Matthew 16

Taaꞌniꞌanta Oo-koo Piavorouꞌnaꞌ

(Mak 8:11-13; Luk 12:54-56)

Niiꞌnaꞌmung teing Boto Keperuuꞌnavitu eeꞌnoko napoꞌ teing Noruꞌ Pitunavitu Jiisuuꞌanko porora tee paara-antavaama niaꞌaama aaꞌpauꞌ, “Narung taaꞌniꞌanta Paning-etaing naumeriai daꞌ Kumponing-etaing deekoꞌ tasiꞌdampiainaꞌ.” Jiisuuꞌke makuꞌurima aaꞌpuruꞌ, “Tenang muung-aapenang diiꞌke aaꞌperimaung, ‘Taneꞌ tampaꞌmung, tampaꞌ otooꞌnaang, kamoꞌ urung deemparing.’ Eeꞌnoko napoꞌ taneꞌnang aaꞌperikooꞌ, ‘Eꞌmung irinke nkoaraaꞌnaang, aiꞌ paning kamoꞌke urunge neeꞌuing.’ Diiꞌke tee tampaꞌ noruꞌeri otong kamoꞌ ooverima nkoaravainaꞌ noruꞌkoo, teka diiꞌke emuꞌnung batei bakaang taaꞌniꞌanta noruꞌeriarupeuꞌ. Diiꞌ enanavarang bakei oreng, nampeesi orarinuka-pinaꞌ diikaang Ovoring siperima, tosirarima aaꞌmerimaing, ‘Taaꞌniꞌanta paning-etaing iroꞌ naumeriko deekoꞌ taararampiaing.’ Bakei Kumponinge diiꞌ taaꞌniꞌanta nau-anta-koo kasivuarura narung masikung aruriiꞌnaang, aaꞌnoaing: teie ning taaꞌniꞌanta deeng-antamuaing temuꞌ Joonaꞌ taaꞌniꞌanta deeng-antavuuꞌnaꞌ.” Teketa Jiisuuꞌ teing teka sipurira tenkenuuꞌ.

Tee Iisi Teing Boto-koo Keperuuꞌnavitu Eeꞌnoko Noruꞌ Pitunavitu Biikaang

(Mak 8:14-21)

Teka tenang tee-koo nuaruꞌkoo beroma teinge bakaning barevare-nupoonge tee taamang nka-koo ampaꞌorouꞌ. Eeꞌnoko nuaruꞌkoo pakoꞌariraiꞌnange Jiisuuꞌke aaꞌpuruꞌ teing, “Tanatarariaing teing-koo Boto Keperuuꞌnavitu-koo eeꞌnoko Noruꞌ Pitunavitu biikaang iisi-koo.” Eeꞌnoko teeꞌpuioꞌ tasiꞌpaavarura kareaama aaꞌpeekoꞌ, “Aunge pa niiꞌke taamang nkavampiaruing-koo teeꞌ minkuvumaang.” Teketa Jiisuuꞌke tee biikaang minkunaa noruꞌura aaꞌpuruꞌ teing, “Diiꞌ baruꞌ masikaꞌantaropanuka, aming-koo diiꞌka minkurarimang taamang nkaveriarura? Koontoꞌ ee mmeꞌ diiꞌke tasiꞌmeriaꞌ ning? Noruꞌeriaꞌ otong teing paꞌnokoꞌnuri bereteꞌ, nantoonge paꞌnokoꞌ kokoreiꞌke naiauꞌning, eeꞌnoko teing-koo arekeeꞌning pekuꞌ oosierira maantoꞌeruꞌ damaꞌke taaꞌparioꞌ? 10 Napoꞌ ee noruꞌeriaꞌ otong teing paꞌnokoꞌketa keura bereteꞌ nantoong karenaumo kokoreiꞌke naiauꞌning eeꞌnoko teing-koo arekeeꞌning pekuꞌ oosierira maantoꞌeruꞌ damaꞌke taaꞌparioꞌ? 11 Arekeeꞌkoo diiꞌke tasiꞌperiaunge? Aiꞌ ninge tee taamang-koo minkuampaung. Teka diiꞌ eeꞌning tanatarariaining tee-koo Boto Keperuuꞌnavitu eeꞌnoko noruꞌ pitunavitu biikaang iisi-koo.” 12 Teketa tenang teinge tasiꞌpauꞌ teie tee tee iisi bereteꞌkoo sipaamaung minkuvuma teeꞌ nauvuriaꞌ, teka tee kapooꞌkoo teinge Boto Keperuuꞌnavitue eeꞌnoko Noruꞌ Pitunukai nau-antavaarimaung-koo teeꞌ minkuvurikoꞌ.

