Revelation of John 12

Sietaniꞌ Bakanaving Nariꞌ Oraruꞌkiaako Oovuuꞌnaꞌ Joonie

(12:1–20:15)

Teni Manikuma Eeꞌnoko Tee Pakia Teni-koo Kare Nkovuuꞌnung

Teketa tee paning-koo kapooꞌ pankaing taꞌnimpaariiꞌ taaꞌniꞌanta oroꞌparuꞌ, nani manikuma duaaꞌke mononopaꞌpinaꞌ nopaꞌniiꞌ, kaara-koo dau donkonuioꞌ, eeꞌnoko kivora-ita keura beentoꞌke boreꞌ koroaioꞌ baakopo-pinaꞌ. Teni teni tootoꞌpoꞌnani eeꞌnoko parooꞌnang dueꞌuma sisikeeravoma baiarakoꞌ. Eeꞌnoko teketa napoꞌ niiꞌnung taaꞌniꞌanta oroꞌparuꞌ teke paning-koo, narung kapooꞌ pakia-pinaꞌoroꞌ aaꞌnaꞌ pankaing urumpumaung, boreꞌ ~kenaanka-taa eeꞌnoko kaintang kivora otoing, eeꞌnoko napoꞌ baakopo ~kenaanka-taa kuruniiꞌ boreꞌkoo. Eeꞌnoko bakaang baringe beentoꞌnanka paning-kooning-koo beenaumo-nariong-koo nariong kiiꞌniꞌpuruꞌ depeto kansiꞌaape. Teketa tee pakia teni-anko manikuma-anko uroꞌkanooꞌ donkonuuꞌ tee bauring tootoꞌ teka paravuko maaꞌuuꞌnaang. Teketa tenie tee bauring tootoꞌ donkaani paravuuꞌ ookara nantoong kansiꞌkoo-nupoong tanatavuriaing tee ninka donsiꞌ aini-koo nkoniiꞌ kompui, eeꞌnoko tee tootoꞌ tee Kumponing-anko kooꞌantavauꞌ teꞌ bakanooꞌ baꞌnavaꞌnaniꞌdoma. Teni manikuma meeꞌboraꞌ sirakamaaꞌaape kooꞌaruꞌ teꞌ Kumponinge teni maamu-antaevuuꞌnooꞌ teka tareaavaꞌnaang doong narung kokoreiꞌketa kenaanka daakuꞌ bera ~narung-taa kivora-koo [1260].

Teketa paning-koo kare pankaing tavoꞌkuuꞌ. Tee Maikol bakaning koosinunanka ninka eeꞌnoko napoꞌ tee pakia bakaning koosinunanka ninka nariꞌ taveuꞌ. Teka tee pakia boong deempaara teing-ninka bakaning koosinunanka-ninka napoꞌ paning-koo otoꞌkoo tauraꞌpaavaꞌ. Teketa tee pakia pankaing kansiꞌaape doonko duaꞌauꞌ, tee tee boruꞌ tee uripoꞌketa otomaung miring maꞌnaang Sietaniꞌ tampaakooꞌ, tee ookara nantoong kansiꞌnupoong poo-antavurimaung. Tee kansiꞌkoo doonko duaꞌaaruꞌ bakaning koosinunanka tee ninka nariꞌ.

10 Teketa narung aurong aaꞌnaꞌ karoko teke paning-koo taaravantuꞌ aaꞌpuko, “Enang tee niikaang domang-anta poing tee ninka iriꞌ eeꞌnoko tee muuꞌ tee niikaang Kumponing bakaang, eeꞌnoko teie tero Pakoꞌpariꞌuuꞌnunge~ bakaang purintoꞌ siraꞌparing. Aiꞌ tee niiꞌmaikororiꞌ tooꞌdempurimaung teke niikaang Kumponing-koo uroꞌkanooꞌke aaꞌning-koo doong eeꞌnoko muung tee doonko duaꞌaing. 11 Teinge tee Sietaniꞌ puruꞌauꞌnooꞌ tee tee ninka ereng Kampia bakaang eeꞌnoko napoꞌ karai siraꞌpaama tee kapooꞌ koontoꞌ teie teing-koo nkovuuꞌnung koontoꞌ booꞌkoo aaꞌnaꞌ tauraꞌpariri. 12 Teeꞌkoo doturaravaing daꞌ paning, eeꞌnoko diiꞌ teke otorining. Teka piaaruꞌ daꞌ kansiꞌ eeꞌnoko teke otorining eeꞌnoko daꞌ pirung teing ookara kapooꞌnanka daꞌkoo otoroining ninka, aiꞌ Sietaniꞌ tee doonko diiꞌanko siaring koontoꞌ iiravoi otong, bakaang batei apukung noruꞌui.”

13 Teketa tenang teie pakiai kansiꞌkoo doonko duaꞌaioꞌ ooarara teie tee teni manikuma tee tootoꞌ donkaani paravuuꞌnani mankiꞌanta tutumpuuꞌ. 14 Teketa tee teni manikuma mareoiꞌ pankaing-kooning kupaꞌ kenaanka avauꞌ purerenuuꞌnaang. Eeꞌnoko purerenura teꞌ teni otoꞌkoo miruꞌniiꞌnooꞌ meeꞌboraꞌ sirakamaaꞌkoo beuꞌ teka tareaavaꞌnaang mareꞌ beemareu-koo eeꞌnoko namaranooꞌ teie pakiai kompuꞌneeng-koo. 15 Teketa teie pakiai karang-eta ntong pankarei kurimpuuꞌ teni manikuma siompuma nkavuuꞌnaang teie douai. 16 Teka kansiꞌke teni manikuma pakuvuma kamaankura tee ntong teie pakiai karang-eta kurimpuko teka dunkumpuuꞌ. 17 Teketa tee pakia aaꞌnaꞌ iiravora kare tutumpuuꞌ teing niiꞌning teni eeꞌnani baurukaaꞌ tavuꞌkoo, teing eeꞌning Kumponing bakaang boto siompaamaing, teing aaꞌning Jiisuuꞌ bakaang kara siraꞌpuuꞌnung pinkaꞌai otoromaing.

Copyright information for `NAS