2 Corinthians 4

Kara Okovuri Nkanuka Teing Tamung Kansiꞌkoong Utaunanka Makosinuka

Teeꞌkoo Kumponinge piaamurira tee araka oko-antamuri bereng-anta-koo botomurioꞌ tee niiꞌ iriꞌ oꞌmariaꞌ siraꞌpampimaung. Niiꞌke nantoong dauaꞌarampiaunge niikaang minkunaa masikaꞌanta-koo. Naning tosi-koo piamoriaunge. Kara Kumponing bakaang mareꞌampiaunge. Teing maimaiaꞌnaꞌ oroꞌnanka tee damaꞌduampiruꞌning. Kumponing narung-koo uroꞌkanooꞌke donkonampiri kara masikung narung sirakaꞌantavampiri nantoong nauarampimaung teinge tampaꞌ tasiꞌmaarira domang-eta arooꞌaavaꞌnaang.

Eeꞌnoko tee doorenang tampara daankiampimaung aaꞌnaꞌ sirakaꞌpari otong, teka teing-koo booꞌaape nameng-koo otoroining-koo deekoꞌ tasiꞌparavaꞌ. Teing eeꞌning masikaꞌanta otoꞌevoroaing teie daang-koong kumponinge kansiꞌkoonge siompaamaunge noruꞌ kaputuꞌantavuruꞌning. Teeꞌkoo tee Karistooꞌ tee Kumponing siuraampi~ meenasi-poꞌnung bakaang doorenang tampara arakavarako ooaavarukooꞌ. Aiꞌ niiꞌ niiꞌka minkumarima daankimariaꞌ, teka Jiisuuꞌ Karistooꞌ Ovoring deempari otoing siraꞌpampimaung, eeꞌnoko niiꞌ teing diiꞌ diikaning botovotonaaꞌnuka Jiisuuꞌ Karistooꞌkoo. Aiꞌ teie Kumponinge kansiꞌ pupuꞌuma aaꞌpuuꞌnunge, “Araka, arakararavai mutaanang-koo meuꞌke,” tee bakaang arakai niikaang domang siisi-antavuuꞌnung nau-antamurima tee meenasi Kumponing bakaang, Karistooꞌ bakaang oing-koo oroꞌparako tasiꞌpampira aaꞌpampiiꞌnaang tee tee Ovoring, Kumponinge tero Pakoꞌpariꞌniiꞌ niiꞌ domamuri taremuriainooꞌkoo.

Nka bane tampeng meenasi niiꞌkoo kuung otoko, niiꞌ teing utau aavetaꞌnanka kansiꞌkoo nkoniiꞌpinaꞌ oroꞌnuka. Kumponinge teeꞌ miruꞌmuruꞌnung iriꞌ dau basie puring-antamuriko nantoonge tee bakaang iriꞌ tasiꞌpaavaꞌnaang, niikaang deeaꞌ. Ookamenta-ita tee aaꞌnaꞌ iinkunumaarimaung, teka nakaꞌmariaung. Bane papaaramariko, nka oraruꞌkampiaung. Turamaarimaunge, teka Kumponinge siꞌmuriaung. Naꞌnamaarima orari-antamaariarukooꞌ. 10 Niikaang moniꞌke doong kante booꞌ kuneꞌumaung teeꞌ Jiisuuꞌkoo nkoaruꞌnaꞌ nariꞌ Jiisuuꞌ bakaang iriꞌ tampaꞌ oroꞌparaaꞌnaang niikaang mono-koo. 11 Eeꞌ, niiꞌ domamariri oꞌnoriko teie Kumponinge tauraꞌmurimaung booꞌ kuneꞌkoo Jiisuuꞌkoo, Jiisuuꞌ bakaang iriꞌ taaꞌniꞌpoi oroꞌparaaꞌnaang niikaang mono booꞌdumpaaꞌ deemparako. 12 Enang tee niiꞌke Karistooꞌ daankiampima booꞌ kuneꞌampiko diiꞌke unaa-anta mantomperikooꞌ.

13 Teeꞌ Daari Meekung-koo narunge aaꞌpuuꞌnaꞌ, “Ninge masikaꞌantavamira karontuꞌnung,” teie narunge Tanuaange masikaꞌanta-koonge daaꞌmuriko masikaꞌantavampima karompimaung. 14 Aming-koo, nnaꞌ eeꞌ masikaꞌ noruꞌampiri oꞌnoring, teie narunge Ovoring Jiisuuꞌ booꞌparuꞌnooꞌketa domampuuꞌnunge domamuriaing tee ninka, eeꞌnoko diiꞌ ninka nariꞌ tavoꞌantamuriaing Kumponing-anko. 15 Kumponinge aing ookara kapooꞌ nkoarampimaing tee diiꞌ paku-anta-koo miruꞌuuꞌning eeꞌ noruꞌuitaaꞌ: mmauꞌ nantoonge tee biraanke nkavaama tee napoꞌ teinge Kumponing daangampaavai, eeꞌnoko Kumponinge meenasi nkavuai tee-koo.

Kara Okovuri Nkanuka Aaꞌnaꞌ Masikaꞌantavai Purimparimanaꞌ

16 Teeꞌkoo taruaꞌmoriaung. Bane damaꞌdu insimarima, nka niiꞌkoo kuunooꞌ tee doong kante nerakaꞌmariri oꞌnorimaung. 17 Aing niikaning arikananka teing aꞌnooꞌ kuaaꞌning, pankaroong otoꞌnumpoꞌning deeaꞌ, teka teinge nerimemurimaung tee mooꞌ aaꞌnaꞌ mankiꞌ tee meenasi otoi otoꞌ. 18 Teeꞌkoo niiꞌ teing-koo kapooꞌnanka-koo eꞌmung oroꞌpariri otoroining-koo ookampiri oꞌnoriaꞌ, teka teing-koo oroꞌpariaing-koo arooꞌmariri oꞌnoring. Teing kapooꞌ oroꞌpari otoining otoꞌnumpoꞌning deeaꞌ, teka teing oroꞌpariaing teing otoi otoaining.

Copyright information for `NAS