Matthew 15

Kumponing Bakaang Botoi Niikakatauro Biikaang Boto Divuꞌui Otoinaꞌ

(Mak 7:1-13)

Tenang tee niiꞌning Boto Keperuuꞌnavitu eeꞌnoko boto naunuka Jerusalemaꞌketa Jiisuuꞌanko porouꞌ. Eeꞌnoko Jiisuuꞌ niaꞌaama aaꞌpauꞌ, “Dakaning barevare-nupoonge aming-koo niikakatauroi bamaaruꞌnaꞌ boto siompaavaung, aaꞌnomaung, biikaang bireng duuꞌpariaꞌ taamanaakooꞌ domang orari-antavarima Kumponing-koo dutakanooꞌke?” Teketa Jiisuuꞌke makuꞌuma aaꞌpuruꞌ, “Nka diiꞌke tee Kumponing bakaang boto aming-koo totoꞌperikooꞌ tee diikaang minkunaa sintokosintoi-koong toomo siomperima? Aaꞌnoma, Kumponinge eeꞌ botoaruꞌ,

‘Daumararing deto noruꞌeresi pakuereaing,’
(Boto 5:16)

eeꞌnoko,

‘Naning baumararing orakaꞌ minkuvureaing tee bakei dupisiꞌnumpoꞌ.’
(Toro 21:17)

Teka diiꞌke aaꞌperimaung, ‘Naninge baumararing kapooꞌkoo apukaꞌpareko, beuringe tering paku-koo kupiꞌora deekoꞌ aaꞌpupeuꞌ, “A, nkaning kapooꞌ arompepeuꞌning teing temuꞌ Kumponing bareantuꞌning.” Eeꞌnoko teeꞌpureta orokoari otoaing teing kapooꞌ baumararing avuꞌkoo.’ Teeꞌ nkorarima diiꞌke tee Kumponing bakaang boto daang-antaverimaung tee diikaang sintokosintoi-koong minkunaa daang toomo pinaꞌ oroꞌparaaꞌnaang. Diiꞌ ampirinunuka! Masikaꞌ teie nakaronunge Aisaiaꞌke tarampeearama~ diiꞌ eeꞌning minkururima Kumponing bakaang kara eeꞌ minkuvuuꞌ,

‘Teinge ainge nantoonge biikaang beꞌduuꞌke narunge pankaing-antamaamaung, teka biikaang domang ning-koo isipoꞌ otoroi.
Tamung ning dootuuꞌmaamaing, aiꞌ teing boto nkaang miring-koo nau-antavaarimaing teing tamung nantoong-etaning.’”
(Aisaiaꞌ 29:13)

Kapooꞌ Naning Domang Orari-antavumaung

(Mak 7:14-23)

10 Teketa Jiisuuꞌke nantoong karinga tee-anko bokuvurira aaꞌpuruꞌ teing, “Aing kapooꞌ diiꞌke taaraverira tampaꞌ norunoruꞌeriaing. 11 Tee kapooꞌ naning-koo karang-koo tumparamaunge naning bakaang domang orari-antavuaung Kumponing bakaang duta-koo, teka teie kapooꞌke naning-eta karange doompeto pomaunge naning domang orari-antavumaung.”

12 Teketa napoꞌ bakaning barevare-nupoong tee-anko porora niaꞌaama aaꞌpauꞌ, “Dake ee noruꞌei otong teinge Boto Keperuuꞌnavitue daꞌ orakaꞌ noruꞌdaing teeꞌ minkuveioꞌ?” 13 Jiisuuꞌke makuꞌuma aaꞌpuruꞌ, “Ookara keenkeenanka Mmaꞌke paning-koonge keempuriaruuꞌning teing bitaꞌkooning ariꞌa ninka nariꞌ. 14 Teing teing biiꞌka kaputuꞌariri niiꞌning duta kaputuꞌnuka taung nau-anta nkoaamaing. Diiꞌke teing siperereriaing, aiꞌ naning kaputuꞌke narung napoꞌ kaputuꞌ siong-antavuma tenaanka tee ookaanka dinkung-koo duaꞌareaing.”

15 Teketa Piitai aaꞌpuuꞌ, “Tee mirumiruꞌ niiꞌkoo sirakaꞌantaveai.” 16 Jiisuuꞌke aaꞌpuuꞌ, “Diiꞌ ee teing-pinaꞌ nariꞌ mmeꞌ noruꞌ sirakaꞌdariaꞌ? 17 Arekeeꞌ tasiꞌperiaꞌ tee kapooꞌ naning-koo karange doonko tumparama pakosiiꞌkoo bemaung, eeꞌnoko teketa mono-ita napoꞌ siarakooꞌ domang orarivuaꞌ? 18 Teka tee kapooꞌnanka karange doompeto pomananka teing teing domang-eta pomaing, eeꞌnoko teinge eeꞌninge naning orari-antavumaung. 19 Aiꞌ eeꞌnooꞌketa domang-eta kapooꞌ orara noruꞌnanka pomaunge aing aaꞌning: naning dupisiꞌkoong noruꞌ, nampeesi orari-koong noruꞌ, kaukauro-koong noruꞌ, eeꞌnoko bakiaaꞌnko, daang-koong kara minku tuutunantomai eeꞌnoko pooreꞌ. 20 Aing eeꞌninge kapooꞌnankai naning orari-antavumaung, teka bireng duuꞌparavaꞌ taamang naie naning orari-antavuaung.”

