2 Corinthians 5

Enang tee niiꞌke noruꞌampiri oꞌnoring tee niikaang mono anke kansiꞌkoo oꞌnoring bare-pinaꞌ pesiꞌarako niiꞌ teing tee pava Kumponing-etaing otoꞌmemuring teing paning-koo otoi otoꞌ aaꞌning naninge birenge kanivuaꞌ. Enang nempampiri niiꞌ teing baimarima oꞌnoring tee mono Kumponing-etaing amuriiꞌnaang piamorima, tee mono nkomemuruꞌnunge duaanamuriko simpenoiꞌnuka deemariarooꞌnaang. Eeꞌ, enang mono kansiꞌ bakaang-koo oꞌnori mankiꞌmorima baimarimaung. Mono tamung siꞌkoo piamoriaꞌ, teka niikaang mono booꞌkoong namuꞌke mono booꞌpaaꞌke dakaꞌpui paari-antamuriiꞌnaang piamorimaung. Niiꞌ niiꞌka teeꞌ nko-koo noruꞌmariaꞌ, teka Kumponinge niiꞌ pia-antamuruꞌ mono booꞌpaaꞌ nka-koo, eeꞌnoko bakaang Tanuaang amuruꞌ taaꞌniꞌantamuri, tasiꞌanta-koo tee maraka-antamuruꞌnung tavoꞌkuaing-koo.

Teeꞌkoo eeꞌ noruꞌampiri ookara batei-koo arooꞌmariri oꞌnorimaung: Enang tee aung kansiꞌ bakaang mono ninka oꞌnori Ovoring-eta taapoꞌ oꞌnoring. Oꞌnoritaaꞌ baitoi masikaꞌanta ninka oꞌnori teeꞌ noruꞌampimaung, kapooꞌ dutai oo-koong deeaꞌ. Aaꞌpamaang, aaꞌnaꞌ purimariri oꞌnoring, teka aaꞌnaꞌ deepoꞌ aung mono sipampira Ovoring-anko oꞌnoriiꞌnaang piamori otong. Ookara-koo dau basinooꞌka tee dotu-antavampiiꞌnaang piamori oꞌnoring, anke mono ninka oꞌnori, niiꞌnooꞌ aung mono sipampira deekoꞌ. 10 Aiꞌ niiꞌ teing ookara Karistooꞌkoo dutakanooꞌka teie simpeꞌmuriaining, narunaꞌ narunaꞌ mooꞌ kante nkavampiaing tenang mono-koo oꞌnori nkoampiruꞌnaꞌ siomparioꞌ, tampaꞌ deekoꞌ aiꞌ orakaꞌ nkoampiruꞌnung deekoꞌ.

Tee Nko-nko Nantoong Kare-nupoong Kumponing Ninka Nariꞌ Navu-anta-koong

11 Teeꞌkoo niiꞌke Kumponing-koo amorompiri nantoong pia-antavarampimaung tee-koo arooꞌariiꞌnaang. Niiꞌ kuung oꞌnorimanaꞌ Kumponinge koontoꞌ noruꞌui otong, eeꞌnoko bakei tampaꞌ diiꞌke teeꞌ nariꞌ tasiꞌmereripeuꞌ diikaang domang pankaruntoonge. 12 Diiꞌke baruꞌ biivimerereriiꞌnaang etumariaꞌ, teka diiꞌke niiꞌ tasiꞌmereriainaꞌkoo pakurarampimaang, eeꞌnoko tenang teinge diiꞌ barantaarimainge biiꞌka tampeng tamparima nka biikaang domang tasiꞌpariaꞌ kararaariko, tampaꞌ kakeꞌii-eta makuꞌereriai. 13 Niiꞌ niiꞌning-koo kanuꞌnuka-pinaꞌ auromarimaung deekoꞌ tee tee kapooꞌ Kumponing bakaang, teka niiꞌ tampaꞌ taaramerererimaung deekoꞌ makosi, diiꞌ paku-koo teeꞌ auromarimaung. 14 Aiꞌ niiꞌ tee Karistooꞌ bakaang piaae aaꞌnaꞌ siong-antamuri oꞌnoring tasiꞌantamuri tee narung niiꞌkoo booꞌparuꞌnung ookara-koo, eeꞌnoko teeꞌkoo ookara tee moompiruꞌning-pinaꞌ oꞌnoring. 15 Eeꞌnoko tee tee ookara-koo booꞌparuꞌnung teing tee-koo napoꞌ domampariaining biiꞌka dotu-anta-koo deeaꞌ, teka Karistooꞌ narung dotu-anta-koo, tee teing-koo booꞌparara napoꞌ domamparuꞌnung. 16 Teeꞌ tasiꞌpampiruꞌnooꞌketa niiꞌke naning bakaang ooꞌoo-koo noruꞌampiaung, kansiꞌ bakaang noruꞌpinaꞌ. Karistooꞌ teeꞌ noruꞌampikoꞌnung deekoꞌ enang teeꞌ noruꞌampiaꞌ. 17 Teeꞌkoo tee naning Karistooꞌkoo otoing tee nerakaꞌpuing. Urikung onou otoaꞌ, teka ookutunung nerakaꞌpuing. 18 Aing teing ookara Kumponing-etaning tee eeꞌnara niiꞌ baka-koo napoꞌ navu-antamuruꞌnung Karistooꞌkoo, eeꞌnoko navu-antamurira tee nko-nko nantoong napoꞌ navu-anta-koong amuruꞌ niiꞌke nkoampiiꞌnaang. 19 Teeꞌ aaꞌnaꞌ Kumponinge ookara kansiꞌnupoong napoꞌ navu-antavuruꞌ baka-koo Karistooꞌkoo kuunge biikaang orakaꞌ nkonanka deeruevurima tuumpivuriaꞌ. Eeꞌnoko teie baremuruꞌ niiꞌke tee minkunaa daankiampiiꞌnaang napoꞌ Kumponing ninka navuariainaꞌ. 20 Eeꞌnoko niiꞌ teing enang Karistooꞌ bakaning kara okomuri nkanuka Kumponing niiꞌkoo kuunge karoko nantoong bokuarampimaing, eeꞌnoko niiꞌke ookara Karistooꞌkoo aaꞌnaꞌ keviꞌarampiri bokuarampimaang aaꞌpampima: Aarumo orara siperira Kumponing ninka navurariai. 21 Kumponinge tee Jiisuuꞌ orakaꞌnko noruꞌuaung orakaꞌ nkonanka-poꞌnung deeng-antavuuꞌ niiꞌ pariꞌanta-koo, tee-koo kuunge niiꞌ Kumponing bakaang aarumo koontoꞌpoꞌnupoong deemariiꞌnaang.

Copyright information for `NAS