Acts 1

Kara Okovuri Nkanukai Jiisuuꞌ Bakaang Kara Daankiauꞌnaꞌ Jerusalemaꞌke

(1:1–8:3)

Jiisuuꞌke Tanuaang Meekung Poaing Nauvuruꞌnaꞌ

Aung ee, Teopilasiꞌ,

Tutunaꞌnaneꞌkoo daarireroma tee ookara kapooꞌnanka-koo minku-antarantuꞌnung Jiisuuꞌke nkovukoꞌning eeꞌnoko nau-antavurikoꞌning tutuntoma-ita bera deto paning-aape intamparuꞌnooꞌke basi.
Mmeꞌ intamparavaꞌ teie bakaning kara okovuri nka-koo miruꞌuruꞌning boto avuruꞌ Tanuaang Meekung-koo kuunge. Teing-koo mmauꞌnamuꞌpie oroꞌparuꞌ domamparuꞌnaꞌkoo taaꞌniꞌantavari, mmauꞌ kapooꞌnanka tasiꞌanta ninka, noruꞌ keekooꞌariarooꞌnaang. Eeꞌnoko booꞌparuꞌnooꞌketa karenaumo kivora doong teeꞌ otoi Kumponing bakaang muuꞌ nau-antavuruꞌ. Eeꞌnoko tenang teing ninka taamanaama otoroi teie orokovuruꞌ Jerusalemaꞌketa tenkenaavarooꞌnaang, teka nempaavaꞌnaang tampuuꞌ tee avuavuꞌ teing-koo Baumai maraka-antavuruꞌnung, eeꞌ oroꞌ, “Aung tee tero naurampiruꞌnung aaꞌpama: Jooni Minkinarai tee ntong-koo minkirurima meekaꞌantarurikoꞌ, teka mmauꞌ doong tankinuaruko diiꞌ teing Tanuaang Meekung ninka meekaꞌantarariaining.”

Bera teinge tee naroꞌ porora eeꞌ niaꞌauꞌ, “Ovoring, dake ee enang donkompeeꞌnaang tee Isireeli tero donkompuuꞌnaꞌ?” Eeꞌnoko teie aaꞌpuruꞌ teing, “Tee kapooꞌ diiꞌke noruꞌkoong deeaꞌ; tee bateinananka Mmaꞌke baka bakaang, bakaange iriꞌke pinkaꞌuruꞌnanka. Teka diiꞌke tee iriꞌ nkaveriaing tenang Tanuaang Meekung diiꞌkoo dau poko, eeꞌnoko diiꞌ teing nkaning ning siraꞌmeriaining anke Jerusalemaꞌke, eeꞌnoko ookutunairu Judiaꞌ nameensiꞌkoo eeꞌnoko Sameriaꞌ eeꞌnoko bera kansiꞌ oparavainooꞌke basi.”

Jiisuuꞌ Paning Koinuuꞌnaꞌ

(Mak 16:19-20; Luk 24:50-53)

Eeꞌnoko teeꞌ minkuvura ooai otoko intamparuꞌ tee Jiisuuꞌ, bera kamoꞌnavuꞌke nopaꞌura paaꞌantavuuꞌ teing-koo duta-ita. 10 Eeꞌnoko tenang paning-aape ankampariri otoroko, tee beko, taꞌninaꞌ kenaanka donkaanira mononopaꞌ kakaarai nopaꞌniiꞌka donkonuretuꞌ teꞌ teing-anko. 11 Eeꞌnoko aaꞌpuretuꞌ, “Diiꞌ donkaang Kaaleliꞌnupoong, aming-koo teeꞌ donkoniri paning-aape ooveri otomang? Tee tee Jiisuuꞌ deto intamparing paning-aape diiꞌankoita tee, teeꞌ nariꞌ otoi poaing ooverioꞌ paning-aape beinaꞌ.”

