Philippians 1

Pilipai-nupoonge Paulaꞌ Tampaꞌ Navuaioꞌ Dotuaruꞌnaꞌ

(1:1–4:23)

Aung aneꞌ karavoto~ ninge Paulaꞌke minkuanko Timotiꞌke daarivuma neeꞌ Karistooꞌ bakanaanka botovotonaaꞌkai diiꞌanko botoampemang nantoong Kumponing bakaning meekupoong Pilipai-navuntuꞌke Jiisuuꞌ Karistooꞌkoo kuunge otorimaing-anko, tanatanuka eeꞌnoko pakupakunuka-anko nariꞌ. Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ.

Tampaꞌ Tang Eeꞌnoko Napoꞌ Tee Kunsi

Ninge tee diiꞌ noruꞌdampima tee-koo nkaang Kumponing-koo tampaꞌ tampamaung ookara batei-koo. Eeꞌnoko nkaang kunsi-koo diiꞌ ookara pakurampima tee ning ookara batei-koo doturotu ninka kunsimaramaung, diiꞌke tampaꞌ pakumerimaung-koo tee doorenang tampara bereng-anta-koo, teketa tutung komperuꞌnooꞌketa bera eꞌmunung doong-koo basinooꞌkoo. Ninge masikaꞌ tasiꞌpansi oꞌnong teie Kumponinge tee nko-nko tampara diiꞌkoo tutung-antavuuꞌnunge beꞌnuꞌantavui otoaing tee, bera teꞌmung tee Jiisuuꞌ Karistooꞌ toroaravainaꞌmung-koo basi.

Bakei makosi ninge diiꞌ ookara teeꞌ noruꞌkoo, aiꞌ diiꞌ teing ning-koo domang-koo otoring, diiꞌ niꞌninka narung-pinaꞌ oꞌnorimaing. Bane tenang ning kiimatanava-koo oꞌnoi eeꞌnoko napoꞌ tenang ninge doorenang tampara pakuansi puring-antavamanang, diiꞌ teing niꞌninka nariꞌ tampaꞌnko Kumponing-etaing kompampimaing. Kumponinge masikaꞌantamupeuꞌ naurampiko teeꞌ ninge diiꞌ piaarampimanaꞌ teie piaae Jiisuuꞌ Karistooꞌkoo pankaruntoong-koong-eta pomaunge. Eeꞌ pinaꞌ kunsimaramaung diiꞌkoo: tee diikaang piaa teeꞌ nariꞌ deto aaꞌnaꞌ dupui otoaing, tee ninka norunoruꞌ masikung eeꞌnoko tee matau tampara. 10 Aaꞌnoainaꞌ, diiꞌke ookara aarumonanka tampaꞌ simpeꞌeri kiiroraaꞌdariri tuumpiropanuka otoriaing bera Karistooꞌ poainooꞌke basi. 11 Eeꞌnoko teinge aarumo koontoꞌ bakaninge sinanankai maantoꞌduri otoriaing Jiisuuꞌ Karistooꞌketa pomainge Kumponing pankaing-antavui daangang-kooninge.

Paulaꞌ Kiimata-koo Otoko Tampara Doorenang Beremparuꞌnaꞌ

12 Ee mmaikoriꞌ, enang kiimatamainooꞌkoo diiꞌke aung noruꞌeriiꞌnaang piamoing, teie kapooꞌke ning-koo nkoarinunge tee doorenang tampara tampaꞌ aaꞌnaꞌ masikaꞌ beremparuꞌnung. 13 Bera tee ookarai amono-koo otoroininge aaꞌnoko teing kiimatanuka eeꞌnoko tanatanuka nariꞌ tee eeꞌ noruꞌaing: Ning tee tamung boturopa kiimatamaavaꞌ, teka ning Karistooꞌkoo botovotonaaꞌ deemarako kiimatamaing. 14 Eeꞌnoko ning tee eeꞌ daiꞌmari oꞌnoko daping ookara nantoong mmaikoriꞌ Ovoring-koo purimpariri biaꞌoromaung bakaang kara arooꞌketa siraꞌpaama avoreaavaꞌ.

15 Masikaꞌ niiꞌninge tee doorenang tampara mamairo ninka daankiaamaung ning Karistooꞌke siong-antamumanaꞌkoo mamairoarima. 16 Teka niiꞌning tampara onou eeꞌnoko piaa ninka daankiarimaung teeꞌ tasiꞌmai aꞌ kiimatanooꞌ siꞌmauꞌnung tee doorenang tampara puring-antavanko. 17 Teinge mamairo ninka daankiaamainge tee Karistooꞌ onou kiiroraaꞌketa daankiaavaꞌ, teka aing aaꞌning onou-koo otoko daankiaakooꞌ: baka-noruꞌ, baka daangang, maroita ning aaꞌnaꞌ mankiꞌantamaavaꞌnaang kiimata-koo oꞌnoko. 18 Teka tee makosi, kapooꞌ otoaꞌ. Tee kapooꞌ pankaing tee Karistooꞌ daankiaamaung bane teie teinge ookenge taunge, aaꞌnoko daang noruꞌariri eeꞌnoko aarumo masikung ninka. Teka ning tee dotumari oꞌnomaung teinge Karistooꞌ daankiaamaung-koo.

