Mark 12

Kara Mirumiruꞌ Teing Nantoong Oreng Mintoong Uaini Tareaakoꞌning-koong

(Mat 21:33-46; Luk 20:9-19)

Jiisuuꞌke niiꞌning kara mirumiruꞌ nauvurima aaꞌpuruꞌ, “Naning narunge mintoong uaininau keempura parange korovui kaavaneꞌuuꞌ, eeꞌnoko dinkung nenkeꞌuuꞌ uaini miiꞌdoma tenau-koong. Eeꞌnoko napoꞌ pava tarenava siaruaꞌ kanivuuꞌ. Eeꞌnoko napoꞌ niiꞌning nantoong tenau tare-antavurira niiꞌnamensiꞌkoo tenkenuuꞌ. Eeꞌnoko tenang batei sinang kavuꞌkoong makotuioꞌ teie narung bakaang botovotonaaꞌ botovuuꞌ teing-anko uaini tarenuka-anko niiꞌning sinang baarauni-koong~ tenau-koo nkaevuaꞌnaang. Eeꞌnoko teinge tare nkonukai tee botovotonaaꞌ mooꞌaara bataꞌauꞌ murasiavaama, tee baarauni avaavaꞌ. Eeꞌnoko napoꞌ narung botovotonaaꞌ botovuuꞌ. Eeꞌnoko teinge boreꞌ bapeꞌaama maimaiaꞌnaꞌ nkoauꞌ. Eeꞌnoko tenau-koo ovoringe napoꞌ narung botovotonaaꞌ botovuuꞌ. Eeꞌnoko teinge tee dupisiꞌauꞌ. Eeꞌnoko napoꞌ mmauꞌ botovotonaaꞌnuka teeꞌ nariꞌ nkoaaruꞌ nariong muraꞌaarima, napoꞌ nariong koontoꞌ dupisiꞌaaruꞌ. Eeꞌnoko teing-koo asiꞌnara botovupeuꞌnung biruanisi bauring piaavumaung. Eeꞌnoko asiꞌnamuꞌkoo deekoꞌ tee bauring botovuuꞌ tare-antavuruꞌning-anko eeꞌ noruꞌura, ‘Aung-koo pa nnuring-koo amaiaaꞌorooꞌnaang.’ Eeꞌnoko teinge tare nkonukai biiꞌka kareaama aaꞌpaakoꞌ, ‘Aung tee barenku okovuaing. Aiaꞌ, dupisiꞌampiaing tee barenku okomuriainaꞌ.’ Eeꞌnoko teinge tee bauring kompaara teka dupisiꞌauꞌ tee. Eeꞌnoko uaininau-koo damaꞌdu duaꞌauꞌ.” Eeꞌnoko Jiisuuꞌke tanaꞌurima aaꞌpuruꞌ, “Enang tenau okonarai arekeeꞌ nkovuriaing? Teie aaꞌ tee teing tare nkonuka-anko pora tavurima opuriaing, eeꞌnoko niiꞌning oko-antavuriaing. 10 Diiꞌke ee tee Daari Meekung-koong kara deeruerima damaꞌ nkoaravainaꞌ tasiꞌperiaung aaꞌpui otoinooꞌka,

‘Tereꞌ eeꞌnareꞌ kapanareꞌ pava kaninukai pooreꞌaama duaꞌauꞌnareꞌ ookutunava-koo eꞌmanianareꞌ tumanareꞌ deemparioꞌ tasiꞌpauꞌ damaꞌke.
11 Ovoringe teeꞌ eeꞌnaꞌ nko-antavuuꞌ eeꞌnoko bakei taꞌnimpaariiꞌ niikaang duta-koo.’”
(Kena 118:22-23)

12 Eeꞌnoko teketa mirumiruꞌke tooꞌpuruꞌnung tasiꞌparira boto naunukai eeꞌnoko piristiꞌkoo ovontunge taung besiꞌauꞌ Jiisuuꞌ daiꞌaavainavung, teka teing nantoong karikaꞌkoo avoreaara teka sipaara tenkenauꞌ.

