Ephesians 6

Niiꞌ Biurukaaꞌ Eeꞌnoko Niiꞌ Biumaraang

Toireꞌke tee diumaraang Ovoring-koo tampaꞌ taaraverererimaatoaing, aiꞌ aung tee diiꞌ diikaang nko-nko. Daari Meekung-koo eeꞌ otong,

“Daumararing deto noruꞌeresi pakuereaing. Teeꞌ nkorarama tee anke kansiꞌkoo pankaroong tampaꞌ otoaing.”
(Boto 5:16)

Aung tee tutunaꞌnung boto Kumponing-etaing maraka-anta ninka mavoꞌpari otoing. Diiꞌke biumaraange diurukaaꞌ iirang-antanaꞌ nkovereriaꞌ otoai, teka tampaꞌ tanataverereriai Karistooꞌ bakanaꞌ kakeꞌii-antavereri, bakaang kara bare-antavererima.

Botovotonaaꞌnuka Eeꞌnoko Teing Tare-nupoong

Diiꞌ daiꞌnisinukai teing diiꞌ tanataraarimaing anke kansiꞌkoo makosinaꞌ ankampereri mataaꞌirariri siompererimaatoai tunsi paakarariaꞌ, teeꞌ Karistooꞌ dotu-antanaꞌ noruꞌeri. Nantoonge ooraariiꞌnaang tampaꞌ nariꞌ mintoontariaꞌ otoai akoꞌ dotu-anta-koo, teka diiꞌ Karistooꞌ bakaning botovotonaaꞌnuka deentariko domange tampaꞌ noruꞌeri mintoontariaing Kumponing-koo. Doturoturariri pakuereriaing kara siomperi – Kumponing noruꞌeri, nantoong noruꞌ ereriaꞌ. Noruꞌeri otong Ovoringe tee nantoong ookara kapooꞌ tampaꞌ nkoaamanaꞌkoo tampaꞌ makuꞌuriaing aaꞌning daiꞌnisinuka eeꞌnoko daiꞌariaing nariꞌ. Diiꞌ oko-nupoonge tee tampaꞌ tarevereriainge teing diikaning teeꞌ nariꞌ, mauꞌmauꞌereriaꞌ eeꞌ noruꞌerima: “Niiꞌ ookara taremurimaung otong teke paning-koo nariꞌ noruꞌmuri, duukung sipuaunge.”

Nopaꞌmariri Oꞌnoriaing Kare-koo Makotumpiri

10 Asirang-koo eeꞌ naurampiiꞌnaang: Purintariri otoriaing Ovoring-koo bakaang iriꞌ iirakuta ninka. 11 Nopaꞌdariaing ootukununge Kumponing bakaang mononopaꞌ tavuꞌkoonge tee ninka nariꞌ Sietaniꞌke aavaruriko dimpaꞌeriainaꞌ. 12 Aming-koo, nnaꞌ niiꞌ tee nantoong tumuusinanka ninka tameeriaꞌ, teka aaꞌning ninka: maꞌnari-koo ovontung avatevaatang-koo neriariri otoroi Sietaniꞌkoo kuunge, paning-nairu-kooning-koo oravitu bakei maare ninka tameering, mutaanang-aapei ootukunung kansiꞌ booniꞌantanuka enanaroong-koo. 13 Teeꞌkoo nopaꞌdariaing teie Kumponing bakaang mononopaꞌke ootukununge diiꞌ dimpaꞌdariainaꞌ doong oraꞌmung basiarako, eeꞌnoko kare oparako diiꞌ tee teeꞌ nariꞌ tampaꞌ donkoniri otoriaing. 14 Tee tee tampaꞌ pinkaꞌdariri donkoniriaing. Kara masikunge tokoniꞌpinaꞌ tokorariai. Koompari otoꞌ siꞌdaravai murukeu-neeꞌpinaꞌ. 15 Maamurariri otoriai tee tampara doorenang mooa-koong nkavui nanuꞌkoo teeꞌ piatooronuka~koo tutung kauꞌkoo boonamante~ baraaꞌarimanaꞌ maamuariri. 16 Napoꞌ teing ookara ninka baito komperiai kapatau kompaamanaꞌ tumpariꞌ ntaꞌpoꞌning sirivaaꞌuko taamparavaing teie orarai, Sietaniꞌke, baiꞌuko. 17 Eeꞌnoko deto komperiaing tee domang-anta Kumponinge aruruꞌnung tee-pinaꞌ diikaang baakopo. Napoꞌ komperiai tee Kumponing bakaang kara tee-pinaꞌ bainatu tavuꞌkoong Tanuaang Meekung-etaing. 18 Teeꞌ Tanuaang Meekunge pakururimanaꞌkoo ookara batei-koo kunsirarimatoai amutemuriiꞌ paku nka-koo baitorarima. Eeꞌnoko teeꞌ nkorarima muung eeꞌnoko doong mantontariri eentaevurerereriai Kumponing bakaning meekupoong ootukunairu-koo. 19 Ning teeꞌke kunsi-koo pakumeriai tenang ninge kara daankiamaꞌnaang nkomarako naumuaining-koo, tampara doorenang makempari otokoꞌnung noruꞌantavarampainaꞌ amaiaaꞌmoaꞌ. 20 Temuriiꞌ kara nka-koo botomuuꞌnung deemarako entamemuriaing amorompaꞌ daankiampainaꞌ makosinaꞌ bane daiꞌmari oꞌnoitaaꞌ.

Asiꞌnaare

21 Enang tee ninge Tikikas diiꞌanko botoamaang tee mmaikoꞌ masikung eeꞌnoko Ovoring-koo mintoomparama mutekaroꞌarakooꞌ. 22 Teie naururiaing niiꞌ oꞌnorinaꞌ eeꞌnoko ninge nkoamaing kapooꞌ, eeꞌnoko diikaang domang kuaaꞌantaruriaing.

23 Mooa eeꞌnoko piaa tee ninka masikaꞌanta tee diiꞌkoo ntaraꞌmainkaang-koo otoaing Kumponing Niuma-ita eeꞌnoko tee Ovoring Jiisuuꞌ Karistooꞌketa. 24 Biraanke otoaing diiꞌkoo niikaang Ovoring Jiisuuꞌ Karistooꞌ piaa oꞌpaaꞌke piaaverimaing-koo ookara-koo. Teeꞌ nariꞌ.

Copyright information for `NAS