Revelation of John 17

Tenie Ovorinanie Auning-nkoi Mooꞌ Orara Nkavuuꞌnaꞌ

Narunge koosinunge teing-koo ~kenaanka-taa-koonge utau kompui otouꞌnunge ning-anko pora aaꞌmuuꞌ, “Poko ioꞌ ninge naurampai temono osi pankamono ntonanka ariteri-koo dau otoinamono, teni auning-nko doore karomai makosinamono, eeꞌnoko kiimatavaavainaꞌ naurampai. Teni teni dauraronanka ninka kansiꞌkoo-nupoong ninka aunimpeema otomai eeꞌnoko ookara nantoong kansiꞌnupoong kanuꞌantavurikooꞌ tee bakaang uaini auning-koong aarumo nai-antavurima.” Teketa tee Tanuaang Meekunge korimuioꞌ teie koosinunge nkamura meeꞌboraꞌ sirakamaaꞌkoo beꞌantamuuꞌ, eeꞌnoko teka teni manikuma kapooꞌkoo biiko-koo urumpumaung-koo dau baꞌnanuioꞌ ooantuꞌ. Eeꞌnoko tee tee biiko mirinankai maantoꞌ ookara mono Kumponing akapeuꞌkoonankai eeꞌnoko boreꞌ tee biiko-koo ~kenaanka-taa eeꞌnoko kaintananka kivora otoing. Teni manikuma ovorinaang masikani taaꞌniꞌantavari otouꞌ baarong urumpumainge eeꞌnoko iiraampumaing kurumpari. Eeꞌnoko napoꞌ aaꞌninge bauniiꞌ: biiri kooro-koong eeꞌnoko dukuꞌ mooꞌ aaꞌnaꞌ pankeng-kooning. Eeꞌnoko birenge kaapu kooro-koo nkoniiꞌ kompui otokoꞌ, kuung kapooꞌke maarekusiꞌnankai maantoꞌ teni auning-koonankai. Eeꞌnoko miring eeꞌ oroꞌ mirumiruꞌ teni-koo oing-koo daariari otong: TEE OSI PANKAMONO BABILONIꞌNAMONO, TEING AUNING NKONUKA BIOKO MAKOSINAMONO, EEꞌNOKO OOKARA AARUMO MAAREKUSIꞌ KANSIꞌKOONING-KOO OKORAꞌNAMONO.

Eeꞌnoko teni eeꞌnanie manikumai ereng naivura kanuꞌarioꞌ ooantuꞌ teing-koong mmauꞌkoong Kumponing bakaning meekupoong dupisiꞌuruꞌning-koong, teing eeꞌning Jiisuuꞌkoo miring siraꞌpaamaing. Eeꞌnoko tenang ninge ooamira teni, ning bakei aaꞌnaꞌ taꞌninantuꞌ. Teketa teie koosinunge aaꞌmuuꞌ ning, “Daꞌ aming-koo taꞌninimaang? Ioꞌ sirakaꞌantavamaꞌnaang daꞌkoo tee mirumiruꞌ makensiꞌnung teni-koong eeꞌnoko napoꞌ tee biiko teni dau baꞌnanui otoing-koong, boreꞌ ~kenaanka-taa eeꞌnoko kainta kivora aaꞌnung. Tee biiko oovemaatomaung tee tero otokoꞌ, teka enang otoaꞌ. Eeꞌnoko napoꞌ teieta dinkung tumangropa-ita bakoarara damaꞌke koontoꞌ keraꞌparara otoaukaꞌnunge. Eeꞌnoko teinge nantoonge ookarai kansiꞌnupoonge aung kansiꞌ mmeꞌ pupuꞌaravaruko-ita biikaang miring daariariaruuꞌninge tee-koo buuku domantooꞌ domampariaining biikaang miring daariariri otoroing-koo, tee biiko ooaara tee taꞌninaavaing. Tee aaꞌnung tero domampari otokoꞌ, teka enang otoaꞌ, teka napoꞌ damaꞌke oroꞌparavaing.

Aung naninge noruꞌpoꞌnunge tampaꞌ keperuuꞌui noruꞌkoo makosi. Teing ~kenaanka-taa boreꞌ teing ~kenaanka-taa iuꞌnanka teni eeꞌnani manikuma dau baꞌnanui otoining. 10 Napoꞌ niiꞌnaꞌkoo teing teing ~kenaanka-taa boreꞌnanka teing dauraronanka. Teing-koo paꞌnokoꞌ tero duaꞌariruꞌ, narung enang otong, napoꞌ narung mmeꞌ tavoꞌkuaꞌ, teka tavoꞌkura tee tee okiꞌnaa batei-koo otoaing. 11 Teka tee biiko tero otokoꞌnung, eeꞌnoko enang otoaꞌ aaꞌnung tee ~beenaumo-taa-nung daurarong~ deemparavaing. Teka teenooꞌ tee teing-koong narung. Nka tee teie, napoꞌ teeꞌ keraꞌparavainge.

12 “Teing kaintananka oovemaatomaing teing kivora dauraronanka, teka mmeꞌ dauraronanka deempariaꞌ batei makotuaruko, teka narung doong-koo okiꞌning batei naing-koo, dauraronanka deempariaing tee ninka biiko ninka nariꞌ otoroi. 13 Teing aing dauraronanka noruꞌ narung ookara otoꞌevorong. Teinge tee biikaang iriꞌ eeꞌnoko tauraꞌ tee biiko avaavaing. 14 Teinge aing eeꞌninge dauraronankai tee kare nakaꞌaavaing Kampia-aape, teka teie Kampiai teing ninka bakaning miruꞌurira bokuvurioꞌ kakeꞌiiariri tee siompaamaing ninka teing tee boong deempuriaing, aiꞌ tee tee Kampia ovontung biikaang Ovoring eeꞌnoko napoꞌ dauraronanka biikaang Dauraronge.” 15 Teketa teie koosinunge aaꞌmuuꞌnung, “Teing ntong-nanka ariteri teni auning nkovumai dau baꞌnanuioꞌ oovemaatomaing tee teing ookara kansiꞌ kante-koo-nupoong miruꞌari otong, eeꞌnoko nantoong karinga, napoꞌ teing dopaꞌ amutemuriiꞌ eeꞌnoko ookara kara amutemuriiꞌnanka. 16 Eeꞌnoko tee biiko-kooninge kaintai kivorai oovemaatomainge tee teni auning-koo baka avaramai munteꞌaavaing. Eeꞌnoko napoꞌ teinge tee teni orakaꞌ nkoaavaing bera simpenoiꞌ deeng-antavaara sipaavai. Eeꞌnoko bioꞌ teni-koong tee maaꞌaama kato ntaꞌkoo tai-antavaavaing. 17 Aung tee noruꞌ Kumponinge biikaang domang-koo sipuko teeꞌ nkoaavaing bakaang pia nkoaraaꞌnaang, eeꞌnoko narung noruꞌ ninka tauraꞌpaako teie biikoi tanatavuriaꞌnaang bera tee Kumponing bakaang kara masikaꞌpuainooꞌke basi. 18 Eeꞌnoko teni manikuma oovemaatomai teni tee osi pankamono miruꞌari otong, dauraronanka ookara kansiꞌnupoong tarevurima-namono.”

Copyright information for `NAS