Acts 26

Akiripaꞌke Simpeꞌuko Paulaꞌ Daankiaruꞌnaꞌ

Akiripaꞌke aaꞌpuuꞌ nauvuma tee Paulaꞌ, “Ninge enang tauraꞌdang daꞌ daka minkuraraaꞌnaang.” Eeꞌnoko tenang Paulaꞌ tankaꞌ toonuma penkeng-koong kara siraꞌparuꞌ aaꞌpuma,

“Ning eꞌmung biraankemaring nkaang kara siraꞌkoo daꞌankoi penkemarama Daurarong~ Akiripaꞌankoi teing kapooꞌ ookarai Juꞌnupoonge tuumpimaamaing-koo, eeꞌ noruꞌamira daꞌ tee ookara aarumonanka eeꞌnoko turananka Juꞌnupoong biikaning noruꞌei otomaung dau basinooꞌ. Teeꞌkoo ninge niaꞌdamaang tampaꞌ dooroontari ning taarameeꞌnaang.

“Nkaang aarumo tee temuꞌketa nemaaꞌnooꞌketa oꞌnoi oꞌnouꞌnaꞌ ookara Juꞌnupoonge noruꞌmai oꞌnong teing-koo nkaning nantoong-koo meuꞌke teke Jerusalemaꞌke. Teinge tee temuꞌketa noruꞌmai oꞌnong, siraꞌmaapeuꞌ piavorora deekoꞌ, tee ning tee Boto-koo Keperuuꞌnavitu-koong aarumo koontoꞌ siompansi oꞌnokoꞌnung, niikaang dootuuꞌkoo aaꞌnaꞌ monkeenaꞌnavitu. Enang tee ning aung aꞌ donkonansing tuutunange paara-koo tee biraanke, booꞌketa daaꞌ tavoꞌkuaing nempamaung-koo, Kumponinge niumaraang-koo maraka-antavuuꞌnung. Tee niiꞌnamuriiꞌ biraanke deeaꞌ niiꞌke ookarai Juꞌnupoonge nempampimaung muung eeꞌnoko doong karimarima Kumponing dootuuꞌampima. Teka tee, ee daurarong, tee eeꞌnara biraanke siraꞌpansioꞌ eeꞌninge tuumpimaamaung Juꞌnupoonge. Aming-koo diiꞌ Judiaꞌnupoong Kumponinge booꞌnuka daaꞌanta masikaꞌanta-koo makosiriaꞌ?

“Aꞌnooꞌ ninge tee ninka koontoꞌnaꞌ eeꞌpinaꞌ noruꞌankoꞌ: Aung miring Jiisuuꞌ Nasaretiꞌnung onou amutemuriiꞌke turampamaaꞌnoaing. 10 Eeꞌnoko tee teeꞌ nkoankoꞌ Jerusalemaꞌke, aaꞌnokoꞌ meekupoong Jiisuuꞌ sionuka kiimatanava-koo kuꞌnumparankoꞌ tauraꞌ tee piristiꞌnanka-koo pankenankai amauꞌnung ninka, eeꞌnoko tee narung deeaꞌ, niiꞌninge teing meekupoong dupisiꞌkoo mauꞌaarikoꞌ teing irikumparanko. 11 Eeꞌnoko napoꞌ ninge mmauꞌnamuꞌpie kiimatavarankoꞌ teka pava dootuuꞌnanka-koo ookara-koo Karistooꞌ penkempaavainaꞌ paara-antavarama. Eeꞌnoko bakei aaꞌnaꞌ iirang-antamarama mankiꞌantavarankoꞌ teing, bane osi pankeng oovuning biikaning-koo.”

Paulaꞌke Baka Bereꞌaruꞌnung-koong Minkunaa Nauvuuꞌnaꞌ Akiripaꞌ

12 “Niiꞌnaꞌmung teeꞌ nariꞌ nkomarama Damaskas-aape nanantuꞌ piristiꞌnanka-koo pankenge tauraꞌ amaara botomaioꞌ. 13 Eeꞌnoko ee daurarong, duaakiꞌnang taunge nanama araka paning-etaing ooantuꞌ aaꞌnaꞌ sisisiisi duaaꞌ divuꞌui. Ning eeꞌnoko teing nariꞌ nanampikoꞌning koromuri arakavaruꞌ. 14 Eeꞌnoko tenang niiꞌ ookara kansiꞌkoo doonko duaꞌmarira ninge aurong taaravantuꞌ Iiburunaꞌ karoma aaꞌmuko, ‘Soolo, Soolo, dake aming-koo ning mankiꞌantamemaang? Nkaang kara dimpaꞌema daka baikeraramaung irintoꞌ deemparako.’

15 “Eeꞌnoko ninge aaꞌpantuꞌ, ‘Daꞌ baa Ovoring?’ Eeꞌnoko Ovoringe aaꞌpuuꞌ, ‘Ning tee Jiisuuꞌ, tee dake mankiꞌantamemaung. 16 Teka donkoniaing deto, ning tee daꞌkoo oroꞌmarinooꞌ aung kapooꞌ otoko: Daꞌ miruꞌdamaang botorampainaꞌ nkovema siraꞌpeeꞌnaang enang oomeinaꞌ eeꞌnoko damaꞌke kapooꞌ napoꞌ daꞌkoo oroꞌmarara naurampainaꞌ. 17 Mmariꞌantarampaing nantoonge aaꞌninge turantaako dakanavitu Juꞌnupoonge eeꞌnoko Juꞌdeeainge, tevitu eeꞌnavitu daꞌ botoramaatomanooꞌnavitu. 18 Duta bante-antaveriko mutaanang-eta araka-koo bereꞌariaꞌnaang eeꞌnoko Sietaniꞌketa Kumponing-koo bereꞌariai biikaning orakaꞌ nkonanka tontaꞌaravainaꞌ, eeꞌnoko barenku-koo-navaro otoꞌevoroai teing ninka ning-koo baitoarira meekupoong deempariruꞌning ninka.’”

