Luke 20

Baie Jiisuuꞌ Tauraꞌ Avuuꞌnung Niaꞌauꞌnaꞌ

(Mat 21:23-27; Mak 11:27-33)

Niiꞌnaꞌmung Jiisuuꞌke teke dootuuꞌnava pankava-koong parang-koo daankiarama doorenang tampara nau-antavurikoꞌ; Teketa teinge piristiꞌkoo ovontung eeꞌnoko boto naunuka, nantoong-koo urang-antanuka ninka tee-anko pororaiꞌnange aaꞌpauꞌ, “Naumeriai dake aremuriiꞌ tauraꞌ otoko dake aing kapooꞌnanka nkovemaatoinge, baie aruuꞌnunge tee tauraꞌ?” Teie makuꞌurima aaꞌpuuꞌ, “Iroꞌ ninge diiꞌ napoꞌ tanaꞌdampiko naumeriaing diiꞌke. Baie tauraꞌpuioꞌ Joonie nantoong ntong-koo minkivurima meekaꞌantavurikoꞌ, Kumponinge aiꞌ tamung nantoonge?”

Eeꞌnoko teing biiꞌka niaꞌeema aaꞌpeekoꞌ, “Areꞌpampiaꞌnaang? Aaꞌpampiko deekoꞌ, ‘Kumponinge,’ teie aaꞌmuriiꞌnaang, ‘Teka diiꞌke aming-koo Jooni masikaꞌantaveriarukoꞌ?’ Teka aaꞌpampiko deekoꞌ, ‘Tamung nantoong-etaing,’ ookarai nantoonge kapange dupisiꞌmaariiꞌnaang, aiꞌ teinge tee Jooni nakaronara Kumponing-etaing tasiꞌpai otong.” Teketa aaꞌpauꞌ makuꞌaama, “Niiꞌke aaꞌ noruꞌampiaꞌ baie pa tauraꞌpuioꞌ.” Eeꞌnoko Jiisuuꞌke aaꞌpuruꞌ teing, “Eeꞌ, ninge teeꞌke naurampiarooꞌnaang baa tee ning tauraꞌ amuuꞌnung aing kapooꞌnanka nko-koo.”

Teing Oreng Mintoonau Oko-antavuruꞌning-koong Mirumiruꞌ

(Mat 21:33-46; Mak 12:1-12)

Eeꞌnoko Jiisuuꞌke kato nau-antavurima aung kara dikitoꞌ nauvuruꞌ teing nantoong, “Naning narunge mintoonau uaininau keempuuꞌnung, teketa niiꞌning nantoong tenau tare-antavurira niiꞌnameensiꞌkoo tenkenuuꞌ pankaroong otooꞌnaang teke. 10 Eeꞌnoko tenang batei sinang kavuꞌkoong makotuioꞌ teie narung bakaang botovotonaaꞌ botovuuꞌ teing-anko uaini tare nkonuka-anko niiꞌning sinang baarauni-koong~ tenau-koo nkaevuaꞌnaang. Teka teinge tenau tare nkonukai tee botovotonaaꞌ murasiavaama bataꞌauꞌ tee baarauni avaavaꞌ. 11 Teketa teie napoꞌ niiꞌnung botovotonaaꞌ botovuuꞌ. Tee eeꞌnung napoꞌ teeꞌ nariꞌ muraꞌaama maimaiaꞌnaꞌ nkoaama bataꞌauꞌ tee baarauni avaavaꞌ. 12 Eeꞌnoko napoꞌ teeꞌ nariꞌ teie ovoringe beenaumo-nung botovuuꞌ, eeꞌnoko tee aung ereng-antavaara damaꞌdu duaꞌauꞌ.

13 “Teketa teie uaininau ovoringe aaꞌpuuꞌ, ‘Enang aming nkoamaꞌnaang? Enang aaꞌ tee nnuring kirokai ninge aaꞌnaꞌ piaavamaung botoampaing. Teing pa amaiaaꞌoropeuꞌ tee-koo.’ 14 Teka tenang teinge tare nkonukai tee bauring ooaara biiꞌka kareaama aaꞌpaakoꞌ, ‘Tee aung eeꞌnung barenku okovuaing. Aiaꞌ dupisiꞌampiai tee barenku okomuriainaꞌ.’ 15 Eeꞌnoko teinge tee uaininau-eta damaꞌdu duaꞌaara teka dupisiꞌauꞌ tee. Enang arekeeꞌ nkovuriaing teie tenau okovenunge? 16 Teie aaꞌ tee teing tare nkonuka-anko pora tavurima opuriaing, eeꞌnoko niiꞌning oko-antavuriaing.”

