Revelation of John 13

Biiko Kenaankara Daaꞌaretuꞌnaꞌ

Teketa napoꞌ pirung dueꞌke piisiꞌkoo donkonansi oꞌnoi narung kapooꞌ kauꞌ karenaumo biiko pirung-eta bakoarako ooantuꞌ, boreꞌ ~kenaanka-taa eeꞌnoko kainta kivora otoing, eeꞌnoko baakopo kivora kainta kante otoing eeꞌnoko boreꞌnanka-koo mirinanka otorong Kumponing pooreꞌkooning. Tee eeꞌnara kapooꞌ biiko ooantuꞌnung leepatiꞌpinaꞌoroꞌ, teka kauꞌnooꞌ beeaꞌpinaꞌoroꞌ, eeꞌnoko karannooꞌ laioni-pinaꞌoroꞌ. Teie pakiai iriꞌ avura napoꞌ bakanooꞌ ovorimpari baꞌnavaꞌnaniꞌdoma baꞌnang-antavuuꞌ. Eeꞌnoko nantoong boto-koo makosi-antavuuꞌ. Naveu teing-koo biiko-kooning-koo boreꞌnanka-koo tee tokoonaꞌpinaꞌ oroꞌpari otoko ooantuꞌ, temuꞌ tavaara booꞌantavaako napoꞌ domamparuꞌnaveu-pinaꞌ oroꞌ. Eeꞌnoko ookara nantoonge kansiꞌnupoonge teveu-koo teu pentanu tempaꞌouꞌnu ooaara taꞌnimparima siompauꞌ tee biiko. Nantoonge tee tee pakia dootuuꞌauꞌ teie pakiai tee biiko makosi-antavuioꞌ nantoong boto-koo, eeꞌnoko teinge tee biiko napoꞌ dootuuꞌaakooꞌ aaꞌpaama, “Baa niiꞌnung naning aung biiko-pinaꞌ oroꞌ otong, eeꞌnoko baie pa tavuma aung boong deempupeuꞌ? Naning otoaꞌ, bakei!”

Teketa teie pakiai makosi-antavuioꞌ teie biikoi baka biivimparama Kumponing aaꞌnaꞌ pooreꞌukoꞌ. Eeꞌnoko Kumponinge kaara karenaumo kivora-ita keura-koo
13:5Beenaumo masiraani bera nau-taa kaara-koo.
basinooꞌ naroꞌ tauraꞌpuuꞌ teeꞌ nkoaraaꞌnaang.
Eeꞌnoko karoma Kumponing pooreꞌukoꞌ. Napoꞌ Kumponing bakaang miring pooreꞌukoꞌ, teꞌ otomanooꞌ nariꞌ, eeꞌnoko napoꞌ teing paning-koo otoromaing. Eeꞌnoko teie pakiai makosi-antavuioꞌ teie biikoi Kumponing bakaning meekupoong ninka kare nakaꞌura puruꞌuruꞌ teing. Eeꞌnoko napoꞌ teie pakiai makosi-antavuioꞌ nantoong ookara muuꞌ tarevurikoꞌ aaꞌning naroꞌka: muuꞌnanka, nantoong ookara kansiꞌkoo-nupoong, kara amutemuriiꞌ, eeꞌnoko ookara dopaꞌ amutemuriiꞌ.

Ookarai nantoonge kansiꞌnupoonge tee biiko dootuuꞌaavaing, aaꞌninge teing Kumponinge biikaang miring daarievuriaruuꞌning tee-koo Buuku Domantooꞌnuka-koong-koo, tee Kampia bakananeꞌkoo, tee kansiꞌ pupuꞌaravaruko-ita Kumponinge miruꞌuioꞌ dupisiꞌauꞌnung. Baa naning punkang-poꞌnunge tee bakei taaravuaing. 10 Baa naning daiꞌkoo miruꞌniiꞌ tee daiꞌaavaing, eeꞌnoko baa naning bainatue dupisiꞌkoo miruꞌniiꞌ teie, bainatue dupisiꞌaavainge.
13:10Niiꞌnaꞌ eeꞌ: Eeꞌnoko baa naning bainatu kompuaing teie bainatue dupisiꞌnumpoꞌ.
Teka tee aung mankiꞌ eeꞌ oroꞌ tavoꞌkuko diiꞌ teing Kumponing bakaning meekupoong miiꞌkiritaaꞌ arooꞌdariri otoriaing.

