Hebrews 9

Urikupoong Pareka Nkonukai Tamung Kauꞌkarenaumo-nanka Parekavaakoꞌnaꞌ

Enang tee tutunaꞌnung kara naroong-anta teeꞌ nariꞌ teing bakaning aarumonanka uuꞌaaꞌnanka otorong dootuuꞌkoo sionumpoꞌ, eeꞌnoko bakanava meekava aꞌnava kansiꞌkoonava teeꞌ otong, paara-anta-koonava. Teva eeꞌnava kaandesi-koo kaniauꞌnava kevarora-poꞌnava. Aivitunavaro-koo aing aaꞌning otorokoꞌ: araka-panteꞌ, eeꞌnoko batanang, eeꞌnoko bereteꞌ tee batanang-koo dau otoko. Tevaro eeꞌnavaro Meekavaro tampaakoꞌnavaro. Napoꞌ kenaanka-nung kuꞌnung kuunavaro-koong otokoꞌ kaandesi-koong daꞌnava, teꞌ Meepoꞌketa Aaꞌnaꞌ Meepoꞌ tampaakoꞌnooꞌ. Tevaro-koo batanang kooroi nkoniiꞌ ii tampaꞌ nuuraaꞌ paroꞌantaroma otokoꞌ eeꞌnoko tee bokita meekung kara naroong-anta-koong otokoꞌ kooroi dakaꞌniiꞌ ookamenta-ita. Eeꞌnoko tee bokita meekung-koo kuung aing aaꞌning otoroko: utau kooro-koo taꞌnaniiꞌ, kuunge tee taamang maanaꞌ paning-etaing otoing; eeꞌnoko napoꞌ teruung Eeroni bakanaruung donsiꞌnaruung puaravura sinampuuꞌnaruung, eeꞌnoko teing bentaning kapang-kooning kara naroong-anta daariniiꞌ nariꞌ otoko. Eeꞌnoko tee-koo bokita-koong-koo daꞌnava-koo daue ereng sinkiꞌdiꞌaakoꞌ nantoong biikaang orakaꞌ nkonanka kui-koo. Eeꞌnoko seraping-ka kenaanka taꞌnaniiꞌka teke daue donkonuresi otorekoꞌ, kupaꞌke toompeeresi Kumponing bakaang meenasi oroꞌantavurema. Aing-koo niiꞌke kapooꞌ ookara pukeampiri enang minkuampiarupeuꞌ.

Teva meekava teeꞌ neriauꞌnooꞌketa teing piristiꞌnanka tee aivitunavaro-koo doong kante tumparikoꞌ biikaang nko-nko dootuuꞌkoong nkoaavaꞌnaang. Teka teꞌ kuunavaro tamung tung-koo bakei meepoꞌ, piristiꞌ pankaing narung deekoꞌ tumparapeuꞌ, namareꞌkoo namuꞌke, napoꞌ ereng nkavui deekoꞌ tumparapeuꞌ aaꞌning-koo boontunamparaaꞌnaang: teie baka eeꞌnoko nantoonge noruꞌaavaꞌ orakaꞌ nkoaakoꞌning-koo. Tee-koo aarumo-koo Tanuaang Meekunge naumurimaung tee taung kunsimariko Kumponinge tampaꞌ noruꞌmurira taaramuripeuꞌnavung mmeꞌ siraꞌparavaꞌ tutunaꞌnung dootuuꞌ donkonui otoko. Tevaro aivitunavaro tevaro taaꞌniꞌanta-navaro teing aing doong-koo aung tutunaꞌnung kara naroong-antai kuung deempui otoining-koo aaꞌning nkoaakoꞌning-koo avuavuꞌ eeꞌnoko boontunang; 10 Teie temuriiꞌ botoi tee naning dootuuꞌaramaung bakaang pankaruntoong dupevui kiiroraaꞌantavuarupeuꞌ, aaꞌnung narunge taamang eeꞌnoko ntong nai, amutemuriiꞌ aarumo ntonge meekaꞌanta, eeꞌnoko niiꞌning napoꞌ mono-aapening aarumonanka kompui otokoꞌ bera tenang teie nerakung kara naroong-antai urikung paari-antavuuꞌnooꞌke basi.