Tenang teinge taaravaara tee aung minkunaa aaꞌpauꞌ, “Ee aing, teing aaꞌ oo niiꞌke teeꞌ nkoauꞌnaꞌ nkoampiarupeuꞌ.”
17 Teka teie ooꞌoovurima teing aaꞌpuruꞌ, “Nko temuriiꞌ nko-koo makosiriaung deekoꞌ anaare Daari Meekung-koonaare aming miruꞌari otong,

‘Tereꞌ eeꞌnareꞌ kapanareꞌ pava kaninukai pooreꞌaama duaꞌauꞌnareꞌ ookutunava-koo eꞌmanianareꞌ tumanareꞌ deemparioꞌ tasiꞌpauꞌ damaꞌke.’?
(Kena 118:22)

18 Ookara nantoong tereꞌkoo tasiꞌpaavaꞌ tupampariaining tee biiꞌka pisiraꞌariaing, bera baa tee naning tereꞌ dau duaꞌaravaing tee tereꞌke puutuvuaing.”

19 Eeꞌnoko teketa tenang boto naunuka eeꞌnoko piristiꞌkoo ovontung tasiꞌpariruꞌ teie tee kara dikitoꞌ teing tooꞌantavuri minkuvurioꞌ. Eeꞌnoko tenang eeꞌnang taung besiꞌauꞌ Jiisuuꞌ daiꞌaavainavung, teka nantoong-koo avoreauꞌ.

Taakisi Mooꞌkoo Jiisuuꞌ Niaꞌauꞌnaꞌ

(Mat 22:15-19; Mak 12:13-17)

20 Tee tee teinge keuai otokoꞌnung makensiꞌnavitu botoaarima tee-anko barevare-nupoong masikeng-pinaꞌ oroꞌpariri avakareaavaꞌnaang, eeꞌnoko kara minkuvuaining-koo oranaare taaravaara deekoꞌ ovoꞌmaꞌkoo tavoꞌaavaꞌnaang. 21 Teinge niaꞌaama aaꞌpauꞌ tee, “Nau-anta ee, niiꞌke noruꞌdampiri otong daꞌ koontoꞌnaꞌ karema nau-antamerimaung, tankaang-anta-pinaꞌ oroꞌdaravaunge, teka bakei masikaꞌ Kumponing bakanavung naumerimaung. 22 Arekeeꞌ, niiꞌke Juꞌnupoonge ee daurarong~ pankaing, Siisaꞌ, Roomaꞌnung taakisi avuꞌkoo makosi aiꞌ makosi deeaꞌ?”

23 Teka teie biikaang avakare tasiꞌpura aaꞌpuruꞌ teing, 24 “Ioꞌ mooniꞌnu naumeriai. Au-koo aung boreꞌ uuꞌaaꞌ baa-koong aaꞌnung miring daariari otong?” Teinge aaꞌpauꞌ, “Siisaꞌkoong.”

25 Teketa teie aaꞌpuruꞌ teing, “Tee tee averiaing teing kapooꞌ Siisaꞌ bakaning tee-anko eeꞌnoko Kumponing bakaning Kumponing-aape averiai.” 26 Teeꞌ makuꞌurioꞌ doona ooaavaꞌ baankaꞌaapeuꞌnaꞌ nantoong-koo uroꞌka, teka taꞌninaara dooroompariruꞌ teing.
20:26Taakisi duaꞌ orokovuko deekoꞌ teinge Eerotiꞌ bakaninge tavaapeuꞌ, eeꞌnoko tamung tauraꞌpuko deekoꞌ teinge Boto Keperuuꞌnavitue turampaapeuꞌ.


Booꞌketa Daaꞌkoong Niaꞌauꞌnaꞌ

(Mat 22:23-33; Mak 12:18-27)

27 Teketa napoꞌ Noruꞌ Pitunavitu-koong~ niiꞌning Jiisuuꞌanko nianiaꞌ ninka porouꞌ. Teing teing booꞌketa napoꞌ daaꞌ masikaꞌantavaavaꞌnavitu.
20:27Aaꞌpaama, “Booꞌketa daaꞌ Moosesi bakaang dariraari-koo ooampiaung.”
Tevitu-koo niiꞌning Jiisuuꞌanko porora avakareaama eeꞌpinaꞌ niaꞌauꞌnung,
28 “Nau-anta, Mosesie aung boto daarimemuruꞌnung,

‘Naning narung booko baꞌaang otoko toireꞌ otoai tee donkaani baaraꞌmaꞌnunge nampuai teni naaro tee ninka bataata booꞌparuꞌnung tootoꞌ paravevureeꞌnaang.’
(Boto 25:5)

29 Urikamuꞌ tee namaiaꞌ naroꞌka ~kenaanka-taa otorokoꞌnung. Eeꞌnoko tutunaꞌnung nampeesiarara booꞌparuꞌ bauring otoaꞌ. 30 Eeꞌnoko baaraꞌmaꞌnunge teni manikuma nampura teeꞌ nariꞌ booꞌparuꞌ bauring otoaꞌ. Teketa beenaumo-nunge; 31 Teeꞌ nariꞌ temaiaꞌkoo ookara-koo ~kenaanka-taa-koo nkoaruꞌ. Ookara boorouꞌ biurukaaꞌ otoroaꞌ. 32 Eeꞌnoko asiꞌnaꞌmoo teni nani manikuma booꞌparuꞌ. 33 Enang teꞌmung asiranaꞌmung booꞌnuka daaꞌariainaꞌmung temaiaꞌkoo arera baꞌaang deemparavainani? Aiꞌ ookara ~kenaanka-taae nampauꞌnanie teni.”

