Acts 17

Tesalonaikaꞌnupoonge Paulaꞌnaanka Sailas Tavuꞌkoo Mauꞌaaretuꞌnaꞌ

Teketa tee Paulaꞌ naanka Sailas Ampipolis eeꞌnoko Apoloniaꞌnavuntuꞌkai tankinureta Tesalonaikaꞌnamono-koo poretuꞌ teꞌ eeꞌnooꞌ Juꞌnupoong biikanava pava dootuuꞌnava otokoꞌnooꞌ. Eeꞌnoko Paulaꞌ teva-koo tumparara daankiaruꞌ temuꞌketa nkoarakoꞌnaꞌ aarumo siompui; Eeꞌnoko beenang doong nko-nko-ita uaaning-koo teke tataꞌeekoꞌ teing ninka tee Daari Meekung-koong kara-koo, Paulaꞌke sirakaꞌantavuma eeꞌnoko tasiꞌantavurima teing-koo tee niiꞌ domamuri taremuriainooꞌkoo tero Pakoꞌpariꞌniiꞌ tee Daari Meekunge tampuuꞌnaꞌ baike kuneꞌura napoꞌ booꞌketa daaꞌaravaing-koong. Eeꞌnoko aaꞌpukoꞌ, “Aung eeꞌnara Jiisuuꞌ ninge siraꞌpamaung diiꞌkoo tee naning tero Pakoꞌpariꞌniiꞌ nemperimaung.” Eeꞌnoko niiꞌninge Juꞌnupoonge taaravaara masikaꞌantavaara tee Paulaꞌ naanka Sailas siompaaretuꞌ, eeꞌnoko napoꞌ mmauꞌ Juꞌdeeaing Kumponing-koo meeꞌduꞌpiari otorokoꞌning eeꞌnoko niiꞌning manikuꞌ mmauꞌ nariꞌ, ovontunavo.

Teka Juꞌnupoong-koo pankeng mamairoarira niiꞌning taarapiikanuka nkavaarira, karikaꞌ tapoꞌaarira tee osi pankaing naampai maantoꞌantavauꞌ, eeꞌnoko Jeesoni bakanava pava putuꞌauꞌ teinge Paulaꞌ naanka nantoong-anko sing-antavareeꞌnaang piavoroma. Eeꞌnoko tenang tenaanka ooaarearura teinge tee Jeesoni eeꞌnoko niiꞌning baito-nupoong barantaꞌaari berouꞌ temono tarenuka-anko bokiaama aaꞌpaama, “Aing kansiꞌ ookutunairu apee bereꞌantavaamaing aꞌ napoꞌ amono-koo poroi. Eeꞌnoko anka aunge Jeesonie onkeonkeꞌuri. Eeꞌnoko ainge ookarai niikaang daurarong~ pankaing, tee Siisaꞌ, bakaang boto totoꞌpai kapooꞌ nkoaamang aaꞌpaama, ‘Niiꞌnung daurarong otong, miring Jiisuuꞌ.’” Eeꞌnoko temono osi pankamono-kooninge ovookaꞌnuka ninka orakaꞌ noruꞌauꞌ teeꞌ taaravaara. Eeꞌnoko aaꞌpaaruꞌ, “Mooniꞌ tutung siperiko deekoꞌ kiimata-ita tenkeng-antararampiiꞌnaang eeꞌnoko tee temuriiꞌ kapooꞌ nkoverimaung napoꞌ nkoveriaruko deekoꞌ aung mooniꞌ damaꞌ napoꞌ tororerorompiaing.” Teketa mooniꞌ duaꞌaioꞌ teinge sing-antavaaruꞌ.

