Revelation of John 9

Paꞌnokoꞌnung Koosinunge Tuuviri Puumpuuꞌnaꞌ

Teketa napoꞌ paꞌnokoꞌnunge koosinunge bakanareng tuuviri puumpuuꞌ. Teketa ninge narung beentoꞌ ooantuꞌ paning-eta kansiꞌkoo duaꞌaruꞌnung. Eeꞌnoko kiiꞌ kong-antavauꞌ tee teꞌnung dinkung tumangropa-koong. Eeꞌnoko teie tee dinkung tumangropa daateꞌuko teieta ii kutekuteivuuꞌ ntaꞌ pankaing-eta popeuꞌnaꞌ. Eeꞌnoko teie iie teketa dinkung-eta kutekuteivuma aaꞌnouꞌ: duaaꞌ mutaanampura aanarooꞌ deto tunumparavaruuꞌ. Eeꞌnoko teieta ii-eta ntaaꞌnanka bakoarira kansiꞌkoo kato bereravariruꞌ purintoꞌnanka kaki-koo bakei oroveiꞌpinaꞌ naapunanka teing; eeꞌnoko munkeita-koong iriꞌ kong-antavaaruꞌ. Eeꞌnoko tee baaꞌnanka kansiꞌkoong napoꞌ teing koiꞌkooning paraꞌnanka orari-koo tauraꞌpaariaꞌ, teka nantoong naing deekoꞌ ookara kaki-koo makosi teing Kumponing bakaang taaꞌniꞌanta otoroaing biikaang oing-koo. Tee-nooꞌ paꞌnokoꞌ kaara-koo kuunge sisikeera-antavaariiꞌnaang tauraꞌpaaruꞌ, teka dupisiꞌkoo deeaꞌ, tee tamung naapuaarima sisikeera-anta-koo. Naapunooꞌkoo teeꞌ oroveiꞌ pinaꞌ mantong tenang naning taivuko. Teketa teing-koo paꞌnokoꞌ kaara-koo kuunge tee nantoonge booroaing taung besiꞌaama poreꞌoroaing, teka taung ooaavaukaꞌnung bakei. Booꞌkoo aaꞌnaꞌ piavoroko booꞌke tee teing meumpuriaꞌ tokoi mmaruaing.

Tee ntaaꞌnanka tee oo-koo oosi-pinaꞌ oroꞌnanka tavutavuꞌkoo maamuariri otoroining-pinaꞌ, eeꞌnoko biikaang boreꞌkoo kapooꞌ baakopo kooro-koong-pinaꞌ oroꞌ otong. Eeꞌnoko oinooꞌ naning-koong-pinaꞌ oroꞌnanka. Eeꞌnoko biikaang dapo manikuma-koong-pinaꞌ isikananka, napoꞌ siꞌdaꞌnooꞌ laioni-koong-pinaꞌ kepeꞌniiꞌnuka. Eeꞌnoko biikaang murukeu-neeꞌ aini-koong-pinaꞌoroꞌ, eeꞌnoko tenang puraanaako kupaꞌkoong aurong kaarisinanka mmauꞌ oosinankai tavutavuꞌkoo kuaꞌparima kurunkurunkaanaamanaꞌ taara. 10 Teing eeꞌning teing baring tairoꞌnukai munkeita-pinaꞌ, eeꞌnoko teꞌ biikaang baring-koo purintoꞌ otong nantoong baike-koong teing-koo paꞌnokoꞌ kaara-koo kuunge. 11 Eeꞌnoko teing tee narung dauraronge~ tanatavurimaing. Tee daurarong tee narung koosinung tee dinkung tumangropa tanatavumaung. Bakaang miring Iiburu-naꞌkoo tee Abadon, eeꞌnoko Kirikiꞌnaꞌkoo Apolion, miruꞌnooꞌ Tooreere. 12 Narung kapooꞌ arikung tee tankinuing. Ee aing, enang tee kenaanka kapooꞌ arikeng mmeꞌ otomang damaꞌke tavoꞌkureeꞌnaang otoining.

