Luke 2

Jiisuuꞌ Pontoꞌaruꞌnaꞌ

(Mat 1:18-25)

Tenang Jooni pontoꞌaruꞌnooꞌketa niiꞌning batei tankinura otoko tee daurarong~, Siisaꞌ, miring Akastasie botonang sipuuꞌnung ookutuning nantoong tarevurikoꞌning-koo biikaang miring daariariiꞌnaang bakaang buuku-koo. Aung tee tutunaꞌnamuꞌ miring daari nkoaruꞌnung tenang Sairiniasiꞌ Siiria-nameensiꞌkoo ovoring deempari otokoꞌnang. Eeꞌnoko ookara tee biikanairu porouꞌnairu siompai nanauꞌnung miring daariariiꞌnaang. Eeꞌnoko Josepaꞌ teeꞌke, Kaaleliꞌkoonooꞌketa, Nasaretiꞌketa, deto Judiaꞌnavaro-koonooꞌaape nanuuꞌnunge Beeteleemaꞌ, teꞌ Deevitaꞌ bakanavuntuꞌ deemparako, aiꞌ tee tee Deevitaꞌ baurukaaꞌ bakanamuiaang-koong. Tee teni ninka Meeriꞌ ninka baꞌaang ninka nariꞌ nanuretuꞌnung miring daariareeꞌnaang. Teni tee tootoꞌpoꞌnani. Eeꞌnoko teke otoreko tootoꞌ pontoꞌkoong bateinang makotuuꞌnung. Eeꞌnoko tenie tootoꞌ tutunaꞌnung paravuuꞌ donkaani, eeꞌnoko baaronge korovui daiꞌura kauꞌ karenaumonanka biikanava-koo otoroi karaasiꞌ maaꞌaakoꞌnavaro-koo bempuuꞌ, poꞌnupoꞌnuka biikanavaꞌkoo doona otoaruioꞌ.

Sipisipiꞌ Tanatanukai Jiisuuꞌ Beeroꞌauꞌnaꞌ

Eeꞌnoko teke Beeteleemaꞌketa dueꞌke niiꞌning sipisipiꞌ tanatanuka otorokoꞌ muunga biikaning sipisipiꞌ binaaꞌkoo tanatavaarima. Eeꞌnoko narung koosinung Ovoring bakaang teing-ankoi tavoꞌaruꞌ, eeꞌnoko Ovoring bakaang meenasi teing korovuri arakavaruꞌ eeꞌnoko tenang avoroꞌ pankainge maantoꞌuruꞌ. 10 Eeꞌnoko koosinunge aaꞌpuruꞌ, “Aroreriaukaꞌ, ninge doorenang tampara poꞌantarerompimang doturotu-koong diiꞌ ookara nantoong-koo basiaravaing. 11 Aaꞌnoing eꞌmung diiꞌankoi teke Deevitaꞌ bakanavuntuꞌkoo narung Domang-anta pontoꞌaring, tee Ovoring Pakoꞌpariꞌniiꞌ, Kumponinge teroita maraka-antarurioꞌ nemperimaung. 12 Taaꞌniꞌanta eeꞌ ooverira masikung tasiꞌperiaing: Narung nerakauꞌ baaronge koroari daiꞌniiꞌ nakoꞌbo-koo bempari otoko ooveriiꞌnaang.”

13 Eeꞌnoko namuꞌke taꞌninaꞌ, tee ninka koosinung ninka paning-nupoong-koonavitu karikaꞌ nariꞌ tapoꞌeuꞌ Kumponing daangampaama eeꞌ minkuaama, 14 “Kumponing paning-koo siroong otomaung daangampampimaang, aiꞌ mooa tee kansiꞌkoo poing nantoong tampaꞌ nkovuriko arooꞌarimaing-koo.”

15 Tenang koosinunanka paning-aape toroaririoꞌ sipisipiꞌ tanatanukai aaꞌpauꞌ biiꞌka kareaama, “Aiaꞌ, Beeteleemaꞌ duꞌmarira, ooampiai tee kapooꞌ nkoaring Ovoringe nau-antamuring niiꞌ.” 16 Eeꞌnoko teing iriꞌnarung berora ooaaruꞌ teing, aaꞌnoko Meeriꞌ, Josepaꞌ eeꞌnoko tee tootoꞌ nakoꞌbo-koo bempari otoko. 17 Eeꞌnoko tenang teinge ooaara tee siraꞌpauꞌ tee minkunaa tootoꞌ minkuari otoing koosinunge nauvuruꞌnung. 18 Eeꞌnoko ookara taaravauꞌninge tee minkunaa avutevuꞌai noruꞌauꞌ sipisipiꞌ tanatanukai teing nauaarioꞌ. 19 Teka Meeriꞌke teing aing kapooꞌnanka kinkompura bakaang domang-koo norunoruꞌukoꞌ. 20 Eeꞌnoko teing sipisipiꞌ tanatanuka toroariruꞌ biikanairu-koo Kumponing daangampaama, bakaang meenasi siraꞌpai kapooꞌnanka teinge taaravaama ooauꞌning-koo teeꞌ eeꞌnaꞌ teie koosinunge nauvuruꞌnaꞌ teing.

