Revelation of John 5

Joonie Narung Buuku Pinkaꞌniiꞌ Oovuuꞌnaꞌ

Eeꞌnoko tee-koo daurarong~ bakaang baꞌnavaꞌnaniꞌkoo teke baꞌnanui otouꞌnung-koo tampanaang-koo ninge narung buuku ooantuꞌ ookamenta-koo daariniiꞌ, kuunge eeꞌnoko damaꞌdue, teketa dau-eta ~kemuꞌka-taae pinkaꞌniiꞌ teie pinkapinkaꞌke, aaꞌnaꞌ meekunge. Teketa narung koosinung~ purintoꞌ ooantuꞌ teie aaꞌnaꞌ bokuma aaꞌpuko, “Baa miring-poꞌnung aneꞌ buuku bereꞌkoo makosi? Baa kansiꞌ okonara taaꞌniꞌantavari aing pinkapinkaꞌnanka kaapeꞌupeuꞌ?” Bakei makotuaꞌ naning miring otoaunge tee aung aneꞌ buuku dapaꞌuma kuung oo-koo, eeꞌnoko teeꞌ oroꞌ naning miring-poꞌnung otoaruuꞌ aaꞌnoko paning-koo otoromaing-koo napoꞌ kansiꞌkoo oꞌnorimaing eeꞌnoko kansiꞌka kuunge otoromaing-koo. Eeꞌnoko ning bakei aaꞌnaꞌ biromaruꞌ naning teneꞌ buukunaneꞌ bereꞌura kuung oovuaing otoaruioꞌ. Teketa tenang teing-koong ovontung-koonge narunge aaꞌmuuꞌ, “Birontaravaukaꞌ, ee aung. Tee Laioni Juda bakanamuiaang-koong boreꞌ, napoꞌ Deevitaꞌ bakanaving-koonge, teie tee parapaara puruꞌuing. Teie eeꞌnarai tee pinkaꞌnisi kaapeꞌura tee aung aneꞌ buuku bereꞌuuꞌnaang.”

Joonie Teu Sipisipiꞌ Kampianu Oovuuꞌnaꞌ

Teketa napoꞌ ookama sipisipiꞌnu Kampianu ooantuꞌnung teke tee ovorimpari baꞌnaniꞌdomai, eeꞌnoko teing karenaumo kapooꞌ domantoia otorokoꞌnooꞌke donkonuioꞌ teing-koo ovontung-koo meuꞌke. Teu eeꞌnu dupisiꞌauꞌnu-pinaꞌ oroꞌnu. Eeꞌnoko kaintananka eeꞌnoko dutananka ~kenaanka-taa otoinu, teing teing ~kenaanka-taa teing Kumponing-etaning tanuaang ookara kansiꞌkoo botovuruꞌning. Teketa tenang teue Kampianue bera tee buuku nkavuuꞌ tee-koo ovorimpari baꞌnavaꞌnaniꞌdomai baꞌnampari otomaung-koo bireng-koo tampanaang-koo. Eeꞌnoko tenang teie tee buuku nkavuko teing kapooꞌ karenaumo domantoia eeꞌnoko napoꞌ teing kenaiꞌka-ita karenaumo ovontung teꞌ teu-anko Kampianu-anko kauꞌkanooꞌ dapuuꞌkai duaꞌariruꞌ. Eeꞌnoko teing ovontung aing aaꞌninge kanteariri kompai: kapooꞌ kiita-pinaꞌ oroꞌning eeꞌnoko napoꞌ utau kooro-kooning kanteng paroꞌniiꞌ tampaꞌ nuuraaꞌke maantoꞌ. Teing teing kunsinanka nantoong meekupoong biikaning. Teketa kena nerakung kenavaama aaꞌpaakoꞌ, “Bakei daꞌ tee makosi tee aung aneꞌ buuku nka-koo eeꞌnoko tee pinkapinkaꞌ kaapeꞌera bereꞌepeuꞌ, aiꞌ daꞌ tee dupisiꞌdauꞌnung eeꞌnoko dakaang erenge Kumponing-aape nantoong mmauꞌ mooꞌeruꞌ avi-tevitu-eta eeꞌnoko ookara kara amutemuriiꞌketa eeꞌnoko ookara nantoong amutemuriiꞌketa, eeꞌnoko ookara nantoong kansiꞌnupoong amutemuuꞌketa. 10 Dake narung muuꞌ deeng-antaverining napoꞌ piristiꞌnanka miruꞌeri niikaang Kumponing bakaning kansiꞌkoo tanatavariiꞌnaang.”

Teu Sipisipiꞌ Kampianu Biivimpauꞌnaꞌ

11 Teketa napoꞌ ooama kena-koong aurong taaravantuꞌ koosinunanka bakei dakuraakuꞌ deeru-paaꞌke koroai kenavariko teke eeꞌnooꞌke Daurarong~ baꞌnanui otokoꞌnooꞌke teing ninka ovontung eeꞌnoko teing kapooꞌ domantoia ninka nariꞌ otorokoꞌnooꞌke. 12 Aaꞌpaakoꞌ aaꞌnaꞌ bokiaama kenavarima, “Makosi tee Kampia dupisiꞌauꞌnung teing aing aaꞌning nka-koo: purintoꞌ, kavokavoro, matau, iriꞌ, biiving, meenasi, eeꞌnoko tee biraanke.” 13 Teketa napoꞌ auronanka taaravantuꞌ ookara kapooꞌ domantoia-ita aaꞌnoko paning-kooning, kansiꞌkooning, kansiꞌka kuunge otoromaing eeꞌnoko pirung-kooning. Teing ookara tenairu-koo otoromainge kenavarima aaꞌpaakoꞌ, “Biraanke eeꞌnoko biiving napoꞌ meenasi eeꞌnoko tee purintoꞌ tee tee-koo Daurarong deempari baꞌnanui otomaung-koo otoi otoaing ookara batei-koo, eeꞌnoko napoꞌ tee-koo Kampia-koo otoainge.” 14 Eeꞌnoko teinge kapooꞌ domantoia karenaumoi aaꞌpaakoꞌ, “Eeꞌ, masikung.” Eeꞌnoko teing ovontung doonko dapuuꞌkai duaꞌarima dootuuꞌarikoꞌ tee-koo.

Copyright information for `NAS