11 Teketa napoꞌ niiꞌnung biiko kansiꞌketa doompeto bakoarako ooantuꞌ kainta kenaanka otoing sipisipiꞌkoo kampianu-pinaꞌ basi, eeꞌnoko kara-koo tee-pinaꞌ pakia-pinaꞌ karokoꞌ. 12 Tee tutunaꞌnung biiko-pinaꞌ iriꞌ oroꞌantavukoꞌ tutunaꞌnung biiko bakaang miring-koo, eeꞌnoko teie kenaanka-nung biikoi ookara nantoong kansiꞌkoo ootukunairu-koo otoromaing etuvuruꞌ tutunaꞌnung biiko dootuuꞌaavaꞌnaang, tero penta orara tempaꞌouꞌnung aaꞌnung. 13 Eeꞌnoko teie kenaanka-nung biikoi taaꞌniꞌantananka taꞌnimpaariiꞌ nkovukoꞌ ntaꞌ dovang paning-eta depeto kansiꞌkoo bokuvuma nantoong-koo dutakanooꞌke. 14 Eeꞌnoko teing ninka taaꞌniꞌantananka taꞌnimpaariiꞌ ninka tee tutunaꞌnung biiko bakaang miring-koo nkovuuꞌning ninka teie kansiꞌnupoong tosivurima siong-antavuruꞌ. Eeꞌnoko botovuriko baka-oo taꞌnampauꞌ tee biiko tutunaꞌnung paara-antavai, aaꞌnung tee tooꞌpauꞌnung teka mmeꞌ domampari otong. 15 Eeꞌnoko napoꞌ teeꞌ nariꞌ tauraꞌ nkavura tee biiko tutunaꞌnung-koong baka-oo domang-antavuuꞌ tee baka-oo karooꞌnaang. Eeꞌnoko nantoonge dootuuꞌaavaruko deekoꞌ tee baka-oo tee biiko-koong teie kenaanka-nung biikoi teing dupisiꞌantavurikoꞌ. 16 Eeꞌnoko teie ookara nantoong etuvurikoꞌ mooꞌdoꞌanta nkavaavaꞌnaang aaꞌnairu-koo: bireng-koo tampanaang-koo deekoꞌ niiꞌnaꞌ oing-koo. Aing aaꞌninge nkavaavaꞌnaang etuvuruꞌ: nantoong pankenankai eeꞌnoko okiꞌnarekaꞌke, kavo-poꞌnupoonge, eeꞌnoko ataꞌoinkue, napoꞌ botovotonaaꞌnukai eeꞌnoko osikaiaange. 17 Teketa deto tee naninge kapooꞌ tamung mooꞌuaukaꞌnunge niiꞌnooꞌ baavevuaukaꞌ tee mooꞌdoꞌanta otoꞌevuaꞌ. Teenooꞌ tee mooꞌdoꞌanta tee tee biiko tutunaꞌnung-koong miring daariniiꞌ niiꞌnooꞌ bakaang taaꞌniꞌanta mirumiruꞌpoꞌnung. 18 Ee mmaikoriꞌ, tampaꞌ matau ninka norunoruꞌeriaing tee aung: baa tee naning noruꞌpoꞌnunge tee tasiꞌpuaing tee taaꞌniꞌanta, aiꞌ tee tee deerunooꞌ tee biiko bakaang miring-koo kuunge bakuꞌari otomaung tee aung: ~Narung-taa daakuꞌ bera ~narung-taa kivora-ita ~narung-taa [666]. Tee deerunooꞌ tee naning-naung-koo taaꞌniꞌanta makosi.

Copyright information for `NAS