Paulaꞌke Kara Tampaꞌ Siompui Mintoomparamaung Nauvuuꞌnaꞌ Akiripaꞌ

19 “Tee teeꞌ, ee Daurarong Akiripaꞌ, kontemoaꞌ nko-koo teeꞌ paning-eta oroꞌparara naumuuꞌnaꞌkoo ninge siraꞌpansi nau-antavarantuꞌ Damaskasie, teketaꞌ Jerusalemaꞌke eeꞌnoko teketa ookutunairu-koo Judiaꞌnavaro-koo eeꞌnoko napoꞌ Juꞌdeeaing-koo orara aarumo sipaara Kumponing-aape bereꞌariiꞌnaang, eeꞌnoko tampaꞌ nkoarima bereꞌniiꞌnuka makosinaꞌ taaꞌniꞌantavariri otorooꞌnaang. 21 Okoraꞌnooꞌ teeꞌkoo Juꞌnupoonge komaara pava dootuuꞌnava pankava-koo dupisiꞌmaavaꞌnaang nkomauꞌ. 22 Teka Kumponinge pakumuioꞌ eꞌmung-koo basinooꞌ ning daankimaramaung bera eꞌmung aꞌ donkonansi kapooꞌ ooantuꞌnaꞌ siraꞌpamaang ookara nantoong-koo ovontung-eta bera toireꞌkoo basinooꞌ. Teeꞌ Moosesi dovang teing Kumponing-etaning nakaro-nupoong urikupoonge nkoaravaing tampaama naumaaruꞌnaꞌ nariꞌ minkuamaung, niiꞌnaꞌ deeaꞌ. 23 Aaꞌnoko Kumponinge niiꞌ domang-anta-koo Pakoꞌpariꞌniiꞌke baike toraꞌpuaing-koong eeꞌnoko tee tutunaꞌnung booꞌketa daaꞌaravaing-koong, eeꞌnoko teeꞌ nkoarama baka araka siraꞌparaaꞌnaang ookavitura-koo aaꞌnoko Juꞌnupoong-koo eeꞌnoko Juꞌdeeaing-koo.”

Paulaꞌke Akiripaꞌ Bereꞌkoo Pia-antavuuꞌnaꞌ

24 Eeꞌnoko tenang teie teeꞌ penkemparama minkuvuko Peestasie bokuma aaꞌpuuꞌ, “Paulaꞌ, daꞌ kanuꞌdaring. Dakaang barevare pankainge kanuꞌantaruing.” 25 Teka Paulaꞌke aaꞌpuuꞌ,

“Ning kanuꞌmaravaꞌ, daꞌ pankaing Peestasi, teka ning koontoꞌ toꞌbiimari masikaꞌ karomang.
26 Aunge dauraronge noruꞌui otong, masikee-antamupeuꞌ aing-koo kapooꞌkoo, eeꞌnoko tee-ankoi tamung danto minkuampeuꞌ teie noruꞌuioꞌ, aiꞌ ninge masikaꞌ noruꞌansi oꞌnong kapooꞌ aing-koo niiꞌnaare bakaang punkaaꞌkoo nerakanaare deeaꞌ, aiꞌ ookarai noruꞌai otong kapooꞌ nkoaruꞌnaꞌ. 27 Arekeeꞌ daꞌ daurarong Akiripaꞌ, dake ee Kumponing-etaning nakaro-nupoong urikupoong masikaꞌantaveri otong? Eeꞌ, noruꞌansi oꞌnong, dake masikaꞌantaveri otong.”

28 Eeꞌnoko Akiripaꞌke aaꞌpuuꞌ makuꞌuma, “Anaarei apukanaarei ee Karistooꞌaape bereꞌantameeꞌnaang?”

29 Eeꞌnoko Paulaꞌke aaꞌpuuꞌ, “Kumponing-koo kunsimaramang daꞌ narung paku-koo deeaꞌ teka aing ookara teeꞌ nariꞌ eꞌmung taaramaamatomaing diiꞌ ning-pinaꞌ oroꞌdariiꞌnaang aing sieena ioꞌ doonko otoko.”

30 Teketa tenang daurarong deto donkonuko aaꞌnouꞌ ovoꞌmaꞌ donkonuuꞌ eeꞌnoko teni Beenis donkonuuꞌ eeꞌnoko ookara nantoong teke baꞌnaniauꞌning teing ninka nariꞌ donkonauꞌ. 31 Eeꞌnoko tenang teketa tenkenaara biiꞌka kareaama aaꞌpaakoꞌ, “Aung naning kapooꞌ tee dupisiꞌkoong eeꞌnoko kiimatanava-koo pinkaꞌkoong makosi nkovuaung.” 32 Eeꞌnoko Akiripaꞌke Peestasi aaꞌpuuꞌ, “Aung naning unaa-antaveripeuꞌnung Siisaꞌke taaravuuꞌnaang arooꞌaravaruuꞌnung dei.”

Copyright information for `NAS