Piitai Jiisuuꞌ Tee Pakoꞌpariꞌniiꞌ Tasiꞌpura Siraꞌpuuꞌnaꞌ

(Mak 8:27-30; Luk 9:18-21)

13 Teketa tenang Jiisuuꞌ bakaning barevare-nupoong ninka Sisariaꞌ Pilipai-navuntuꞌkoonooꞌ berora teing niaꞌurima aaꞌpuruꞌ, “Ning Tee Naning-naumpoꞌ Paning-etaing nantoonge baa tammaamaung?” 14 Teinge makuꞌaama aaꞌpauꞌ, “Niiꞌninge aaꞌdaamaung, ‘Aung pa tee Jooni Minkinara,’ eeꞌnoko niiꞌninge Eliasi poaing-koong tantaamaung, eeꞌnoko niiꞌninge napoꞌ urikupoong nakaro-nupoong-koo narung, booꞌketa daaꞌaruꞌnung, aiꞌ Jeremaia pa.” 15 Eeꞌnoko napoꞌ Jiisuuꞌke aaꞌpuruꞌ teing, “Teka diiꞌke napoꞌ baa tammerimaung ning?” 16 Teketa Saimoniꞌ Piitai bariꞌuma aaꞌpuuꞌ, “Daꞌ aaꞌ tee Kumponinge teroita Pakoꞌpariꞌniiꞌ nantoong domamperira tareveriainooꞌkoo, tee Kumponing domantooꞌ bauring.” 17 Jiisuuꞌke makuꞌuma aaꞌpuuꞌ, “Biraankeraring daꞌ, Jooni bauring, aiꞌ aung tee naninge kansiꞌkoonge nauruaꞌ, teka tee Mmaꞌke paning-koonge nauruing. 18 Eeꞌnoko ninge aaꞌdamaang, daꞌ tee eeꞌnung Piita, Manto, eeꞌnoko aung-koo boiaꞌkoo eꞌmaniang-koo ninge tee nkaang dootuuꞌ donkong-antavampaing, mosianung-koonge purintoꞌke puruꞌuaukaꞌnung. 19 Eeꞌnoko ninge daꞌ tee kiiꞌnanka arompaing teing muuꞌ paninung-kooning. Aming kapooꞌ dake anke kansiꞌkoo pinkaꞌeaing deekoꞌ paning-koo teeꞌ pinkaꞌaravaing, eeꞌnoko aming kapooꞌ anke kansiꞌkoo dapaꞌeaing deekoꞌ paning-koo teeꞌ nariꞌ dapaꞌaravainge.” 20 Teketa potevuruꞌ teing bakaning barevare-nupoong siraꞌpaavarooꞌnaang tee Kumponinge Pakoꞌpariꞌniiꞌ.

Jiisuuꞌke Bakaang Aarumo Bare-antavuruꞌnaꞌ Boainaꞌmung Dueꞌuko

(16:21–20:34)

Piitai Jiisuuꞌ Booaing Tamparako Orokovuuꞌnaꞌ

(Mak 8:31-33; Luk 9:22)

21 Tenang-eta deto Jiisuuꞌke tee teꞌ Jerusalemaꞌ bera kapooꞌnanka arikananka toraꞌpuaining bakaning barevare-nupoong nau tutumpuruꞌ. Aing aaꞌninge toraꞌantavaavaing: nantoong pankenge, piristiꞌkoong ovontunankai, eeꞌnoko boto naunukai. Eeꞌnoko tee teeꞌ nkoaama dupisiꞌaavaing, eeꞌnoko beenang doong deemparako napoꞌ domamparara daaꞌaravai. 22 Teketa Piitai taapoꞌ beꞌantavura teka potevuma aaꞌpuuꞌ, “Bakei makotuaꞌ daꞌ teeꞌ nko-koo, Ovoring. Teeꞌ daꞌkoo nkoaravaukaꞌnung.” 23 Teketa Jiisuuꞌ bakaning barevare-nupoong-aape bereꞌarama Piita turampuma aaꞌpuuꞌ, “Tokoi beai daꞌ Sietaniꞌ. Daꞌ tee ning-koo baankaꞌ makosi. Dake tee Kumponing bakaang noruꞌ noruꞌeaꞌ, nantoong biikaang noruꞌ narung noruꞌei otong.”

Karistooꞌ Siong-koo Amariainaꞌ

(Mak 8:34–9:1; Luk 9:23-27)

24 Teketa Jiisuuꞌke aaꞌpuruꞌ teing bakaning barevare-nupoong, “Naning ning siomui pooꞌnaang piavora deekoꞌ, baka bakaang pia iroꞌ doonko tompimparavaing eeꞌnoko bakaang aaꞌbarataꞌ poruꞌui ning siomumaatoaing. 25 Eeꞌkoo, baa tee naning bakaang domaang ning-koo orokovuma baka tare-koo piavoaing tee paaꞌaravaing, teka baa tee naning bakaang domaang ning-koo arooꞌari duaꞌuaing, teie tee napoꞌ daaꞌuaing. 26 Eeꞌnoko aming kapooꞌ tampara basiarapeuꞌ naning-koo ookara kapooꞌnanka kansiꞌpoꞌ barampuma okovui baka orariarakotaaꞌ domaang paaꞌaravainaꞌ? Eeꞌnoko naning aming avupeuꞌ tee bakaang domaang paaꞌaruꞌnung napoꞌ mooꞌkoo? 27 Aiꞌ ning Tee Naning-naumpoꞌ Paning-etaing tee teie Mmaꞌ bakaang meenasie baumari moaing teing ninka nkaning koosinunanka ninka, teketa mooꞌ avorompaing nantoong narunaꞌ narunaꞌ kapooꞌ nkoauꞌning siomparioꞌ. 28 Teka ninge masikung naurampimang, diiꞌkoo niiꞌning anke nariꞌ donkoniri otorining-koo mmeꞌ booꞌkoo mantonkiriaꞌ ning Tee Naning-naumpoꞌ Paning-etaing nkaang muuꞌkoo Daurarong~ deemari moko oomeriaing.”

Copyright information for `NAS