Genesis 4

Enang tee Aadama Iivi-ninka baꞌaang ninka otoresi teni kempoꞌkuuꞌ. Teketa tootoꞌ narung donkaani paravuuꞌ tenie, miring Keiniꞌ.
4:1Iiburu-nupoong biikaang kara-koo miring “Keiniꞌ” tee “Nkavansi” pinaꞌ aurompari otong, eeꞌnoko tee miring “Eebeloꞌ” tee “Domang-keraꞌ” miruꞌari otong.
Eeꞌnoko aaꞌpuuꞌ tenie, “Ninge narung donkaani paravansing Ovoringe pakumuioꞌ.”
Napoꞌ kemuꞌkanaꞌ tenie donkaani Keiniꞌke baaraꞌmaꞌnung paravuuꞌ miring Eebeloꞌ.
4:2Iiburu-nupoong biikaang kara-koo miring “Keiniꞌ” tee “Nkavansi” pinaꞌ aurompari otong, eeꞌnoko tee miring “Eebeloꞌ” tee “Domang-keraꞌ” miruꞌari otong.
Eebeloꞌ sipisipiꞌnanka tanata deemparuꞌ eeꞌnoko Keiniꞌ mintoong nkonara.

Damaꞌke tee Keiniꞌke tee-koo keenkeenanka-koo sinananka nkavurira Ovoring-koo boontunamparuꞌ. Eeꞌnoko Eebeloꞌke sipisipiꞌnanka-koo niiꞌning tutunaꞌning-kooning datoꞌurira menaanka dovang-nairu ninka boontunamparuꞌ. Eeꞌnoko Ovoring Eebeloꞌkoo aaꞌnaꞌ dotuaruꞌ eeꞌnoko tee-koo bakaang-koo boontunang-koo. Teka Keiniꞌkoo eeꞌnoko tee-koo bakaang-koo boontunang-koo dotuaravaruuꞌ. Eeꞌnoko Keiniꞌ teeꞌkoo aaꞌnaꞌ iirai oing orakaꞌ oroꞌparuꞌ.

Eeꞌnoko Ovoringe aaꞌpuuꞌ tee Keiniꞌ, “Daꞌ aming-koo iirarora oing orakaꞌ oroꞌdaramang? Daꞌ tampaꞌ boontunantaravaing deekoꞌ ning daꞌkoo dotumaravaing, apeꞌ aung? Teka tee dake kapooꞌ orara nkoveko deekoꞌ tee orara aarumo maamuari otong daꞌ kurumaaꞌkoo. Nka dake purintarara puruꞌeaing tee.”

Teketa Keiniꞌke tee baaraꞌmaꞌnung Eebeloꞌ bokuvuma aaꞌpuuꞌ, “Poai ioꞌ tokoi poraꞌke korokoromareai.” Eeꞌnoko tenang poraꞌ bereta Keiniꞌ tee-koo baaraꞌmaꞌnung-koo Eebeloꞌkoo dau kokoroarara teka tavuma dupisiꞌuuꞌ tee.

Tenang Ovoringe aaꞌpuuꞌ tee Keiniꞌ, “Eebeloꞌ arerai tee daaraꞌmaꞌnung?” Eeꞌnoko Keiniꞌke aaꞌpuuꞌ, “Ninge noruꞌampaꞌ tee, aiꞌ ning tee ntaraꞌmaꞌnung tare-koo siꞌmeuꞌnunge?”

10 Eeꞌnoko Ovoringe aaꞌpuuꞌ, “Nka dake aming nkoveing? Tee daaraꞌmaꞌnung bakaang ereng-koong aurong tee ning-koo biromparamang kansiꞌketa. 11 Emuꞌ tee daꞌ barakosiꞌdama aaꞌdamaang: Anketa kansiꞌketa daꞌ tenkeniaing, aꞌ teꞌ kansiꞌnooꞌ daaraꞌmaꞌnung-koong ereng tuuvuioꞌ naivuinooꞌ daka dake dupisiꞌeioꞌ. 12 Daꞌ tee poreꞌdoma kansiꞌkoo keempeko taamang tampaꞌ nkoaravaukaꞌnung eeꞌnoko tokoo dakanooꞌ masipoꞌ otoꞌderuaukaꞌ, tamung kansiꞌkoo kororaramatoaing.”