Beeriaꞌnupoong Tampaꞌ Barorompariruꞌnaꞌ

10 Eeꞌnoko teinge baito-nupoonge teꞌmung eeꞌnaꞌmung Paulaꞌ naanka Sailas tenkeng-antavaaretuꞌ Beeriaꞌnamono-aape, eeꞌnoko Beeriaꞌ basiareta Juꞌnupoong biikanava pava dootuuꞌnava-koo kuung beretuꞌ. 11 Teing aing Juꞌnupoong teke otorokoꞌning biikaang noruꞌ aaꞌnaꞌ daateꞌniiꞌnanka teing-koo Tesalonaikaꞌke otorokoꞌning-koo, aiꞌ teinge beekaang kara aaꞌnaꞌ tampaꞌ taaravaakoꞌ eeꞌnoko doong kante Daari Meekung-koo minkuaakoꞌning-koo biiꞌka deeruaakoꞌ masikanaare oo-koo piavoroma. 12 Teeꞌkoo teing-koo mmauꞌke masikaꞌantavauꞌ, eeꞌnoko teing Juꞌdeeaing-koo ovontung nariꞌ aaꞌning manikuꞌ eeꞌnoko donkaang. 13 Teketa Juꞌnupoonge Tesalonaikaꞌ otorokoꞌninge taaravauꞌ Paulaꞌke Kumponing bakaang kara daankivuko Beeriaꞌnavuntuꞌkoo, teeꞌ taaravaara teꞌ napoꞌ porouꞌ irikung-antavuriko turang daaꞌantavaavaꞌnaang nantoong karinga-koo meuꞌke. 14 Eeꞌnoko teing baito-nupoonge deemparikoꞌninge namuꞌke Paulaꞌ tenkeng-antavauꞌ pirung-aape navunge danto, teka Sailas naanka Timoti teke temono-koo otoretuꞌ. 15 Teinge Paulaꞌ tanatavai nariꞌ nanaakoꞌninge Aateni-namono-koo basi-antavauꞌ, eeꞌnoko Paulaꞌ botoaruꞌ Sailas naanka-anko Timoti, nauaareko namuꞌke poreeꞌnaang tee-anko. Teketa Paulaꞌ teꞌ otoko teing tenkenauꞌ.

Paulaꞌ Aatenie Daankiaruꞌnaꞌ

16 Aung aaꞌ tee Paulaꞌ teke Aatenie tenaanka Sailas naanka Timoti nempuresi otoitaaꞌ kumponing tositosinanka-koong baka-oonanka mmauꞌ teka temono-koo oovurira domang aaꞌnaꞌ karinsiꞌouꞌ. 17 Teketa pava dootuuꞌnava-koo Juꞌnupoong biikanava-koo tumparara teke karai tataꞌeekoꞌ Juꞌnupoong ninka eeꞌnoko teing Juꞌdeeaing Juꞌnupoong ninka nariꞌ dootuuꞌarikoꞌning, napoꞌ baaveroma bema doong kante teeꞌ nariꞌ tataꞌeekoꞌ teꞌ porokoꞌning ninka. 18 Niiꞌninge napoꞌ norukasiꞌnankai kuneꞌaama tataꞌeekoꞌ aaꞌninge Epikurian-navitu eeꞌnoko Sitoikiꞌnavitu. Teing-koo niiꞌninge aaꞌpaakoꞌ, “Aunge kara baukoi aming minkuvumaang?” Niiꞌninge napoꞌ aaꞌpaakoꞌ, “Nnaꞌ aung kumponinanka akovoraꞌkooning biikaang kara daankivumaung-pinaꞌ oroꞌparamang.” Aung tee Jiisuuꞌ eeꞌnara daankivuko teeꞌ, napoꞌ booꞌketa daaꞌaruꞌnung-koo. 19 Eeꞌnoko teinge mooꞌaara tee biikanooꞌ kakaꞌdekeroma beꞌantavauꞌ miring Areopakasi, aaꞌpaama, “Naumeriai tee kapooꞌ nerakamuriiꞌ dake nantoong nau-antaverimaung. 20 Aiꞌ dake kapooꞌ tee damisimaing niiꞌ taara-antamering, teeꞌkoo niiꞌ miruꞌnooꞌ noruꞌkoo piamorimang tee-koo kapooꞌkoo.”

