Acts 4

Piita naanka Jooni Daiꞌaaretuꞌnaꞌ

Eeꞌnoko tenang Jooni naankai Piita teing nantoong karavaareko teing piristiꞌnanka eeꞌnoko pava dootuuꞌnava pankava orokovui tarenuka~koong boreꞌ eeꞌnoko teing Noruꞌ Pitunavitu~ teꞌ tenaanka-anko porouꞌ. Porora teing aaꞌnaꞌ iiravorouꞌ taaravaara tenaankai Jiisuuꞌ daankivurema nantoong booꞌketa daaꞌariaing minkuvureko. Eeꞌnoko aaꞌnaꞌ kamunooꞌuioꞌ teinge tenaanka daiꞌaareta kiimatanavaꞌkoo sipaaretuꞌ bera daunaꞌmung-koo basinooꞌ otoreeꞌnaang. Teka mmauꞌke tenaanka-koo tee kara taaravauꞌninge masikaꞌantavauꞌ. Eeꞌnoko deerunooꞌkoo teing nantoong bereꞌariruꞌning paꞌnokoꞌ kokoreiꞌkoo~ basi.

Tuutunampaaresioꞌ Piitai Makuꞌuruꞌnaꞌ

Teketa daunaꞌmung Juꞌnupoong koompaaraꞌnavitu naroꞌariruꞌ aaꞌning tarenuka, pankenanka eeꞌnoko boto naunuka. Aanasi, tee ookara-koo dau basi piristiꞌ, eeꞌnoko teing donkaang tee ninka Kaiapasi, Jooni eeꞌnoko Aleksandaꞌ narung puataꞌkooning nariꞌ porouꞌ teꞌ Jerusalemaꞌ. Eeꞌnoko tenang teinge tenaanka meuꞌ baꞌnang-antavaareta niaꞌaarekoꞌ aaꞌpaarema, “Iriꞌ eeꞌnoko miring baa bakaange tee aung amuriiꞌ nkoveremang deeꞌke?”

Teketaꞌ tee Piita Tanuaang Meekunge maantoꞌui aaꞌpuruꞌ teing, “Diiꞌ tarenuka eeꞌnoko nantoong-kooning pankenanka, taaramerereriai. Diiꞌke eꞌmung niiꞌnaꞌ noruꞌerima tuutunamererimaatomaung deekoꞌ kapooꞌ tampara nkoampetuꞌnung-koo aung-koo kauꞌ doota-koo, eeꞌnoko teeꞌ taarevouꞌnaꞌ noruꞌkoo piaroriko deekoꞌ makosi. 10 Naurarampiko tee aung tasiꞌperiaing diiꞌke eeꞌnoko ookarai Isireeli-nupoonge tee Jiisuuꞌ Nasaretiꞌnung tee Domamuri Taremuriainooꞌkoo Tero Pakoꞌpariꞌniiꞌ bakaang miring ninka teeꞌ nkoampesing. Tee eeꞌnung, diiꞌke aaꞌbarataꞌkoo dupisiꞌeriko Kumponinge booꞌketa daaꞌuuꞌnung, tee bakaang iriꞌke aung naning diiꞌkoo dutakanooꞌke tampaꞌ otoi donkonui otong. 11 Daari Meekunge tee naning Pakoꞌpariꞌniiꞌ miruꞌui eeꞌ minkuvuuꞌnung,

‘Areꞌ eeꞌnareꞌ kapanareꞌ diiꞌke pava kaninukai pooreꞌerima duaꞌeruꞌnareꞌ enang ookutunava-koo eꞌmanianareꞌ tumanareꞌ deemparioꞌ tasiꞌperiaing!’
(Kena 118:22)

12 Eeꞌnoko niiꞌnung domaang mooꞌmuripeuꞌnung otoaꞌ, Jiisuuꞌ narung. Bakei, ookutunairu-koo paning-koo boonameng-koo niiꞌnung otoaꞌ bakaang miring bokuampiko domamuripeuꞌnung.”

13 Enang tee teinge tenaanka Piita naanka eeꞌnoko Jooni avororeaꞌ deravareko ooaareta taꞌninauꞌnung, tamunsiꞌnaanka, tampaꞌ barearearuuꞌnaanka-pinaꞌ noruꞌaarema. Teketa tasiꞌpaaretuꞌ Jiisuuꞌ ninka nariꞌ otorekoꞌnaanka. 14 Teka tee naning taarevouꞌnung tenaanka-koo dueꞌ donkonuioꞌ ooaama teinge kapooꞌ minku-koo makosiaavaruuꞌ tenaanka tooꞌdeng-koo. 15 Bera koompaaraꞌnavitue damaꞌdu botoaareta biiꞌka makenge minkuarima aaꞌpauꞌ, 16 “Arekeeꞌ nkoarampiiꞌnaang niiꞌke anaanka? Aiꞌ ookara Jerusalemaꞌnupoonge tee noruꞌai otong taꞌnimpaariiꞌ pankaing nkovuresing, eeꞌnoko niiꞌke penkempampiarupeuꞌ. 17 Teka nantoong-koo avitoitoi beremparavarooꞌnaang deekoꞌ potearampiaing anaanka napoꞌ aung ninka miring ninka naning karavureaukaꞌnaꞌ.” 18 Teketa tee napoꞌ bokuaareta poteaaretuꞌ koontoꞌ minkuvurearooꞌnaang eeꞌnoko nau-antavaarearooꞌnaang Jiisuuꞌ bakaang miring-koo.

