Ephesians 5

Arakamariri Oꞌnoriaing Kumponing-nung Arakai

Teeꞌkoo diiꞌ Kumponing baurukaaꞌ, teie piaarurimaing, paararariaing tee-pinaꞌ nariꞌ otoꞌkoo. Piaareeri otomatoai teeꞌ Karistooꞌke piaamuruꞌnaꞌ eeꞌnoko tee baka niiꞌkoo avaruꞌ tee boontunang tampaꞌ nuuraaꞌ Kumponing-koo. Kaukauro-nko, eeꞌnoko noruꞌ kuꞌmiꞌ siong, niiꞌnooꞌ makosi deeaꞌnaꞌ karaaꞌ bakei diiꞌkoo otoaukaꞌnung; minkueriaꞌ otoai Kumponinge meekaꞌantanisinuka deentariri. Napoꞌ kara sikuriꞌke siꞌ, kara kanuꞌ eeꞌnoko deuꞌ makotuaꞌ diiꞌke minku-koo. Tampaꞌ tang narung diiꞌke minku-koo makosi. Koontoꞌ tasiꞌperi noruꞌeriaing naning tee kaukauro-nko, naning kiiroraaꞌ deeaung, niiꞌnooꞌ mamairontoꞌ tee otoꞌevuaukaꞌnung barenku-koo Karistooꞌke eeꞌnoko Kumponinge tareaaremaing ninka. Temuriiꞌ karaaꞌ siong kumponing daang-koong boontuvuma-nko. Eeꞌnamuriiꞌkoo Kumponinge iira basi-antavumaung teing-koo bakaang kara siompaavaing-koo. Taaraveriaukaꞌ niiꞌninge niiꞌnaꞌ nauraariko kara menaankavoroma. Tee tee teing ninka nariꞌ mantaꞌdeeri otoriaukaꞌ.

Tero tee diiꞌ mutaanange maantoꞌduri otorikoꞌning, teka enang arakai Ovoring-etainge maantoꞌduri otong. Tee tee enang araka sirakaꞌantaveri nanirimaatoaing. Noruꞌeriaing tee eeꞌnara arakai aing aaꞌning tavoꞌantavumaung: tampara aarumo, aarumo koontoꞌ eeꞌnoko kara masikung amutemuriiꞌari. 10 Eeꞌnoko ioꞌ paaraverira ooveriaing aming-koo Ovoring dotuaramaunge. 11 Temuriiꞌ mintoong mutaanang-koong kapooꞌ basiaravaing-koo kantoꞌdariaꞌ otoaing, teka siraꞌperiai temuriiꞌ aarumo orara. 12 Kapooꞌ makemparioꞌ nkoaamaing bakei maremaare, maimaiaꞌnaꞌ taara minku-koo. 13 Teka tenang siraꞌpevurereriko teie arakai tee biikaang orakaꞌnko orara-pinaꞌ tasiꞌparioꞌ siraꞌpuaing. Eeꞌnoko daamparimanaꞌ tasiꞌparira niiꞌning tee arakavariaing napoꞌ. 14 Teeꞌ eeꞌnaꞌ kenai minkuvumanaꞌ aaꞌpuma,

“Tanteraravai daꞌ aasiꞌ bauko. Booꞌketa daaꞌdarako Karistooꞌke daꞌ araka-antaruaing.”
(Aisaiaꞌ 26:19; 60:1)

