John 7

Jiisuuꞌke Paroro Bare-koo Otoꞌkoong Oovuuꞌnaang Nanuuꞌnaꞌ

Teketa tee damaꞌke Jiisuuꞌ Kaaleliꞌnamenge nanukoꞌnung. Judiaꞌnamenge nanuꞌkoo piavoaruuꞌ Juꞌkoong ovontunge teꞌ otorokoꞌninge tavaavaꞌnaang piavoroko. Juꞌnupoong biikaang Paroro Bare-koo Otoꞌkoong dueꞌuioꞌ Jiisuuꞌ baaraꞌmainkaange aaꞌpauꞌ, “Ameng sipera Judiaꞌnameng-koo naniaing dakaning barevare-nupoonge dakaang nko-nko ooaavainaꞌ nkovemaung. Naning kapooꞌ nkovumaing ookarai oo-koo piavoi bakuꞌuarupeuꞌ. Teeꞌkoo aing kapooꞌ ookara nkovemaung deekoꞌ sirapoꞌ siꞌdaravaing ookarai ooraara masikaꞌantaraavainaꞌ.” Teinge bane baaraꞌmainkaange masikaꞌ antavaavaꞌ teeꞌpauꞌ. Eeꞌnoko Jiisuuꞌke teing aaꞌpuruꞌ, “Nkaang doong mmeꞌ makotuaꞌ. Ookara doonanka diiꞌkoo makosi. Kapooꞌ otoaꞌ diiꞌ avoꞌduripeuꞌnung. Kansiꞌnupoonge diiꞌ munteꞌkoo makosi deeaꞌ, nka ning munteꞌmaamaung doong kante ninge biikaang aarumo orara siraꞌpamaung-koo. Berira naniriaing paroro-koo. Ning mmeꞌ nanamparooꞌnaang tee-koo paroro-koo, aiꞌ ning nkaang doong mmeꞌ makotuaꞌ.” Eeꞌnoko teeꞌ nauvuriraiꞌnange tee, Kaaleliꞌnameng-koo teke otouꞌ.

10 Teketa baaraꞌmainkaang paroro-koo ureai beroioꞌ Jiisuuꞌke damaꞌketa siraꞌparavaꞌ bakuꞌaritaaꞌ siompuruꞌ. 11 Eeꞌnoko Juꞌkoong ovontunge besiꞌaakoꞌ tee-koo paroro-koo, aaꞌpaama, “Tee areꞌ otong?” 12 Eeꞌnoko tee karikaꞌ iaampeema niiꞌninge aaꞌpaakoꞌ, “Tee naning tampara.” Eeꞌnoko niiꞌninge aaꞌpaakoꞌ, “A, teie nantoong tosivurima orari-antavurimaung.” 13 Nka baruꞌ sirapoꞌke minkuaavarukoꞌ avoreaitaaꞌ biikaang ovontung-koo.

14 Eeꞌnoko paroro-koo navaro oparioꞌ Jiisuuꞌ dootuuꞌnava pankava-koo kuung tumparara kara nau tutumpuruꞌ. 15 Eeꞌnoko Juꞌkoong ovontung taꞌninaama aaꞌpauꞌ, “Keei. Aung naning sikuruꞌaravaruuꞌnunge arekeeꞌ kapooꞌ avutevuꞌ noruꞌui otong?” 16 Jiisuuꞌke aaꞌpuruꞌ, “Ninge kara naurampimaung ning ninka nkaang deeaꞌ, Kumponing-eta pomaung, ning botomuuꞌnung-eta. 17 Teinge Kumponing bakaang pia nko-koo okovuriainge ning nkaang kara tasiꞌpaavaing Kumponing-etaing deekoꞌ niiꞌnooꞌ tamung nkaang noruꞌketa karomaung deekoꞌ. 18 Naning baka bakaang noruꞌketa karomaung baka daangang piavoma, eeꞌnoko naning tee botovuuꞌnung bakaang miring pankaing deemparaaꞌnaang piavomaung tee, tee naning koontoꞌ, daang minkuvuaung. 19 Moosesie ee boto aruriaꞌ? Eeꞌnoko diiꞌkoo narung otoaꞌ doma tee boto siompumaung. Aming-koo diiꞌke dupisiꞌmeriiꞌnaang piarorimang?” 20 Eeꞌnoko karingai makuꞌaama aaꞌpauꞌ, “Daꞌ maꞌnaang orara-poꞌnung. Baie daꞌ taruuꞌnaang tantumang?”