13 Teketa Keiniꞌke aaꞌpuuꞌ tee Ovoring, “Ee bakaꞌ, aung tee kiimata pankaing masikung. Dake ameioꞌ orarunsie dupisiꞌmuuꞌnaang. 14 Dake tee ning eꞌmung bataꞌmeing anketa kansiꞌketa, eeꞌnoko dakaang biraanke-ita bakuꞌmeinge. Eeꞌnoko tokoo nkanooꞌ otoꞌmemuaukaꞌ; tamung kansiꞌkoo koromaramaꞌnoaing. Naninge tokoa oomura deekoꞌ tamung anutua dupisiꞌmuaing makosie.”

15 Teka Kumponinge aaꞌpuuꞌ tee, “A, teeꞌ deeaꞌ. Niiꞌnung naninge daꞌ taruma dupisiꞌduaing deekoꞌ, tee naning tee ninge aaꞌnaꞌ dau basinooꞌ kiimata avompaing.” Eeꞌnoko Ovoringe Keiniꞌkoo taaꞌniꞌanta sipuuꞌ naninge tokoa oovura tavuꞌneeng-koo tee. 16 Teketa tenang Keiniꞌ Ovoring-ankoita tenkenuuꞌ, eeꞌnoko bera Ataꞌnanuꞌ tampaama-nameng-koo beuꞌ teketa Iideniꞌketa duaaꞌ pomanooꞌaapenameng-koo.

Keiniꞌ Bakanaving

17 Emuꞌ tee Keiniꞌ, osi pankaing kanivui otoko, baꞌaang kempoꞌkura bauring donkaani paravuuꞌ miring Iinoke; eeꞌnoko Keiniꞌke tee osi opura napoꞌ Iinoke namirimpuuꞌ. 18 Eeꞌnoko Iinoke tee Irat bauma. Tee Irat tee Meusiel bauma, eeꞌnoko Meusiel tee Metusiel bauma, eeꞌnoko Metusiel tee Leemekiꞌ bauma.

19 Eeꞌnoko Leemekiꞌke kenaanka manikumaara nampuretuꞌ. Niiꞌnani-koong miring Eda, eeꞌnoko nani Silaꞌ. 20 Eeꞌnoko Edai Jabal paravuuꞌ, Jabal tee teing poraꞌke nanaama boromakaꞌnanka tarearikoꞌning biuma. 21 Tee Jabal baaraꞌmaꞌnung miring Jubal, eeꞌnoko tee Jubal tee teing nantoong kovi dovang kiita kompaamaing biuma. 22 Damaꞌke napoꞌ tenie Silaꞌke Tubokein paravuuꞌ. Tubokein tee teing nantoong baraasi~ dovang-koo aini aaꞌning-koo kapooꞌ nkonuka biuma. Tee Tubokein baꞌmari miring Naama.

23 Niiꞌnaꞌmung Leemekiꞌke tenaanka baꞌaankaara nauvurema aaꞌpuretuꞌ, “Eda naanka Silaꞌ ee, nkaang kara tampaꞌ masikaꞌ taaramereai. Naninge narunge nemakai ning baikemuioꞌ ninge dupisiꞌansieeng makuꞌkoo, eeꞌnoko baꞌmarange meroꞌkoo piavorora deekoꞌ eeꞌ nauarampaing, 24 ‘Baa naning Keiniꞌ dupisiꞌuaing aaꞌnaꞌ dau basinooꞌ kiimata nkavuaing, eeꞌnoko naning ning tamuaing bakei aaꞌnaꞌ aaꞌnaꞌ kiimata dau basinooꞌ kompuaing.’”

Set Bakanaving Tampaving

25 Damaꞌke napoꞌ Aadama ninka otoresi baꞌaange tootoꞌ narung donkaani napoꞌ paravuuꞌ miring Set,
4:25Iiburu-nupoong biikaang kara-koo miring “Set” tee “Avuavuꞌ” pinaꞌ aurompari otong.
eeꞌnoko tenie aaꞌpuuꞌ, “Kumponinge tootoꞌ narung napoꞌ amuing Eebeloꞌ pariꞌantanung tee Keiniꞌke dupisiꞌuuꞌnung.”
26 Damaꞌke napoꞌ Set bauring pontoꞌaruꞌ eeꞌnoko Iinosiꞌ tampuuꞌ. Tenang eeꞌnang nantoonge Kumponing Iaaue
4:26Tee miring Iaaue tee Iiburuꞌnaꞌ miring Kumponing-koong; “Oꞌnoi Oꞌnomaung” pinaꞌ auromparamaung.
tampaama dootuuꞌ tutumpariruꞌ.

Copyright information for `NAS