Mark 8

Jiisuuꞌke Nantoong Karenaumo Kokoreiꞌ Divuꞌ Bauꞌuruꞌnaꞌ

(Mat 15:32-39)

Pankaroompuaruko nantoong karikaꞌ porora naroꞌariruꞌ. Eeꞌnoko taamang naiaapeuꞌning otoaruioꞌ Jiisuuꞌke bakaning barevare-nupoong tee-anko bokuvurira aaꞌpuruꞌ, “Nkaang domang aaꞌnaꞌ piaamoing aing-koo nantoong-koo. Aing teing niꞌninka beenang doong oꞌnorining eeꞌnoko kapooꞌ nai-koong otoꞌevoroaꞌ. Eeꞌnoko ninge peeravoroi otoroko osi-aape botoaranko dei taunga peerai tavuripeuꞌ, aiꞌ nariong aing-koo isipoꞌnupoong.” Eeꞌnoko bakaning barevare-nupoonge Jiisuuꞌ tanaꞌaama aaꞌpauꞌ, “Teka anke meeꞌboraꞌ sirakamaaꞌkoo taamang naninge areꞌka daaꞌura aing bauꞌuriaꞌnaang?” Eeꞌnoko Jiisuuꞌke niaꞌurima aaꞌpuruꞌ, “Teka arekeeꞌning bereteꞌ otoꞌderuring?” Eeꞌnoko aaꞌpauꞌ, “~Keura-taa.”

Eeꞌnoko Jiisuuꞌke botovuruꞌ teing nantoong karinga kansiꞌkoo baꞌnampariaꞌnaang. Eeꞌnoko ~keura-taa bereteꞌ nkavura tampaꞌ tampura pisiꞌuma bakaning barevare-nupoong avuriko teinge nantoong miatara avaarikoꞌ. Eeꞌnoko napoꞌ niiꞌning taviꞌning okiꞌnarekaꞌ otoꞌevuruꞌning-koo biraankevura bakaning botovuruꞌ teing napoꞌ tankaampaariaꞌnaang. Eeꞌnoko ookara taamanaara poovorouꞌ. Eeꞌnoko Jiisuuꞌ bakaning barevare-nupoonge pekuꞌ ~kevekuꞌka-taa kakitaꞌke maantoꞌauꞌ. Naroꞌka donkaang deerunooꞌ karenaumo kokoreiꞌ pinaꞌ teke otorouꞌ. Eeꞌnoko Jiisuuꞌke teing nantoong tenkeng-koo botovuruꞌ. 10 Eeꞌnoko namuꞌke tee bakaasi-nareng-koo bakaning barevare-nupoong ninka aaꞌeariruꞌ, eeꞌnoko Dalamanuta-nameng-aape berouꞌ.

Boto Keperuuꞌnavitue Jiisuuꞌ Tanaꞌauꞌnaꞌ Taaꞌniꞌanta Nauvuriiꞌnaang

(Mat 16:1-4)

11 Niiꞌning Boto Keperuuꞌnavitu Jiisuuꞌanko porouꞌ bakaang kara paara-koo. Tutumpaama teinge tanaꞌauꞌ taaꞌniꞌanta nkoevuriiꞌnaang Kumponinge botovuuꞌnaꞌkoo. 12 Jiisuuꞌke eeꞌmaraanura aaꞌpuruꞌ, “Aming-koo diiꞌ avarang taaꞌniꞌanta-koo tanaꞌkirimang? Masikung naurampimang, Kumponinge diiꞌ enanavarang taaꞌniꞌanta nau-koo kasivuaꞌ otong.” 13 Teeꞌpurira sipuruꞌ teka, eeꞌnoko bakaasi-koo aaꞌearara nuaruꞌ pakoꞌ tutumpuuꞌ amenkaꞌkoo beeꞌnaang.

