2 Corinthians 11

Paulaꞌke Kara Okovuri Nkanuka Daang Tamparikoꞌning Sirakaapuvuruꞌnaꞌ

Ioꞌ tauraꞌmeri otoko okiꞌnanaare nkaang minkunaa-koo minkuampai. Bane biivimaring-pinaꞌ minkumarako teka diiꞌke daangamaring-pinaꞌ taaraverima domang imaꞌdariaukaꞌ. Ninge diiꞌ bakei Kumponing-koo kuunge tokontampimaing diiꞌ orarirariꞌneeng-koo. Aiꞌ ninge tee diiꞌ narung naning-koo konteeriiꞌnaang miruꞌdampiruꞌning tee eeꞌnara Karistooꞌ. Eeꞌnoko tee-anko tavoꞌdampiiꞌnaang diiꞌ manikuma neraiꞌnaꞌ kuukuma~pinaꞌ kiiroraaꞌoi otoko baꞌung-anko nampeesinaꞌmung taavoꞌaamanaꞌ. Teka amoromaang ning teeꞌ Iivi aavavuuꞌnaꞌ teie boruꞌke ampirinunge~ diiꞌ teeꞌ nariꞌ naninge diikaang onou tokoonaꞌ kaakeꞌantaruriꞌneeng Karistooꞌkoo pinkaꞌdariri otorimanooꞌketa. Aiꞌ diiꞌ teing ouꞌouꞌnuka-pinaꞌ oorampimaing. Naninge diiꞌanko pora niiꞌnamuriiꞌ Jiisuuꞌ minkuvuma niiꞌnaꞌ daankivuko teietaꞌ ninge diiꞌankoi daankiantuꞌnung-eta tee tamung danto siomperikooꞌ. Napoꞌ tee onou Tanuaang Meekung-etaing tero nkaveruꞌnung siperima oovunamuriiꞌ onou siomperikooꞌ. Napoꞌ doorenang tampara mareꞌai niiꞌnaꞌ daankiaako tero daankiankoꞌnaꞌketa tee napoꞌ domang imaꞌdariarukooꞌ tee-koo. Ning tee bakei teing-koo boong basi-pinaꞌ noruꞌmaravaꞌ teing-koo diikaning nau-antanuka-koo kara okovuri nkanuka pankeng tamparimaing-koo. Ning tee bane matau-pinaꞌ karompaunge, teka ning noruꞌ oꞌnong. Ninge tee temuꞌketa avuntevunge teeꞌ diiꞌ tasiꞌantarampimaung.

Arekeeꞌkoo pa ning teeꞌ tokomerimaunge? Tero ninge Kumponing bakaang doorenang tampara diiꞌkoo daankiama mooꞌ eentamaravaꞌ. Aiꞌ teeꞌ tompimari pankaing-antarampiko orara aarumo nkoamaung-pinaꞌ oomerimaunge? Ninge tee mooniꞌ niiꞌning dootuuꞌnupoong-eta nkavantuꞌnung tee diiꞌ paku-antarampiiꞌnaang. Tenang ning diiꞌ ninka oꞌnoritaaꞌnange kapooꞌ piamoma niiꞌnung naning mankiꞌantavampaꞌ, teka teinge niiꞌmaikororiꞌke Masedoniaꞌketa porora pakumauꞌ piamokoꞌning-koo. Ninge diiꞌ ookara taung-koo mankiꞌanta avuꞌkoo paraꞌmaramaung, eeꞌnoko teeꞌ nariꞌ nkomaramatoaing. 10 Jiisuuꞌ bakaang kara masikung ning-koo otoinaꞌ masikaꞌ minkuamaang, naninge diiꞌ Akaiaꞌnameensiꞌnupoong-koonge napuꞌmuaukaꞌnung teeꞌ daangamaramaung-koo. 11 Aming-koo, aiꞌ diiꞌ piaarampiaꞌ ee? A, tee aaꞌ Kumponinge noruꞌui otong aaꞌnaꞌ piaarampimanaꞌ. 12 Eeꞌnoko tee siꞌmaravaukaꞌnung teeꞌ nariꞌ nkoamanaꞌ nko-nko nko-koo. Teing nantoong ning-pinaꞌ basinuka tamparima mooꞌ piavoroma biiꞌka daangamparimaing eꞌmantoma otoꞌantavevorompaukaꞌnung.

