Luke 24

Jiisuuꞌ Booꞌketa Daaꞌaruꞌnaꞌ

(Mat 28:1-10; Mak 16:1-8; Jon 20:1-10)

Teka Saandei-naꞌmung tero maata teing manikuꞌ berouꞌ teꞌ kuvi dakoꞌdoma, duuni numpompoꞌning maamu-antavauꞌning nkavai, Jiisuuꞌkoong mono sisiꞌaavaꞌnaang. Eeꞌnoko teinge kapang kuvi dakoꞌdoma karanaang-eta korimparioꞌ ooauꞌ. Teka tenang kuung tumparira Ovoring Jiisuuꞌkoong mono ooaavaꞌ. Tenang noruꞌ tee-koo paapaaꞌariri otoroko bakei taꞌninaꞌ kenaanka naninka teing-koo dueꞌ donkonuretuꞌ mononopaꞌ sisisiisie nopaꞌaresi. Eeꞌnoko teketa avoreaara teing teꞌ doonko kansiꞌkoo kinkinauꞌnung, eeꞌnoko tenaankai aaꞌpaaretuꞌ, “Aming-koo diiꞌke tee domantooꞌ anka booꞌnuka biikanooꞌka besiꞌerimang? Tee aꞌ otoaꞌ; tero daaꞌaring; Napoꞌ noruꞌeriai teeꞌ Kaaleliꞌ otori naururuꞌnaꞌ, tee tee Naning-naumpoꞌ Paning-etaing tavoꞌaavaing orananka biikaang bireng-koo eeꞌnoko aaꞌbarataꞌkoo taakavaako beenang doong deemparako napoꞌ daaꞌaravai.”

(Luk 9:22; 18:31,33)

Eeꞌnoko teinge tenang noruꞌauꞌ tee bakaang kara.

Eeꞌnoko kuvi dakoꞌdoma-ita osi duparira teinge teing nanaiꞌketa narung nauaaruꞌ tee aung kapooꞌnanka, eeꞌnoko napoꞌ teing niiꞌning ookara barevare-nupoong nariꞌ. 10 Ainge maniiꞌke dooreaaruꞌ teing kara okovuri nkanuka, ainge aaꞌnoko Meeriꞌ Maꞌdala-nani, eeꞌnoko Joana eeꞌnoko Meeriꞌ teni Jeemisi bauko, eeꞌnoko niiꞌning manikuꞌ napoꞌ nariꞌ. 11 Teka tee aung karananka teinge nauaaruꞌning minkunaa boturopa-pinaꞌ noruꞌauꞌ. Eeꞌnoko teinge masikaꞌantavaariaꞌ teing. 12 Teka Piita iꞌamparara kuvi-aape kuaꞌparuꞌ, eeꞌnoko kinkinura daanto kuung oovuma baarong teka oovuuꞌ booꞌnuka daiꞌkoong baka otoko. Eeꞌnoko teketa osi duparuꞌ paapaaꞌari tee-koo kapooꞌ nkoaruꞌnung-koo.

Jiisuuꞌke Emeasi-navung-koo Kenaankara Kuneꞌuretuꞌnaꞌ

(Mak 16:12-13)

13 Teketa teꞌmung eeꞌnaꞌmung Jiisuuꞌ bakaning barevare-nupoong-koo kenaanka nanuretuꞌ niiꞌnamono-koo miring Emeasi aaꞌnooꞌ Jerusalemaꞌketa kenaanka aua makosinooꞌ nanuꞌkoo. 14 Eeꞌnoko tee kapooꞌnanka nkoaruꞌning-koo nariꞌ minkuarema nanureko Jiisuuꞌ baka dueꞌ pora nariꞌ nanaakoꞌ. 16 Teka beekaang duta dootai tavuretuꞌ tee tasiꞌkoo. 17 Eeꞌnoko teie aaꞌpuretuꞌ tenaanka, “Aung minkunaa aremuriiꞌ deeꞌke orarunsiraresi minkuerema naniremaang?” Eeꞌnoko teꞌ dantavaretuꞌ tenaanka orarunsi-poꞌnaanka-pinaꞌ oroꞌparesi. 18 Tenang narunge tenaanka-koo miring Kiliopasiꞌke aaꞌpuuꞌ tee, “Arekeeꞌ minkuemaang? Daꞌ ee Jerusalemaꞌke aing-koo doompeto otoitaaꞌ taarakiaꞌ teing-koo kapooꞌ nkoarieening-koo?”