Aampariꞌmarima Tanuaang Meekunge Maantoꞌmariri Oꞌnoriainaꞌ

15 Enang tee araka-koo otoritaaꞌ tarerariri otoriaing diiꞌ otoriainaꞌkoo, tampaꞌ mataurariri, kanuꞌaapenaꞌ deeaꞌ. 16 Teeꞌ nkorarima doona siperiaukaꞌ, aiꞌ enang batei orara, doong arikung. 17 Teeꞌkoo kanuꞌdariaukaꞌ, teka paaraveriai noruꞌkoo Ovoring bakaang pia. 18 Purintoꞌnaruꞌke baruꞌ naikirima kanuꞌanta-koo bakerariai diikaang domang ootukunavaro orari-antarariꞌneeng, teka Tanuaang Meekunge maantoꞌduri otoaing. 19 Teeꞌ otoritaaꞌ kenanankai karareerimaatoai aaꞌninge Daari Meekung-koo daariniiꞌninge, Ovoring daangang-koo nantoonge toroaamainge eeꞌnoko Tanuaang Meekunge karantavuko~ kenanankai. Diikaang domang-eta kenararima amutemuriiꞌ ninka kovirariaing Ovoringe taararuriainaꞌ. 20 Ookara batei-koo tampara tamperimaatoai tee-koo Kumponing tee Niuma, niikaang Ovoring Jiisuuꞌ Karistooꞌ bakaang miring-koo. 21 Eeꞌnoko arooꞌantareeri otorimaatoaing Karistooꞌkoo meeꞌduꞌpirariri.

Niiꞌdarintu

22 Diiꞌ biiꞌankaaruꞌ diiꞌunkaampi-koo arooꞌdariri otorimaatoai Ovoring bakaang kara arooꞌerimanaꞌ, 23 aiꞌ donkaani tee manikuma bakaang boreꞌ teeꞌpinaꞌ nariꞌ Karistooꞌ dootuuꞌnupoong-koo boreꞌ deempari otomanaꞌ, bakaang mono, eeꞌnoko tee tee baka domang-anta tee mono-koo. 24 Tee tee teeꞌ nariꞌ dootuuꞌnupoong Karistooꞌkoo arooꞌariri otoromanaꞌ teeꞌ nariꞌ diiꞌ biiꞌankaaruꞌ diiꞌunkaampi-koo arooꞌdariri otoriaing.

25 Diiꞌke biiꞌunkaampie diiꞌankaampi piaaverereri otomatoai teeꞌ nariꞌ Karistooꞌke dootuuꞌnupoong piaavuri bakaang mono avaruꞌnaꞌ. 26 Teeꞌ nkovuuꞌ teing naroꞌka baꞌaang makosinavitu deempariko tevitu kiiroraaꞌantavui meekaꞌantavuuꞌnaang aaꞌnoma ntonge duuꞌ kara meekaꞌanta-koong ninka. 27 Karistooꞌke teeꞌ nkovuuꞌ tevitu bakanavitu tee-anko pipiraari donkonuuꞌnaang nerampari, kuꞌmiꞌ dovang dopai, naankuviraaꞌ, meekaꞌnisi, dakaosiꞌ. 28 Teeꞌ nariꞌ biiꞌunkaampie biiꞌankaampi piaavaarimatoaing, teeꞌ biikaang mono biiꞌka piaavarimanaꞌ nariꞌ. Baa tee naning baꞌaang piaavumaung tee baka piaavaramaung teni piaavui. 29 Naning bakaang mono munteꞌaramaung otoaꞌ, teka tee mono bauꞌaramaung piaavari tanatavarama, teeꞌ nariꞌ Karistooꞌke bakanavitu dootuuꞌnupoong tanatavurimanaꞌ. 30 Teeꞌ nkorariaing diiꞌ bakaang mono-koo mantaꞌdeeri biꞌdariri otorining deentariko. 31 Teeꞌ Daari Meekunge minkuvumanaꞌ aaꞌpuma,

“Teeꞌkoo naninge baumararing sipureta tee baꞌaang ninka daiꞌarara tenaanka narung deempareaing.”
32 Kapooꞌ pankaing masikung aung-koo bakuꞌari miruꞌari otong, nka ninge eeꞌ ooamaang: Aung kapooꞌ Karistooꞌ ninka bakanavitu dootuuꞌnupoong miruꞌuri otoing. 33 Teka siraꞌpari otoinaꞌkoo eeꞌ otong: Diiꞌke narunaꞌ narunaꞌ diiꞌankaampi piaaverererimaatoai teeꞌ diikaang mono diiꞌka piaararimanaꞌ nariꞌ. Eeꞌnoko baꞌaang baꞌung-koo meeꞌduꞌpiari otomatoai.

Copyright information for `NAS