~Narung-taa-nung Koosinunge Tuuviri Puumpuuꞌnaꞌ

13 Teketa napoꞌ ~narung-taa-nung koosinunge bakanareng tuuviri puumpuuꞌ, eeꞌnoko narung aurong karoko taaravantuꞌ teketa boonturoma-ita Kumponing-koo uroꞌkanooꞌ kooro-koo nkoniiꞌnooꞌketa, ookamenta karenaumo kunkuꞌdoiꞌketa. 14 Eeꞌnoko teie auronge tee ~narung-taa-nung koosinung tuuviri kompui otokoꞌnung nauvuma aaꞌpuuꞌ, “~Karenaumo-taa koosinung daiꞌariri otorong teke tee ntong pankarei Iuperetisi-ankoi. Teinge tee batei Kumponinge miruꞌuuꞌnung nempaamaang maamuariri nantoong-koo beenaumo nariong dupisiꞌaariiꞌnaang; 15 Aiaꞌ, tee batei tee amareꞌ, au kaaranu eeꞌnoko eꞌmung eeꞌnaꞌmung deemparioꞌ dipiꞌeriko berora Kumponinge miruꞌuruꞌnaꞌ nkoaavai.” Teketa teie koosinunge taaravura teing karenaumo koosinunanka dipiꞌuruꞌ. 16 Teketa tavuꞌnupoong oosinanka-koo baꞌnaniauꞌning-koong deerunooꞌ taaravantuꞌ kenaanka daakuꞌ kokokokoreiꞌ [200,000,000]. 17 Eeꞌnoko napoꞌ noone-koo oosinanka-koo nantoong baꞌnaniꞌaioꞌ ooarantuꞌ biikaang murukeu-neeꞌ niiꞌnooꞌ ntaꞌpinaꞌ urung, niiꞌnooꞌ iinau-pinaꞌ oroꞌ, eeꞌnoko niiꞌnooꞌ piiko-pinaꞌ meraaꞌ. Eeꞌnoko oosinanka-koong boreꞌnooꞌ laioni-pinaꞌ oroꞌ, eeꞌnoko biikaang karang-eta aaꞌning kuripioaakoꞌ: ntaꞌ, ii, eeꞌnoko tee piiko karauviaana. 18 Eeꞌnoko ookara nantoong-koo beenaumo-nariong aing beenaumo doovaange dupisiꞌaaruꞌnung, aaꞌninge: ntaꞌ, ii, napoꞌ tee piiko karauviaana, karang-eta kuripioauꞌnunge. 19 Aiꞌ tee purintoꞌ oosinanka-koong aaꞌning-koo otong: karang eeꞌnoko baring. Eeꞌnoko teing biikaang barinanka tee boruꞌpinaꞌ oroꞌ, napoꞌ botu boreꞌpoꞌnunge, eeꞌnoko temarange nantoong taiaarima baikeaaruꞌ.

20 Teka teing nantoong beenaumo doovaange dupisiꞌuriaruuꞌning teing teeꞌ nariꞌ bereꞌariaruuꞌ teing-eta biikaning orakaꞌ nkonanka-ita, aaꞌnoko maꞌnari dovang-koo boontu, eeꞌnoko daang-koong kumponinanka biiꞌka taꞌnampauꞌning-koo dootuuꞌ nko aaꞌning-koo: kooro, silivaꞌ, boronsi~, kapang, eeꞌnoko koiꞌ; teing eeꞌning kapooꞌ oo noruꞌaavaꞌ, taarakaavarupeuꞌ, nanuꞌkoo makosiaavaꞌ. 21 Napoꞌ aing eeꞌ oroꞌ nko-nko-ita bereꞌariaruuꞌ: naning dupisiꞌ, doparopa, kaukauro-nko, eeꞌnoko kapooꞌ avutevuꞌnanka bakiaaꞌ.

Copyright information for `NAS