Taakisi Mooꞌkoo Jiisuuꞌ Niaꞌauꞌnaꞌ

(Mat 22:15-22; Luk 20:20-26)

13 Eeꞌnoko botoaaruꞌ teing Boto Keperuuꞌnavitu eeꞌnoko Eerotiꞌ Bakanavitu Jiisuuꞌanko porora niiꞌning tanatanaꞌke avakareaama tee duaꞌantanaꞌkoo. 14 Eeꞌnoko Jiisuuꞌanko porora aaꞌpauꞌ, “Nau-anta ee, niiꞌke daꞌ noruꞌdampiri otong naning masikung narung minku. Daꞌ tee kapooꞌ naninge minkurupeuꞌning tamung taarai. Eeꞌnoko naning ankang noruꞌeaꞌ. Kapooꞌ masikung narung Kumponinge nantoong pia-antavurimanaꞌ nauerimaung; 15 Enang aung naumeriaing niiꞌke Juꞌnupoonge ee daurarong~ pankaing, Siisaꞌ~, Roomaꞌnung, taakisi avuꞌkoo makosi, aiꞌ makosi deeaꞌ?” Eeꞌnoko Jiisuuꞌke tokompurira aaꞌpuruꞌ, “Aming-koo dauaꞌmerimaang aiꞌ ning taaviꞌmerimaang? Teu mooniꞌnu iroꞌ poꞌantaveriko ooampai.” 16 Eeꞌnoko teinge mooniꞌnu nau avaioꞌ tanaꞌurima Jiisuuꞌke aaꞌpuruꞌ, “Aung uuꞌaaꞌ eeꞌnoko aung miring baa bakaang?” Eeꞌnoko aaꞌpauꞌ, “Daurarong Siisaꞌ bakaang.” 17 Eeꞌnoko Jiisuuꞌke aaꞌpuruꞌ, “Tee tee averiaing kapooꞌ Siisaꞌ bakaang, eeꞌnoko kapooꞌ Kumponing bakaang Kumponing averiai.” Eeꞌnoko teeꞌ makuꞌurioꞌ aaꞌnaꞌ taꞌnimpariruꞌ.
12:17Taakisi duaꞌ orokovuko deekoꞌ teinge Eerotiꞌ bakaninge tavaapeuꞌ, eeꞌnoko tamung tauraꞌpuko deekoꞌ teinge Boto Keperuuꞌnavitue turampaapeuꞌ.


Tanatanaꞌ Booꞌketa Domang-koong

(Mat 22:23-33; Luk 20:27-40)

18 Teketa napoꞌ Noruꞌ Pitunavitu~koo niiꞌning Jiisuuꞌanko nianiaꞌ ninka porouꞌ, booꞌketa napoꞌ daaꞌ masikaꞌantavaavaꞌnavitu. 19 Porora avakareaama aaꞌpauꞌ, “Nau-anta, Mosesie aung boto daarimemuruꞌnung,

‘Tenang naninge baꞌaang siraraaviꞌaresi naaroarako napoꞌ baaraꞌmaꞌnunge teni damaꞌ mooꞌura bataata-aape paroreai.’
(Boto 25:5)

20 Urikamuꞌ tee namaiaꞌ naroꞌka ~kenaanka-taa otorokoꞌnung. Eeꞌnoko tutunaꞌnung nampeesiarara booꞌparuꞌ beurukaaꞌ otoreaꞌ. 21 Eeꞌnoko teketa kenaanka-nunge napoꞌ teni naaro damaꞌmooꞌura paroreaꞌ booꞌparuꞌ. Eeꞌnoko napoꞌ beenaumo-nung teeꞌ nkoaruꞌ. 22 Eeꞌnoko teing ookara teeꞌ nariꞌ, teka aing ~kenaanka-taa namaiaꞌ teni nampauꞌning biurukaaꞌ otoꞌevuriaꞌ boorouꞌ, eeꞌnoko asiꞌnaꞌmoo teni manikuma booꞌparuꞌ. 23 Eeꞌnoko teing teꞌmung asiranaꞌmung booꞌnuka daaꞌariainaꞌmung teni temaiaꞌkoo arera baꞌaang deemparavainani? Aiꞌ ookara ~kenaanka-taae nampauꞌnani teni.”

