James 1

Parapaarananka Kuneꞌampira Kumponing-koo Imaꞌmariri Tampaꞌ Oꞌnoriainaꞌ

(1:1-18)

Aung aneꞌ karavoto~ ninge Jeemisie daariamang tee Kumponing eeꞌnoko tee Jiisuuꞌ Karistooꞌdaang beekaang botovotonaaꞌke. Tampaꞌ tampamang diiꞌkoo kivora-ita kenaanka muuꞌ Isireeli-nupoong-koo avitoitoi purarenkaꞌdariri otorimaing-koo.

Parapaarai Baito Purimarimaung Noruꞌampima Keekooꞌmariaukaꞌ

Ee mmaikoriꞌ, niꞌninka nariꞌ Jiisuuꞌkoo baitorarimaing, doturoturariri otorimaatoaing tenang kapooꞌ avutevuꞌ parapaarananka kuneꞌerima. Aiꞌ diiꞌke tee noruꞌeri otong tenang diikaang masikaꞌanta teie parapaarai paararuriko tee, daꞌdeng apukaruuꞌkiriaꞌ otorimaatoai. Eeꞌnoko teeꞌ pinkaꞌdariri otorikotaaꞌ koontoꞌ imaꞌdariai Kumponing bakaang pia narung tampaꞌ siomperima ookusiiꞌeri, niiꞌnooꞌ siperiaꞌ.

Naning Matau-koo Apukaꞌparara Deekoꞌ Kunsiaravaing

Diiꞌkoo naning narung matau-koo apukaꞌparara tee Kumponing niaꞌuaing, tee ookara nantoong-koo avusiroꞌ, domang mankiꞌoaꞌ, eeꞌnoko teie avuaing tee. Teka tee baito ninka eentavaravaing noruꞌ keekooꞌaravaꞌ, aiꞌ tee keekooꞌaramaung tee tee-pinaꞌ booꞌa dovinge avitoitoi bereravumaung. Teie naninge eeꞌ noruꞌuai: Naning noruꞌ kenaankai tee kapooꞌ nkavuarupeuꞌ Ovoring-eta, bakaang aarumo ookara naroꞌke pinkaꞌaravaung deemparako.

Tautau Aaꞌning-koo Kapooꞌkoo Apukaꞌparimaing Eeꞌnoko Maneearimaing

Teing ataꞌoinku niiꞌmaikororiꞌ teing dotuariai Kumponinge deto kompurimaung-koo. 10 Eeꞌnoko teing nantoong mmauꞌpoꞌnupoong tee dotuariai Kumponinge doonko otoromanooꞌ tasiꞌantavuruꞌnung-koo, aiꞌ teing tee-pinaꞌ kaakaaꞌ napoꞌ namuꞌke boomaung. 11 Duaaꞌ tee uipaariiꞌ naapu ninka daaꞌaramaung eeꞌnoko baaꞌnanka maraꞌantavukooꞌ, napoꞌ kaakaaꞌnanka duaꞌarikooꞌ eeꞌnoko tampaꞌ oroꞌnooꞌ tenang paaꞌarakooꞌ. Teeꞌ nariꞌ napoꞌ teing nantoong mmauꞌ kavo-poꞌnupoong paaꞌariaing teing biikaning nko-nkonanka nkoaamaing.