Simioniꞌ Naankai Aanaꞌ Jiisuuꞌ Onkeonkeꞌuretuꞌnaꞌ

21 Eeꞌnoko Jiisuuꞌ pontoꞌaruꞌnaꞌmung-eta ~beenang-taa doong deemparako tenang dopaꞌ napuꞌauꞌnang tee, miring Jiisuuꞌ tampauꞌ, tee eeꞌnara koosinunge tampuuꞌnung tee miring tenang mmeꞌ poontoaravaruko~ keꞌde-koo. 22 Eeꞌnoko Meeriꞌke tootoꞌ paravuuꞌnooꞌketa meekava-koo beꞌkoo untuꞌanta-koong batei makotuioꞌ, teeꞌ Moosesi bakaang botoi tampui otoinaꞌ, teringe Jiisuuꞌ tavoꞌuretuꞌ Jerusalemaꞌaape Ovoring oko-antavureeꞌnaang teie botoi napoꞌ minkuvui otoinaꞌ aaꞌpuma,

23 “Ookara toireꞌ donkaang tutung pontoꞌariaining Ovoring bakaning meekupoong tang-koong.”
(Toro 13:2,12)

24 Eeꞌnoko untuꞌanta-koo boontunampariiꞌnaang berouꞌ botoi Ovoring bakaange tampui otoinaꞌ aaꞌpuma,

“Urareng-koo~ mantaꞌnisining ninka boonturariaing niiꞌnooꞌ niiꞌnamuriiꞌ kuukuuꞌkoo kooꞌnening keura.”
(Boontu 12:8)

25 Tenang teke Jerusalemaꞌ naning narung otokoꞌnung bakaang miring tee Simioniꞌ. Aung tee naning koontoꞌ Kumponing-koo meeꞌduꞌpiari otokoꞌnung. Nempui besiꞌukoꞌnung Isireeli-koong Dun-sirunsinara~ tavoꞌaravaing, eeꞌnoko Tanuaang Meekung tee tee-koo otokoꞌnung. 26 Eeꞌnoko Tanuaang Meekunge tee tee-koo siraꞌpuuꞌ tee booaukaꞌnung teie mmeꞌ oovuaꞌ tee Domang-anta Ovoringe tero Pakoꞌpariꞌuuꞌnung~. 27 Eeꞌnoko Tanuaang Meekunge nau-antavuioꞌ dootuuꞌnava pankava-koo kuung tumparuꞌ; 28 Eeꞌnoko tenang tee tootoꞌ Jiisuuꞌ baumararinge kuung poꞌantavuretuꞌnang botoi minkuvumanaꞌ aarumo nkovureeꞌnaang, teie pora birenge nkavura biraankevuma Kumponing-koo aaꞌpuuꞌ, 29 “Ovoring ee, emuꞌ tee ning dakaang botovotonaaꞌ mooa ninka bakemari moompaing makosi, teeꞌ temuꞌ marakarari naumeuꞌnaꞌ, aiꞌ ninge tee emuꞌ ooansing nkaang dutai Tee Domamuriaing dake maamu-antaveuꞌnung nantoong-koo dutakanooꞌka. 32 Teie Arakai teing Isireeli-eta taapoꞌnupoong kapooꞌ masikung biiꞌka noruꞌaavarukoꞌnung sirapoꞌevuriaing eeꞌnoko Isireeli-nupoong meenasi kong-antavuriai.” 33 Eeꞌnoko Jiisuuꞌ baumararing taꞌninuretuꞌ teing-koo kapooꞌnanka Jiisuuꞌkoo minkuvuuꞌning-koo.

34 Eeꞌnoko Simioniꞌke tekang biraankevurira Meeriꞌ nauvuma aaꞌpuuꞌ teni Jiisuuꞌ bauko, “Ani ee, aung tootoꞌ tee miruꞌari otoing mmauꞌ nantoong Isireeli-nupoong-kooning aaꞌnoaing niiꞌning duaꞌantavuriai eeꞌnoko napoꞌ niiꞌning daaꞌantavuriai; 35 Eeꞌnoko napoꞌ tee tee taaꞌniꞌanta deempari otooꞌnaang miruꞌari otong nantoonge tompimpaavaing, eeꞌnoko teeꞌ tompimpaako nantoong mmauꞌ biikaang domang-eta onounanka siraꞌparavai. Eeꞌnoko daꞌ bainatu-pinaꞌ orarunsie domang tooꞌduainanie.”