Karistooꞌ Baka Bakaang Ereng Ninka Boontuarara Pareka Nkovuuꞌnung

11 Teka tee Karistooꞌ, tee Pakoꞌpariꞌniiꞌ, tee tero pouꞌ piristiꞌ pankaing deempari kapooꞌnanka tampenanka Kumponinge maraka-antavuruꞌning niiꞌ oko-anta-koo. Teketa tee dootuuꞌnava pankava masikava-koo dupe-antaniiꞌnava paning-koo otoinava-koo koinuuꞌ naninge birenge kanivuaruuꞌnava-koo, aaꞌnava aung kansiꞌ nkovuuꞌnaꞌketa oovunaꞌ masikaꞌ nkoniiꞌnavai. 12 Eeꞌnoko koinuma naroꞌka bakevui Meepoꞌketa Aaꞌnaꞌ Meepoꞌ tumparuꞌ ereng meeꞌmeeꞌkoong eeꞌnoko boromakaꞌkoong ninka deeaꞌ, teka baka bakaang ereng nkavui bera teie mooꞌmuruꞌ oꞌpaaꞌnaꞌ. 13 Urikung dootuuꞌkoo tee aing aaꞌning nkoaama nantoong kiiroraaꞌantavaarima mono-aapening boto totoꞌpaakoꞌning-koo: meeꞌmeeꞌkoong eeꞌnoko boromakaꞌkoong erenge eeꞌnoko boromakaꞌ kampianu-koo bioꞌ tai-antavaakoꞌnu-koonge sipunge teinge piarauꞌaarikoꞌ nantoong. 14 Teka tee ereng Karistooꞌkoong tee bakei dau basinooꞌ purintoꞌ. Tee Tanuaang Meekung ookara batei-koo otomaung bakaang iriꞌ ninka Karistooꞌ tee baka avaruꞌ Kumponing-koo, eeꞌnoko kapooꞌ orara tee-koo otoaꞌ. Teeꞌkoo teie bakaang erenge tee deto basinooꞌ niikaang pankaruntoong kiiroraaꞌantamurimaung eeꞌnoko booꞌaapenung nko-nko-ita unaa-antamurikooꞌ Kumponing domantooꞌ makosinaꞌ dootuuꞌampiiꞌnaang.

15 Teeꞌkoo Karistooꞌ tee meuꞌnung tee nerakung kara naroong-anta pinkaꞌanta-koong, eeꞌnoko tee temuriiꞌ naning deemparioꞌ nantoong teing Kumponinge miruꞌuruꞌninge tee barenku maraka-antavuruꞌnung otootoꞌ oparavaukaꞌnung nkavaavaing, aiꞌ tenang Karistooꞌ booꞌparuꞌnang teie mooꞌuruꞌnung orakaꞌ nkonanka-ita tutunaꞌnung kara naroong-anta siompai nkoarikoꞌning-eta.

