Matthew 17

Jiisuuꞌ Paning-etaing Daurarong-pinaꞌ Oroꞌparuꞌnaꞌ

(Mak 9:2-13; Luk 9:23-36)

Teketa paꞌnokoꞌketa naꞌmung doong tankinuioꞌ Jiisuuꞌke Piita dovang Jeemisi eeꞌnoko baaraꞌmaꞌnung Jooni, bokuvurira iuꞌ isikung-koo deto koinauꞌ teing naing biiꞌka. Eeꞌnoko teke teinge ooaioꞌ Jiisuuꞌ bakaang mono aampariꞌarama aaꞌnouꞌ, bakaang oing duaaꞌpinaꞌ siisiouꞌ eeꞌnoko bakaang mononopaꞌ aaꞌnaꞌ kakaaravouꞌ araka-pinaꞌ. Eeꞌnoko tenang teing-ankoi Moosesi naanka Eliasi oroꞌpareta Jiisuuꞌ ninka kareaakoꞌ. Eeꞌnoko Piitai aaꞌpuuꞌ tee Jiisuuꞌ, “Ovoring ee, bakei tampaꞌ niiꞌ anke oꞌnorimaang. Daꞌ piaroko deekoꞌ ninge bare beevaari kaniampaing, nava daꞌ dakanava, nava Moosesi bakanava eeꞌnoko nava Eliasi bakanava.” Eeꞌnoko tenang tee Piita teeꞌ karoi otoko narunge kamoꞌke sisisiisie teka dakaꞌpuruꞌ, eeꞌnoko teieta kamoꞌketa auronge karoma aaꞌpuuꞌ,

“Aung tee nnuring ninge piaavamaung. Ning tee-koo aaꞌnaꞌ dotumaramaung. Taaraveriaing tee.”
Tenang teinge bakaning barevare-nupoonge tee aurong taaravaara avoreaara oing kansiꞌkoo doonko kinkinauꞌ. Teka Jiisuuꞌke pora kompurima aaꞌpuruꞌ, “Deto daaꞌdariai, aroreriaꞌ.” Teketa tenang deto daaꞌarira ookaama niiꞌnara naning ooaavaꞌ, Jiisuuꞌ narung teka ooauꞌ.

Teketa iuꞌketa depeto siarima Jiisuuꞌke teing orokovuruꞌ tee kapooꞌ ooauꞌnung nauaariarooꞌnaang bera tee Naning-naumpoꞌ Paning-etaing booꞌketa daaꞌaravainooꞌke basi.

10 Teketa teinge bakaning barevare-nupoonge tee niaꞌaama aaꞌpauꞌ, “Teinge boto naunukai aming-koo aaꞌpaamaung Eliasi tee tee-koo Kumponinge Pakoꞌpariꞌniiꞌkoo~ uroꞌke poaing?” 11 Eeꞌnoko Jiisuuꞌke makuꞌurima aaꞌpuuꞌ, “Masikaꞌ Daari Meekung-koo Eliasi tee pooꞌnaang tampari otong ookara kapooꞌnanka nerivuuꞌnaang. 12 Teka ninge aaꞌdampimang, tee Eliasi aaꞌ tee tero pouꞌnung, teka teinge tasiꞌpaavarura tee orakaꞌ piavorouꞌnaꞌ nariꞌ nkoauꞌ tee. Teeꞌ nariꞌ napoꞌ ning Tee Naning-naumpoꞌ Paning-etaing nantoonge sisikeera-antamaavainge.” 13 Teketa teeꞌ minkuvuioꞌ teinge bakaning barevare-nupoonge tasiꞌpauꞌ tee eeꞌnung Jooni Minkinara miruꞌui Eliasi teeꞌ minkuvuuꞌnung.

Jiisuuꞌke Narung Nemaka Kookokoarakoꞌnung~ Taare-antavuuꞌnaꞌ

(Mak 9:14-29; Luk 9:37-42)