19 Eeꞌnoko teie aaꞌpuretuꞌ tenaanka, “Aming kapooꞌnanka?” Eeꞌnoko tenaankai tee nauvurema aaꞌpuretuꞌ, “Jiisuuꞌ Nasaretiꞌnung bakaang minkunaa, tee nakaronara karoma nko-koo purintoꞌpoꞌnung Kumponing-koo eeꞌnoko ookara nantoong-koo uroꞌkanooꞌke. 20 Tee eeꞌnung niikaninge piristiꞌnanka-koo ovontunge eeꞌnoko tare-nupoong aaꞌninge tavoꞌauꞌnung kavumani-aape simpeꞌai orara tampaara dupisiꞌaavaꞌnaang, eeꞌnoko aaꞌbarataꞌkoo taakavauꞌ. 21 Teka niiꞌke eeꞌ noruꞌampikoꞌnung tee tee eeꞌnung niiꞌ Isireeli-nupoong napoꞌ donkomuriaing. Eeꞌ, teketa tee aung ookara nkoarieenooꞌketa eꞌmung tee beenang doong deemparing. 22 Aaꞌnoing niiꞌninge manikuꞌke niiꞌkooninge taꞌning-antamaaring. Taneꞌke tero beroraiꞌnange kuvi dakoꞌdoma eeꞌnoko teinge ooaavaruing bakaang mono; 23 Eeꞌnoko teinge toroarira aaꞌpaing, ‘Niiꞌke koosinunka noone-pinaꞌ ooarampiring, aaꞌpuresinaanka, “Tee domamparing.” ’ 24 Teketa barevare-nupoong-koo niiꞌning teꞌ kuvi dakoꞌdoma-aape beroing, eeꞌnoko teeꞌ nariꞌ ooai manikuꞌke minkuainaꞌ, teka tee ooaavaꞌ teinge.”

25 Eeꞌnoko teie tenaanka aaꞌpuretuꞌ, “Bakei kanuꞌka eeꞌnoko domange masikaꞌanta-koo anaꞌkai tee kapooꞌnanka Kumponing-etaing nakaro-nupoonge tero minkuauꞌnanka-koo. 26 Arekeeꞌ, teeꞌ ee teing aing baikenanka kuneꞌuarupeuꞌ teie domang-anta-koo Pakoꞌpariꞌniiꞌke aarenuuꞌnaang bakaang nerang-koo kuung?” 27 Eeꞌnoko ookutunairu Daari Meekunge tee baka-koo minkuvui otoinairu tasiꞌantavuretuꞌ Moosesi bakanarong-eta tutumpura doonko teing nakaro-nupoong biikanaronge basivuma nauvuretuꞌ.

28 Teeꞌ minkuarima osinamono-koo dueꞌ porouꞌ tenaanka berekoꞌnamono-koo. Eeꞌnoko basiarima tankinuuꞌnaang-pinaꞌ nkoarako teka tenaankai datevuretuꞌ tee. 29 Aaꞌpuretuꞌ, “Neeꞌ ninka oꞌnoreai, aiꞌ aung muung-aapevuing, doong pankarong oparing.” Tee tee nariꞌ tenaanka ninka berouꞌ teke nariꞌ otorooꞌnaang.

30 Tenang taamantomai otoroitaaꞌ teka bereteꞌnu nkavura biraankevura eeꞌnoko pisiꞌura tenaanka avuretuꞌ. 31 Eeꞌnoko beekaang duta tenang daateꞌarara tasiꞌpuretuꞌ tee, eeꞌnoko tee teke paaꞌaruꞌ tenaanka-koo dutakanooꞌketa. 32 Tenaanka beeꞌka karorema aaꞌparetuꞌ, “Maikoꞌ, neeꞌkoo tee domang-koo ntaꞌ betuꞌantamuresing taunge neeꞌ karamurema Daari Meekung-kooning kara neeꞌkoo siraꞌpuma!”

33 Eeꞌnoko tenaanka tenang tee batei-koo iꞌampareta Jerusalemaꞌaape toroaretuꞌ eeꞌnoko bereta teing nanaiꞌketa narung kuneꞌaareta nariꞌ oosiariri otoroko napoꞌ niiꞌning ninka nariꞌ. 34 Eeꞌnoko teinge tenaanka aaꞌpaaretuꞌ, “Ovoring bakei masikaꞌ daaꞌaring. Saimoniꞌkoo oroꞌpari.” 35 Eeꞌnoko tenaankai napoꞌ teing nauaaretuꞌ teing kapooꞌ tenaanka-koo taunge nkoaruꞌning, eeꞌnoko tenaanka-koo tasiꞌparuꞌnaꞌ bereteꞌ pisiꞌuuꞌnooꞌke.