Kumponinge Niiꞌ Tampaꞌ Nkomurimaung, Orakaꞌ Nko-koo Baramuriaung

12 Biraanke-nupoong teing nantoong parapaaranankai apukaruuꞌantavuriaung-koo, aiꞌ teꞌmung ookara parapaarananka puruꞌaara teing tee biikaang mooꞌ nkasiiaavaing, tee domang-anta Kumponinge maraka-antavuruꞌnung teing-koo tee pankaruntoompaamaing-koo. 13 Tenang naninge parapaara kuneꞌuma tosiarama aaꞌpuaukaꞌ, “Kumponinge orara nko-koo paaramumaang,” aiꞌ naninge Kumponing orara nko-koo paaravuarupeuꞌ eeꞌnoko teie baka naning teeꞌ paaravuarupeuꞌ. 14 Teka tee nantoonge kantenaꞌ parapaara kuneꞌaako teie biikaang karaaꞌ orarai narunge teing tosivurima barampurikooꞌ orara aarumo nko-koo. 15 Teka tee karaaꞌ domang-koo nareꞌukotaaꞌ orakaꞌnko basi-antavuuꞌnaang, eeꞌnoko teketa otokotaaꞌ orara aarumo pankaꞌparara booꞌ basiaraaꞌnaang. 16 Ee mmaikoriꞌ piaarampimaing, tarerariai diiꞌka tosirarima niiꞌnaꞌ noruꞌeriꞌneeng, aiꞌ Kumponing tee orara nko-koo paaramuriaung. 17 Ookara kapooꞌ paning-eta pomaing teing tampeng naing, eeꞌnoko ookara avuavuꞌnanka tampeng masikeng teing Kumponinge niiꞌkoo depeto poꞌantavumaing tee Ookara Araka Okonara deemparioꞌ. Tee aampariꞌaravaꞌ araka narung naumurimaung. Mutaananameng tee-koo otoaꞌ. 18 Teie niiꞌ baurukaaꞌ deeng-antamuruꞌ bakaang kara masikung taara-antamurira. Baka piavora teeꞌ nkomuruꞌ niiꞌ tutunaꞌnupoong oꞌnoriiꞌnaang ookara bakaning nkovuruꞌnanka-koo.

Niiꞌke Kumponing-koo Arooꞌmarimainge Nantoong Tampaꞌ Nkoarampiaing

(1:19–5:6)

Kara Taaravampira Meumpampiaing

19 Ee mmaikoriꞌ piaarampimaing, tee aung noruꞌeriaing: Ookara narunaꞌ narunaꞌ namuꞌke kara taaraverimaatoai, teka makuꞌkoo eeꞌnoko iira-koo iriꞌnaruntariaꞌ otoai, 20 aiꞌ naning bakaang iirai aarumo koontoꞌ Kumponing bakaang narung tavoꞌantavuaung. 21 Teeꞌkoo teing aing aaꞌning enang siperiai: aarumo kuꞌmiꞌ eeꞌnoko domang orarai maantoꞌui otoꞌ; eeꞌnoko tee kara Kumponing bakaang diiꞌkoo keempuko baroromperira arooꞌeriai, tee tenaarei diiꞌ domang-anta-koo makosinaare.

22 Tee kara tamung taaraverima tosirariaukaꞌ, teka taaraverima nkoverimatoai. 23 Aiꞌ diiꞌke ampaꞌdori siomperiaung deekoꞌ diiꞌ teing tee-pinaꞌ naning bakaang oing oorara-koo ooarama tenkenura namuꞌke ampaꞌopeuꞌ bakaang oing oroꞌoroꞌnaꞌ. 25 Teka tee Kumponing bakaang kara koontoꞌ unaa-anta-koong, eeꞌnoko baa tee naning tee kara kuung oovumatoaing kapooꞌ nauvumaung nko-koo ampaꞌoaꞌ, teie tee bakaang nko-nko-koo kuunge biraanke nkavuaing.

26 Naning dootuuꞌnung tamparama bakaang karang makosinaꞌ minkuvuaung tee, bakaang domang tosi-antavarapeuꞌ eeꞌnoko bakaang dootuuꞌ daange. 27 Tee dootuuꞌkoong aarumo kiiroraaꞌ masikung eeꞌnoko pituaravaung Niuma Kumponing-koo uroꞌkanooꞌke tee aung: Naning maantuaaraꞌ eeꞌnoko teing naaroonku beeroꞌurima pakuvurimatoai eeꞌnoko naning baka tanatavari otoai kansiꞌ bakaang aarumo orari-antavuꞌneeng-koo.

Copyright information for `NAS