Acts 12

Eerotiꞌke Jeemisi Tavura Napoꞌ Piita Daiꞌuuꞌnaꞌ

Tenang tee batei-koo tee daurarong~ Eerotiꞌ botoarioꞌ niiꞌning dootuuꞌnupoong-kooning daiꞌaaruꞌ orakaꞌ nkoaariiꞌnaang. Bera aaꞌnouꞌ Jeemisi tee Jooni bataata, Eerotiꞌ botoarioꞌ bainatue dupisiꞌauꞌ. Eeꞌnoko teing ovontung Juꞌnupoong Jiisuuꞌ turampaakoꞌninge tampaꞌ noruꞌauꞌ; Teketa Eerotiꞌke teing dotuariko oovura napoꞌ Piita daiꞌkoo botoaruꞌ. Aung tee tenang Baariꞌkoong~ Paroro, taamang bereteꞌ iisiropa-koong nkoaakoꞌnang. Eeꞌnoko tenang teie mooꞌura tee kiimatanava-koo sipuuꞌ piatooronuka-koo kareviturie karenaumonaꞌ paarieema tanatavaavaꞌnaang kiimatanava-koo. Teketa Baariꞌkoong Paroro bakearako nantoong-anko beꞌantavuuꞌnaang noruꞌukoꞌ. Teeꞌkoo Piita tee kiimatanava-koo teka tareaakoꞌ, teka teinge dootuuꞌnupoonge kunsi ivekung nkoevauꞌ Kumponing-koo.

Koosinunge~ Piita Sing-antavuuꞌnaꞌ Kiimatanavaꞌketa

Teketa teꞌmung eeꞌnaꞌmung muunga teie Eerotiꞌke nantoong-anko tavoꞌuuꞌnaang tampukoꞌnaꞌmung Piita tee aatui otoko piatoorora-koo~ kenaankara-koo meuꞌke kevintai sieenai daiꞌari. Eeꞌnoko niiꞌning tarearikoꞌning kiimatanava-koo karanaange donkonai tanatavariko. Bera tee taꞌninaꞌ Ovoring bakaang koosinung teke oroꞌparuꞌ eeꞌnoko arakai arakavuuꞌ tevaro. Eeꞌnoko Piita teka matoꞌnang-koo tankoꞌpuma tantevura aaꞌpuuꞌ, “Iriꞌnarung daaꞌdaravai.” Eeꞌnoko teing sieenaning doonko duaꞌaretuꞌ bireng-eta. Eeꞌnoko koosinunge napoꞌ aaꞌpuuꞌ tee, “Baarong tokorarara boonamante~ siꞌdaravai.” Eeꞌnoko teeꞌ nkoarioꞌ koosinunge Piita aaꞌpuuꞌ, “Mononopaꞌ kuruntarara siomeai ning.” Eeꞌnoko danto siaruꞌ siompui tee. Teie tee masikaꞌantavuaꞌ tee kapooꞌ koosinunge nkovuuꞌnung, tang niiꞌnaung-koo bereꞌari noone-koo nanuuꞌnung-pinaꞌ noruꞌuma. 10 Teketa tee tenaanka tutunaꞌnung eeꞌnoko kenaanka-nung tanata nkora divuꞌaareta aini-koong kuꞌnung otoinooꞌ basiaretuꞌ osi pankamono-aape beꞌdoma. Eeꞌnoko tee tee kuꞌnung baka daateꞌarioꞌ tenaanka siaretuꞌ danto damaꞌdu. Bera navunge danto bereta koosinunge teka namuꞌke sipuuꞌ tee.

