2 Timothy 2

Arikung Kuneꞌema Naning Piikonung-pinaꞌ Iriꞌ Oꞌdaravaukaꞌ

Aung ee daꞌ nnuring, purintaravaing iriꞌ nkavei, tee iriꞌ Jiisuuꞌ Karistooꞌkoo kuung otoko biraankerui arumaung. Eeꞌnoko tee minkunaa ning-koo taaraveruꞌnung mmauꞌ ninka tee eeꞌnara masikaꞌantaveri pareꞌeriai nantoong-koo kara tare baukonuka-koo botoverima napoꞌ niiꞌning nau-antavaariiꞌnaang. Kuneꞌeaing nariꞌ tee sisikeera ninge kuneꞌamanaꞌ iriꞌ oꞌdaravaꞌ daꞌ naning tampara kare-koo tavuꞌkoo piikonung-pinaꞌ Jiisuuꞌ Karistooꞌnung deentari. Naning piikonung noruꞌ paakavaravaung, teka bakaang ovoring dotu-antavuainaꞌ nariꞌ otomaung. Naning deikooꞌkoo kuaꞌparamaung tee siompumaung tee deikooꞌ bakaang aarumo narung. Siompuarui dei makotuarupeuꞌ mooꞌ nka-koo. Eeꞌnoko napoꞌ tee eeꞌnara naning mintoong bauko tee tutunaꞌning-koo naikumaung poreꞌomaatoma. Norunoruꞌeaing teing kapooꞌ ninge nauransining. Ovoringe tee tasiꞌantaruaing miruꞌnooꞌ teing ookara-koo.

Eeꞌnoko napoꞌ norunoruꞌeaing tee Jiisuuꞌ Karistooꞌ daaꞌaruꞌnung bouꞌnooꞌketa tee eeꞌnara Deevitaꞌ bakanamuiaang-koong pouꞌnung tee-pinaꞌ doorenang ninge siraꞌpamaunge minkuvui otoinaꞌ. Tee eeꞌnara doorenang ninge sisikeera kuneꞌankooꞌ siraꞌpama, kakuuꞌ dovang kaki-antamaakooꞌ bakiaaꞌ nko-pinaꞌ. Nka tee karakara Ovoring bakaang kakuuꞌ kaki-antavaavaung, beremparamaung. 10 Teeꞌkoo amutemuriiꞌ sisikeera toraꞌkoo tauraꞌmarama iriꞌ oꞌmaravaung teinge nantoonge Kumponinge miruꞌniiꞌnankai taaravaavainaꞌ teing napoꞌ Jiisuuꞌ Karistooꞌkoo kuung otoroi domang-anta kompaavaꞌnaang meenasi otoi otoꞌ mantaꞌpai. 11 Aung kara kenavampimaung masikung:

Niiꞌ tee ninka nariꞌ moompira
Napoꞌ tee ninka nariꞌ domamariaing.
12 Eꞌmanampiri sisikeera toraꞌpampira
Tee ninka nariꞌ nantoong tarearampiaing.
Nka niiꞌ tee-koo penkemariko
Napoꞌ tee niiꞌkoo penkemparavaing.
13 Nka niiꞌ eꞌmanampiaruko tee-koo
Tee bakaang kara-koo eꞌmanui otoaing,
Aiꞌ bakaang aarumo tampara-koo
penkemparavarupeuꞌ.

