Acts 10

Koniliasie Koosinung~ Oovuuꞌnaꞌ

Teke Sisariaꞌnamono-koo tee narung naning otokoꞌ miring Koniliasi, narung daakuꞌ piatooro~ tanatavurikoꞌnung, Itali-nameensiꞌnupoong tampaarikoꞌning. Koniliasi tee naning dootuuꞌkoo tampara, Kumponing-koo amaiaaꞌoi meeꞌduꞌpiari otokoꞌ bakanava-kooning ninka nariꞌ. Eeꞌnoko Juꞌnupoong ataꞌoiꞌnuka mmauꞌ mooniꞌ avurima pakuvurikoꞌ. Tee eeꞌnung kunsi bauko Kumponing-koo.

Niiꞌnaꞌmung kamunooꞌaapevuko Kumponinge niiꞌnaung~koo bereꞌantavuioꞌ koosinung siraꞌpari poioꞌ oovuuꞌ Kumponing bakaang. Pora aaꞌpuuꞌ tee, “Koniliasi ee.” Eeꞌnoko teie tee oovui avoroꞌke korivuma aaꞌpuuꞌ, “Arekeeꞌ, Ovoring?” Eeꞌnoko teie aaꞌpuuꞌ, “Dakaang kunsi eeꞌnoko dakaang avuavuꞌ Kumponing-anko tavoꞌkuioꞌ tasiꞌderuing. Enang nantoong Joopaꞌaape botoveriai eeꞌnoko narung Saimoniꞌ niiꞌnooꞌ miring Piita bokuaavai teka. Niiꞌnung Saimoniꞌ ninka nariꞌ otoreng, dopaꞌ kauꞌkarenaumo-koong takeraꞌumaung ninka. Bakaang pava pirung dueꞌke otong.” Tenang tee koosinung tee kara nauvuuꞌnung tenkenuko teie kenaanka bakanaanka bautarara bokuvuretuꞌ eeꞌnoko narung piatooronuka-koong Kumponing-koo meeꞌduꞌpiari otokoꞌnung teke nempariri otorokoꞌning-koong. Eeꞌnoko ookara kapooꞌnanka nauvurira Joopaꞌaape botovuruꞌ teing.

Piitai Kapooꞌ Niiꞌnaung~koo Bereꞌarara Oovuuꞌnaꞌ

Teketa daunaꞌmung duaakiꞌnang teing nanaama teꞌ dueꞌ basiariko osi pankamono-koo Piita daunavaro-koo pava-koo koinuuꞌ teke kunsiaraaꞌnaang. 10 Eeꞌnoko teke aaꞌnaꞌ peeravora kapooꞌ nai-koo piavokoꞌ. Teke niiꞌning iapavariko tee niiꞌnaung-koo bereꞌarara paning daateꞌarioꞌ oovuuꞌ, bera kapooꞌ baarong pankaing-pinaꞌ sivereꞌari depeto kansiꞌkoo siaruꞌ karenaumo kunkuꞌdoiꞌkoo biꞌari. 12 Tenaaꞌkoo kuunge amutemuriiꞌ kauꞌ karenaumonanka, boruꞌnanka eeꞌnoko barennanka auviꞌau-kooning otoroko. 13 Teketa aurong eeꞌ taaravuuꞌ, “Piita, deto donkonira tavera maaꞌeai.” 14 Teka Piitai aaꞌpuuꞌ, “A, Ovoring, ninge temuꞌketa koontoꞌ aing kapooꞌ eeꞌ oroꞌ maaꞌampaung, aiꞌ aing teing kuꞌmiꞌpoꞌning orokoari otong niiꞌkoo Juꞌnupoong-koo.” 15 Eeꞌnoko aurong napoꞌ karouꞌ kemuꞌkanaꞌ aaꞌpuma, “Aming kapooꞌ Kumponinge kiiroraaꞌantavuing dake kapooꞌ kuꞌmiꞌpoꞌnung tampema pooreꞌeaukaꞌ.” 16 Asiꞌnaꞌmoo beemuꞌpinaꞌ nkoarioꞌ tee baarong napoꞌ daꞌdeng paning-aape deto nkavuuꞌ.

