Acts 15

Dootuuꞌnupoong Kakaꞌdekeariruꞌnaꞌ Jerusalemaꞌke Botonanka Minkuaama

Teka niiꞌning nantoong Judiaꞌketa depeto Antiokoꞌnavuntuꞌ porouꞌ baito-nupoong nau-antavaarima aaꞌpaama, “Diiꞌ dopaꞌ napuꞌdariarura deekoꞌ, Moosesie tampuuꞌnaꞌ, diiꞌ teing domang-anta komperiaukaꞌning.” Eeꞌnoko Paulaꞌ naankai Banabasi taaravureta aaꞌnaꞌ turampaareta tataꞌeekoꞌ. Teketa Paulaꞌ eeꞌnoko Banabasi niiꞌning ninka nariꞌ miruꞌaaretuꞌ Jerusalemaꞌaape deto berooꞌnaang kara okovuri nkanuka-anko eeꞌnoko dootuuꞌkoo urantanuka-anko aung kapooꞌ tataꞌeuꞌnung-koo niaꞌkaavaꞌnaang. Temono-koong dootuuꞌnupoonge teeꞌ nanuꞌkoo botoaarioꞌ Ponisia eeꞌnoko Sameriaꞌnameensiꞌka-kooninge deto dooreaari tankinauꞌ Juꞌdeeaing bereꞌariruꞌnung-koong doorenang, eeꞌnoko teinge teeꞌ dooreaama aaꞌnaꞌ doturotu-antavaaruꞌ teing biiꞌmaikororiꞌ baito-nupoong.

Tenang teing Jerusalemaꞌ basiariko onkeonkeꞌaaruꞌ temono-koo dootuuꞌnupoonge eeꞌnoko teing-koo urantanukai eeꞌnoko teing kara okovuri nkanukai. Eeꞌnoko teinge nauaaruꞌ ookara Kumponinge nkovuuꞌnanka teing ninka. Teketa niiꞌning Karistooꞌ masikaꞌantavaakoꞌning Boto Keperuuꞌnavitu-kooning~ daaꞌarira aaꞌpauꞌ, “Teing Juꞌdeeaing dopaꞌ totoꞌparira deekoꞌ makosiaapeuꞌ domaang otoi otoꞌ nka-koo, eeꞌnoko Moosesi-nung boto siong-koo botoarampiai.”

Teketa tee teing kara okovuri nkanuka eeꞌnoko Karistooꞌkoonavitu-koo urantanuka naroꞌariruꞌ tee aung minkuaavaꞌnaang. Eeꞌnoko teketa aaꞌnaꞌ tataꞌeekotaaꞌ Piitai donkonura aaꞌpuruꞌ teing, “Ee aing mmaikoriꞌ, diiꞌke noruꞌeri otong tero tee Kumponinge ning diiꞌkoo meuꞌka miruꞌmuuꞌnung daankiamaꞌnaang tee doorenang tampara Juꞌdeeaing-koo taaravaara masikaꞌantavaavaꞌnaang. Eeꞌnoko teie Kumponinge ookara biikaang domang noruꞌui otoinge Juꞌdeeaing onkeonkeꞌurimanaꞌ siraꞌparuꞌnung Tanuaang Meekung avurima teeꞌ nariꞌ niiꞌ amuruꞌnaꞌ. Eeꞌnoko noruꞌ tankatankaang niiꞌkoo meuꞌke otoaꞌ aaꞌnoko niiꞌ eeꞌnoko teing, teka niiꞌpinaꞌ kiiroraaꞌuruꞌnung biikaang domang masikaꞌantavaako. 10 Enang teeꞌ noruꞌerima diiꞌke aming-koo Kumponing paaraverimaang Moosesi-nung boto-koo mankiꞌ poruꞌantavererima teing Karistooꞌ sionuka? Tee eeꞌnara boto niikakatauroi eeꞌnoko niiꞌke naroꞌka nka-koo makosi deeaung. 11 Teka niiꞌke eeꞌ masikaꞌantavampiri otong niiꞌ niikaang Ovoring Jiisuuꞌ bakaang piaae booꞌketa mooꞌmuriainge teeꞌ teing-pinaꞌ nariꞌ.”