13 Teing aing nantoong teing daang kara okovuri nkanuka tamparima, oovunung kara nau-anta-koo mintoomparikooꞌ, daang tosie Karistooꞌ bakaning-pinaꞌ oroꞌantavarima. 14 Aiꞌ Sietaniꞌ teeꞌke, baka nantoong tosivurima daang avitoitoi bereꞌaramaung maroita nantoonge koosinung~ araka-koong Kumponing-etaing-pinaꞌ noruꞌaara siompaavaꞌnaang. 15 Teeꞌkoo kapooꞌ taꞌnimpaariiꞌ deeaꞌ tenang bakaning botovotonaaꞌnukai tee bakaang aarumo siompai nantoong tosiaariko, teeꞌ Kumponing bakaning-pinaꞌ oroꞌantavarima kara nau-antaraariko. Aing nantoong teeꞌ orakaꞌ nariꞌ nkoarima botu basiariainooꞌke mooꞌ makosinaꞌ kompaavaing.

Paulaꞌke Mankiꞌnanka Bakei Mmauꞌ Kuneꞌuuꞌnaꞌ Kara Okovui Nkavuma

16 Napoꞌ unampama aaꞌpamaang, naninge ning baruꞌ biivimaramaung-pinaꞌ noruꞌmeaukaꞌ, teka tokomerira deekoꞌ tang tauraꞌmeriaing niiꞌning tauraꞌperererimanaꞌ, eeꞌnoko okiꞌnooꞌ dooremaravaing diiꞌkoo. 17 Aung eeꞌ oroꞌ aarumo ninka biivimaramanaꞌ tee Ovoringe baka nko-antavuaung eeꞌnoko teeꞌkoo teeꞌ amako-pinaꞌ nkomaramang. 18 Teka tee aing nantoong daangamparimaung deekoꞌ teeꞌ kansiꞌnupoong daangamparimanaꞌ ning teie teeꞌ daangamaravaing. 19 Makosi apeꞌ aing? Amakonuka doturariri tauraꞌperererimaung avutevuꞌdaarimaatooꞌnaang diiꞌ norukasiꞌnuka deentarima. 20 Napoꞌ tang ooveri otoriko aaꞌnaꞌ deto biaꞌoroi biikaning botovotonaaꞌnuka deeng-antaraarikooꞌ, eeꞌnoko opantaarimaatooꞌnaang. Dauaꞌdaarima miitaꞌdaariiꞌnaang, napoꞌ maavaiꞌarima botoraarikooꞌ. Eeꞌnoko oing-koo tankoꞌdaarimaatooꞌnaang. 21 Aming-koo teeꞌ tauraꞌdaririoꞌ orakaꞌ nkoraarimaunge? Aiꞌ teeꞌ tampaꞌpinaꞌ noruꞌerimaunge? Eeꞌnoko teeꞌ teinge tauraꞌdaririoꞌ nkoraarimanaꞌ ninge nkorampiri dei ee doturaripeuꞌ? Teeꞌ ee maimaiaꞌnaꞌ tamperiarupeuꞌ?

