Revelation of John 1

Jiisuuꞌ Karistooꞌke Kara Botovuuꞌnaꞌ ~Kenaanka-taa Dootuuꞌanko

(1:1–3:22)

Aung tee Jiisuuꞌ Karistooꞌke siraꞌpuuꞌnung Kumponinge nauvuioꞌ kapooꞌ daꞌdeng tavoꞌkuaing-koong bakaning botovotonaaꞌnuka nau-anta-koo. Eeꞌnoko bakaang koosinung~ botovuioꞌ sirakaꞌantamuuꞌnaang ning-koo Jooni-koo bakaang botovotonaaꞌ deemarako. Eeꞌnoko teing kapooꞌnanka ning-koo sirakaꞌantavuioꞌ ooamira tee Kumponing bakaang kara masikaꞌantavantuꞌ. Teeꞌkoo siraꞌpamaang ninge, tee kara masikung Jiisuuꞌ Karistooꞌke sirakaꞌantavuuꞌnanka. Baa tee naning aung kara tarampee-koong~ deeruvuaing dootuuꞌdomai tee biraanke nkavuaing, eeꞌnoko teing taaravaara pinkaꞌaavaining teing biraankeariainge teing kapooꞌ daariari otoining pinkaꞌaara, aiꞌ batei tee dueꞌumaang.

Joonie Karavoto~ Daarivuuꞌnaꞌ ~Kenaanka-taa Dootuuꞌanko

Aung kara ninge Joonie daariamang diiꞌkoo ~kevuntuꞌka-taa osi-koo dootuuꞌnupoong otorimaing Eesia-nameensiꞌkooning-koo. Kumponinge teie aaꞌnunge, teroita otouꞌnunge, eꞌmung teeꞌ otong, eeꞌnoko damaꞌke teeꞌ nariꞌ otoi poainge, teie piaaruri mooaruriaing. Napoꞌ teinge ~kenaanka-taae Tanuaange Kumponing baꞌnanumanooꞌ uroꞌkanooꞌke otoromainge piaaraari mooaraariainge. Napoꞌ Karistooꞌke teeꞌ nariꞌ piaaruri mooaruriai. Teie eeꞌnarai motekaroꞌari kara masikung siraꞌpuuꞌnunge bera booꞌparuꞌnooꞌke basi. Tee tutunaꞌnung booꞌketa daaꞌaruꞌnaꞌkoo, napoꞌ Ovoringe dauraronuka tanatavurimaung kansiꞌnupoong. Tee Jiisuuꞌ Karistooꞌ tee eeꞌnara niiꞌ piaamurira bakaang erenge simpiriꞌantamuruꞌ niikaning orakaꞌ nkonanka-ita. Eeꞌnoko niiꞌ bakanamuiaang deeng-antamurira napoꞌ Bauma Kumponing bakanavitu pirisitiꞌnuka deeng-antamuruꞌ tee-koo ookara meenasi eeꞌnoko purintoꞌ doong kante okovui otoi otoaing. Eeꞌ, masikung. Ooveriaing tee tee pooꞌnaang kaꞌmoꞌ ninka nariꞌ ookarai tee ooaavaꞌnaang. Teing tee tooꞌpauꞌning eeꞌnoko ookara nantoong kansiꞌnupoong teing birompariiꞌnaang tee poko ooaara. Eeꞌ, teeꞌ eeꞌnaꞌ.

“Ning tee tutunaꞌnaare eeꞌnoko napoꞌ asiranaare, napoꞌ uroꞌnunge eeꞌnoko damaꞌnunge.” Teeꞌpumaung teie Ovoring Kumponinge. “Teroita oꞌnouꞌnung, eꞌmung teeꞌ oꞌnong, eeꞌnoko damaꞌke teeꞌ nariꞌ oꞌnoi moainge. Ning tee Piikonara, ookara kapooꞌ nko-koo makosi.”