24 Eeꞌnoko Jiisuuꞌke aaꞌpuruꞌ, “Diiꞌ bakei papaarararimaung, aiꞌ diiꞌke doma Daari Meekung eeꞌnoko Kumponing bakaang purintoꞌ noruꞌeriaꞌ. 25 Nantoong damaꞌke booꞌketa daaꞌarira koosinung-nanka~ paning-nupoong-pinaꞌ nampeesiariaꞌ otoroaing. 26 Eeꞌnoko tenaare-koo booꞌketa napoꞌ daaꞌnaare-koo diiꞌke ee deeruerima tasiꞌperiaung Moosesie teeꞌ nau-antamuruꞌnaꞌ Daari Meekung-koo daarivuuꞌnavaro-koo? Kumponinge tuuꞌdoiꞌnavari tamung urusivukoꞌnavari-eta karoma Moosesi aaꞌpuuꞌ,

‘Ning tee Kumponing teing aing aaꞌning biikaang: Eebaraamiꞌ, Aisakeꞌ, Jeekopiꞌ. Teing ninka komeeri Oꞌnoi Oꞌnomaung ning.’
(Toro 3:2,6)

27 Aung kara tee miruꞌnooꞌ eeꞌ otong: Ookara bakaning deempariri domantooꞌnuka otorong Kumponing bakaang duta-koo, booꞌnuka deeaꞌ. Diiꞌ bakei daang noruꞌerimaing.”

Aung Tee Pankaing Boto

(Mat 22:34-40; Luk 10:25-28)

28 Narung boto-nau teꞌ otoitaaꞌ taaravuruꞌ tanaꞌeeko, eeꞌnoko Jiisuuꞌke Noruꞌ Pitunavitu tampaꞌ bariꞌuriko oovuuꞌ. Eeꞌnoko Jiisuuꞌanko pouꞌ eeꞌ tanaꞌuuꞌnaang, “Boto arera aaꞌnaꞌ pankaing ookara-ita?” 29 Eeꞌnoko Jiisuuꞌke aaꞌpuuꞌ, “Aung boto aaꞌnaꞌ pankaing masikung:

‘Diiꞌ Isireeli-nupoong taaraveriai, Kumponing niikaang Ovoring tee narung masikung.
30 Eeꞌnoko dake piaaveaing Ovoring dakaang Kumponing teieta dakaang domang ootukunung eeꞌnoko teieta dakaang uraang~ ootukunung eeꞌnoko teieta dakaang onou ootukunung eeꞌnoko teie dakaang purintoꞌ ootukunung.’
(Boto 6:4,5)

31 Eeꞌnoko kenaanka-nung boto aung:

‘Dake tee naning daꞌkoo dueꞌnung daka piaararamanaꞌ nariꞌ teeꞌ piaaveaing.’
(Boontu 19:18)

Niiꞌnara boto otoaꞌ aing-koo dau basi.”

32 Eeꞌnoko boto-naue Jiisuuꞌ aaꞌpuuꞌ, “Nau-anta, dake bakei tampaꞌ minkueing. Teeꞌ minkueinaꞌ niiꞌnara Kumponing otoaꞌ, tee narung. 33 Eeꞌnoko napoꞌ naninge piaavuai Kumponing teieta bakaang domaang ootukunung eeꞌnoko teieta bakaang norunoruꞌ ootukunung eeꞌnoko teieta bakaang purintoꞌ ootukunung. Eeꞌnoko oovunara piaavuai baka piaavaramanaꞌ. Aing boto meung-koo bakei tampaꞌ, dau basi teieta kauꞌ karenaumo boonturomai tai-antavaamaung-eta eeꞌnoko napoꞌ avuavuꞌ niiꞌning Kumponing-koo.” 34 Eeꞌnoko Jiisuuꞌke aung naning bakaang makumakuꞌ mataaꞌivui bariꞌuioꞌ aaꞌpuuꞌ, “Daꞌ isipoꞌ otoaꞌ Kumponing bakaang muuꞌketa.” Eeꞌnoko tenang-eta deto teing ookara nantoong avoreauꞌ Jiisuuꞌ niiꞌning nianiaꞌ niaꞌkoo.

