Genesis 1

Ookara Kapooꞌnanka Kumponinge Pupuꞌuuꞌnaꞌkoong Minkunaa

Tenang tutunaꞌ masipoꞌ Kumponinge aaꞌning paning eeꞌnoko kansiꞌ nkovuuꞌnang. Aung kansiꞌ tee, emuꞌ otoinaꞌ otoarukoꞌ; naroomparavaꞌ otokoꞌ; tamung domaang-poꞌningmeeva otokoꞌ. Dau-eta mutaanange dakaꞌpui otokoꞌ tee poonaruꞌ baka otoko, eeꞌnoko tee Kumponing bakaang Tanuaang tee-koo pirung-koo daue aavinuko.

Tenang Kumponinge karoma aaꞌpuuꞌ, “Araka, tavoꞌdaravai,” eeꞌnoko tenang araka oroꞌparuꞌ. Eeꞌnoko Kumponinge tee araka tampaꞌ oovura dotuarara tee araka simpeꞌuuꞌ mutaanang-eta. Eeꞌnoko Kumponinge tee araka doonaaꞌ tampuuꞌ eeꞌnoko mutaanang muung tampuuꞌ. Teketa aaꞌnouꞌ muung tankinuko taneꞌpuuꞌ eeꞌnoko teꞌmung teꞌmung tutunaꞌnaꞌmung.

Eeꞌnoko Kumponinge napoꞌ karoma aaꞌpuuꞌ, “Meerooꞌnavaro doona otoai tankaampuresi pirung boonaruꞌ eeꞌnoko ntong kamoꞌkoong.” Tee meerooꞌnavaro tee, Kumponinge teing ntong meuꞌ tankaampureeꞌnaang nkovuuꞌ boonaruꞌ daunaruꞌketa. Eeꞌnoko Kumponinge tee meerooꞌnavaro doona auviꞌau tampuuꞌ, teketa aaꞌnouꞌ muung tankinuko taneꞌpuuꞌ eeꞌnoko teꞌmung teꞌmung keꞌmunta-naꞌmung.

Teketa napoꞌ Kumponinge aaꞌpuuꞌ, “Aiaꞌ, ntong paning-koo boong otoing naroꞌ poontarako koverenooꞌ oroꞌparavai,” eeꞌnoko teeꞌ masikaꞌ nkoaruꞌ. 10 Teketa Kumponinge teꞌ koverenooꞌ kansiꞌ tampuuꞌ eeꞌnoko tee ntong poonaruꞌ pirung tampuuꞌ. Eeꞌnoko Kumponinge tampaꞌ oovura dotuaruꞌ.

11 Eeꞌnoko Kumponinge napoꞌ karoma aaꞌpuuꞌ, “Kansiꞌkoo baaꞌ eeꞌnoko koiꞌnanka amutemuriiꞌ dupuai, aaꞌnoko keenavaang, eeꞌnoko poraꞌkooning, eeꞌnoko sinampuai ookara muuꞌ amutemuriiꞌ kantenaꞌ.” Eeꞌnoko teeꞌ eeꞌnaꞌ nkoaruꞌ. 12 Kansiꞌkoo amutemuriiꞌ baaꞌ eeꞌnoko koiꞌnanka amutemuuꞌnaꞌ sinampumaing dupuuꞌ, keenavaang eeꞌnoko poraꞌkooning, teing-koo kuunge napoꞌ okiꞌnarekaꞌ sinang nkoarikooꞌ amutemuuꞌnaꞌ. Eeꞌnoko Kumponinge tampaꞌ oovura dotuaruꞌ. 13 Teketa aaꞌnouꞌ muung tankinuko taneꞌpuuꞌ eeꞌnoko teꞌmung teꞌmung beenanaꞌmung.

14 Teketa napoꞌ Kumponinge aaꞌpuuꞌ, “Aiaꞌ, arakananka tavoꞌdariai meerooꞌnavaro-koo meuꞌke teke paning-koo doong eeꞌnoko muung simpeꞌaareaing, eeꞌnoko teke aing aaꞌning taaꞌniꞌantavaari otoromaatoai: doonanka, kaarananka eeꞌnoko mareꞌnanka. 15 Eeꞌnoko teke meerooꞌnavaro-koo paning-koo arakavariri otoromaatoai teketa kansiꞌaape araka poꞌantavaamaatoai.” Eeꞌnoko teeꞌ eeꞌnaꞌ nkoaruꞌ. 16 Eeꞌnoko Kumponinge teeꞌ araka pankeng kenaanka nkovuretuꞌ, narung aaꞌnaꞌ araka doonaaꞌ araka-koo miring duaaꞌ nkovuuꞌ. Eeꞌnoko niiꞌnung baruꞌ araka deeaung muunga araka-koo miring kaara nkovuuꞌ. Napoꞌ beentoꞌnanka nkovuruꞌ. 17 Teing paning-koo meuꞌ nkovurira sipuruꞌ teketa kansiꞌaape araka poꞌantavaamaatooꞌnaang. 18 Eeꞌnoko teketa doong eeꞌnoko muung tanatavaamaatoai, eeꞌnoko napoꞌ arakanaanka eeꞌnoko mutaanang tankaampaarematoai. Eeꞌnoko Kumponinge teeꞌ eeꞌnaꞌ tampaꞌ oovura dotuaruꞌ. 19 Teketa aaꞌnouꞌ muung tankinuko taneꞌpuuꞌ, eeꞌnoko teꞌmung teꞌmung karenanaꞌmung.