Paulaꞌ Domampari Otooꞌnaang Noruꞌaruꞌnaꞌ Pilipai-nupoong Paku-koo

19 Eeꞌnoko teeꞌ nariꞌ dotumari oꞌnoaing, aiꞌ ninge tee noruꞌansi oꞌnong diiꞌke kunsi-koo ning pakumerimaung-koo eeꞌnoko napoꞌ Jiisuuꞌ Karistooꞌ bakaang tanuaange pakumumaung-koo botue tee unaa-anta kompampaing. 20 Eeꞌnoko ning aaꞌnaꞌ dotumari nemari oꞌnong tee kapooꞌ tavoꞌkuaing-koo, maiaꞌmoaukaꞌnaꞌ noruꞌmari, teka amanampaꞌ monoi ookutununge Karistooꞌ pankaing-antavampaing teeꞌ nariꞌ uripoꞌketa nkomaramanaꞌ, bane aaꞌnoainge: domang oꞌnoi oꞌnoaing deekoꞌ, eeꞌnoko dupisiꞌmaavaing deekoꞌ. 21 Aiꞌ domamari oꞌnoi Karistooꞌ tee ning nkaang domaang, eeꞌnoko moomira deekoꞌ tee dupeari otoko kompampaing. 22 Teka ning nkaang mono teeꞌ nariꞌ domamari oꞌnoaing deekoꞌ tee eeꞌ oroꞌpari otong, nko-nko doma ninge tampara sinang-poꞌnung nkoampaing, teka tee ning meuꞌ keꞌmeꞌmari oꞌnong kenaanka noruꞌkoo. 23 Booꞌkoo pia oꞌnong Karistooꞌ ninka nariꞌ oꞌnoreainaꞌkoo, teeꞌ teeꞌ bakei aaꞌnaꞌ tampaꞌ masikaꞌ. 24 Teka kapooꞌ pankaing dau basi tee domamari anke kansiꞌkoo otoꞌkoong diiꞌ iriꞌantarampima. 25 Eeꞌnoko ninge enang toꞌbiimari tee eeꞌ tasiꞌpansing: ning doma diiꞌ ninka nariꞌ oꞌnoi pakurampiri puring-antarampimatoaing diikaang masikaꞌanta-koo eeꞌnoko napoꞌ tee-koo diikaang doturotu. 26 Teeꞌkoo ning napoꞌ diiꞌanko basimarako diiꞌ ning-koo doturarima diiꞌke tee Karistooꞌ daangamperiaing.

Pilipai-nupoong Arikung-koo Kuunge Tampaꞌ Otorooꞌnaang Nauvuruꞌnaꞌ

27 Otori teeꞌ teie doorenang tamparai Karistooꞌ bakaange tampui otoinaꞌ nariꞌ otorimaatoai, bane ninge moma beeroꞌdampiko eeꞌnoko beeroꞌdampiaꞌ diiꞌketa taapoꞌke oꞌnoko deekoꞌ, aiꞌ ninge diiꞌ teing narung onou-koo purintariri otoriko taara-koo piamoi oꞌnong, eeꞌnoko narung noruꞌ ninka pakureeri ivekaꞌdoriai tee doorenang tampara masikaꞌantaveri. 28 Diikaning kare-nupoonge bane arekeeꞌ tokoonaꞌ nkoraariko aroreriaꞌ otorimaatoai. Teeꞌ taaꞌniꞌantarariri otoriko teinge tasiꞌpaavaing doong asiꞌnaꞌmung keraꞌpariaing-koo diiꞌ domantariko, Kumponinge eeꞌnunge pakururioꞌ. 29 Aiꞌ Kumponinge tampara otootoꞌkoo bokururima Karistooꞌ masikaꞌanta narung-koo miruꞌduriaꞌ, teka ookeng-koo masikaꞌanta ninka arikananka nariꞌ kuneꞌkoo Jiisuuꞌ bakaang miring-koo. 30 Aiꞌ diiꞌ ninge tasiꞌdampiri otong diiꞌ teing arikananka kuneꞌerima poreꞌdorimaing teeꞌ ninge arikananka-koo poreꞌ kompanko oomerikoꞌnaꞌ eeꞌnoko enang napoꞌ teeꞌ nariꞌ poreꞌmoko taaramerimaang.

Copyright information for `NAS