Jiisuuꞌ Bakaning-koo Oroꞌparuꞌnaꞌ Tautauvurima

(Mat 28:16-20; Mak 16:14-18; Jon 20:19-23)

36 Tee tee tenaankai teeꞌ minkuvuresi otoreko tee Jiisuuꞌ baka teꞌ teing-koo meuꞌ donkonura aaꞌpuuꞌ, “Tampara, ee aing! Mooa tee diiꞌkoo otoaing!” 37 Teka teing domang taꞌninaara avoreauꞌ tanuaang ooauꞌnung-pinaꞌ noruꞌaama. 38 Eeꞌnoko teie aaꞌpuruꞌ teing, “Nko diiꞌ aming-koo avoroꞌke tairurimang? Aming-koo noruꞌ keekooꞌdariri? 39 Oomeriai bireng eeꞌnoko kauꞌ tasiꞌmeri, ning tee ning. Ioꞌ komerira oomeriai, aiꞌ tanuaang tee aaꞌning bioꞌ eeꞌnoko kooꞌ otoaung teeꞌ ning oomerimatomanaꞌ.”

40 Eeꞌnoko teeꞌ minkuvurira nau-antavuruꞌ bakaang bireng eeꞌnoko kauꞌ niirie tooꞌpauꞌnairu. 41 Eeꞌnoko teeꞌ nariꞌ dotue maantoꞌurira noone-pinaꞌ noruꞌai masikaꞌantavaavaꞌ papaaravaririoꞌ aaꞌpuruꞌ teie teing, “Kapooꞌ ee nai-koo makosi anke otomang?” 42 Eeꞌnoko teinge taviꞌnooꞌ uaꞌniiꞌnooꞌ avauꞌ, davainta nariꞌ. 43 Eeꞌnoko teie nkavura tee teinge ooaioꞌ maaꞌuuꞌ.

44 Teketa tenang aaꞌpuruꞌ teing teie, “Aing teing nkaning kara diiꞌ naurampiruꞌning tenang diiꞌ ninka nariꞌ oꞌnoi aaꞌpama: Ookara tee kapooꞌnanka Daari Meekunge ning-koong tero minkuvuuꞌnung koontoꞌ dupearavaining aaꞌnooꞌke Moosesi bakaang boto, nakaro-nupoong biikaang kara, eeꞌnoko ookara kenananka otoinooꞌke.”

45 Tenang teeꞌ minkuvura biikaang onou daateꞌantavuruꞌ noruꞌaavaꞌnaang tee Daari Meekung-koong karananka aaꞌpurima, “Teroita eeꞌ daariari otomaung, tee Domang-anta Kumponinge Pakoꞌpariꞌuuꞌnung~ pora baike kuneꞌura beenang doong deemparako booꞌketa daaꞌaravai, eeꞌnoko napoꞌ tee domang bereꞌanta eeꞌnoko tontaꞌanta orakaꞌ nko-ita daankiaavaing bakaang miring-koo ookara kansiꞌkoo-nupoong-koo Jerusalemaꞌketa tutumpaara. 48 Eeꞌnoko ninge aaꞌdampimang, ninge tenaare dupeanko ooverimaing deentaririoꞌ diiꞌ eeꞌning teing daanki nkonuka miruꞌdampimang aing kapooꞌnanka siraꞌperiaining. 49 Eeꞌnoko ee aing, ninge tee Tanuaang Meekung Mmaꞌke maraka-antavuuꞌnung botoampaing diiꞌkoo dau otoꞌkoo. Teka anke osi pankamono-koo otoriaing diiꞌ bera purintoꞌke paning-etainge maantoꞌduriainooꞌke basi.”

Jiisuuꞌ Deto Paning-aape Koinuuꞌnaꞌ

(Mak 16:19-20; Nka 1:9-12)

50 Teketa temono-ita bakaning barevare-nupoonge Jiisuuꞌ siompai berouꞌ bera Beetani-navuntuꞌkoo, eeꞌnoko bakaang bireng toonura biraankevurikoꞌ teing bakaning barevare-nupoong. 51 Eeꞌnoko biraankevurima tee deto iꞌamparara paning-aape tenkenuuꞌ teing-ankoita. 52 Eeꞌnoko teinge pankaing-antavaara tee toroariruꞌ Jerusalemaꞌaape aaꞌnaꞌ doturotuarima. 53 Eeꞌnoko beꞌnuꞌai Kumponing daangampaama eeꞌnoko biraankeaama otorokoꞌ pava dootuuꞌnava pankava-koo.

Copyright information for `NAS