20 Eeꞌnoko Kumponinge napoꞌ karoma aaꞌpuuꞌ, “Ntong eeꞌnoko pirung ookarai kapooꞌnanka amutemuriiꞌ domantooꞌnankai maantoꞌaavai. Eeꞌnoko barennankai porora meerooꞌnavaro aꞌdeiꞌ auviꞌau puraanaama maantoꞌaavai.” 21 Taviꞌ pankenanka nkovuruꞌ pirung-koo kuung otoromaing eeꞌnoko ookara okiꞌnarekaꞌ kapooꞌ nanaamaing ntong-koo kuunge, eeꞌnoko ookara bareng amutemuriiꞌ. Eeꞌnoko Kumponinge tampaꞌ oovura dotuaruꞌ. 22 Eeꞌnoko Kumponinge ookara biraankevuruꞌ aaꞌpuma, “Ookara kapooꞌnanka pirung-kooning parerima berentarima pirung maantoꞌeriai, eeꞌnoko ookara barennanka teeꞌke, parerima berentariai kansiꞌkoo.” 23 Teketa aaꞌnouꞌ muung tankinuko taneꞌpuuꞌ eeꞌnoko teꞌmung teꞌmung paꞌnokoꞌnaꞌmung.

24 Teketa napoꞌ Kumponinge aaꞌpuuꞌ, “Enang kansiꞌkoo kapooꞌnanka amutemuriiꞌ domantooꞌnanka tavoꞌdariai: ookara kauꞌkarenaumo bauꞌnaananka, eeꞌnoko biikoori, eeꞌnoko ookara kapooꞌ kansiꞌkoo daue nanaamaing.” Eeꞌnoko teeꞌ eeꞌnaꞌ nkoaruꞌ. 25 Kumponinge kauꞌkarenaumo poraꞌkooning amutemuuꞌ nkovuruꞌ eeꞌnoko napoꞌ bauꞌnaananka amutemuuꞌ teeꞌ nariꞌ nkovuruꞌ eeꞌnoko napoꞌ teing kansiꞌkoo daue kakanaamaing teeꞌ nariꞌ amutemuuꞌ nkovuruꞌ. Eeꞌnoko Kumponinge tampaꞌ oovura dotuaruꞌ.

26 Teketa napoꞌ Kumponinge aaꞌpuuꞌ, “Aiaꞌ, naning-namuuꞌ nantoong niiꞌ pinaꞌ oroꞌnuka nkoarampiai, niikaang oroꞌoroꞌnooꞌ siompuioꞌ, eeꞌnoko teinge ookara kapooꞌnanka tanatavaariai, aaꞌning: taviꞌ pirung-koonanka, barenanka auviꞌau-kooning, kauꞌkarenaumo datauraaꞌnanka, eeꞌnoko poraꞌkoonanka, eeꞌnoko napoꞌ teing ookara kapooꞌnanka kansiꞌkoo daue nanaamaing.” 27 Teeꞌkoo Kumponinge naning baka bakaang oroꞌoroꞌnooꞌ siompuioꞌ nkovuuꞌ. Teeꞌ eeꞌnaꞌ nariꞌ oroꞌ Kumponing-pinaꞌ nkovuuꞌ, aaꞌnouꞌ donkaani eeꞌnoko manikuma nkovuretuꞌ. 28 Eeꞌnoko Kumponinge biraankevurema aaꞌpuretuꞌ, “Deeꞌ parerema berentareai eeꞌnoko deurukaaꞌke ookara kansiꞌ maantoꞌaara ookara kapooꞌnanka tanatavaariai tenairu-koo. Eeꞌnoko deeꞌke tee aaꞌnoaing ookara taviꞌ pirung-kooning tanataverereriai, barenanka auviꞌau-kooning eeꞌnoko ookara kapooꞌnanka kansiꞌkoo daue nanaamaing.” 29 Eeꞌnoko Kumponinge aaꞌpuretuꞌ, “Oovereko, ninge tee deeꞌ arompesing ookara kapooꞌnanka sinampumaing ookara-koo kansiꞌkoo daue otorinanka; deeꞌ deekaang taamang, ookara baaꞌnanka, koiꞌnanka, keenavaang eeꞌnoko poraꞌkooning naroꞌka. 30 Eeꞌnoko ookara kauꞌkarenaumo-nanka kansiꞌkooning, napoꞌ barennanka auviꞌau-kooning eeꞌnoko ookara kapooꞌnanka kansiꞌkoo daue nanaamaing, eeꞌnoko ookara kapooꞌ domantooꞌnanka, ninge teing ookara kapooꞌ dupumaung maaꞌkoo avoronsing.” Eeꞌnoko teeꞌ eeꞌnaꞌ nkoaruꞌ. 31 Eeꞌnoko Kumponinge ookara kapooꞌnanka teie nkovuruꞌning tampaꞌ masikaꞌ oroꞌpariko oovura dotuaruꞌ. Teketa aaꞌnouꞌ muung tankinuko taneꞌpuuꞌ, eeꞌnoko teꞌmung teꞌmung ~naꞌmung-taa-naꞌmung.

Copyright information for `NAS