34 Eeꞌnoko Jiisuuꞌke aaꞌpuruꞌ teing, 35 “Aung emuꞌnung batei-koo donkaang eeꞌnoko manikuꞌ nampeesiarimaung, teka damaꞌnung batei-koo teing Kumponinge makosi-antavuriaining booꞌketa daaꞌarira otoꞌkoo tee teing nampeesiariaukaꞌning, 36 aiꞌ teing tee napoꞌ booꞌkoo makosinuka deeaꞌ; aming-koo, nnaꞌ koosinunanka-pinaꞌ oroꞌnanka deempariko. Teing booꞌketa daaꞌariainooꞌkoo Kumponinge baurukaaꞌ deempariri otoroaing. 37 Moosesie eeꞌnarai teeꞌ nau-antamuruꞌnunge teing booꞌnuka domampariaing-koong kara. Bakaang dariraari-koo Kumponinge tuuꞌdoiꞌnavari tamung urusivukoꞌnavari-eta karoma Moosesi aaꞌpuuꞌ,

‘Ning tee Kumponing teing aing aaꞌning biikaang: Eebaraamiꞌ, Aisakeꞌ, Jeekopiꞌ. Teing ninka komeeri Oꞌnoi Oꞌnomaung ning.’
(Toro 3:6)

38 Teeꞌ minkuvuuꞌnung-koo tasiꞌpampiri otong ookara bakaning deempariri domantooꞌnuka otorong Kumponing bakaang duta-koo, booꞌnuka deeaꞌ.”
20:38Teing Noruꞌ Pitunavitu teing ookara piristiꞌnanka. Eerotiꞌke biikaang pankaing piristiꞌ miruꞌuko deekoꞌ donkonupeuꞌ. Paarivuko deekoꞌ, paariaravaing. Tee piristiꞌ pankaing tee Juꞌ biikaang koompaaraꞌnavitu-koong boreꞌ. Eerotiꞌ dotu-anta-koo Daari Meekung-koo Moosesie daarivuuꞌnavaro navaro masikaꞌantavaakoꞌning, eeꞌnoko napoꞌ Roomaꞌ eeꞌnoko Kirikiꞌnupoong biikaang aarumo arooꞌaarikoꞌ.


39 Eeꞌnoko napoꞌ niiꞌning boto naunukai makuꞌaama aaꞌpauꞌ, “Nau-anta, daꞌ tampaꞌ kareing.” 40 Teketa tee, teing ookara nantoong avoreauꞌ Jiisuuꞌ niiꞌning nianiaꞌ niaꞌkoo.

Tee Pakoꞌpariꞌniiꞌ Baa Bauring Deemparavaing Jiisuuꞌke Niaꞌuruꞌnaꞌ

(Mat 22:41-46; Mak 12:35-37)

41 Teketa Jiisuuꞌke biikaang noruꞌ tante-anta-koo aaꞌpuruꞌ teing, “Arekeeꞌkoo nantoonge aaꞌpaamaung, ‘Tee naning Kumponinge tero Pakoꞌpariꞌuuꞌnung nantoong domampuri tarevuriainooꞌkoo tee Deevitaꞌ bakanaving-koong deempari tavoꞌaraaꞌnaang.’? 42 Aiꞌ Deevitaꞌke baka aaꞌpuuꞌnooꞌkoo tee-koo Buuku Kena-koo,

43 ‘Teie Ovoringe nkaang Ovoring aaꞌpuuꞌ, “Aꞌ ning-koo tampavine-koo baꞌnaniai bera ninge dakaning kare-nupoong dakaang kauꞌ patuꞌnanka deeng-antarerompainooꞌke basi.” ’
(Kena 110:1)

44 Teeꞌ minkuvuma Deevitaꞌke tee Pakoꞌpariꞌniiꞌ Ovoring Kumponing-pinaꞌ basi tampuuꞌnung. Enang Kumponing deemparako arekeeꞌ napoꞌ Deevitaꞌ bakanaving-koong tampaapeuꞌ?”

45 Eeꞌnoko ookara nantoonge taaravaioꞌ teie aaꞌpuruꞌ bakaning barevare-nupoong, 46 “Tarerariai teing boto naunuka-koo biikaang aarumoi baaroꞌantaraariꞌneeng. Teing mononopaꞌ isikeng ninka avitoitoi nanuꞌkoo piavoromaing. Eeꞌnoko nantoonge pankaing-antavaariiꞌnaang piavorokooꞌ baaveromanairu-koo. Napoꞌ pava dootuuꞌnairu-koo baꞌnavaꞌnaniꞌnanka tampeng-koo baꞌnaniaakooꞌ nantoonge ankampaariaꞌnaang, eeꞌnoko paroro kante-koo pankeng-pinaꞌ noruꞌaariiꞌnaang piavorokooꞌ. 47 Eeꞌnoko naaroonku biikaning pava ookeng daping opoꞌ dunkumpaama kunsi isikenge dakarakaꞌpaakooꞌ orakaꞌ noruꞌaariꞌneeng-koo. Teing teing eeꞌning pankaing kiimata nkavaavaining.”

Copyright information for `NAS