Teka teing aing biiꞌka biivimparimanaꞌkoo deekoꞌ ning teeꞌke, ninka biivimarapeuꞌ, teka teeꞌ minkumarama ning makotuaꞌnaꞌpinaꞌ karomang.
22 Teing Iiburu-nupoong deekoꞌ ning teeꞌke teing ninka nariꞌ Iiburu-koonge. Teing Isireeli-nupoong deekoꞌ ning teeꞌke Isireeli-nunge. Teing Eebaraamiꞌ bakanaving-koo-nupoong deekoꞌ, ning teeꞌke, Eebaraamiꞌ bakanaving-koonge. 23 Teing Karistooꞌ bakaning botovotonaaꞌnuka deekoꞌ ninge noruꞌdopa-pinaꞌ karoma aaꞌdampiiꞌnaang: Ning tee teing-koo dau basinooꞌ puruꞌaransitaaꞌ aaꞌnaꞌ mintoomaramaung. Teeꞌkoo kiimatanava-koo mmauꞌnamuꞌpie beꞌantamaakooꞌ; muraꞌmaariko ninge aaꞌnaꞌ dau basinooꞌ sisikeera toraꞌpankooꞌ; dapiꞌ moonkooꞌ amutemuꞌke. 24 Niiꞌnang paꞌnokoꞌnamuꞌpie Juꞌnupoonge aaꞌnaꞌ orakaꞌ toraꞌantamauꞌ, deerunooꞌkoo asiꞌnamuꞌ otoaꞌ teing muraꞌmauꞌning karenaumo kivora deemparaaꞌnaang (39) teꞌ tauraꞌniiꞌnooꞌ nantoong muraꞌkoo. 25 Beemuꞌpie teinge Juꞌdeeainge banaꞌke muraꞌmauꞌ. Napoꞌ niiꞌnaꞌmung Juꞌnupoonge kapange dupisiꞌmaavaꞌnaang tooꞌmaakoꞌ. Beemuꞌpie aarerie~ nananko aareri nakaꞌaruꞌ. Teing-koo niiꞌnaꞌmung aaꞌnouꞌ muung naꞌmung eeꞌnoko doong naꞌmung maiaraꞌkoo tamung koiꞌkoo komari naampemarama oꞌnouꞌ. 26 Ookara batei-koo tee diiriꞌmari oꞌnomaung. Teeꞌ nanama aing aaꞌning-koo koraposimarakooꞌ: doua dovang-koo minki-koo, bakisipunankai tavuꞌkoo, nkaning nantoonge eeꞌnoko Juꞌdeeainge dapiꞌ tamaakooꞌ, osi pankeng-koo eeꞌnoko poraꞌka dapiꞌ tamaakooꞌ. Pirung-koo dapiꞌ minkimarakooꞌ, eeꞌnoko daang mmaikoriꞌ tamparimainge dapiꞌ orari-antamaakooꞌ. 27 Aaꞌnaꞌ poreꞌmoi mintoomaramaung. Niiꞌnang baruꞌ aatumparukooꞌ. Peeramoma ntong-koo nukaaꞌmokooꞌ. Niiꞌnang taamang-koo ataꞌankooꞌ. Kamaarie dupisiꞌmukooꞌ baarong nopaꞌmaravaing otoꞌmemuaruko. 28 Napoꞌ aing baikenanka-koo daua ookara dootuuꞌnupoong osi kante-koo mankiꞌmoi aaꞌnaꞌ noruꞌarankooꞌ. 29 Tenang niiꞌning amutemuriiꞌ parapaaranankai aruaruꞌoroko ning teeꞌ aruaruꞌ mantomarakooꞌ. Eeꞌnoko niiꞌninge orara aarumo-koo duaꞌantavaariko ning tee napoꞌ iirang-antamaramaung.

30 Ning biiving-koo etumerimatomanooꞌkoo makosi biivimaravaing teing-koo nkaning aruaruꞌnairu siraꞌpumaing-koo Ovoring bakaang puring ning-koo oroꞌparaaꞌnaang. 31 Teie Kumponinge tee niikaang Ovoring Jiisuuꞌ Karistooꞌ Baumai ookara batei-koo biraankeampimaatoainge noruꞌmui otong ning tosimaravaꞌ. 32 Tenang ning teke Damaskasie oꞌnoko teie ovoꞌmaꞌke, tee daurarong~ Aretasi bakaange piatooronuka~ botovuruꞌ ning osi-koo parang-koo karanaanga tenkenanko nemaara daiꞌmaavaꞌnaang. 33 Bera kooꞌmarapeuꞌnaꞌ papaaravanko mmaikoriꞌke ning mmariꞌantamaama burunge doonko osi-koong parang-koo damaꞌdue sing-antamauꞌ kaꞌbaraaꞌkoo oꞌnoko. Eeꞌnoko teeꞌ kooꞌmaruꞌ tee ovoꞌmaꞌ bakaang bireng-eta.

Copyright information for `NAS