21 Enang tee teing ookara Aateni-nupoong eeꞌnoko damisimainku teke otorokoꞌning kapooꞌ niiꞌnung nko-koo piavoroaruuꞌ teka doorenananka taara-koo eeꞌnoko nau-koo piavorouꞌ. 22 Teeꞌkoo Paulaꞌ Areopakasi-koo meuꞌ donkonura aaꞌpuuꞌ,

“Diiꞌ nantoong Aateni-nupoong, ninge diiꞌ avutevuꞌdariri aaꞌnaꞌ pareka nkonuka oorampimatoing.
23 Aiꞌ ninge tankinama tee meekanairu ooankotaaꞌ niiꞌnooꞌ boonturoma ooansing taaꞌniꞌanta eeꞌpinaꞌ daariari otoko, ‘Aung Kumponing tee noruꞌampiaung bakaang.’ Teka tee naning diiꞌke parekaverimaung noruꞌeriaꞌ tee aung ninge naurampimang diiꞌ. 24 Tee Kumponing ookutunung kansiꞌ nkovuuꞌnung eeꞌnoko ookara kapooꞌnanka kansiꞌkoo otoromaing tee eeꞌnara Ovoring paning-koong eeꞌnoko kansiꞌkoonge, teka teke boontunava naninge kanivumanooꞌke otoaung. 25 Kapooꞌkoo apukaꞌparavaunge. Naninge bakaang birenge pakuvuarupeuꞌ, aiꞌ teie eeꞌnarai baka ookara nantoong domang eeꞌnoko domaang avurimaunge eeꞌnoko ookara kapooꞌnanka. 26 Eeꞌnoko teie tee niiꞌ ookara nantoonanka narung-eta nkomuruꞌ ookutunairu-koo kansiꞌkoo oꞌnoriiꞌnaang. 27 Batei miruꞌmemuruꞌ oꞌnoriainaroong, napoꞌ oꞌnoriainairu bonoꞌmemuruꞌ teꞌ oꞌnori Kumponing besiꞌampiainaꞌ aaꞌpampima, ‘Aiꞌ pa taampampima peꞌnumpampiiꞌnaang.’ Teka tee tee isipoꞌke otoaꞌ niiꞌkoo narunaꞌ narunaꞌ, aiꞌ niiꞌ teing tee-koo oꞌnori domamariri nanampimaang naning-naummuri. 28 Teeꞌ diiꞌka diikaninge kena toronukai kena toroaama minkuaamanaꞌ aaꞌpaamanaꞌ, ‘Niiꞌ teing baurukaaꞌ masikeng.’

29 “Niiꞌ teing Kumponing baurukaaꞌ deemariri eeꞌ noruꞌampiaukaꞌ: Tee Kumponing tee Kooro dovang-koo silivaꞌ eeꞌnoko kapang tekaꞌniiꞌ nantoonge tamung nuuruupiaama mataunaꞌ tekaꞌpaamaung. 30 Urikamuꞌ nantoong noruꞌ otoroarukoꞌnang Kumponinge tamung oovurikoꞌ, teka enang tee Kumponinge ookara nantoong ookutunairu-kooning baka narung Kumponing masikung-anko bereꞌariiꞌnaang botoaring tompimpuriꞌneeng-koo damaꞌke. 31 Aiꞌ teie ookara nantoong kansiꞌnupoong simpeꞌuriainaꞌmung tero pinkaꞌantavuuꞌnung. Narunge naninge teie Pakoꞌpariꞌuuꞌnunge~ ookara biikaang aarumo tasiꞌpuitaaꞌ koontoꞌnaꞌ simpeꞌuriaing, eeꞌnoko niiꞌ ookara teeꞌ nkoaraaꞌnaang tasiꞌantamuruꞌ tee eeꞌnara Pakoꞌpariꞌniiꞌ booꞌketa daaꞌantavura.”

32 Teketa tee niiꞌninge tee napoꞌ booꞌketa daaꞌanta taaravaara benkenauꞌ, teka niiꞌninge aaꞌpauꞌ, “Niiꞌ napoꞌ taara-koo piamorimang tee kara naumering.” 33 Teketa Paulaꞌ tenkenuuꞌ teing-ankoita. 34 Teka niiꞌning nantoong tee ninka tapoꞌarira masikaꞌantavauꞌ. Teing-koo niiꞌnung Daionisias teke kakaꞌdeke-koo narung pankaing eeꞌnoko nani manikuma miring Damaris eeꞌnoko napoꞌ niiꞌning nariꞌ tenaanka ninka.

Copyright information for `NAS