James 4

Kansiꞌkoong Aarumo Piamoriaukaꞌ Ovoring-koo Turaniiꞌnuka Oꞌnoriꞌneenga

Aminankai tee tataꞌ dovang turanturang, kare tavoꞌantavumaung diiꞌkoo meuꞌke? Tee aaꞌ tee teinge diikaning karaaꞌke narunaꞌ narunaꞌ domang mankiꞌantaruriko kare basiaramaung. Diiꞌke karaaꞌerimaing nka-koo makosiriaruma niiꞌning mamairorarima dupisiꞌerererimaung. Napoꞌ diiꞌke niiꞌning otoꞌevoromaing kong-koo keviꞌerima tavuꞌ tutumperimaung pariꞌereriiꞌnaang teing. Teka diiꞌke nkaveriaung aaꞌnoma: niiꞌnang Kumponing-koo eentarariaruma. Eeꞌnoko niiꞌnang bane niaꞌeriko Kumponinge aruriaung tamung karakaraaꞌkoo otoꞌderuriiꞌnaang piarorimaung-koo, Kumponing dotu-antanaꞌ noruꞌeriaruma. Diiꞌ bakei nampeesi orariaamaing-pinaꞌ makosinuka, aiꞌ diiꞌke Kumponing bakaning miruꞌniiꞌnukai kansiꞌ bakaang aarumo karaaꞌerima Kumponing ninka aaꞌnaꞌ munteꞌnupoong deeng-antararimaung. Eeꞌ, baa tee naning kansiꞌaapening piaavuaing tee baka Kumponing ninka turaniꞌ deemparing. Arekeeꞌ noruꞌerimang? Daari Meekunge ee daang minkuvuuꞌ aaꞌpuma,

“Tee Tanuaang Meekung Kumponinge niiꞌkoo otooꞌnaang amuruꞌnunge tee niiꞌ karaaꞌmuri pia-antamurimaung Kumponing-koo narung-koo arooꞌmariri oꞌnoriiꞌnaang.”?
Eeꞌnoko Kumponinge teeꞌ tampaꞌ nkomurima teie napoꞌ piaamuri bakanavung siong-koo pakumurimaung bakaning tampaꞌ nkonanka-koo dau pauꞌui. Teeꞌkoo Daari Meekunge aaꞌpumaung,

“Kumponinge turampurimaung teing baka daanganuka, eeꞌnoko piaavuri pakuvurikooꞌ teing boonko noruꞌariri otoromaing.”
(Mirumiruꞌ 3:34)

Teeꞌkoo Kumponing-koo boonko otori tee Sietaniꞌ turamperimatoai diiꞌankoita mmaruainaꞌ. Kumponing-koo dueꞌantarariai eeꞌnoko tee Kumponing dueꞌaravai diiꞌkoo. Diiꞌ orakaꞌ nkorarimaing bereꞌdarira tampaꞌ nariꞌ nkorarimatoaing, eeꞌnoko diiꞌ tunsi paakanuka noruꞌ narung deentariri domang kiiroraaꞌpoꞌnupoong otorimaatoai. Orarunsirarima birontarimatoai diikaang orakaꞌ nkonanka tasiꞌperima. Teing-koo benkeng siperi maiaꞌdoriai. Doturotu siperima napoꞌ miꞌmiinkirorimatoai. 10 Eeꞌnoko Ovoring-koo teeꞌ amaiaaꞌdoriko teie deto iꞌanturiai.

Orakaꞌ Minkumeeriaukaꞌ

11 Ee mmaikoriꞌ, diiꞌka orakaꞌ minkureeriaꞌ otoai. Baa tee naning baꞌmaikoꞌ orakaꞌ minkuvuma simpeꞌumaunge tee boto orakaꞌ minkuvuma simpeꞌumaung. Teka dake tee boto simpeꞌeaing deekoꞌ daꞌ boto siong deeaꞌ, daꞌ makotuaꞌnaꞌ boto simpeꞌ deeng-antararamang. 12 Niiꞌ narung daurarong~ boto amurimaung otoꞌmemuring, eeꞌnoko teie deekoꞌ simpeꞌmuriaing. Napoꞌ teie deekoꞌ makosi nantoong domang-anta-koo niiꞌnooꞌ orari-anta-koo. Aiꞌ daꞌ Kumponing-pinaꞌ basi noruꞌdarama ee teeꞌ simpeꞌerimaunge nantoong?

Niiꞌka Daangamariaukaꞌ

13 Arerai daꞌ aaꞌpemaatomaung, “Eꞌmung niiꞌnooꞌ taneꞌ deekoꞌ temono-ita temono-koo meeꞌnaang eeꞌnoko namareꞌ teke oꞌnoai baavenang-koo mooniꞌ barampama.” 14 Dake aaꞌ taneꞌ noruꞌeaꞌ dakaang otootoꞌkoo otoainaꞌ, aiꞌ daꞌ tee tee-pinaꞌ kamoꞌ batei okiꞌnamuꞌkoo oroꞌparama namuꞌke paaꞌaramaung-pinaꞌ. 15 Teka dake aaꞌpei dei makosi, “Ovoring bakaang pia-koo deekoꞌ niiꞌ domamariri aunanka nkoarampiaing.” 16 Teka diiꞌ eeꞌ nkorarimaung, miring pankaintarima daangantarimaung. Tee teeꞌ oroꞌ baka daangang tee orara. 17 Teeꞌkoo tee naning aarumo koontoꞌ noruꞌui, teka nkovuaꞌ otong, tee tee orakaꞌ nkoaramang.

Copyright information for `NAS