21 Jiisuuꞌke makuꞌurima aaꞌpuruꞌ, “Ninge narung nko-nko pankaing nkoanko taꞌniniruꞌ. 22 Moosesie naururuꞌ diurukaaꞌkoong dopaꞌ napuꞌeriiꞌnaang. Tee eeꞌnara aarumo Moosesie koontoꞌ tutumpuaꞌ, diiꞌ diikakatauroi tutumpauꞌnung, eeꞌnoko tootoꞌ donkaani-koong dopaꞌ totoꞌperimaung bane Uaanaꞌmung. 23 Diiꞌke tootoꞌnung dopaꞌ napuꞌerimaung Doong Uaanaꞌmung Moosesi-nung boto siomperitaaꞌ. Enang aming-koo diiꞌ iirarorimaang ninge naning mono ookutunung taare-antavansioꞌ Doong Uaanaꞌmung-koo? 24 Tamung daunaaꞌketa tuumpimeriaukaꞌ. Tampaꞌ mataueri aarumo simpeꞌeriai.”

Jiisuuꞌkoo Niaꞌeema Tataꞌeuꞌnaꞌ

25 Niiꞌninge Jerusalemaꞌnupoonge aaꞌpauꞌ, “Eeꞌ, masikaꞌ, aung tee eeꞌnara naning tavaavaꞌnaang mauꞌaamang, apeꞌ? 26 Ooveriaing, aung eeꞌnara tee sirapoꞌke karoko naninge karavuaꞌ. Niikaning pankainankai pa tee Kumponinge Pakoꞌpariꞌniiꞌ tasiꞌpai otong, aiꞌ arekeeꞌ? 27 Nka tee Pakoꞌpariꞌniiꞌ poainaꞌmung naninge noruꞌuaukaꞌnung areketa poainge, eeꞌnoko niiꞌke noruꞌampiri otong aung pouꞌnooꞌ.”

28 Teketa Jiisuuꞌke dootuuꞌnava pankava-koo kara nauvurima aaꞌnaꞌ karoma aaꞌpuuꞌ, “Eeꞌ, diiꞌke noruꞌmeri otong, eeꞌnoko mouꞌnooꞌ noruꞌeri otong. Ning aꞌ ninka moaꞌ. Nka tee ning botomuuꞌnung tee masikung diiꞌke noruꞌeriaꞌ. 29 Teka ninge noruꞌansi oꞌnong tee, teie botomuioꞌ ning tee-ankoita mouꞌnung.” 30 Eeꞌnoko teinge tee mooꞌkoo kariaama mooꞌaavarukoꞌ. Naninge tankaꞌ panteꞌuaꞌ tee-koo, bakaang batei mmeꞌ makotuaruko. 31 Eeꞌnoko karingai nantoonge tee masikaꞌantavaama aaꞌpaakoꞌ, “Tee Kumponinge uripoꞌketa Pakoꞌpariꞌniiꞌ niiꞌ domamuri taremuriainooꞌkoo poraiꞌnange arekeeꞌ taaꞌniꞌanta nkovuaing aung naning bakaang-koo dau basinooꞌ? Makotuaꞌ.”

Piatooronanka~ Jiisuuꞌ Daiꞌkoo Kasiaavaruuꞌnaꞌ

32 Karingai teeꞌ minkuminkuaako teinge Boto Keperuuꞌnavitue taaravauꞌ. Taaravaara tee teinge eeꞌnoko piristiꞌkoong ovontunankai niiꞌning Piatooronanka botoaaruꞌ Jiisuuꞌ mooꞌaavaꞌnaang. 33 Jiisuuꞌke aaꞌpuruꞌ, “Ning diiꞌ ninka okiꞌnooꞌ mmeꞌ oꞌnoriaing, teketa napoꞌ toromaravaing ning botomuuꞌnung-anko. 34 Diiꞌke ning besiꞌmeriaing eeꞌnoko oomeriaukaꞌnung, aiꞌ ning oꞌnoainooꞌ diiꞌ beriarupeuꞌ.” 35 Juꞌkoong ovontunge biiꞌka kareaama aaꞌpauꞌ, “Areꞌ nanuko niiꞌke ooampiaukaꞌnunge? Aiꞌ Kirikiꞌnupoong biikanameensiꞌaape nanuuꞌnaang niiꞌkoong niiꞌning ninka otorooꞌnaang, eeꞌnoko teing akopoꞌnupoong Kirikiꞌnupoong kara nauvuriiꞌnaang deeꞌma. 36 Teie aaꞌmuring, ‘Diiꞌke ning besiꞌmeriaing eeꞌnoko oomeriaukaꞌnung.’ Eeꞌnoko napoꞌ aaꞌmuri, ‘Diiꞌ beriarupeuꞌ ning oꞌnoainooꞌ.’ Tee miruꞌnooꞌ aming teeꞌ minkuvuing?”

