2 Peter 2

Tositosinuka Nakaro-nupoong~ Keraꞌpariainaꞌ

(Jud 1:4-13)

Teka niiꞌning nakaro-nupoong daang Kumponing-etaining tamparima daaꞌarikoꞌ Juꞌnupoong-koo meuꞌke, eeꞌnoko napoꞌ teeꞌ nariꞌ daang-koonanka nau-antanuka daaꞌariainge diiꞌkoo meuꞌke. Teeꞌ nkoarima nantoong makenge orari-antavaariaing biikaning noruꞌketa daang nau-antavaarima, biikaang Ovoring teing mooꞌuruꞌnung sipai. Teeꞌkoo biiꞌka namuꞌke orari-anta kuneꞌaavaing. Aꞌnooꞌ tee mmauꞌke siompaariaing biikaang aarumo amutemuriiꞌ maimaiaꞌnanka-poꞌnung. Teketaꞌ teing teeꞌ nkoariko tevung Karistooꞌnung kara masikung sionavung niiꞌninge orakaꞌ minkuaavaing. Eeꞌnoko teeꞌ nkoarima mooniꞌ barang-koo okovuriai kara menaankavarima. Nka tee teie Simpeꞌnkoi~ tuutunang~ miruꞌevuruꞌnung nempari otong. Teing orari-antavuriainge keeroorovuri otong.

Niiꞌke noruꞌampiri otong teeꞌ nkoaravainooꞌ aaꞌnung-koo: Niiꞌning koosinunanka orakaꞌ nkoariko tamung oovuriaruuꞌ, teka kansiꞌkoo tumang duaꞌuruꞌ isipoꞌ masipoꞌ mutaananooꞌ doonko teke daiꞌariri otorooꞌnaang bera simpeꞌuriainaꞌmung-koo basi. Napoꞌ urikavarang orara aarumo ninka nariꞌ kansiꞌ maantoꞌaakoꞌning tamung oovuriaruuꞌ, teka doua-koo minki-antavurira opuruꞌ, Nooaꞌ narung deekoꞌ aarumo koontoꞌ daankivukoꞌnung domampuuꞌ, niiꞌning nantoong ~kenaanka-taa ninka nariꞌ. Napoꞌ osi pankeng kevuntuꞌka Sodom eeꞌnoko Komoraꞌ sipung deeng-antavuretuꞌ otorearooꞌnaang tampureta damaꞌnavarange Kumponing siompaavaukaꞌninge nkovuriainaꞌ ooaavaꞌnaang. Eeꞌnoko teka napoꞌ naning koontoꞌ, Looteꞌ, domang-antavuuꞌ, tee eeꞌnara orakaꞌ deeꞌokoꞌnung teing oreng Sodom-nupoong maimaiaꞌnaꞌ nkoariko. Tee eeꞌnara naning koontoꞌ deempari domang mankiꞌokoꞌnung teing tee ninka otorokoꞌning boto-koo kuung otoroaꞌpinaꞌ noruꞌai nkoarikoꞌning ninka doong kante oovurima eeꞌnoko teing-koo taaravuma. Teeꞌ nkovuruꞌnaꞌkoo tee siraꞌpari otong tee Ovoring noruꞌkui otong nantoong tee siompaamaing parapaara arikung-eta domang-antanaꞌkoo eeꞌnoko napoꞌ teing siompaavaukaꞌning kiimatavuriiꞌnaang pinkaꞌuri otoꞌnaꞌkoo bera teꞌmung simpeꞌuriainaꞌmung-koo basi. 10 Deepoꞌ masipoꞌ bakei kiimatavuriaing teing nau-antanuka daang Kumponing-etaining tamparimaing. Mono bakaang pia orara deraꞌ siompaamaing Ovoring tompimpai.