14 Tenang teing nantoong karinga-anko poroioꞌ naning narung pora Jiisuuꞌanko kinkinura aaꞌpuuꞌ, 15 “Ovoring ee, nnuring piaaveai kookokoaramaung, eeꞌnoko aaꞌnaꞌ sisikeeravokooꞌ. Mmauꞌnamuꞌpie ntaꞌkoo niiꞌnooꞌ ntong-koo duaꞌarakooꞌ. 16 Aing-anko dakaning barevare-nupoong-anko tavoꞌansioꞌ teinge taare-anta-koo makosiaavaruing.” 17 Eeꞌnoko Jiisuuꞌke makuꞌurima aaꞌpuruꞌ teing, “Nko diiꞌ masikaꞌanta otoriainge, koontariaing, areꞌ basinaroonge diiꞌ ninka nariꞌ oꞌnorimaatoainge dooroontampiri? Poꞌantaveai tee okiꞌnara aꞌ ning-anko.” 18 Teketa tavoꞌuioꞌ Jiisuuꞌke tee maꞌnaang teka akaꞌpuioꞌ teieta nemaka-ita bakoaruꞌ, eeꞌnoko tenang-eta deto taarevouꞌ.

19 Teketa teing bakaning barevare-nupoong makenge tee-anko porora aaꞌpauꞌ, “Niiꞌ aming-koo tee maꞌnaang bataꞌkoo makotumpiaꞌ?” 20 Jiisuuꞌke makuꞌuma aaꞌpuruꞌ, “Diikaang masikaꞌanta bakei okiꞌnung deemparako teeꞌ bataꞌeriarupeuꞌnung. Masikaꞌ naurampimang ninge, diikaang masikaꞌanta tee masitaraꞌkoong sinang-pinaꞌ basi otoꞌderui dei diiꞌke aunteto iuꞌ aaꞌperipeuꞌ, ‘Ankaꞌ diiriꞌdaravai anketa,’ eeꞌnoko tee diiriꞌarapeuꞌ. Teeꞌkoo kapooꞌ diiꞌke nko-koo makosi deeaung otoarupeuꞌ diiꞌkoo. 21 Teka tee aung amuriiꞌ tamung bakoaravarupeuꞌ, naninge kunsiarama eeꞌnoko unkumoarama deekoꞌ makosi temuriiꞌ bataꞌkoo.”

Jiisuuꞌke Damaꞌke Booꞌantavaavaing Kemuꞌkanaꞌ Siraꞌpuuꞌnooꞌ

(Mak 9:30-32; Luk 9:43-45)

22 Eeꞌnoko tenang teing ookara Kaaleliꞌ porora oosiariraiꞌnange Jiisuuꞌke aaꞌpuruꞌ teing, “Ning Tee Naning-naumpoꞌ Paning-etaing tee nkaning-koo navumainuka-koo narunge tooka kompui tauraꞌmuuꞌnaang nantoong oreng biikaang bireng-koo. 23 Teinge dupisiꞌmaavaing, teka beenang doong deemparako napoꞌ domamarara daaꞌmaravaing.” Eeꞌnoko teing bakaning orakaꞌ deeꞌorouꞌ teeꞌpuioꞌ.

Piita naankai Jiisuuꞌ Taakisi Duaꞌuretuꞌnaꞌ

24 Teketa Jiisuuꞌ bakanavitu ninka Kapaneumeꞌnavuntuꞌkoo basiaririoꞌ taakisi nkanukai porora Piita niaꞌaama aaꞌpauꞌ, “Diikaang nau-antai ee taakisi dootuuꞌnava pankava-koong duaꞌuaung?” 25 Piitai makuꞌuma aaꞌpuuꞌ, “A, tee aaꞌ duaꞌumaung.” Teketa tenang Piita pava-koo pora mmeꞌ nauvuaruko teie Jiisuuꞌke tutung minkuvuma aaꞌpuuꞌ, “Saimoniꞌ ee, arekeeꞌ noruꞌemaang, ookara dauraronukai kansiꞌkooninge baata-koo taakisi barampaamaung, biurukaaꞌkoo aiꞌ oovuning-koo?” 26 Piitai makuꞌuma aaꞌpuuꞌ, “Oovuning-eta barampaamaung.” Teketa Jiisuuꞌke aaꞌpuuꞌ, “Tee tee teeꞌkoo dauraronuka biurukaaꞌ teing unaanisi otoꞌnuka, eeꞌnoko ning napoꞌ teeꞌke, unaanisi otoꞌnara. 27 Teka makosi neeꞌke mooꞌampeaing noruꞌ orari-antavarampeꞌneeng teing. Enang bera aꞌdoong nuaruꞌkoo airiraravaing, teketa tutunaꞌnu taviꞌnu barampeainu-koo karang kaakeꞌera teka mooniꞌ ooveaing. Oovera nkavera teing averiaing, neekaang taakisi deemparavaing.”

Copyright information for `NAS