2 Corinthians 13

Koorin-nupoong Biikaang Masikaꞌanta-koo Tareariaing Nauvuruꞌnaꞌ Paulaꞌke

Enang tee ning maamumaramaang diiꞌ beemuꞌpinaꞌ beeroꞌdampiiꞌnaang. Ookara kapooꞌ simpeꞌkooning tavoꞌeriiꞌnaang nerirarira masikee-anta-nupoonge beenaumoi niiꞌnooꞌ kenaankarai tavoꞌkoo makosi. Tenang ning diiꞌ ninka nariꞌ kemuꞌkanaꞌ oꞌnoruꞌnang tero koono-antarampiri tautaurampiruꞌ. Enang taapoꞌ oꞌnoi napoꞌ unampama naurampima aaꞌpamaang: Ninge tee teing temuꞌketa orakaꞌ nkoarimaing eeꞌnoko napoꞌ niiꞌning nariꞌ nkoariaining mora ookara naroꞌka turamparampaing. Diiꞌke taaꞌniꞌanta ning-koo oo-koo piarori otong tee Karistooꞌ ning-koo kuunge karomaung-koong. Bakei ooveriiꞌnaang tenang turamparampainang, aiꞌ tee Karistooꞌ tee aruaruꞌoaꞌ diiꞌ koong-antarurima, teka tee tee iriꞌoi otong diiꞌkoo meuꞌke. Niiꞌke tasiꞌkoo eeꞌ ooampiaing, bane teie aruaruꞌoioꞌ aaꞌbarataꞌkoo biꞌaara dupisiꞌauꞌnunge, teka tee tee domampari otong Kumponing bakaang iriꞌke. Ning teie tee-pinaꞌ nariꞌ aruaruꞌke tee aruaruꞌoi otokoꞌnaꞌ, teka tee Kumponing bakaang iriꞌke ning tee tee ninka nariꞌ oꞌnoremaatoaing diiꞌ koong-anta-koo.

Diiꞌ diiꞌka paararariai diikaang domang-eta baito-koo otorimanaꞌ masikaꞌ oo-koo diiꞌka Karistooꞌ bakaning masikaꞌantarariainaꞌ. Diiꞌke ee tasiꞌperiaꞌ tee Pakoꞌpariꞌniiꞌ Jiisuuꞌ diiꞌkoo otoing? Teka aꞌnooꞌ parapaara-koo duaꞌdarimaung deekoꞌ diiꞌkoo otoaꞌ tee. Ee aing, ninge tampaꞌ tasiꞌmeripeuꞌnaꞌ noruꞌamaung, aiꞌ ning tee parapaara-koo duaꞌmaravaung. Teka enang tee ning kunsimaramaang Kumponing-koo diiꞌke kapooꞌ orara nkoveriarooꞌnaang, nantoonge ning kara-okomui-nka-koo makosi-pinaꞌ oomaavaꞌnaang deeaꞌ, teeo diiꞌke tampara aarumo siomperiiꞌnaang piamoi. Eeꞌnoko bane turantampiaruma aruaruꞌpinaꞌ oroꞌmarako ning makosi deeaung-pinaꞌ oomaapeuꞌ, teka dotumarapeuꞌ diiꞌ tampaꞌ otoriko oorampira. Aiꞌ ninge tampara aarumo-koo nantoong turamparamparupeuꞌ, teka deto puring-antavarampeuꞌ kara masikung siong-koo. Ning dotumaramaung tenang ning aruaruꞌpinaꞌ oroꞌmaramanang diiꞌ purintariri otoriko diikaang masikaꞌanta-koo, eeꞌnoko nkaang kunsi tee diiꞌ paku-koo nkoamaung diiꞌ petaaꞌdori otoriiꞌnaang. 10 Teeꞌkoo enang ning taapoꞌ oꞌnoi aneꞌ daarirerompimang tenang ning diiꞌanko mera iiramoarooꞌnaang tee ninka iriꞌ Ovoringe amuuꞌnung ninka. Aiꞌ teie iriꞌ ning amuuꞌnung tee diiꞌ deto duꞌanta-koong, diiꞌ kepuꞌkoong deeaꞌ.

Kara-koo Asiꞌnaare

11 Asiꞌnamooraꞌkoo aaꞌdampimang ee mmaikoriꞌ: Tampara, otoriko! Petaaꞌdoriai. Tautau taaraveri domang kuaaꞌdoriai, eeꞌnoko napoꞌ narung noruꞌ ninka mooa-koo otoriai. Bera tee Kumponing piaa bauko mooa-poꞌnung diiꞌ ninka nariꞌ otoaing. 12 Eeꞌnoko tampaꞌ nariꞌ onkeonkeꞌdeeriaing Kumponing-koo meekupoong-pinaꞌ otori. 13 Ookarai Kumponing bakaning meekupoonge anke otoromainge biikaang doturotukoong tampaꞌ tang botoaamang diiꞌanko.

14 Tee biraanke Ovoring Jiisuuꞌ Karistooꞌ bakaang eeꞌnoko napoꞌ tee piaa Kumponing bakaang eeꞌnoko tee navunavu Tanuaang Meekung bakaang diiꞌ ninka nariꞌ otomatoaing. Eeꞌ, masikung.

Copyright information for `NAS