1 Timothy 4

Timoti Koontoꞌ Minkunaꞌkoong Tautau

Enang tee Tanuaang Meekunge eeꞌ koontoꞌ naumurimaung: Asiꞌnaꞌmung dueꞌuko niiꞌning tee bereꞌariaing akovetei teieta kara masikung siompampimaung-eta teing maꞌnari tositosinanka taaravaari-kotaaꞌ, eeꞌnoko teing minkunaa Sietaniꞌ bakaning-koo biꞌarikotaaꞌ. Aing minkunaananka tositosinanka nantoong-eta ampirinung-nupoong-eta tavoꞌaravaining. Teing nantoong tositosi-koo datavoroi biikaang domang-koo kuunga biikaang daang minku tasiꞌpariarupeuꞌ. Aaꞌparipeuꞌnaꞌ: “Nanteeriaukaꞌ eeꞌnoko taamang keremperiai tanuaang kuꞌmiꞌantarariꞌneeng.” Nka teeꞌpaama daang minkuaamaung, aiꞌ Kumponinge tee taamang tampaꞌ nkomemuruꞌ eeꞌnara tampara minkuampima nkavampiiꞌnaang niiꞌke, tee kara masikung noruꞌampiri otoininge, eeꞌnoko masikaꞌantavampimainge. Ookara kapooꞌ Kumponinge nkovuruꞌnung tampara, kapooꞌ otoaꞌ dimpaꞌampiaing Kumponing tampara tampampima nkavampiaing deekoꞌ, aiꞌ temuriiꞌ taamang Kumponinge makosi-pinaꞌ oovumaung bakaang kara eeꞌnoko niikaang kunsi siompui.

Dake aing nko-nkonaꞌ nau-antananka naueriaing-koo niiꞌmaikororiꞌ daꞌ tee tampara pakupakunung Jiisuuꞌ Karistooꞌ bakaang deentaravaing maantoꞌantararara teinge karakarananka masikeng siompampimainge eeꞌnoko tampara minkunaa tee eeꞌnara dake siompemaung. Dontaꞌdari otoai teing-eta kumponaang daang-koonanka Kumponing-etaning deeaing-eta. Nka daka tampaꞌ bareraravai Kumponing bakaang naning makosinaꞌpinaꞌ nkoraravainaꞌ. Aiꞌ amuriiꞌ mirumiruꞌ minkuaamaung masikung: “Mono bare-anta-koo tampaꞌke, nka tanuaang bare-anta-koo baruꞌ tampaꞌ masikaꞌ, enanung eeꞌnoko damaꞌnung otootoꞌkoo paku-antanaꞌkoo.” Teeꞌ masikaꞌanta-koo makosi. 10 Teeꞌkoo bakei poreꞌmorimaung, iriꞌ oꞌmarikooꞌ, niikaang noruꞌ Kumponing domantooꞌkoo sipampiri otomaung-koo, eeꞌnara ookara-koo Domang-anta masikaꞌantavaamaing-koo.

11 Aing kapooꞌnanka aaꞌnaꞌ tuutuuꞌantaveri nau-antaveriai, eeꞌnoko botoveriaing siompaavainaꞌ. 12 Tauraꞌdaravaukaꞌ naninge daꞌ okiꞌnaa-anta-koo daꞌ pankara deeaung deentarako, teka Kumponing baito-nupoonge ooraara dakaang kara-koo biꞌantavariaing deentari otoai, eeꞌnoko nko-nko-koo, piaa-koo, baito-koo eeꞌnoko kiiroraaꞌ aarumo-koo. 13 Moainooꞌke basi mataaꞌirari deeruevuriai tee Kumponing bakaang dariraari, daankierima eeꞌnoko kara nau-antaverima. 14 Dakaang avuavuꞌ daꞌkoo otoing Tanuaang Meekung-etaing sipeaukaꞌ, eeꞌnara karai tarampee~koonge minkuvuko nkaveuꞌnung tenang teinge dootuuꞌkoo urantanukai bireng panteꞌdaako. 15 Aing kapooꞌ botoransing nkoemaatoai. Avuꞌantararavai teing-koo, daꞌ pankaꞌdaramatomanaꞌ tasiꞌpaavainaꞌ. 16 Tareraravai dakaang nko-nko eeꞌnoko nau-anta, tampaꞌ nariꞌ otoainaꞌ, eeꞌnoko teeꞌ nkovekotaaꞌ ookara taararaamaing ninka nariꞌ domantariaing.

Copyright information for `NAS