36 Eeꞌnoko napoꞌ niiꞌnani manikuma nakaronani teke otokoꞌ miring Aanaꞌ, Panuele baurang, Aasia bakanamuiaang-koonani. Teni baꞌung ninka mareꞌ ~kemareꞌka-taa otoretuꞌnani nampeesiaruꞌnooꞌketa, eeꞌnoko emuꞌ beenaumo kivora-ita karemareu ookara mareꞌ bakaning; 37 Eeꞌnoko ani teni pava dootuuꞌnava pankava-ita tokoo bearukoꞌnani; teke otoi unkumoarama kunsiarama dootuuꞌarakoꞌnani muunga eeꞌnoko doonga. 38 Tenang tee-koo batei-koo pora Kumponing tampara tampuuꞌnung eeꞌnoko tee tootoꞌkoo nantoong minkuvuruꞌ teing Tee Poaing nempai besiꞌaakoꞌning Jerusalemaꞌnupoong daiꞌariri otoromanooꞌketa napoꞌ mooꞌuriaing Ovoringe maraka-antavuruꞌnung.

39 Eeꞌnoko tenang ookara kapooꞌnanka nkovureta botoi Ovoring bakaange minkuvui otoinaꞌ tekang toroariruꞌnung Kaaleliꞌnavaro-aape bera biikanooꞌ osi Nasaretiꞌ tavoꞌariruꞌnung. 40 Eeꞌnoko tootoꞌ pankaꞌparara purimparuꞌnung mataue maantoꞌniiꞌ, eeꞌnoko Kumponinge tampaꞌ oovui otokoꞌ biraankevui.

Tee Nemaka Jiisuuꞌ Datavouꞌnaꞌ Dootuuꞌnava Pankava-koo

41 Emuꞌ tee, ookara mareꞌkoo tee Paroro Baariꞌkoong~ nkoaakoꞌnang baumararing tee Jerusalemaꞌaape berekoꞌnung. 42 Eeꞌnoko tenang tee kivora-ita kemareꞌka mareꞌ makotuuꞌnang tee nariꞌ berouꞌ baumararing ninka, tering nanurekoꞌnaꞌ nariꞌ. 43 Tenang paroro bakearako nantoong toroariko tee nemaka Jiisuuꞌ teke otouꞌnung Jerusalemaꞌke. Baumararinge tee noruꞌureaꞌ. 44 Teꞌmung nanaama eeꞌ noruꞌurekoꞌ, niiꞌning ninka poromang. Eeꞌnoko taunga muumpuruꞌnooꞌka besiꞌuretuꞌ beeꞌmarang-ankoa eeꞌnoko ookara teringe noruꞌaaresining-ankoa. 45 Teka oovurearuta toroaretuꞌ Jerusalemaꞌaape tee besiꞌureeꞌnaang. 46 Teketa beenang doong tankinuko daaꞌuretuꞌ teka dootuuꞌnava pankava-koo boto naunuka-koo meuꞌ baꞌnanuioꞌ taaravuritaaꞌ otoko nianiaꞌnanka niaꞌurima. 47 Eeꞌnoko teing taaravauꞌning bakei asikovorouꞌ tee-koo bakaang norukasiꞌkoo eeꞌnoko makumakuꞌkoo. 48 Eeꞌnoko tee baumararinge oovureta taꞌninuretuꞌ, eeꞌnoko baukoi aaꞌpuuꞌ, “Nnuring, arekeeꞌkoo dake neeꞌ teeꞌ nkomeresi? Aung ee, neeꞌdaring poreꞌmoresing daꞌ besiꞌkoo noruꞌ mankiꞌmoresitaaꞌ.” 49 Eeꞌnoko teie aaꞌpuretuꞌ, “Ning aming-koo besiꞌkoo poreꞌdoremang? Deeꞌke ee noruꞌereaꞌ tee ning Mmaꞌ bakanava-koo oꞌnoaing?” 50 Teeꞌpuresioꞌ teringe tasiꞌpurearuuꞌ bakaang kara. 51 Eeꞌnoko teie tee tering siompuresi tekang Nasaretiꞌaape doonko berouꞌ, eeꞌnoko otoi osie kara siompukoꞌ tering beekaang. Eeꞌnoko baukoi aing ookara kapooꞌnanka domang-koo kinkompuuꞌ.

52 Eeꞌnoko Jiisuuꞌ pankaꞌparuꞌnung matau ninka nariꞌ. Kumponinge eeꞌnoko nantoonge deto tampaꞌ nariꞌ ooaakoꞌ.

Copyright information for `NAS