Jiisuuꞌ Ntonari Domaang-poꞌnari Tamparama Daankiaruꞌnaꞌ

37 Paroro-koong asiranaꞌmung bakei aaꞌnaꞌ meekaꞌnaꞌmung. Teꞌmung eeꞌnaꞌmung Jiisuuꞌke donkonura aaꞌnaꞌ karoma aaꞌpuruꞌ, “Diiꞌkoong naning tee nukaaꞌdoma ning-anko pora naikiaing. 38 Daari Meekung-koo daariari otoinaꞌ aaꞌpumanaꞌ,

‘Naning tee ning masikaꞌantamumaung ntonari domaang-poꞌnari tunsi-eta kooꞌuaing.’”
(Aisaiaꞌ 58:11; Sekaraia 14:8)

39 Jiisuuꞌke teeꞌ minkuvuuꞌ Tanuaang Meekung minkuvuma. Tee eeꞌnara Tanuaang Meekung teinge Jiisuuꞌ masikaꞌantavaakoꞌninge dueꞌka nkavaavaꞌnaang. Teꞌmung eeꞌnaꞌmung teeꞌ minkuvuko Kumponinge Tanuaang Meekung avuriaꞌ, Jiisuuꞌ meenasi-koo mmeꞌ daaꞌaravaruko.

Nantoong Turampeekoꞌnaꞌ Jiisuuꞌ Taaravaara

40 Jiisuuꞌke teeꞌpuioꞌ mmauꞌ nantoonge karikaꞌke otorokoꞌninge taaravaara aaꞌpauꞌ, “Aung naning masikaꞌ tee eeꞌnara nakaronung Kumponing-etaing.” 41 Eeꞌnoko napoꞌ niiꞌnarionge aaꞌpauꞌ, “A, tee Pakoꞌpariꞌniiꞌ Kaaleliꞌketa poaukaꞌnung. 42 Daari Meekunge eeꞌ minkuvumaang: Tee Pakoꞌpariꞌniiꞌ Deevitaꞌ bakanamuiaang-koo tavoꞌkuaing, eeꞌnoko Beeteleemaꞌnavuntuꞌkoo pontoꞌaravaing, teꞌ eeꞌnooꞌ osi Deevitaꞌ otokoꞌnavuntuꞌkoo.” 43 Teketa tee, ookara teing nantoong paroro-koo poruꞌning pokapokaꞌariruꞌ Jiisuuꞌnung minkunaa tataꞌeema. 44 Niiꞌninge mooꞌaara daiꞌaavaꞌnaang piavorouꞌ, nka naninge birenge kompuaꞌ.

Juꞌnupoong Biikaning Pankainankai Masikaꞌantavaavarukoꞌnaꞌ

45 Teketa tee Piatooronuka toroariruꞌ piristiꞌkoong ovontung-anko Boto Keperuuꞌnavitu-anko. Toroariko niaꞌaarima aaꞌpaaruꞌ, “Aming-koo diiꞌke tee bokueri poriaꞌ?” 46 Eeꞌnoko piatooronukai kara makuꞌaarima aaꞌpaaruꞌ, “Naning teeꞌ karoaung tee karomanaꞌ.” 47 Eeꞌnoko teinge Boto Keperuuꞌnukai makuꞌaarima aaꞌpaaruꞌ, “Diiꞌ ee napoꞌ teie papaara-antarurining? 48 Niiꞌ nantoong pankainanka-koo eeꞌnoko Boto Keperuuꞌnavitu-koo naninge baitoaring tee-koo? Otoaꞌ. 49 Teka aing karikaꞌ Moosesi-nung boto noruꞌaavaꞌ Jiisuuꞌ siompaama barakosiꞌniiꞌ otorong.” 50 Nikodemasi teing-koong narung otoko, tee eeꞌnara tero Jiisuuꞌ beeroꞌuuꞌnung. Enang teie aaꞌpuruꞌ, 51 “Niikaange botoi tauraꞌmuriaꞌ naning booꞌkoo tang-koo tutung kara bakaang taaravampiaꞌ eeꞌnoko noruꞌampiaꞌ aming kapooꞌ nkovuing.” 52 Eeꞌnoko teinge makuꞌaama aaꞌpauꞌ, “Ekee, daꞌ doma Kaaleliꞌnung! Daari Meekung tampaꞌ deerueaing noruꞌeainaꞌ nakaro-nupoong poroaung Kaaleliꞌketa.” 53 Teketa ookara biikanooꞌ tenkenauꞌ, eeꞌnoko Jiisuuꞌ iuꞌkoo nanuuꞌ Oliveꞌpoꞌnamii-koo.

Copyright information for `NAS