Piita Bokuauꞌnaꞌ Koniliasi-anko

17 Enang tee Piitai niiꞌnaung-koo bereꞌarara kapooꞌ oovuuꞌnung-koong miruꞌnooꞌ besiꞌuma norunoruꞌuko teing nantoong Koniliasie botovurioꞌ porouꞌning teke niaꞌkaakotaaꞌ Saimoniꞌ bakanavaꞌkoo karanaang-koo dueꞌ donkonai otorokoꞌ. 18 Eeꞌnoko bokiaama aaꞌpauꞌ, “Tee ee Saimoniꞌ, niiꞌnooꞌ miring Piita, anke otomang?” 19 Piitai tee mmeꞌ tee niiꞌnaung-koo bereꞌararara oovuuꞌnung-koong miruꞌ nooruupivuko Tanuaang Meekunge aaꞌpuuꞌ, “Ee aung, nantoong beenaumoi daꞌ besiꞌdaamang. 20 Donkonira doonko sirarara teing ninka nariꞌ beriai tokoonaꞌ noruꞌeaꞌ, aiꞌ teing teing ninge botoaransining.” 21 Eeꞌnoko Piita doonko siaruꞌ teing-anko eeꞌnoko aaꞌpuuꞌ, “Ning eeꞌnara aung diiꞌke besiꞌmerimatomaung. Aming kapooꞌkoo porininge?” 22 Eeꞌnoko teinge aaꞌpauꞌ, “Koniliasi, tee daakuꞌ piatooro tanatavurimaung, tee naning koontoꞌ eeꞌnoko Kumponing-koo aaꞌnaꞌ amaiaaꞌoi otomaung eeꞌnoko tee ookarai Juꞌnupoonge tampara tampaamaung, narunge meekunge koosinunge botovuioꞌ daꞌanko botoaring daꞌ bakanava-koo beeꞌnaang eeꞌnoko taaravuuꞌnaang kapooꞌ dake minkuveaining.” 23 Teeꞌ taaravura tee teie kuung bokuvurira naꞌmung muung teke aasiauꞌ.

Piita Koniliasi-anko Beuꞌnaꞌ

Teketa daunaꞌmung tee daaꞌarara teing ninka nariꞌ berouꞌ, eeꞌnoko niiꞌning baito-nupoong Joopaꞌketa nariꞌ siompauꞌ.
24 Eeꞌnoko keinaꞌmung Sisariaꞌ basiariruꞌ, Koniliasie nempuri otoko ookara baꞌmarang eeꞌnoko baꞌmaikoriꞌ naroꞌ naroꞌurira. 25 Tenang Piita tumparako Koniliasie kuneꞌura kauꞌkanooꞌke miinge keemparara pankaing-antavuuꞌ tee. 26 Teka Piitai deto iꞌampuma aaꞌpuuꞌ, “Donkoniai, ning tee naning, daꞌpinaꞌ oroꞌ.” 27 Eeꞌnoko nariꞌ karorema kuung basiarema nantoong karikaꞌ oovuruꞌ teke naroꞌariri otoroko.

28 Eeꞌnoko aaꞌpuruꞌ teie teing, “Diiꞌke tee noruꞌeri otong Juꞌnupoong niikaang botoi tauraꞌmuriaꞌ niiꞌ oovunavitu ninka nariꞌ navu-koo niiꞌnooꞌ beeroꞌkoo, teka Kumponinge tero naumuieeng ninge baa naning tamunsiꞌnung niiꞌnooꞌ kuꞌmiꞌpoꞌnung tampamparooꞌnaang. 29 Teeꞌkoo ning-koo botoraririoꞌ ning tee aung moing kupiꞌmoaꞌ. Enang niaꞌdamaang ninge daꞌ: Aming-koo ning-koo botorarieenge?”

30 Eeꞌnoko Koniliasie aaꞌpuuꞌ, “Karenang doong tankinuieening-koo duaaꞌ enang-pinaꞌ basiarako batei kamunooꞌnang-koong kunsi siompansi kunsimarako anke nkanava-koo taꞌninaꞌ naning narung ning-koo uroꞌkanooꞌ donkonuuꞌ mononopaꞌ sisisiisi kurumpari. 31 Teie aaꞌmuuꞌnung, ‘Koniliasi, Kumponinge dakaang kunsi taarareruing eeꞌnoko dakaang avuavuꞌnanka ataꞌoinku-koo nkovemaung noruꞌderuieenge. 32 Teeꞌkoo aaꞌdamaang: Joopaꞌaape Saimoniꞌanko, niiꞌnooꞌ miring Piita tampaakooꞌ, botoraravai. Niiꞌnung Saimoniꞌ bakanava-koo otomatoing pirung-koo dueꞌ, tee dopaꞌnanka kauꞌkarenaumo-koong takeraꞌumaung.’ 33 Teeꞌkoo daꞌanko iriꞌnarung botomaruꞌ, eeꞌnoko tampaꞌ tampamang daꞌ aaꞌ poing-koo. Teeꞌkoo niiꞌ ookara anke naroꞌmariring Kumponing-koo uroꞌkanooꞌ teing kapooꞌ Ovoringe botoruining naumeriko taaravampiiꞌnaang.”