12 Piitai teeꞌ minkuvuioꞌ ookara naroꞌariruꞌning kapuuariruꞌ, teketa Banabasi naanka Paulaꞌ barorompaaretuꞌ minkuvureko taaꞌniꞌantananka eeꞌnoko taꞌnimpaariiꞌnanka Kumponinge Juꞌdeeaing-koo meuꞌke tenaanka ninka nkovuuꞌning-koo.

13 Eeꞌnoko tenaanka kara bakeareko Jeemisie karoma aaꞌpuuꞌ, “Ee aing, taarameriaing ning. 14 Saimoniꞌke tee naururuꞌnung diiꞌ teeꞌ Kumponinge teing Juꞌdeeaing beeroꞌuruꞌnaꞌ teing-koo niiꞌning tontaꞌurira bakaning deempuriiꞌnaang. 15 Eeꞌnoko teke urikupoong nakaro-nupoong Kumponing-etaing biikaang kara nariꞌ makotuuꞌ, eeꞌ daariari otoinaꞌ:

16 ‘Ovoringe aaꞌpumaang, damaꞌke tee toromarara ninge napoꞌ kaniampaing teva bare-nava Deevitaꞌ dootuuꞌarakoꞌnava pesiꞌaruꞌnava. 17 Pesiꞌaruꞌnooꞌketa napoꞌ kaniamiraiꞌnange deto donkompampaing teinge niiꞌninge nantoonge Ovoring tasiꞌmaara poroainaꞌ Juꞌdeeaing ookarai nkaning tamparansi otoininge. 18 Ovoringe teeꞌpuuꞌ, teie kansiꞌ pupuꞌaruꞌnooꞌketa ookara kapooꞌnanka nkovuriainaꞌ noruꞌui otomaunge.’”
(Eimos 9:11,12)

19 “Teeꞌkoo ninge eeꞌ simpeꞌamaang, tee aaꞌ niiꞌke poreꞌantavarampiaukaꞌnung teing Juꞌdeeaing Kumponing-aape bereꞌariaining. 20 Teka daariampima nauarampiaing aing aaꞌning nkoaavarooꞌnaang, taamang naiaavaukaꞌ kumponing tositosinanka-koo darimpaama kuꞌmiꞌantavaamaung, kaukauro nkoaavaukaꞌ, bioꞌ tutung tavaama ereng dakoaavaung maaꞌaavaukaꞌ, eeꞌnoko ereng naiaavaukaꞌ, Juꞌnupoong diiꞌkoo maarevoroꞌneeng. 21 Aiꞌ urikavarang-eta nantoong otoromaung Moosesi-nung boto deeruaama aing kapooꞌnanka daankiaamaing osi kante pava dootuuꞌnanka-koo Doong Uaanaꞌmung kante.”

Niiꞌ Moosesi-nung Boto-koo Boong Oꞌnoriaung Tampaama Daariauꞌnaꞌ

22 Eeꞌnoko tenang teinge kara okovuri nkanukai, dootuuꞌkoo urantanukai, eeꞌnoko teing ookara dootuuꞌnupoonge tamparavaara, aing aaꞌning teing-kooning miruꞌaaruꞌ Paulaꞌ naanka ninka Banabasi Antiokoꞌaape nariꞌ nanuꞌkoo: Judasi, niiꞌnooꞌ Basabas tampaakoꞌ, eeꞌnoko Sailas, tenaanka teing-koo dootuuꞌnupoong-koo miring-poꞌnaanka. 23 Karavoto~ eeꞌ daariniiꞌ nkavai beꞌkoo botoaaruꞌ:

“Diiꞌ teing Juꞌdeeaing Karistooꞌkoo baito-nupoong aaꞌning-kooning-Antiokoꞌ, Siiria eeꞌnoko Silisia-nupoong-diiꞌkoo tampara tampampimaang niiꞌke diiꞌmaikororiꞌke aaꞌninge: kara okovuri nkanukai eeꞌnoko Karistooꞌkoonavitu-koo urantanukai.
24 Niiꞌankoita niiꞌning berora kararaarima poreꞌantaraariko taaravampiring onou-koo otoꞌ dataveriaꞌ otomanaꞌ nkoraarima, aaꞌdaarima diiꞌ dopaꞌ totoꞌdarira eeꞌnoko Moosesi-nung boto siomperima Juꞌpinaꞌ otoriaing. Teka niiꞌke nauarampiaruko teeꞌ minkuraarimaung. 25 Teeꞌkoo niiꞌ naroꞌmarira nariꞌ noruꞌmariruꞌnung niiꞌnaanka miruꞌarampira botoarampiiꞌnaang diiꞌanko anaanka ninka niiꞌke piaavarampimanaanka ninka aaꞌnoko Banabasi eeꞌnoko Paulaꞌ; 26 Aaꞌnaanka niikaang Ovoring Jiisuuꞌ tee Pakoꞌpariꞌniiꞌ tasiꞌpuresi avororeaꞌ siompuremanaankai, nantoonge mauꞌaareko. 27 Niiꞌke anaanka Judasi naanka Sailas botoarampiring beeꞌka napoꞌ karai nauraariiꞌnaang kapooꞌ aunge karavotoi naurarampiring.
28 Tenang Tanuaang Meekung ninka nariꞌ oꞌnori eeꞌ tampaꞌnaꞌ noruꞌmariring: Niiꞌke kara mankiꞌ diiꞌkoo dau panteꞌampiaukaꞌnung, teka aing naing aarumo naurarampiiꞌnaang diiꞌke siong-koo makosi: 29 Taamang kumponing tositosinanka-koo dariniiꞌ eeꞌnoko ereng naieriaukaꞌ, bioꞌ tutung tavaama ereng dakoaavaung maaꞌeriaukaꞌ, kaukauro nkoveriaukaꞌ. Aing-eta tontaꞌdariri otoriaing deekoꞌ teeꞌ tee tampaꞌ.
Makosi otoriko.”
30 Teketa tee botoaarioꞌ teing Antiokoꞌnavuntuꞌaape doonko berouꞌ, eeꞌnoko teꞌ basiarira tee Karistooꞌnavitu naroꞌ oosiaarira teka tee karavoto avaaruꞌ. 31 Eeꞌnoko tenang teinge deeruaara dotuariruꞌ teing tee-koong karai domang kuaaꞌantavurioꞌ. 32 Eeꞌnoko Judasi naankai Sailas nakaronaankai mmauꞌ kara nauaarema daankiaretuꞌ puring-antavaarema teing baito-nupoong. 33 Teketa niiꞌning batei teke otorora teinge baito-nupoong mooa ninka botoaaretuꞌning-anko nanureeꞌnaang tampaarema siꞌnooraꞌaaretuꞌ. 34 Teka Sailas teke napoꞌ otoꞌkoo piavoko Judasi baka toroaruꞌ. 35 Eeꞌnoko Paulaꞌ naanka Banabasi nariꞌ teke otorouꞌ Antiokoꞌnavuntuꞌkoo. Tenaanka niiꞌning mmauꞌ ninka nariꞌ Ovoring bakaang kara nau-antavarima daankiaarikoꞌ.

Paulaꞌ Napoꞌ Daankiarama Nanuꞌ Tutumparuꞌnaꞌ Sailas Ninka Nariꞌ

36 Eeꞌnoko niiꞌning doong tankinuko Paulaꞌke Banabasi aaꞌpuuꞌ, “Poai, toromareta neekaning baito-nupoong beeroꞌarampeai ookara osinanka-koo Ovoring bakaang kara daankiampetuꞌning-koo ooarampema otoroinaꞌ.” 37 Eeꞌnoko Banabasie Jooni Maakaꞌ tenaanka ninka nariꞌ bokuvuresi nanuꞌkoo piavouꞌ. 38 Teka Paulaꞌke eeꞌ noruꞌuuꞌ, “Aung bokuampearui dei tampaꞌ, aiꞌ temuꞌ Pampiliaꞌka neeꞌ siꞌmureta pakumurearuuꞌ poreꞌmoreko.” 39 Teketa tataꞌeereta siivenkeꞌeeretuꞌ; Banabasie Maakaꞌ bokuvura Saiparasi-namuiꞌkoo aarerie beretuꞌ, 40 eeꞌnoko Paulaꞌke Sailas bokuvura tenkenuretuꞌ teinge baito-nupoonge Ovoring-koo sipaaresioꞌ teie pakuvureeꞌnaang. 41 Eeꞌnoko tenaanka nanuꞌ tutumparema Siiria-nameensiꞌ eeꞌnoko Silisia-nameensiꞌke tankinuretuꞌ dootuuꞌnupoong puring-antavaarema osi kante-koo.

Copyright information for `NAS