2 Peter 3

Ovoring Poainaꞌmung-koo Keekooꞌdariaukaꞌ

Aung aneꞌ karavoto keneꞌka-naneꞌ diiꞌ mmaikoriꞌ masikupoong daarirerompimang. Eeꞌnoko aing-koo ookaneꞌka-koo ninge diikaang noruꞌ tante-antarampimang nariꞌ piturariaꞌ otoriiꞌnaang. Teeꞌkoo aing kapooꞌ unampansi naurampimang teinge urikupoonge nakaro-nupoonge Kumponing-etaininge miruꞌai minkuauꞌning napoꞌ norunoruꞌeriai eeꞌnoko niikaang Ovoring Domang-anta bakaang boto nariꞌ tero niiꞌke kara okomuri nkanukai naurarampiruꞌnaꞌ. Aming-koo teeꞌ naurampimang? Nnaꞌ doong asiꞌ dueꞌuko teing nantoonge tee bakei benkentaariaining diiꞌ, biikaang mono-koong pia siompai. Aaꞌpaavaing, “Tee napoꞌ toroaravaing tamparuꞌnung arerai? Aiꞌ teing niikakatauro teeꞌ nariꞌ naumaarikoꞌning boorouꞌnooꞌketa ookara kapooꞌ nariꞌ otong kansiꞌ pupuꞌaruꞌnooꞌketa otomanaꞌ.” Teka teeꞌ minkuaama narung kapooꞌ maroita beiꞌbeiꞌaamaung aaꞌnouꞌnung: Kumponinge karoko paning tavoꞌaruꞌ tero, eeꞌnoko kansiꞌ pirung-eta bakoarara taꞌnamparuꞌ. Napoꞌ Kumponing karoko tee kansiꞌ tero otokoꞌnung douai pirung-pinaꞌ dunkumpura orarivuuꞌ Nooaꞌ bakaang batei-koo. Eeꞌnoko tenaarei eeꞌnaarei napoꞌ paning eeꞌnoko kansiꞌ enang otomatomaing ntaꞌke paroꞌkoo miruꞌura sipuuꞌ, eeꞌnoko teka pinkaꞌui otong bera teꞌmung doong nantoong oreng simpeꞌurira keraꞌantavuriainaꞌmung-koo basi.

Teka ee mmaikoriꞌ, beiꞌbeiꞌeriaukaꞌ aung kapooꞌ: Ovoring-koo tee mareꞌ kivora daakuꞌ naꞌmung doong-pinaꞌ otong, eeꞌnoko naꞌmung doong tee mareꞌ kivora daakuꞌpinaꞌ otong. Ovoringe tee bakaang maraka-anta dupe-koo tamung anaꞌaravaung niiꞌninge tampaamanaꞌ. Teka teie piaavuri nempuri otong teing beiꞌbeiꞌarimaing-koo naning narung keraꞌparaꞌneeng-koo, teka ookara bereꞌariiꞌnaang piavorora batei makosinooꞌ avuriiꞌnaang.

Kansiꞌ Eeꞌnoko Paning Paaꞌaravainaꞌ Ovoring Toroarako

10 Aiꞌ teꞌmung Ovoring bakanaꞌmung bateinanaꞌmung teꞌmung bakiaaꞌ nko-pinaꞌ poainaꞌmung, eeꞌnoko tenang paning kurunkurunkaanang paaꞌaravai eeꞌnoko ookara kapooꞌ paning-koonanka ntaꞌke taivurira taꞌdaꞌpurira ntong deeng-antavuriaing, eeꞌnoko kansiꞌ teing ninka bakaning nko-nkonanka naroꞌka parosinampurira opuriaing. 11 Enang tee diiꞌ aing-koo ookara kapooꞌnanka-koo bakei okiꞌnooꞌ biꞌdariaukaꞌ taivurira taraꞌpuriaining noruꞌeritaaꞌ, eeꞌnoko meekaꞌdariri Kumponing-koo arariri otoriai. 12 Teeꞌ nariꞌ nemperi Kumponing poainaꞌmung duerueꞌantaveri otoriai, teꞌmung eeꞌnaꞌmung Kumponinge paning paroꞌuko taraꞌpura tuuvuainaꞌmung, teing ookara kapooꞌnanka teke otoromaing nariꞌ. 13 Teka tee kapooꞌ masikung nempampiri oꞌnorimaung tee paning eeꞌnoko kansiꞌ nerakeng tavoꞌkureaing maraka-antamuruꞌnaꞌ, teꞌ aarumo koontoꞌ narung otoainooꞌ.

Taremariri Ovoring Nempampimaatoaing

14 Teeꞌkoo diiꞌ mmaikoriꞌ masikupoong, teꞌmung nemperimaing deentariko eeꞌ naurampimang, purintariri otoriaing kuꞌmiꞌdopanuka, niiꞌnooꞌ tuumpi otoriaing, Kumponinge tee ninka mooa-koo otoꞌnuka meuꞌduriainaꞌ. 15 Eeꞌnoko noruꞌeriaing aming-koo teeꞌ pankaroong nemurimaunge. Tee aaꞌ batei amurima bakaang doorenang domang-anta-koong noruꞌanta-koo teeꞌ nemurimaung. Teeꞌ eeꞌnaꞌ niiꞌmaikoꞌ piaavampimaunge, Paulaꞌke daarirerurima naururuꞌnaꞌ Kumponinge onou avuioꞌ. 16 Ookara karavoto bakaning-koo teeꞌ nariꞌ daarivukooꞌ. Aꞌnooꞌ tee niiꞌning kapooꞌ teing-koo karavotonanka-koo ivekeng otong noruꞌkoo, eeꞌnoko teinge noruꞌdopanukai teing mareꞌaama biiꞌka orari-antavarimaung teeꞌ napoꞌ niiꞌning Daari Meekung-kooning kara mareꞌaamanaꞌ nariꞌ. 17 Teeꞌkoo diiꞌke mmaikoriꞌ masikupoonge tutung aing eeꞌ oroꞌ kapooꞌnanka tasiꞌperira tarerariri otoriaing boto siompaavaininge taapoꞌke barantaariꞌneenga kara koontoꞌ deeaung nauraarima eꞌmantoma dekopiꞌantaraari. 18 Teka deto duꞌduriaing Karistooꞌ noruꞌkoo, tee niikaang Ovoring Domang-anta, eeꞌnoko bakaang piaa nka-koo. Tee eeꞌnara meenasi ookara okovui otoaing enang-eta deto bera teꞌmung doong oparavaukaꞌnaꞌmung. Eeꞌ, teeꞌ nariꞌ.

Copyright information for `NAS