James 2

Amutemuriiꞌkoo Tampaꞌ Nariꞌ Nkoarampima Siivenkeꞌmeeriaukaꞌ

Ee mmaikoriꞌ, niikaang Ovoring Jiisuuꞌ tee eeꞌnara urikamuꞌketa Kumponinge Pakoꞌpariꞌniiꞌ domamurira taremuriainooꞌkoong, tee daurarong~ meenasi okoraꞌ. Teeꞌ masikaꞌantaveri otori nantoong daunaroꞌ oovererima siivenkeꞌereriaꞌ otoriaing. Aaꞌnoko deekoꞌ, naning tampaꞌ nepunepuꞌniiꞌ diing tovang kooro-kooning kuruniiꞌ dootuuꞌnava-koo kuung poko, napoꞌ naning ataꞌoiꞌ nariꞌ porepeuꞌ teꞌ, mononopaꞌ dereꞌ kuruniiꞌ. Eeꞌnoko tenaanka-koo tee tampaꞌ nepunepuꞌniiꞌkoo doororaripeuꞌ eeꞌnoko mooniꞌ mmauꞌ duaꞌupeuꞌnaꞌ noruꞌerima aaꞌperipeuꞌ, “Pinau, aaꞌ pora tampaꞌ baꞌnaniai,” tee ataꞌoiꞌ aaꞌperima, “A, duukuꞌdaravaꞌ basi baꞌnaniai.” Teeꞌ nkoverima nantoong tankaamperima makotuaꞌnaꞌ simpeꞌ nkonuka~ deeng-antararimaung daang matau orakaꞌ siomperi siivenkeꞌererima. Ee mmaikoriꞌ, taarameriai, nantoong kansiꞌnupoonge ataꞌoiꞌnuka tampaarimaing biiꞌka duukuꞌnuka deeaꞌ, aiꞌ Kumponinge teing miruꞌuruꞌnung tee-koo aaꞌnaꞌ baito-niiꞌnuka otorooꞌnaang eeꞌnoko teeꞌkoo bakaang muuꞌ okovuriaing teeꞌ maraka-antavuruꞌnaꞌ teing-koo tee pankaruntoompaamaing-koo. Teka diiꞌke tamunsiꞌnupoong tamperererikooꞌ teing ataꞌoiꞌnuka. Teka ioꞌ noruꞌeriai, teing mmauꞌ kavopoꞌnupoong teing ikiꞌantaraarimaing eeꞌnoko diikaang komaaru~ namuꞌke makuꞌeriaruko tuutunang~koo donkong-antaraarikooꞌ. Eeꞌnoko Jiisuuꞌ bakaang miring pankaing akapeuꞌaakooꞌ, tee miring diiꞌ biraankerariruꞌnung.

Daari Meekung-koo narung boto pankaing otong aaꞌpumaung,

“Dake tee naning daꞌkoo dueꞌnung daka piaararamanaꞌ nariꞌ teeꞌ piaaveaing.”
(Boontu 19:18)

Tee tenaare makosinaꞌ dupe-antaverira deekoꞌ tampaꞌ.
Teka siivenkeꞌ nkoveriaing deekoꞌ tee diiꞌ orakaꞌ nkoraririning eeꞌnoko teie botoi tompinturi otong tee totoꞌperining deentariko. 10 Aiꞌ baa tee naning ootukunung boto tampaꞌ siompuma niiꞌnavuꞌ totoꞌpura deekoꞌ teie tee ootukunung boto naroꞌka totoꞌpuinung. 11 Tee eeꞌpinaꞌ, Kumponing bakaang boto-koo nampeesi orarieaukaꞌnaare nanaare minkuvuaꞌ, napoꞌ naning tavema dupisiꞌeaukaꞌnaare minkuvuuꞌ. Teka dake teing-koo aaꞌnopeuꞌ nampeesi orarieaꞌ naning tavema dupisiꞌepeuꞌ, teeꞌkoo daꞌ tee boto totoꞌ deentaring.