11 Eeꞌnoko Piita-koo tenang onou poko aaꞌpuuꞌ, “Emuꞌ koontoꞌ tasiꞌpansing aung tee Ovoringe bakaang koosinung botovuing ning domamuuꞌnaang Eerotiꞌ bakaang bireng-eta eeꞌnoko bakaning orakaꞌ nkonanka ning-koo basi-antavuko Juꞌnupoonge ooaavaꞌnaang nemparikoꞌning.” 12 Tenang tee tasiꞌparara Piita Meeriꞌ bakanava-koo beuꞌ, teni tee Jooni Maakaꞌ bauko, teꞌ eeꞌnooꞌ nantoong karinga oosiarira kunsiarikoꞌnooꞌ. 13 Eeꞌnoko tenang teie karanaang-koong kuꞌnung kopikopiꞌuko nani neraiꞌnaꞌ bautara miring Roodaꞌke taaravura oo-koo pouꞌ. 14 Bera Piita-koong aurong tasiꞌpura dotuarama karanaang daateꞌuaꞌ kuung-aape kuaꞌpari bera nauvurima aaꞌpuuꞌ, “Piita karanaang-koo damaꞌdue donkonui otong.” 15 Nka teinge aaꞌpauꞌ teni, “Daꞌ aaꞌ pa kanuꞌdaring.” Teka teni deravarako teinge aaꞌpauꞌ, “Tee aaꞌ bakaang tanuaang pa.” 16 Teka Piitai teeꞌ nariꞌ kopikopiꞌukoꞌ. Eeꞌnoko tenang teinge daateꞌaama Piita ooaara tee taꞌninauꞌnung. 17 Bera dooroompariiꞌnaang birenge orokovurira teie sirakaꞌantavuuꞌ Ovoringe kiimatanavaꞌketa poꞌantavuuꞌnaꞌ. Eeꞌnoko aaꞌpuuꞌ Piitai, “Aung Jeemisi bakanamiring naueriai eeꞌnoko teing niiꞌning niiꞌmaikororiꞌ.” Teketa tenang tenkenura oovunamono-koo beuꞌ.

18 Tenang taneꞌpuioꞌ tee teing piatooronuka okiꞌnooꞌ biruꞌariaꞌ Piita paaꞌaruꞌnung-koo. 19 Eeꞌnoko tenang Eerotiꞌke besiꞌuma oovuarura teing tare-nupoong tuutunampuriraiꞌnange tavaarima dupisiꞌaariiꞌnaang botoaruꞌ. Teketa Eerotiꞌ Judiaꞌketa Sisariaꞌaape doonko bera teke otouꞌ.

Tee Daurarong~ Eerotiꞌ Orakaꞌ Booꞌparuꞌnaꞌ

20 Tenang Eerotiꞌ teke Sisariaꞌke otoko Taiaꞌnupoong eeꞌnoko Saidoniꞌnupoong naroꞌ naroꞌarira niiꞌning nantoong Eerotiꞌ pinau-antavaavaꞌnaang botoaaruꞌ, aiꞌ teie Eerotiꞌke tee teing aing kemonora osi pankeng aaꞌnaꞌ munteꞌuri otokoꞌnung. Eeꞌnoko teing mooa-antanuka porora tutung narung tee Eerotiꞌ bakanava tanatavukoꞌnung miring Blastus tampaꞌ karavaama mooa-koo eentavariruꞌ, aiꞌ teing teing biikaang taamang tee daurarong bakanooꞌketa nkavaakoꞌning.

21 Bera tee teketa teꞌmung doong miruꞌuuꞌnaꞌmung makotuuꞌnang Eerotiꞌ nepuꞌari daurarong bakanooꞌ baꞌnaniꞌdoma baꞌnanura booꞌantanaꞌ daankiaruꞌ teing-koo nantoong-koo. 22 Eeꞌnoko teinge bokiaama aaꞌpaakoꞌ, “Narung eeꞌnara kumponing bakaang-pinaꞌ auromparamaang, naning-pinaꞌ deeaꞌ.” 23 Teketa namuꞌke Kumponing bakaang koosinunge~ teka tavuuꞌ tee, bakaang daangang Kumponing-aape pareꞌuaruioꞌ. Eeꞌnoko domang ninka otoko kikiꞌke puampaako booꞌparuꞌ.

24 Eeꞌnoko teketa tee Kumponing bakaang kara nepuꞌnaꞌ deto aaꞌnaꞌ dupura beremparuꞌ. 25 Eeꞌnoko tenang tee batei-koo Banabas naanka Soolo Jerusalemaꞌketa toroaretuꞌ mooniꞌ tavoꞌuretuꞌnooꞌketa, tee Jooni Maakaꞌ bokuvuresi.

Copyright information for `NAS