Karistooꞌ Jooni-koo Oroꞌparako Oovuuꞌnaꞌ

Ning tee Jooni diiꞌmaikoꞌ diiꞌ ninka nariꞌ baike kompampiruꞌnung miiꞌkampiritaaꞌ Karistooꞌ bakaang muuꞌkoo. Eeꞌnoko muiꞌ miring Patimos-koo siꞌmauꞌ tee kara Kumponing bakaang daankianko Jiisuuꞌ siraꞌpama. 10 Tee-koo doong Ovoring bakaang-koo ning tee teie Tanuaang Meekunge korimuioꞌ ning-koo damaꞌdua aurong pankaing taaravantuꞌ tuuviri-pinaꞌ karoma aaꞌpuko, 11 “Kapooꞌ dake ooveing buuku-koo daariera teing dootuuꞌnupoong-anko botoveai, teing ~kevuntuꞌka-taa osi-koo otoromaing aaꞌning-anko: Epeses, Simeena, Peekamamiꞌ, Taiataira, Saadis, Piladelepiaꞌ, eeꞌnoko Leodesiaꞌ.”

12 Tenang tee aurong ning karamukoꞌnung ooamaꞌnaang tee-aape bereꞌmaruꞌ, eeꞌnoko bereꞌmarama ~kenaanka-taa daamu baꞌnang-kooning kooro-koo nkoniiꞌ ooantuꞌ. 13 Eeꞌnoko teenanka daamu baꞌnananka-koo meerooꞌke narung naning-naumpoꞌ teke otoko, mononopaꞌ isikung kauꞌkoo basi kurumpari, eeꞌnoko tokoniiꞌkoo kooronanka naꞌnaniiꞌ murukeue kapeto keemoomparitaaꞌ. 14 Bakaang boreꞌ eeꞌnoko dapo aaꞌnaꞌ kakaara sipisipiꞌkoong dapo-pinaꞌ eeꞌnoko kaꞌmoꞌkoo tuꞌbetuꞌbe-pinaꞌ oroꞌ. Bakaang duta ntaꞌpinaꞌ urung. 15 Bakaang kauꞌ baraasi~ ntaꞌke ivaiꞌniiꞌpinaꞌ oroꞌ, eeꞌnoko bakaang aurong ntonanka uutuaramanaꞌ taara. 16 Bakaang bireng tampanaange beentoꞌ ~keura-taa kompuri otokoꞌ, eeꞌnoko karang-eta bainatu ookamenta irintoꞌ basiaruꞌ, eeꞌnoko bakaang oing duaaꞌpinaꞌ aaꞌnaꞌ sisisiisi.

17 Tenang ninge ooamira tee, ning tee-koo kauꞌkanooꞌ duaꞌmaruꞌ booꞌpinaꞌ mantomari. Teka teie ning-koo bireng tampanaang panteꞌmura, aaꞌmuuꞌ, “Aroreaukaꞌ. Ning tee tutuntoma eeꞌnoko napoꞌ oꞌdomai. 18 Eeꞌnoko ning tee napoꞌ Domantooꞌ. Ning tee moomira napoꞌ daaꞌmaruꞌnung. Eeꞌnoko teeꞌ nariꞌ domamari oꞌnoi oꞌnomaaꞌnoaing ookara batei-koo. Eeꞌnoko ninge tee kiiꞌnanka kompansi oꞌnong aaꞌnoko: booꞌkoong eeꞌnoko tutueu-aapenung. 19 Enang tee kapooꞌnanka dake ooveining daarieaing enang otoining eeꞌnoko damaꞌke tavoꞌkuaining nariꞌ. 20 Aung tee mirumiruꞌ aing aaꞌning oovemaatomaing-koong: ~keura-taa beentoꞌ ning-koo tampanaang-koo otoining eeꞌnoko napoꞌ ~kenaanka-taa daamu baꞌnananka kooro-koo nkoniiꞌ otoining. Aing ~keura-taa beentoꞌ teing teing koosinunanka makosining, teing dootuuꞌnupoong ~kevuntuꞌka-taa osi-koo otoromaing tanatanuka. Eeꞌnoko teing napoꞌ ~kenaanka-taa daamu baꞌnananka kooro-koo nkoniiꞌ oovemaatomaing teing nkaning ~kevitura-taa dootuuꞌnupoong.”

Copyright information for `NAS