Acts 28

Paulaꞌ Maalta-namuiꞌkoo Otouꞌnaꞌ

Teketa teeꞌ domamariruꞌnooꞌketa niiꞌke noruꞌampiruꞌ temuiꞌ muiꞌnamuiꞌ miring Maalta-namuiꞌ. Eeꞌnoko temuiꞌnupoonge nantoonge aaꞌnaꞌ bakei navumaaruꞌ, onkeonkeꞌmaarima aaꞌnouꞌ ntaꞌ betuꞌmemaaruꞌ tenang eeꞌnang apoꞌuma kamaari nkoarako. Paulaꞌke tee koiꞌnanka oosivuma ntaꞌkoo betuꞌuko tenang tee boruꞌ doparopa-poꞌnung ntaꞌke uipaariiꞌoko teketa bakoarara Paulaꞌkoo bireng-koo kakiaruꞌ. Tenang teinge nantoonge temuiꞌnupoonge ooaara teu boruꞌnu bireng-koo biꞌari otoko teinge aaꞌpaakoꞌ biiꞌka kareaama, “Aung naning pa dupisiꞌnko deemparako bane aareri-eta domampari, teka teie kumponinge meroꞌnkoi domang-koo tauraꞌpuaꞌ.” Teketa Paulaꞌke tee boruꞌ ntaꞌkoo tankaꞌniꞌpura baike kuneꞌuaꞌ. Teketa teinge tee nempaakoꞌnung doremparara niiꞌnooꞌ booꞌ duaꞌarako ooaavaꞌnaang. Teka pankaroong nemparikotaaꞌ tee-koo kapooꞌ basiaravaruioꞌ teinge norunoruꞌ paariarira aaꞌpauꞌ, “Aung tee kumponinanka-koo narung.”

Narung ovoꞌmaꞌ pankaing temuiꞌkoong miring Publias teke kansiꞌ otoꞌevukoꞌnung simariruꞌnooꞌke dueꞌke. Teie eeꞌnarai bokumurira onkeonkeꞌmurira beenang doong-koo oꞌnori tampaꞌ nkomurikoꞌ niiꞌ damisimainku. Tenang eeꞌnang Publias bauma siipavoko uipaariiꞌ ninka kuviriꞌoma, eeꞌnoko Paulaꞌke bera beeroꞌuma bireng panteꞌura kunsivuioꞌ taarevouꞌ. Eeꞌnoko tenang eeꞌnang tee teeꞌ taarevoioꞌ taaravaara temuiꞌkoo-nupoong ookara siipa-poꞌnupoong tee-anko porora taarevorouꞌ. 10 Teinge tee niiꞌ avuavuꞌnanka mmauꞌ amaaruꞌ.

Paulaꞌ Roomaꞌ Basiaruꞌnaꞌ

11 Teketaꞌ tee beekuri kaara tankinuko teketa tenkenampiruꞌ aarerie teke kamaari bakaang batei-koo temuiꞌkoo otouꞌnareng-koo koinampira. Eeꞌnoko temuiꞌnupoonge ookara kapooꞌnanka nanuꞌkoo apukaꞌmariruꞌning teꞌ aareri-koo kuung siꞌmemaaruꞌ. Tereng aareri-nareng Aleksandariaꞌ biikanareng miring Pauroonka Kumponinka tampaakoꞌnareng, uroꞌkanooꞌke boreꞌ kenaanka tekaꞌniiꞌnareng. 12 Teketa Siirakius basimarira teke beenang doong oꞌnoruꞌ. 13 Eeꞌnoko teketa tenkenampira tee dovinge damaꞌdu-aape biiꞌmuriꞌneeng-koo kororairaiꞌ nanampikotaaꞌ doonko Reekium basimariruꞌ. Teke naꞌmung doong oꞌnorioꞌ doving toroarama eeꞌ depeto poioꞌ tenkenampira keꞌmunta-naꞌmung namuꞌke Puteoli basimarira aareri teka sipampiruꞌ. 14 Eeꞌnoko teka niiꞌke niiꞌning Karistooꞌkoo baito-nupoong kuneꞌarampirioꞌ teing tasiꞌmaarira bokumaaruꞌ teke teing ninka nariꞌ oꞌnoriiꞌnaang ~keꞌmunta-taa doong-koo. Eeꞌnoko temono-ita daanto kauꞌke nanampiruꞌ bera Roomaꞌaapenairu-koo basimariruꞌ.

15 Eeꞌnoko teinge Karistooꞌkoo baito-nupoonge niiꞌ moruꞌnooꞌ taaravaara Roomaꞌketa porora narung osi-koo basiariruꞌ niiꞌ kuneꞌmaariiꞌnaang, Aapia Bakanooꞌ Baaveroma tampaakoꞌnooꞌ. Eeꞌnoko teing-koo niiꞌnarionge pava beevaari baave-kooning otokoꞌnooꞌka osia kuneꞌmaaruꞌ. Paulaꞌ teing oovurira Kumponing-koo tampara tampuma domang purimparuꞌ.

16 Eeꞌnoko tenang Roomaꞌ tavoꞌmarira Paulaꞌ baka oovunava-koo otoꞌ piavoioꞌ tauraꞌpauꞌ teka narunge piatooronuka-koonge tanatavui otooꞌnaang.

