Matthew 23

Jiisuuꞌke Bakaning Ampirinumpariarooꞌnaang Orokovuruꞌnaꞌ

(Mak 12:38-39; Luk 11:43,46; 20:45-46)

Teketa Jiisuuꞌke nantoong karinga eeꞌnoko teing bakaning barevare-nupoong aaꞌpuruꞌ, “Teing boto naunuka eeꞌnoko Boto Keperuuꞌnavitu Moosesi paariauꞌning bakaang boto nau-anta-koo. Teeꞌkoo diikaning ovoꞌmaꞌnuka deempariko taaraverereriaing kapooꞌ nauraariaining, teka kapooꞌnanka teinge nkoaavaining diiꞌke nkoveriaukaꞌ, aiꞌ teinge tee kapooꞌ daankiaamaung nko-nkoi siong-antavaavaung. Teinge tee poreꞌantavaarimaung mmauꞌ boto nantoonge tareaavaꞌnaang botoaarima, teka biiꞌka teinge okiꞌnooꞌ tareaavaꞌ.

“Ookara kapooꞌnanka teinge nkoaamaing nantoonge oo-koo maroita nkoaamaung. Aaꞌnomaung: dootuuꞌkoong taaꞌniꞌanta teing dapapiꞌ daiꞌarikooꞌ, eeꞌnoko dootuuꞌkooning baarong-koong puraparari bakei isikeng kurumparikooꞌ. Paroro kante-koo teꞌ ovontung biikanooꞌ baꞌnang-koo piavorokooꞌ. Napoꞌ pava dootuuꞌnairu-koo baꞌnavaꞌnaniꞌnanka tampeng-koo baꞌnaniaakooꞌ nantoonge ankampaariaꞌnaang. Napoꞌ nantoong kunekuneꞌnairu-koo nantoonge onkeonkeꞌaarimaatooꞌnaang piavorokooꞌ ‘Nau-anta Pankaing’ tampaarima. Teka diiꞌ teing ‘Nau-anta Pankaing!’ tantaariaukaꞌning, aiꞌ diikaang Siong-anta tee narung masikung otong, eeꞌnoko diiꞌ teing namaiaꞌ makosinuka. Eeꞌnoko napoꞌ naning narung anke kansiꞌkoo diuma tamperiaukaꞌ, aiꞌ diiꞌ teing narung masikung Diuma otong, eeꞌnoko tee tee paning-koo otomaung. 10 Eeꞌnoko nau-antananka pankeng tantaariaukaꞌ, aiꞌ diiꞌ teing tee narung Nau-anta Pankaing otoꞌderuring tee Kumponinge Pakoꞌpariꞌniiꞌ. 11 Naning diiꞌkoo pankaing masikung tee eeꞌnung diiꞌkoo meuꞌke pakupaku nkovuaing. 12 Baa tee naning baka deto basiaramaung damaꞌke doonko basi deemparavaing, eeꞌnoko baa tee naning boonko noruꞌari otomaung tee tee eeꞌnung deto basi deemparavaing.

Jiisuuꞌke Teing Boto Keperuuꞌnavitu Iooꞌuruꞌnaꞌ Ampirinumparikoꞌnung-koo

(Mak 12:40; Luk 11:39-52; 20:47)