Piita Daankiaruꞌnaꞌ Koniliasi Bakanava-koo

34 Eeꞌnoko Piitai daankinang tutumpuma aaꞌpuuꞌ, “Masikaꞌ enang tampaꞌ tasiꞌpansi otong Kumponinge tee nantoong tankaampuriaung, teka nantoong paninga boonameng-koo-nupoong Kumponing meeꞌduꞌpiai koontoꞌ otoromainge tee Kumponing dotu-antavaamaung. 36 Aung tee kara Kumponinge Isireeli baꞌdompenku-anko botovuuꞌ, tee doorenang tampara eeꞌ minkuvui otoing: Jiisuuꞌ tee naning Kumponinge tero Pakoꞌpariꞌuuꞌnung niiꞌ ookara domamuri taremuriainooꞌkoo, eeꞌnoko teeꞌkoo Jiisuuꞌ ookara-koo naroꞌka Ovoring deempari otong, eeꞌnoko tee-koo kuunge mooa-koo oꞌnoriaing. 37 Diiꞌke tee noruꞌeri otong tee minkunaa beremparuꞌnung ootukunairu-koo Judiaꞌke Kaaleliꞌketa tutumparara tenang Jooni Minkinarai daankivukoꞌnooꞌketa damaꞌke. 38 Tenaare anaare: Kumponinge Jiisuuꞌ Nasaretiꞌnung Tanuaang Meekung ninka iriꞌantavuma pakoꞌpariꞌuuꞌ. Teketa nantoong tampaꞌ nkovurima avitoitoi nanukoꞌ teing Sietaniꞌke korivurikoꞌning unaa-antavurima, aiꞌ tee tee Kumponing ninka nariꞌ otorekoꞌnung. 39 Nka niiꞌ teing, ookara kapooꞌnanka siraꞌnuka teie nkovukoꞌning teke Juꞌnupoong biikanooꞌke, nka baruꞌnooꞌ Jerusalemaꞌke, eeꞌnoko teinge teka dupisiꞌauꞌnaꞌ koiꞌkoo biꞌaara. 40 Teka Kumponinge beenang doong tankinuioꞌ tee bouꞌnooꞌketa daaꞌura siraꞌpuuꞌ. 41 Ookara nantoong-koo tee oroꞌparavaꞌ, teka Kumponinge niiꞌ bakaning siraꞌ nkonuka miruꞌmuritaaꞌ niiꞌankoi oroꞌantavuuꞌ eeꞌnoko nariꞌ taamang tovang ntong naiampikoꞌ booꞌketa daaꞌarara. 42 Eeꞌnoko teie niiꞌke ooampiruꞌnaꞌ nau-antavarampiiꞌnaang botomuruꞌ ookara nantoong daankiarampima tee Jiisuuꞌ tee Kumponinge pakoꞌpariꞌuuꞌnung booꞌnuka eeꞌnoko domantooꞌnuka simpeꞌkoo. 43 Ookara urikupoong nakaro-nupoong Kumponing-etainge eeꞌ nariꞌ siraꞌpauꞌnung:

‘Ookara nantoong tee masikaꞌantavaavaining tontaꞌanta kompaavaing tee bakaang miring-koo kuunge.’”
(Aisaiaꞌ 33:24; 53:5,6; Jeremaia 31:34; Danielo 9:24)

Nantoonge Juꞌdeeainge Tanuaang Meekung Nkavauꞌnaꞌ Koniliasi Bakanava-koo

44 Tenang Piita teeꞌ minkuari otoko Tanuaang Meekung tee teing-koo ookara-koo tee kara taaravauꞌning-koo pouꞌ. 45 Eeꞌnoko teing Juꞌnupoong Karistooꞌ masikaꞌantavaakoꞌning nariꞌ Piita ninka porouꞌning bakei taꞌninauꞌnung, aming-koo, nnaꞌ Tanuaang Meekung teing-koo piamparioꞌ bane Juꞌdeeainge. 46 Aiꞌ teinge tee oovuning karai kareaama Kumponing daangampaako taaravaaruꞌ. Teketa Piitai sirakaꞌantavuma aaꞌpuuꞌ, 47 “Baie orokovuripeuꞌ aing ntong-koo minkie meekaꞌanta-koo? Aiꞌ aing teing Tanuaang Meekung nkavaining niiꞌpinaꞌ nariꞌ.” 48 Eeꞌnoko teie botovuruꞌnung ntong-koo minkiarira meekaꞌantavariiꞌnaang Jiisuuꞌ Karistooꞌ bakaang miring-koo. Teketa teinge Piita dateauꞌ niiꞌning doong nariꞌ otorooꞌnaang tampaama.

Copyright information for `NAS