Paulaꞌ Daankiaruꞌnaꞌ Roomaꞌke

17 Eeꞌnoko beenang doong tankinuko Paulaꞌke ookara Juꞌnupoong pankenanka teke otorokoꞌning naroꞌ bokuvuruꞌ. Eeꞌnoko tenang oosiaririoꞌ Paulaꞌke aaꞌpuruꞌ teing, “Ee diiꞌ mmarang, Juꞌnupoong, ninge tee bane kapooꞌ nkoampaꞌ niikaning nantoong orari-anta-koo eeꞌnoko niikakatauro biikaning toomonanka, teka ning tamung daiꞌmaara Jerusalemaꞌka Roomaꞌnupoong-anko tavoꞌmauꞌ. 18 Eeꞌnoko teinge Roomaꞌnupoonge nkaang kara simpeꞌaara tee ning kiimata-ita unaa-antamaavaꞌnaang piavorouꞌ, kapooꞌ tenaiꞌkoo nkanaiꞌkoo ning booꞌanta-koo makosi ooaavarura. 19 Teketa tenang Juꞌnupoong teeꞌkoo piavoroaruioꞌ ninge niiꞌnaꞌ noruꞌamparura Siisaꞌ narung-koo arooꞌ sipantuꞌ simpeꞌmuuꞌnaang. Nkaning Juꞌkooning pankeng tuumpi-koo moaꞌ. 20 Teeꞌkoo ning tuumpimauꞌnooꞌkoo ninge diiꞌ oorampira diiꞌ kararampima naurampiiꞌnaang botomaring. Okoraꞌnooꞌ ning sieenai daiꞌmari oꞌnoing tee aung kapooꞌ: Tee Pakoꞌpariꞌniiꞌ Isireeli-nupoonge Nempaamaung ninge masikaꞌantavamaung-koo.”

21 Eeꞌnoko teinge aaꞌpauꞌ tee, “Niiꞌke karavoto Judiaꞌketa nkavampiaꞌ daꞌkoo minkunaa, eeꞌnoko niiꞌnung niiꞌmarang-koong otoaꞌ niiꞌkoo aꞌ pora niiꞌ naumurima orakaꞌ minkuruuꞌnung daꞌ. 22 Teka niiꞌ dake minkueko taara-koo piamorimang dake noruꞌei otoinaꞌ, aiꞌ niiꞌke tee ookanairu-koo tamung orakaꞌ nariꞌ minkuaako taaravampimaung tevung nerakavung dake siompemanavung.”

23 Tenang teinge doong niiꞌnaꞌmung miruꞌevaara otokoꞌnava-koo karinga porouꞌ. Eeꞌnoko teie enang tevung nerakavung kankenkankeng-antavuruꞌ teing, taneꞌketa bera kamunooꞌke basi. Eeꞌ nauvuruꞌ, nantoong Kumponing-namuuꞌkooning arekeeꞌ oroꞌnuka teie daankivuruꞌ teing-eta kara aaꞌnoko Moosesie boto sipuma daarivuuꞌning eeꞌnoko teinge niiꞌninge nakaro-nupoonge tenang-eta deto daariaakoꞌning, teing tasiꞌantavuriiꞌnaang tee Jiisuuꞌ tee Kumponinge temuꞌketa Pakoꞌpariꞌniiꞌ bakaang muuꞌ tare-koo. 24 Eeꞌnoko niiꞌninge Jiisuuꞌ tasiꞌpauꞌ bakaang kara taaravaara, teka niiꞌninge masikaꞌantavaavaꞌ.

25 Teketa siivenkeꞌeema tenkenaavaꞌnaang nkoariko Paulaꞌke asiꞌnaare minkuvuma aaꞌpuuꞌ, “Tanuaang Meekung tee masikaꞌparuꞌnung teing-koo diumaraang-koo Aisaiaꞌ karantavuko~ daarivuma aaꞌpuuꞌnooꞌka,

26 ‘Aing Juꞌnupoong bera aaꞌperiai, Diiꞌke tee bakei bane nkaang kara taaraverikotaaꞌ, teka onoue komperiaukaꞌnung; eeꞌnoko bane taaꞌniꞌanta ooverikotaaꞌ, teka tasiꞌperiaukaꞌnung. 27 Teeꞌ naueriaing, aiꞌ aing nantoong teing maroita domang poruruorouꞌ~ eeꞌnoko biikaang punkaaꞌ kapamporouꞌnankai maroita taaravaaꞌneeng-koo, eeꞌnoko biikaang duta mutuuariruꞌnankai aaꞌnoꞌneeng-koo: dutai tasiꞌpaara, punkaaꞌke taaravaara, domange onou kompaara ning-anko bereꞌariko taare-antavaramiꞌneeng-koo.’
(Aisaiaꞌ 6:9,10)

28 “Enang tee, teeꞌ daarivuuꞌnooꞌkoo diiꞌke noruꞌeriaing Kumponinge tee domang-anta bakaang Juꞌdeeaing-anko beeꞌnaang tampuuꞌ. Teinge taaravaavaing tee.” 29 Eeꞌnoko Paulaꞌke teeꞌ minkuvuioꞌ teing Juꞌnupoong biiꞌka deepaikoꞌeema tenkenauꞌ.

30 Eeꞌnoko tee Paulaꞌ tevaꞌkoo kemareꞌka ookutuning otouꞌ daiꞌaritaaꞌ baka mooꞌuma teva. Nantoong tee-anko porokoꞌning onkeonkeꞌurikoꞌ. 31 Eeꞌnoko makempuaꞌ teing-koo daankivukoꞌ tee Kumponing bakaang muuꞌ eeꞌnoko kapooꞌke avoꞌuaruko nau-antavurikoꞌ Jiisuuꞌ tee Ovoring tero Pakoꞌpariꞌniiꞌ ookara nantoong domamuriainooꞌkoo.

Basi teꞌ.

Copyright information for `NAS