Jiisuuꞌke Bakaning Koono-antavuruꞌnaꞌ Niiꞌning Biikaang Tositosi-koo

(Mat 16:5-12)

14 Jiisuuꞌ bakaning barevare-nupoong ampaꞌorouꞌ taamang nka-koo. Eeꞌnoko nau masiku bereteꞌ otoꞌevuruꞌ teke bakaasi-koo. 15 Eeꞌnoko Jiisuuꞌke siingoravurima aaꞌpuruꞌ, “Bakei tarerariai tee-koo iisi Boto Keperuuꞌnavitue eeꞌnoko Eerotiꞌnupoonge biikaang taamang ninka bereꞌaamaung-koo.” 16 Eeꞌnoko teeꞌpuioꞌ tasiꞌpaavarura kareaama aaꞌpeekoꞌ, “Aunge pa niiꞌ taamang otoꞌmemuriaruioꞌ teeꞌ minkuvuing.” 17 Eeꞌnoko Jiisuuꞌke minkuaako noruꞌura aaꞌpuruꞌ, “Aming-koo diiꞌka minkurarimang taamang nkaveriarura? Koontoꞌ ee mmeꞌ diiꞌke tasiꞌmeriaꞌ ning? Aiꞌ diikaang domang kapanukai? 18 Duta otori, teka ee ookiriaꞌ? Punkang otori, teka ee taaraveriaꞌ? Aming-koo noruꞌeriaꞌ? 19 Tenang bereteꞌ paꞌnokoꞌnuri ninge nantoong paꞌnokoꞌ kokoreiꞌ bauꞌaransioꞌ arekeeꞌning pekuꞌ kakitaꞌke oosierira maantoꞌeruꞌ?” Eeꞌnoko aaꞌpauꞌ, “Kivora-ita kevekuꞌka.” 20 Jiisuuꞌke napoꞌ aaꞌpuruꞌ, “Eeꞌnoko tenang ~keura-taa bereteꞌ nantoong karenaumo kokoreiꞌke naiaioꞌ arekeeꞌning pekuꞌ kakitaꞌke maantoꞌerieeng?” Eeꞌnoko aaꞌpauꞌ, “~Kevekuꞌka-taa.” 21 Eeꞌnoko aaꞌpuruꞌ, “Teka ee diiꞌke mmeꞌ tasiꞌperiaꞌ?”

Jiisuuꞌke Bakaning Barevare-nupoong Nau-antavuruꞌnaꞌ

(8:22–10:52)

Jiisuuꞌke Naning Duta Kaputuꞌ Bantang-antavuuꞌnaꞌ

22 Jiisuuꞌ bakaning ninka Besaida duparirioꞌ narionge naning duta kaputuꞌ tavoꞌauꞌ tee-anko birenge kompuaꞌnaang eentavarima. 23 Eeꞌnoko Jiisuuꞌke naning kaputuꞌ bireng-koo kompura osi-eta damaꞌdu tenkeng-antavuuꞌ. Eeꞌnoko duta-koo tutupaaꞌura bakaang bireng tee-koo panteꞌuuꞌ, eeꞌnoko aaꞌpuuꞌ, “Kapooꞌ ee oovemaang?” 24 Eeꞌnoko duta bantora aaꞌpuuꞌ, “Nantoong aaꞌ koiꞌpinaꞌ nanaako ooaramang.” 25 Eeꞌnoko Jiisuuꞌke napoꞌ bireng patuꞌuuꞌ duta-koo, eeꞌnoko tenang duta bantora naapu narung ookuma tamparuꞌkuuꞌ. Ookara kapooꞌ sirakaꞌparuꞌ. 26 Eeꞌnoko Jiisuuꞌke koontoꞌ bakanooꞌaape botovuma aaꞌpuuꞌ, “Amono-nupoong-koo bera naueriaukaꞌ!”