Mataiasie Judasi Pariꞌantavuuꞌnaꞌ

12 Teketa Oliveꞌpoꞌnamii-eta toroariruꞌ teing Jerusalemaꞌaape. Dueꞌ teꞌ Jerusalemaꞌ teketa. 13 Eeꞌnoko osi duparira deto daukava-koo koinauꞌ teꞌ otorokoꞌnooꞌ aaꞌning: Piita, Jooni, Jeemisi, Aanduruꞌ, Pilipiꞌ, Toomasi, Baatolomiuꞌ, Maatiuꞌ, Jeemisi tee Alopeasi bauring, Saimoniꞌ Sielotiꞌ, eeꞌnoko Judasi Jeemisi bauring. 14 Aing teing nariꞌ otoroi kunsi-koo biiꞌka avarikoꞌning, napoꞌ nariꞌ teing maniiꞌ, Meeriꞌ Jiisuuꞌ bauko ninka nariꞌ, eeꞌnoko teing Jiisuuꞌ baaraꞌmainkaang.

15 Teketa niiꞌning doong tankinuko teing Jiisuuꞌ bakaning barevare-nupoong oosiarira Piita meuꞌ donkonuuꞌ teing-koo, deerunooꞌ narung daakuꞌketa kenaiꞌka-pinaꞌ otoroi. 16 Eeꞌnoko aaꞌpuuꞌ, “Mmaikoriꞌ ee, tee Daari Meekunge minkuvuuꞌnung kara tee bakei dupenumpoꞌ tee Tanuaang Meekunge urikamuꞌ siraꞌpuuꞌnung Deevitaꞌ karantavuma~ mmeꞌ nkoaravaruko, aaꞌnaare Judasi minkuari otong tee eeꞌnara Jiisuuꞌ daiꞌauꞌning barampuri pouꞌnung. 17 Tee tee niiꞌ ninka deeruniiꞌ, Ovoringe niiꞌ ninka nariꞌ mintoomariiꞌnaang miruꞌmuruꞌnung.”

18 Tee aaꞌ tee Judasie kansiꞌnameensiꞌ mooꞌuuꞌnung teinge mooniꞌninge bakaang orakaꞌ nko-koo mooꞌauꞌninge, eeꞌnoko teke boreꞌke uroi duaꞌarara tompooꞌkura mintung taapoꞌ bakoaruꞌ. 19 Ookara Jerusalemaꞌnupoonge tee noruꞌauꞌnung tee, eeꞌnoko tevoraꞌ kansiꞌnavoraꞌ Akeldama tampauꞌ, miruꞌnooꞌ Tookanavoraꞌ.

20 Eeꞌnoko Piitai napoꞌ karoma aaꞌpuuꞌ, “Tee aung naning tee Daari Meekung-koong Kena-koo eeꞌ minkuari otong,

‘Bakanavaro tee doonavaravaing eeꞌnoko naning teꞌ otoaukaꞌ.’
(Kena 69:25)

Eeꞌnoko

‘Niiꞌnunge bakanooꞌ tareroma pariꞌantavuaing.’
(Kena 109:8)

21 Teeꞌkoo, Daari Meekunge teeꞌ minkuvuioꞌ naning Judasi paari-antanung miring tampampiaing tee Ovoring Jiisuuꞌ booꞌketa daaꞌaruꞌnaꞌkoong kara siraꞌpuaing niiꞌ ninka nariꞌ. Niiꞌ Jiisuuꞌ ninka nariꞌ oꞌnorimaing-pinaꞌ masikaꞌ oroꞌ miruꞌampiaing. 22 Tee Jiisuuꞌ ookara batei-koo nanuuꞌnaꞌ siompukoꞌnung Joonie minkivura meekaꞌantavuuꞌnooꞌketa bera niiꞌankoita deto koinuuꞌnooꞌke basi.” 23 Eeꞌnoko teinge kenaanka makosira tampaaretuꞌ aaꞌnoko Josepaꞌ, niiꞌnooꞌ Basabas Jaastas eeꞌnoko Mataias. 24 Eeꞌnoko kunsiarima aaꞌpauꞌ, “Ovoring ee, dake nantoong-koong domang noruꞌei otomaunge naumeriaing arera narung anaanka-koo kenaankara-koo dake miruꞌei otoing amuriiꞌ nko-nko nko-koo Judasi pariꞌantavuaing, oovunaꞌ bereꞌarara bakanamenge oramenge booꞌpari beuꞌnung.” 26 Eeꞌnoko teeꞌ minkuaara siikiitaakiiꞌ nkoaako Mataias miring tavoꞌkuuꞌ. Eeꞌnoko teketa tee tee teing ninka nanaiꞌketa narung kara okovuri nkanuka ninka nariꞌ deeruauꞌ.

Copyright information for `NAS