11 Aing amuriiꞌ nantoong derareranuka, boreꞌ kapanuka, anutua avoreaavaꞌ avutevuꞌari dauraronanka orakaꞌ minkuaarimaing, teka teing ookara noruꞌpoꞌnupoong, bane koosinunanka deekoꞌ, teeꞌ nkoariaung. Bane teing koosinunanka nantoong-koo dau basinaꞌ iriꞌ eeꞌnoko iirakutapoꞌnupoonge orakaꞌ minkuaarima tuumpiaariaung biikaning kare-nupoong Ovoring-koo uroꞌkanooꞌke. 12 Teka aing tosi nkonuka kauꞌ karenaumonanka-pinaꞌ oroꞌnuka, noruꞌ papaaravari otoꞌnuka, matauropanuka, tamung doonko tavuꞌkoo makosinanka-pinaꞌ oroꞌnuka. Noruꞌaavaꞌ pooreꞌ nkoaamaing. Biikaang deraꞌke booꞌantavuriko keraꞌpariaining. 13 Tee tee eeꞌnara biikaang mooꞌ orara orakaꞌ nkoarikoꞌnung-koo, aaꞌnoma: doong ookutunaꞌmung maiaꞌoroaꞌ tamung sirakuraꞌ mono bakaang pia orara siong-koo keiꞌorokooꞌ. Teing teing diiꞌ ninka nariꞌ otori diikaang miring orari-antaraarimaung eeꞌnoko diikaang navunavu daang deeng-antavaakooꞌ. Diiꞌ ninka nariꞌ Ovoring bakaang taamang naierima aavaraarikooꞌ moru-pinaꞌ noruꞌai. 14 Biikaang duta tee karakaraaꞌke maantoꞌnuka manikuꞌkoo, orara aarumo besiꞌui otoꞌnuka, aruaruꞌnuka daꞌdeng duaꞌantavaarimaing, eeꞌnoko biikaang domang aarumo okoꞌoko-koo bareari otoꞌnukai. Kumponinge barakosiꞌniiꞌnuka teing. 15 Koontoꞌnavung sipaara pooariruꞌning. Tee nakaronara Baalamu, Beeoo bauring, bakanavung siompaamaing, mooniꞌ nka-koo piavora orakaꞌ nkoaruꞌnung. 16 Teka tee bakaang doonkiiꞌke amakoi naning-pinaꞌ karoma orokovuuꞌnung danto nariꞌ orakaꞌ nkoaraꞌneeng-koo, tee nakaronara bakaang aarumo kanukanuꞌ potevui.

17 Teing daang-koong nau-antanuka tee tee-pinaꞌ ntong dakau-pinaꞌ oroꞌnuka, eeꞌnoko napoꞌ tee kamoꞌ dovinge avitoitoi nkavui nanumaung-pinaꞌ oroꞌnukai, Kumponinge mutaananooꞌ tumang masipoꞌ miruꞌevuruꞌning teke otoꞌkoo. 18 Aiꞌ teing daang pankaing-antavarima buiaꞌarimaing maimaiaꞌnaꞌ nkoarima, eeꞌnoko baankaꞌ nempaama mono bakaang piai beana-antavaakooꞌ niiꞌning nantoong teing-eta oraruꞌkiai otoromanavitu-eta kooꞌariko biꞌanta-koo. 19 Opampaarima tuumpi-eta unaavoroi otoroaining tampaarimaung, teka teing biiꞌka deraꞌantanameng-koo daiꞌariri otoroi, aiꞌ aming kapooꞌ tee naning kuung deempui otoing-koo, tee tee, tee-koo eeꞌnung-koo daiꞌari otong. 20 Eeꞌnoko enang teing aaꞌnaꞌ daiꞌariri otorong, ioꞌ teieta kansiꞌ bakaang aarumo orara-ita mmariaara, tee niikaang Ovoring eeꞌnoko Domang-anta Jiisuuꞌ Karistooꞌ siompaakotaaꞌ, teketa napoꞌ enang kuung duaꞌarira daiꞌaririnamuꞌ oramuꞌ. Tutunaꞌnamuꞌ divuꞌui otong. 21 Baruꞌ tampaꞌnaꞌ deeaꞌ tee teing koontoꞌnavung-koo noruꞌkaavarupeuꞌnung-koo, eeꞌnoko bakei orakaꞌ tutung noruꞌaara napoꞌ bereꞌariring-koo teieta doorenang aaꞌnaꞌ tampara, Karistooꞌketaing boto meekung tutung taaravauꞌnung-eta. 22 Tee teeꞌ teing-koo nkoaramaung tee niikaang mirumiruꞌ tampui otoinaꞌ, aaꞌpumanaꞌ, “Mosiꞌke tee napoꞌ bakaang kurinaꞌkoo toroarama maaꞌumaung,” niiꞌnaꞌ eeꞌ, “Pooroꞌ duuꞌpaako napoꞌ metoꞌkoo novuuaramaung.”

Copyright information for `NAS