13 Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka. Diiꞌ eeꞌning diiꞌka muuꞌ paninung-koo tuntariaruma niiꞌning napoꞌ tauraꞌperereriarukooꞌ teꞌ tumparipeuꞌning. 14 Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka. Diiꞌke naaroonku biikaning kapooꞌnanka pariꞌererima opevurerererikooꞌ kunsi isikanankai dakarakaꞌdarima nantoonge tampaꞌ ooraariiꞌnaang. Teeꞌkoo diiꞌ teing bakei aaꞌnaꞌ kiimatarariaining. 15 Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka. Nanunanuꞌ isipoꞌ basi nkoverikooꞌ pirung-koo daue eeꞌnoko kansiꞌkoo narung naning diiꞌkoo bereꞌaraaꞌnaang, eeꞌnoko tenang diiꞌanko poko diiꞌke bakei diiꞌkoo dau basinaꞌ mosianung-koo nanuꞌkoong deeng-antaverikooꞌ. 16 Bakaꞌ piaaruꞌnuka diiꞌ kaputuꞌdariri nantoong taung nau-anta-koo piarorimaing aaꞌperima, ‘Naning dootuuꞌnava pankava tampuma marakavaravaing tee kapooꞌ otoaꞌ, teka baa tee naning dootuuꞌnava pankava-koong kooro tampuma marakavaravaing tee tee daiꞌari otong tee bakaang maraka-anta dupe-anta-koo.’ 17 Diiꞌ bakei kaputuꞌnuka mutaanang-kooning, arera teing-koo aing-koo aaꞌning-koo dau basi: kooro niiꞌnooꞌ dootuuꞌnava pankava tee kooro meekaꞌantavumanava? 18 Napoꞌ aaꞌperikooꞌ diiꞌke, ‘Naning boonturoma-koo marakavarako kapooꞌ nkoaravaukaꞌnung, teka naning teꞌ kapooꞌ darimpaamaung-koo marakavarara deekoꞌ teie tee tee dupe-antavuaing.’ 19 Diiꞌ bakei kaputuꞌnuka mutaanang-kooning, arera kapooꞌ pankaing masikung teing-koo, tee kapooꞌ darimpaamaung aiꞌ teꞌ boonturoma tee kapooꞌ teꞌ darimpaamaung meekaꞌantavumaung? 20 Teeꞌkoo baa naning boonturoma-koo marakavaravaing tee teꞌkoo marakavaravaing eeꞌnoko ookara kapooꞌnanka teke otoroining-koo nariꞌ. 21 Eeꞌnoko baa tee naning dootuuꞌnava pankava-koo marakavaravaing tee teva-koo marakavaravaing eeꞌnoko tee-koo Kumponing-koo teke otomaung-koo nariꞌ. 22 Eeꞌnoko baa tee naning paning-koo marakavaravaing tee tee Kumponing bakanooꞌ baꞌnanui tare nkoroma-koo marakavaramaang eeꞌnoko napoꞌ tee-koo teꞌ baꞌnanui otomaung-koo nariꞌ.

23 “Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka, aiꞌ diiꞌke tee avutevuꞌ napoka dovang okiꞌnarekaꞌ kivoranaꞌ tankaamperima baarauni-koo~ namanto Kumponing averikooꞌ, sirivitaꞌ dovang koꞌdompuuꞌ, teka teing kapooꞌ boto-koo pankeng damaꞌduerikooꞌ aaꞌning: aarumo koontoꞌnaꞌ simpeꞌ, aarumo piaa unaa-anta-poꞌnung, eeꞌnoko Kumponing masikaꞌantavui kakeꞌiiari otoꞌ. Aing eeꞌning teing diiꞌke naroꞌka nko-koo makosining. 24 Diiꞌ kaputuꞌnuka taung nau-anta-koo piarorimaing, okiꞌnarekaꞌ kapooꞌnanka aaꞌnaꞌ pukerariri maaꞌerikooꞌ, teka kapooꞌ pankaing opoꞌ dunkumperikooꞌ.

25 Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka~. Diikaning kaapunanka-koo eeꞌnoko bantovantoꞌnanka-koo damaꞌdu aaꞌnaꞌ kiiroraaꞌantaverikooꞌ duuꞌperima, teka kuung teing-koo bakiaaꞌke maantoꞌ, eeꞌnoko mono bakaang pia narung siong. 26 Diiꞌ Boto Keperuuꞌnavitu kaputuꞌnuka, tutung kuung kiiroraaꞌantaverimaatoai teing diikaning kaapu eeꞌnoko bantovantoꞌnanka aaꞌnoainaꞌ damaꞌdu nariꞌ kiiroraaꞌ otoai.

27 Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka. Diiꞌ kuvi dakoꞌdoma damaꞌdu aaꞌnaꞌ kiiroraaꞌantavaamaing-pinaꞌ oroꞌnuka damaꞌdu-eta tampaꞌ oroꞌparaaꞌnaang, teka kuung bakei booꞌnuka-koong makeꞌke maantoꞌ eeꞌnoko amutemuriiꞌ kuꞌmiꞌnanka. 28 Teeꞌ nariꞌ diiꞌ damaꞌdu-eta nantoonge koontoꞌnuka-pinaꞌ ooraarimaung teka diiꞌkoo kuung ampirinunge~ maantoꞌ eeꞌnoko boto totoꞌke.