19 Teka Piita eeꞌnoko Jooni naankai makuꞌaarema teing aaꞌpaaretuꞌ, “Arekeeꞌ tampaꞌ, diiꞌ nantoong taara-koo aiꞌ Kumponing? Kumponing-koo dutakanooꞌka makuꞌnaꞌ enang noruꞌeriai. 20 Neeꞌke niiꞌnaꞌ bereꞌkoo makosi deeaꞌ, teka teeꞌ nariꞌ taaravampema ooampetuꞌnaꞌ minku-koo makosi.” 21 Teketa teinge tee sisikeera avaarepeuꞌnaꞌ papaaravauꞌ, ookarai nantoonge Kumponing daangampaako tee-koo nkoaruꞌnung-koo. Eeꞌnoko aaꞌnaꞌ avoroꞌantavaareta sipaaretuꞌ. 22 Aiꞌ tee aung naning taꞌninaꞌ taarevouꞌnung tee bakaning mareꞌ karenaumo kivora divuꞌ.

Dootuuꞌnupoong Eentavariruꞌnaꞌ Iriꞌ Nka-koo Tampaꞌ Daankiariiꞌnaang

23 Teketa tee Piita eeꞌnoko Jooni sipaaresioꞌ beeꞌmaikororiꞌanko bereta nauaaretuꞌ kapooꞌ teinge piristiꞌnuka-koo ovontunge eeꞌnoko nantoong-kooning pankenankai minkuauꞌning. 24 Eeꞌnoko tenang teinge taaravaara tee teing deto aaꞌnaꞌ nariꞌ kareauꞌ Kumponing-anko aaꞌpaama,

“Ovoring, daꞌ Kumponing ookara kapooꞌ nkoveuꞌnung aaꞌnimpoꞌ, paning eeꞌnoko kansiꞌ eeꞌnoko pirung.
25 Dake Tanuaang Meekung ninka temuꞌnung niuma Deevitaꞌ, dakaang muuꞌ uripoꞌ tarevukoꞌnung, karantavema aaꞌpeuꞌ,

‘Aming-koo teing akovituri iira ninka daaꞌarimang? Aming-koo nantoong orakaꞌ makotuaꞌnaꞌ nko-koo maroarimaunge!
26 Ookara dauraronanka kansiꞌkoo otoromaing tavuꞌkoo maamuariri otorong. Pankenuka naroꞌarira otorong tee Ovoring turang-koo eeꞌnoko tee tero Pakoꞌpariꞌuuꞌnung nantoong domampuri tarevuriainooꞌkoo.’
(Kena 2:1,2)

27 “Masikaꞌ minkueing, aaꞌnoing Eerotiꞌ eeꞌnoko Poontiasi Pailatiꞌ, Juꞌnupoong eeꞌnoko akovitu nariꞌ tapoꞌariring aung-koo osi pankaing-koo Jiisuuꞌ turang-koo, tee dakaang muuꞌ tare-koo dake pakoꞌpariꞌeuꞌnung. 28 Teing naroꞌariring nko-koo ookara kapooꞌnanka dake dakaang iriꞌke eeꞌnoko piai tero miruꞌeuꞌning tavoꞌaraaꞌnaang. 29 Enang tee mauꞌmauꞌmaariko ooverira Ovoring iriꞌ ameriaing dakaning botovotonaaꞌnuka dakaang kara amorompiaꞌ siraꞌpampiainaꞌ. 30 Eeꞌnoko dakaang bireng tovoroꞌdaravaing nantoong taare-anta-koo, eeꞌnoko taaꞌniꞌantananka taꞌnimpaariiꞌnanka nko-antamemuriai tee dakaang botovotonaaꞌkoo kuunge miring Jiisuuꞌ tampampiko.”

31 Enang tee kunsi bakeariko teꞌ eeꞌnooꞌ teing oosiariruꞌnooꞌ danuꞌarako ookara Tanuaang Meekunge maantoꞌuruꞌ, teketa Kumponing bakaang kara siraꞌpaakoꞌ avoreaavaꞌ.

Dootuuꞌnupoong Domange Daiꞌei Pakueekoꞌnaꞌ

32 Enang tee tevitu ookutunavitu masikaꞌanta-poꞌnavitu domang nariꞌ noruꞌarima nariꞌ mantomparikoꞌ. Naninge eeꞌ tampuaꞌ: Kapooꞌ ning otoꞌmemuining ninka nkaning, teka teing ookara kapooꞌ nariꞌ otoꞌevorokoꞌ. 33 Eeꞌnoko tee ninka iriꞌ pankaing ninka teinge kara okovuri nkanukai Ovoring Jiisuuꞌ booꞌketa domamparuꞌnaꞌkoong kara ooauꞌnaꞌ siraꞌpauꞌ, eeꞌnoko ookara biraanke-poꞌnupoong deempariruꞌ. 34 Naning kapooꞌkoo ataꞌoiꞌ otoaruuꞌ teing-koo meuꞌke, aiꞌ teinge ookarai aaꞌnong teing kansiꞌpoꞌnupoong eeꞌnoko pavapoꞌnupoonge kanteariri baaveaama mooꞌnooꞌ nkavaama kara okovuri nkanuka-anko tavoꞌaakoꞌ. 35 Eeꞌnoko teing narunaꞌ narunaꞌ biiꞌka tankaampeekoꞌ ataꞌoinku-koo. 36 Narung pakupaku nkovukoꞌnung tee Josepaꞌ, niiꞌnaꞌ “Banabasi” kara okovuri nkanukai tampauꞌnaꞌ (miruꞌnooꞌ: domang kuaaꞌanta bauko) Liivaiꞌ bakanarempoꞌkoong, Saiparasi-namuiꞌnung. 37 Teie eeꞌnunge kansiꞌnameng baavevura mooniꞌ kara okovuri nkanuka-anko tavoꞌuuꞌ tankaampaavaꞌnaang.

Copyright information for `NAS