Karistooꞌkoonge Erenge Nerakung Kara Naroong-anta Puring-antavumanaꞌ

16 Tenang naning narunge bakaang kapooꞌnanka niiꞌnung oko-antavuuꞌnaang tampura tee booko, teie tee kara naroong-anta minkuvupeuꞌ, teka tee kara purintoꞌ otoaꞌ tee naning booaruko. 17 Aiꞌ temuriiꞌ kara nareꞌuarupeuꞌ tenang tee naning karouꞌnung domampari otoko. Teka tee kara minkuvuuꞌnung booꞌparako deekoꞌ makotupeuꞌ. 18 Tee-pinaꞌ napoꞌ tutunaꞌnung kara naroong-anta nareꞌui otoarukoꞌ ereng otoaruko. 19 Tenang ookara botonanka Moosesie sirakaꞌantavuuꞌnang ookara nantoong-koo teie tee boromakaꞌ kampia-nanka-koong eeꞌnoko meeꞌmeeꞌnanka-koong ereng nkavuuꞌ eeꞌnoko ntong nariꞌ; 20 Eeꞌnoko sipisipiꞌkoong dapo urung koiꞌnave-koo marununave-koo daiꞌura duuꞌpura miraꞌuuꞌ ookeng-koo, boto-koong kara daariniiꞌnaneꞌ eeꞌnoko nantoong-koo dau, aaꞌpuma,

“Aung tee ereng kara nareꞌanta-koong Kumponinge botorurima diiꞌ naroong-antavuing.”
(Toro 24:8)

21 Eeꞌnoko napoꞌ teeꞌ nariꞌ miraꞌuuꞌ teie erenge ookara kapooꞌnanka teva kaandesinava eeꞌnoko teing dootuuꞌarima kompaakoꞌning nariꞌ. 22 Eeꞌ, masikaꞌ, boto-koo kuunge daping ookara kapooꞌnanka tee kiiroraaꞌantavaakoꞌ erenge, eeꞌnoko teeꞌ nariꞌ ereng tuuvuaruko deekoꞌ tee boto totoꞌnanka tontaꞌuarupeuꞌ.

Karistooꞌ Baka Boontunamparuꞌnaꞌ Orakaꞌ Nkonanka Tontaꞌuma

23 Tenang teva meekava kaandesi-koonava daateꞌauꞌnang tee teing kapooꞌnanka dootuuꞌkooning teeꞌ makosinaꞌ kiiroraaꞌantavai meekaꞌantavaaruꞌning tamung uuꞌaaꞌpinaꞌ otoroi teing-koo kapooꞌ masikeng-koo paning-kooning-koo. Teka Karistooꞌke teꞌ masipoꞌ Kumponing ninka naroꞌmariainooꞌ paning-koo daateꞌuma tee bakaang erenge meekaꞌanta-koo makosi teie deto basinaꞌ aaꞌnaꞌ tamparai. 24 Aiꞌ Karistooꞌ tee pava meekava nantoonge kaniniiꞌnava-koo tumparavaꞌ tamung uuꞌaaꞌ makosinava, teka paning masipoꞌ tumparuꞌ, teke eeꞌnooꞌke enang donkonui otong Kumponing-koo uroꞌkanooꞌke niiꞌ pakumurima.

25 Teke tee amutemuꞌke boontunamparaaꞌnaang tumparavaꞌ teeꞌ piristiꞌnanka pankenanka mareꞌ kante meekava-koo tumparikoꞌnaꞌ ereng oovunara biiꞌka-koong deeaung avaavaꞌnaang. 26 Teeꞌ eeꞌnaꞌ boontunamparapeuꞌnung dei amutemuꞌke sisikeera kuneꞌumaatopeuꞌ kansiꞌ pupuꞌaruꞌnooꞌketa, teka enang bateinang-nanka-koo asiranooꞌke namuꞌke oroꞌparuꞌ ookutunung bateinang dakaꞌpui tee orakaꞌ nkonanka tontaꞌuuꞌnaang baka boontunamparara. 27 Kumponinge toomo aung: Nantoong tee namuꞌke booroaing eeꞌnoko tee-koo damaꞌdue koosinampariaing. 28 Teeꞌkoo napoꞌ Karistooꞌ teie, namuꞌke boontunamparuꞌ nantoong karinga biikaang orakaꞌ nkonanka nkavuuꞌnaang, eeꞌnoko kemuꞌkanaꞌ poaing nantoong biikaang orakaꞌ nkonanka napoꞌ nka-koo deeaꞌ, teka dupe-antavui domampuriiꞌnaang teing nantoong tee batei nempai otoroaining.

Copyright information for `NAS