Nani Akovitu-koonanie Tee Jiisuuꞌ Ookara-koo Pankaing Masikaꞌantavuuꞌnaꞌ

(Mak 7:24-30)

21 Eeꞌnoko Juꞌ biikanameng-eta uaa-koo tenkenuraiꞌnange Jiisuuꞌ bakaning ninka osi Taiaꞌ eeꞌnoko Saidoniꞌnameng-koo berouꞌ. 22 Teka temeng-koo naning Keenang-naving-koonani Jiisuuꞌanko pora bokuma aaꞌpuuꞌ, “Ovoring, Deevitaꞌ bakanaving-koong, piaameai ning! Nnorang teni maꞌnaang aaꞌnaꞌ masikaꞌ kurumaaꞌaramanani!” 23 Teka Jiisuuꞌke nanaarenooꞌ karoma makuꞌuaꞌ. Teeꞌ birompari otoko bakaninge barevare-nupoonge Jiisuuꞌanko beroma botoaama aaꞌpauꞌ tee, “Ani bataꞌeai. Niiꞌ siomurima birompari otomang.” 24 Teka Jiisuuꞌke aaꞌpuuꞌ teni, “Ning tee Isireeli-nupoong-eta sipisipiꞌpinaꞌ pooariruꞌning naing-koo botomuuꞌnung.” 25 Teketa teni pora Jiisuuꞌkoo uroꞌkanooꞌ kinkinura eentavarama aaꞌpuuꞌ, “Ovoring pakumeai.” 26 Jiisuuꞌke makuꞌuma aaꞌpuuꞌ, “Tee aaꞌ taamang toireꞌ biikaang mosiꞌnanka-anko duaꞌkoo tampaꞌ deeaꞌ.” 27 Tenie aaꞌpuuꞌ, “Eeꞌ, Ovoring, masikaꞌ, nka tee mosiꞌnankai napoꞌ mukunanka naiaamaung ovoring baurukaaꞌ taamanaamanooꞌketa duaꞌarimaing.” 28 Teketa Jiisuuꞌke makuꞌuma aaꞌpuuꞌ teni, “Ani ee, daꞌ bakei dakaang baito pankaing, teeꞌkoo tee kapooꞌ eentararing enang nkoaring.” Eeꞌnoko teni baurang tee-koo batei-koo tenang taarevouꞌ.

Jiisuuꞌke Nantoong Siipa-poꞌnupoong Taare-antavuruꞌnaꞌ

29 Teketa Jiisuuꞌke teꞌ sipura Kaaleliꞌnaruꞌ sionge danto beuꞌ. Teketa miie deto koinuuꞌ, bera aꞌdeiꞌ baꞌnamparuꞌ. 30 Teketa nantoong karinga tee-anko porouꞌ nantoong deꞌdoonuka eeꞌnoko kaputuꞌnuka, kooꞌ mareꞌnuka, amakoori eeꞌnoko napoꞌ mmauꞌ niiꞌning. Porora tee-koo kauꞌkanooꞌ bempaarioꞌ teka taare-atavuruꞌ. 31 Nantoong bakei aaꞌnaꞌ taꞌninauꞌ tenang aing aaꞌning nantoong ooaarira, amakonuka kareaako ooaaruꞌ, kooꞌ mareꞌnuka koompariruꞌ, deꞌdoonuka tampaꞌ nanauꞌ, kaputuꞌnuka ookauꞌ. Eeꞌnoko teinge tee Kumponing Isireeli-nupoong biikaang daangampauꞌ.

Jiisuuꞌke Nantoong Deerunooꞌ Karenaumo Kokoreiꞌ Divuꞌ Bauꞌuruꞌnaꞌ

(Mak 8:1-10)

32 Teketa Jiisuuꞌke bakaning barevare-nupoong tee-anko bokuvurira aaꞌpuruꞌ, “Nkaang domang aaꞌnaꞌ piaamoing aing-koo nantoong-koo. Aing teing niꞌninka beenang doong oꞌnorining eeꞌnoko kapooꞌ nai-koong otoꞌevoroaꞌ. Peeravoroi otoroko tokoi boto-koo piamoaꞌ taunga peerai tavuriꞌneeng.” 33 Eeꞌnoko bakaning barevare-nupoonge aaꞌpauꞌ, “Aing bauꞌkoong makosi nantoong karinga taamang areꞌka nkavampiiꞌnaang aung-koo meeꞌboraꞌ sirakamaaꞌkoo meuꞌka?” 34 Eeꞌnoko Jiisuuꞌke niaꞌurima aaꞌpuruꞌ, “Teka bereteꞌning arekeeꞌning otoꞌderuring?” Teinge aaꞌpauꞌ, “Paꞌnokoꞌketa keura eeꞌnoko niiꞌning taviꞌning okiꞌnarekaꞌ.”

35 Eeꞌnoko teie nantoonge karinga kansiꞌkoo baꞌnaniꞌaavaꞌnaang nauvuruꞌ. 36 Teketa teie teing paꞌnokoꞌketa keura bereteꞌning eeꞌnoko taviꞌning nkavura Ovoring-koo tampara tampura pisiꞌura teing bakaning barevare-nupoong avuruꞌ, eeꞌnoko teinge nantoong avaaruꞌ. 37 Eeꞌnoko ookara taamanaara poovorouꞌ. Teketa damaꞌke bakaning barevare-nupoonge pekuꞌ paꞌnokoꞌketa kevekuꞌka kakitaꞌnankai sipaaruꞌninge maantoꞌauꞌ. 38 Nantoong donkaang naing teke taamanauꞌning-koong deerunooꞌ karenaumo kokoreiꞌ, manikuꞌ dovang toireꞌ nariꞌ deeruariaꞌ. 39 Teketa Jiisuuꞌke nantoong karinga tenkeng-koo botovurira tee bakaasi-nareng-koo aaꞌearuꞌ, eeꞌnoko teketa Maꞌdala-aape-navete-koo berouꞌ.

Copyright information for `NAS