12 Diiꞌ teing Karistooꞌ bakaang boto-koo kuunge unaarori otorimaing, teeꞌkoo tampaꞌ karerima unaa-antareerimatoaing, aiꞌ diiꞌ teing teie botoi Karistooꞌ bakaange simpeꞌruriaining. 13 Kumponinge tee piaavuriaꞌ kiimatavuriaing teing nantoong piaa oroꞌantavaavaukaꞌning. Teka piaa oroꞌantavaako deekoꞌ teie napoꞌ piaavurira baariꞌantavuriaing kiimata-ita.

Baito Nko-nko Ninkaing

14 Ee mmaikoriꞌ, naninge aaꞌpui dei, “Ning masikaꞌanta otoꞌmemung,” teka nko-nko otoaꞌ, tee-koong sinang aming? Temuriiꞌ masikaꞌantai ee domang-antavupeuꞌ? 15 Niiꞌnooꞌ naning narung Karistooꞌkoo niiꞌmaikoꞌ aaꞌning-koo apukaꞌparako duaana-koo eeꞌnoko taamang-koo, eeꞌnoko diiꞌkoo narunge tamung aaꞌpupeuꞌ tee, “Pinau, bera duaanararavai eeꞌnoko pooruai,” teka kapooꞌ avuaꞌ tee mono-nameng-koo apukaꞌpari otoining-koo, tee-koo aming basiarapeuꞌ? 17 Teeꞌkoo tee masikaꞌanta nko-nko otoꞌevuaung tee booꞌ. 18 Naninge aaꞌmuko “Tamung masikaꞌantavanko Kumponinge domang-antamuaing,” ninge aaꞌpampeuꞌ, “Aiaꞌ ioꞌ dakaang masikaꞌanta nko-nkoropa baito masikung deekoꞌ naumeai, eeꞌnoko ninge nkaang masikaꞌanta naurampai nkaang nko-nko-koo siraꞌparioꞌ.” 19 Dake tamung masikaꞌantavei aaꞌpemaung, “Kumponing tee narung,” teka temuriiꞌ masikaꞌanta makosi deeaꞌ. Teinge maꞌnarie teeꞌ nariꞌ masikaꞌantavai otorong, eeꞌnoko Kumponing meumeevanuka tasiꞌpariri dankusiꞌkaamaunge keraꞌpariainaꞌ noruꞌai.

20 Daꞌ tee naning masikaꞌanta-koo daunaaꞌanta otoꞌderung arekeeꞌ, nau-antaramaꞌnaang piaromaang tee temuriiꞌ masikaꞌanta mantaꞌparavaung tamung sinangropa? 21 Noruꞌeaꞌ ee tee niuma Eebaraamiꞌ nko-nko-koo Kumponinge naning koontoꞌ tampuuꞌnung tenang tee bauring Aisakeꞌ boontunampuuꞌnaang nkoaruꞌnang? 22 Ooveko teie nko-nkoi masikaꞌanta dupe-antavura makosi-antavuuꞌ. 23 Teeꞌ meumpuioꞌ tee Daari Meekung-koong kara dupearuꞌ aaꞌpumaung,

“Eebaraamiꞌke Kumponing masikaꞌantavuioꞌ Kumponinge naning koontoꞌ tampuuꞌ.”
(Pupuꞌ 15:6)

Eeꞌnoko tee Kumponing bakaang navumai tampari otomaung.
24 Ooveko, naning tee nko-nko ninka nariꞌ masikaꞌantavuko deekoꞌ Kumponinge naning koontoꞌ tampupeuꞌ, masikaꞌanta narung-koo deeaꞌ. 25 Eeꞌnoko napoꞌ teni Reeapi, orani, teeꞌ nariꞌke, nko-nko ninka nariꞌ masikaꞌantavui tenaanka Kumponing bakanaanka botovotonaaꞌka bokuvureta napoꞌ beekaning kare-nupoong-koo koono-antavuresi moꞌminge sivuresioꞌ Kumponinge koontoꞌnani tampuuꞌ. 26 Toꞌbiiarioꞌ aaꞌpamaang, teeꞌ nariꞌ tee mono domaangropa tee booꞌ tee-pinaꞌ masikaꞌanta teeꞌke, nko-nkoropa tee booꞌ.

Copyright information for `NAS