Piitai Jiisuuꞌ Tee Pakoꞌpariꞌniiꞌ Tasiꞌpura Siraꞌpuuꞌnaꞌ

(Mat 16:13-20; Luk 9:18-21)

27 Niiꞌnaꞌmung Jiisuuꞌ bakaning barevare-nupoong ninka Sisariaꞌ Pilipai navuntuꞌaape taunge nanaama bakaning barevare-nupoong tanaꞌurima aaꞌpuruꞌ, “Nantoonge ning baa tammaamaung?” 28 Eeꞌnoko teinge aaꞌpauꞌ, “Niiꞌninge Jooni Minkinara tantaamaung. Eeꞌnoko narionge Eliasi poaing-koong tantaamaunge. Eeꞌnoko niiꞌninge urikupoong nakaro-nupoong-koo narung, booꞌketa daaꞌaruꞌnung.” 29 Eeꞌnoko napoꞌ Jiisuuꞌke teing tanaꞌurima aaꞌpuruꞌ, “Eeꞌnoko diiꞌke napoꞌ ning baa tammerimaung?” Eeꞌnoko Piitai bariꞌuma aaꞌpuuꞌ, “Daꞌ aaꞌ tee Kumponinge teroita Pakoꞌpariꞌniiꞌ nantoong domamperira tareveriainooꞌkoo.” 30 Eeꞌnoko Jiisuuꞌke potevurima aaꞌpuruꞌ, “Naning-koo siraꞌmeriaukaꞌ.”

Piitai Jiisuuꞌ Booaing Tamparako Orokovuuꞌnaꞌ

(Mat 16:21-23; Luk 9:22)

31 Eeꞌnoko Jiisuuꞌke bakaning nau tutumpuruꞌ booꞌparavainaꞌ, aaꞌpurima, “ning Tee Naning-naumpoꞌ Paning-etaing teing amutemuriiꞌ arikananka toraꞌpampaing, eeꞌnoko aing aaꞌninge tompimaavaing: pankenukai, piristiꞌkoong ovontunukai eeꞌnoko boto naunukai, eeꞌnoko tee dupisiꞌmaavaing. Teketa beenang doong tankinuko napoꞌ domamarara daaꞌmaravaing.” 32 Sirakaꞌpui tampaꞌ nauvurioꞌ Piitai taapoꞌ beꞌantavura potevuuꞌ temuriiꞌ kara minkuvuarooꞌnaang. 33 Eeꞌnoko Jiisuuꞌ bakaning barevare-nupoong-aape bereꞌarama Piita turampuma aaꞌpuuꞌ, “Tokoi beai daꞌ Sietaniꞌ, ning-ankoita. Dake tee Kumponing bakaang noruꞌ noruꞌeaꞌ, nantoong biikaang noruꞌ narung noruꞌei otong.”

Karistooꞌ Siong-koo Amariainaꞌ

(Mat 16:24-28; Luk 9:23-27)

34 Eeꞌnoko Jiisuuꞌke nantoong miatara bakaning barevare-nupoong ninka naroꞌ bokuvurira aaꞌpuruꞌ, “Naning ning siomui pooꞌnaang piavora deekoꞌ, baka bakaang pia iroꞌ doonko tompimparavaing eeꞌnoko bakaang aaꞌbarataꞌ poruꞌui ning siomumaatoaing.
8:34Miruꞌnooꞌ eeꞌ: Jiisuuꞌ bakaning teing Jiisuuꞌpinaꞌ Kumponing bakaang pia narung nko-koo daiꞌariri otoromaing baike kuneꞌkoo tauraꞌpariri.
35 Eeꞌkoo, baa tee naning bakaang domaang ning-koo orokovuma baka tare-koo piavoaing tee paaꞌaravaing, teka baa tee naning ning-koo eeꞌnoko nkaang doorenang tampara-koo bakaang domaang arooꞌari duaꞌuaing tee domamparavaing. 36 Naninge kapooꞌ ookara kansiꞌkooning barampui okovura bakaang domaang daroveꞌuko teinge arekeeꞌ pakuaapeuꞌ? 37 Eeꞌnoko naning aming avupeuꞌ tee bakaang domaang paaꞌaruꞌnung napoꞌ mooꞌkoo? 38 Aing avarang oreng otorong nampeesi orarinuka, eeꞌnoko naning teing-koo meuꞌke otoi nkaang miring siraꞌkoo eeꞌnoko nkaang kara-koo maiaꞌomaung damaꞌke ning Tee Naning-naumpoꞌ Paning-etaing tee-koo maiaꞌmoaing mora teing ninka koosinung~ meekupoong eeꞌnoko Mmaꞌ bakaang meenasi ninka.”

Copyright information for `NAS