29 “Bakaꞌ piaaruꞌnuka diiꞌ boto naunuka eeꞌnoko diiꞌ Boto Keperuuꞌnavitu, bakei toraꞌkiriaining diiꞌ ampirinunuka. Diiꞌke nakaro-nupoong dakoꞌaaruꞌnooꞌ tampaꞌ kanierikooꞌ, koontoꞌnuka biikaning dakoꞌdomanairu tampaꞌ nepunepuꞌerikooꞌ. 30 Aaꞌperimaung, ‘Niiꞌ tenang nakaro-nupoong niikakatauro otorokoꞌnang oꞌnori dei nakaro-nupoong dupisiꞌaariko pakumariarupeuꞌ.’ 31 Teka daang dakarakaꞌdarima teeꞌ minkurarikooꞌ, aiꞌ diikaang aarumoi teing biurukaaꞌ siraꞌdurimaung nakaro-nupoong tero dupisiꞌaaruꞌning. 32 Aiaꞌ enang dupe-antaveriaing teeꞌ nariꞌ tee temuriiꞌ aarumo orara diikakatauroi tero nkoaakoꞌnung. 33 Diiꞌ borukoporonuka, boruꞌ doparopa-poꞌnung baurukaaꞌ, arekeeꞌ napoꞌ dontaꞌperipeuꞌ tenang Kumponinge tuutunanturira mosianung-koo beꞌkoo tanturiko?

34 “Teeꞌkoo ninge nakaro-nupoong diiꞌanko botoarampaing eeꞌnoko Daari Meekung-koo norukasiꞌnuka eeꞌnoko nau-antanuka. Niiꞌning tee teing-koo diiꞌke dupisiꞌerereriaining aaꞌbarataꞌ dovang-koo biꞌerererima. Eeꞌnoko niiꞌning teing muraꞌereriaining diikaning pava dootuuꞌnanka-koo kuunge osi kanteveri bataꞌererima. 35 Tee tee ookara urikupoong koontoꞌnuka dupisiꞌaarikoꞌning-koong tuutunang diiꞌke komperiaing teing-koo Eebeloꞌketa bera Sakaraiaꞌkoo basinooꞌka, tee Sakaraiaꞌ tee Berakaia bauring boonturoma eeꞌnoko meekavaro-koo meuꞌka diiꞌke diumaraang-koo kuunge dupisiꞌeruꞌnung teꞌ dootuuꞌnava pankava-koo.
23:35Tenaanka tutunaꞌnung eeꞌnoko asiꞌnung nantoong tampeng orenge tavaaretuꞌnaanka Daari Meekung-koo minkuari otoining-koo. (Pupuꞌ 4:8; 2 Noruꞌanta 24:20-21)
36 Masikaꞌ naurampimang, aing teing ookara kapooꞌnanka enanavarang-koo basiarako toraꞌkiriaing.”

Jiisuuꞌ Orarunsiaruꞌnaꞌ Jerusalemaꞌ Kiimatanumpoꞌ Deemparako

(Luk 13:34-35; 19:41-44)

37 “Oi bakaꞌ Jerusalemaꞌnupoong, Jerusalemaꞌnupoong, dupisiꞌerererimaing Kumponing bakaning nakaro-nupoong, eeꞌnoko teing diiꞌkoo botovurimaing kapange tooꞌpererima dupisiꞌerererikooꞌ, arekeeꞌning batei-koo ninge diiꞌ naroꞌkoo karirampimaung kokoreeꞌke baurukaaꞌ kupaꞌkoo boong naroꞌurimanaꞌ, teka diiꞌ arooꞌdariaung. 38 Aing ee, Kumponinge diikanooꞌ osi siꞌduring diiꞌke diiꞌka tare-koo bera nuampavooꞌnaang. Eeꞌnoko naurampimang diiꞌke tee ning napoꞌ oomeriarooꞌnaang bera tenang batei aaꞌmeriainang,

‘Biraankenung tee naning Ovoring bakaang miring-koo pomaatomaung.’”
39 (Kena 118:26)

Copyright information for `NAS