Karistooꞌ Baa Bauring Deempari Poaing-koong?

(Mat 22:41-46; Luk 20:41-44)

35 Jiisuuꞌke kara nauvurima pava dootuuꞌnava pankava-koo teing tanaꞌurima aaꞌpuruꞌ, “Arekeeꞌkoo boto naunukai aaꞌpaamaung, ‘Tee naning Kumponinge tero Pakoꞌpariꞌuuꞌnung~ nantoong domampuri tarevuriainooꞌkoo tee Deevitaꞌ bakanaving-koong deempari tavoꞌaraaꞌnaang.’? 36 Aiꞌ Deevitaꞌke baka Tanuaang Meekunge karantavuko~ aaꞌpuuꞌ,

‘Teie Ovoringe nkaang Ovoring nauvuma aaꞌpuuꞌ, “Aꞌ ning-koo tampavine-koo baꞌnaniai bera ninge dakaning tooꞌde-nupoong dakaang kauꞌkoo boonavete-koo siparampainooꞌke basi.’”
(Kena 110:1)

37 Teeꞌ minkuvuma Deevitaꞌke baka tee Pakoꞌpariꞌniiꞌ Ovoring Kumponing-pinaꞌ basi tampuuꞌnung. Enang arekeeꞌ napoꞌ Deevitaꞌ bakanaving-koong tampaapeuꞌ?”

Jiisuuꞌke Nantoong Boto Naunuka-koo Koono-antavuruꞌnaꞌ

(Mat 23:1-36; Luk 11:37-54; 20:45-47)

38 Eeꞌnoko minkuvurima aaꞌpuruꞌ, “Koonorariri otoriaing boto naunuka-koo mononopaꞌ isikara ninka nanuꞌkoo piavoromaing; nantoonge pankaing-antavaariiꞌnaang pianuka baaveroma-nairu-koo. 39 Napoꞌ pava dootuuꞌnairu-koo baꞌnavaꞌnaniꞌnanka tampeng-koo baꞌnaniaakooꞌ nantoonge ankampaariaꞌnaang. Eeꞌnoko paroro nainang tampooꞌ baꞌnang-koo piavorokooꞌ. 40 Naaroonku biikaang pavapoꞌ bakiaaꞌaakooꞌ, eeꞌnoko kunsi isikananka nkoaakooꞌ nantoonge tampaꞌ ooaariiꞌnaang. Teeꞌkoo biikaang kiimata bakei orara masikung.”

Naaro Sitovuruꞌnani Bakaang Bautaꞌ Kumponing-koo

(Luk 21:1-4)

41 Jiisuuꞌ pava dootuuꞌnava pankava-koo karikaꞌkoo meuꞌke baꞌnanui oovurioꞌ nantoonge mooniꞌ duaꞌauꞌ. Eeꞌnoko manee-nupoong mauꞌke mooniꞌ deto duaꞌauꞌ. 42 Eeꞌnoko niiꞌnani naaro ataꞌoiꞌ poraiꞌnang mooniꞌning keura duaꞌuuꞌ, baruꞌ mooniꞌ masikeng deeaꞌ, nau toeaꞌ pinaꞌ basining. 43 Eeꞌnoko Jiisuuꞌke bakaning barevare-nupoong naroꞌ bokuvurira aaꞌpuruꞌ, “Masikaꞌ ninge naurampimang, anie naaro ataꞌoiꞌke bakei bautaꞌ masikung sipuing ookarai duaꞌaining-eta dau basi. 44 Narionge masikaꞌ daang-pinaꞌ duaꞌaing mooniꞌ mmauꞌ otoꞌevuritaaꞌ, eeꞌnoko teni bakei bane ataꞌoiꞌke teka ookara-koo otoꞌevuining duaꞌuing bakaning taamang mooꞌsiipeuꞌning.”

Copyright information for `NAS