Kara Masikung Narung Pakupakupoꞌnung; Niiꞌnamuriiꞌkoo Konteroaing

14 Dake noruꞌantaveriaing tee kara nauransinaꞌ. Ovoringe oorurioꞌ botoveriaing eeꞌ: Dontaꞌdariri otoriai kara-koo tataꞌnanka-ita. Teeꞌ tataꞌkoo tampaꞌ deeaꞌ. Nantoonge taaravaama tee orari-antavaripeuꞌ. 15 Paarararavai daka matauari otoꞌkoo Kumponinge makosi-antaruainaꞌ, naning matau-pinaꞌ, dakaang nko-nko-koo maiaꞌkoo makosi deeaung-pinaꞌ. Teeꞌ kompeaing tee minkunaa Kumponing-etaing kara masikung makosinaꞌ miruꞌ koontoꞌ siraꞌpei. 16 Dontaꞌdari otoaing temuriiꞌ Kumponing-nung deeaung naampa-ita. Teie tee nantoong barampuriaing tee-koo taung oovunavung-koo Kumponing-ankoita. 17 Teie biikaang kara tee deraꞌpinaꞌ maaꞌuriaing deraꞌke naning domantooꞌ otoko maaꞌumanaꞌ. Teing teeꞌ oroꞌning-koonaanka niiꞌnaanka Haimenias eeꞌnoko Pailitas. 18 Tenaanka taung masikavung bekoiꞌuretuꞌnaanka aaꞌpurema, “Kumponinge ookara nantoong booꞌketa daaꞌuruꞌ tero.” Teeꞌ minkuvurema niiꞌning biikaang masikaꞌanta orari-antavuretuꞌ. 19 Nka tee aung kara masikung teing-koo nantoong-koo Kumponing masikaꞌantavaamaing-koo aaꞌnaꞌ dateꞌpari otomaung natuku tankanung-pinaꞌ ivekung tekaꞌpaama eeꞌ daariaapeuꞌnung-pinaꞌ, “Ovoringe noruꞌui otong teing bakaning, eeꞌnoko ookara Kumponing bakaang miring tampaama masikaꞌantavaamaing koontoꞌ bereꞌariaing orara aarumo-ita.”

20 Tee tee aarumonanka tee eeꞌpinaꞌ otong: Naning bakanava-koo aretereng otorong, niiꞌning kapang-koo aaꞌnaꞌ sisisiisi-koo nkoniiꞌ, eeꞌnoko niiꞌning koiꞌkoo eeꞌnoko kansiꞌkoo nkoniiꞌ. Teing-koo niiꞌning kapooꞌ tampara masikung bantoꞌning eeꞌnoko niiꞌning tamunsiꞌning. 21 Eeꞌpinaꞌ: Naning tee tampareng-pinaꞌ baka kiiroraaꞌari dei tamunsiꞌnung aarumo-ita enang tee kapooꞌ tampara bantoꞌnareng-pinaꞌ deemparapeuꞌ; napoꞌ meekaꞌpari otopeuꞌ, bakaang pankaing pakuvupeuꞌnaꞌ maamuari otopeuꞌ tampamuriau nko-nko nko-koo. 22 Tee tee enang dontaꞌdari otoai nemaaꞌ biikaang karakaraaꞌketa. Toꞌbii-antarari otoai teꞌaape: nariari otoꞌ, masikaꞌanta, piaa eeꞌnoko mooa, teing Ovoring-koo baitoarimaing ninka nariꞌ otoritaaꞌ tampaꞌ nariꞌ nko-koo piavoromaing ninka. 23 Nauꞌka pakuraravaukaꞌ tee-koo minkuminku-koo daang-koonanka-koo kanuꞌaapenung-koo. Noruꞌei otong temuriiꞌ aarumoi turang-anta basi-antavumaung. 24 Ovoring bakaning botovotonaaꞌnuka turang nkonuka deeaukaꞌ. Teing nauꞌka navunavuroꞌnuka otoroaing ootukunung-koo, tampaꞌ sirakaꞌantanuka, iira noruꞌaavaing, napoꞌ biikaning kare-nupoong koong-antavaarimaatoai domang boimporoi. 25 Aiꞌ pa Kumponinge napoꞌ toro-antavuriai eeꞌnoko noruꞌaavai tee kara masikung. 26 Eeꞌnoko teeꞌkoo mmariaavaing teieta Sietaniꞌ bakaang baankaꞌketa biꞌantavurimaung-eta bakaang noruꞌ siong-koo.

Copyright information for `NAS