Romans 10

Isireeli-nupoong Papaaravariruꞌnaꞌ Oo-koo Kumponinge Meekaꞌantamurimanaꞌ

Mmaikoriꞌ ee, pankaruntoonge ning aaꞌnaꞌ piamoi Kumponing-koo kunsimaramaung nkaning nantoong Isireeli-nupoong domampariiꞌnaang. Ooansi siraꞌpampeuꞌ teing biikaang aarumo avarimanaꞌ Kumponing-koo, nka tee avariainaꞌ makosinooꞌ sirakaꞌpariaꞌ. Noruꞌaavaꞌ tee taung Kumponinge nantoong koong-antavurimanavung. Biiꞌka matauarima kaariꞌaamaung Kumponing bakanavung siong-koo kupiꞌoroma, Karistooꞌkoo kuunge. Karistooꞌ tee Moosesi-nung boto oꞌanta-koong. Teeꞌkoo teing ookara nantoong Karistooꞌ masikaꞌantavaavaining teing koontoꞌnuka tampuriaing.

Moosesie boto siong-koo eeꞌ daarivuuꞌ,

“Tee naning aung boto siompuaing tee domamparavaing.”
(Boontu 18:5)

Nka tee niiꞌnooꞌka eeꞌ minkuvuuꞌ masikaꞌantanavung-koo,

“Diiꞌka eeꞌ minkueriaukaꞌ: Baa paning-aape koinuainge tee Kumponinge Teroita Pakoꞌpariꞌniiꞌ niiꞌ domamuri taremuriainooꞌkoong depeto boku-koo teie pakumuriiꞌnaang?
Napoꞌ eeꞌ minkueriaukaꞌ: Baa doonko kansiꞌkoo kuung tumparavai napoꞌ tee Pakoꞌpariꞌniiꞌ booꞌketa daaꞌantavuuꞌnaang? Aiꞌ tee Kumponing bakaang kara tee teroita diiꞌanko dueꞌ otong, diikaang beꞌduuꞌkoo eeꞌnoko domang-koo otong.”
(Boto 30:12-14)

Emuꞌ tee tee kara teie minkuvuuꞌnung tee tampara doorenang daankiampimaung diiꞌke masikaꞌanta-koong.
Tee diiꞌke karang-eta siraꞌperiaing deekoꞌ aaꞌperima, “Jiisuuꞌ tee Ovoring,” eeꞌnoko masikaꞌantaveriaing diikaang domang-eta tee Kumponinge domang-antavuuꞌ nung bouꞌnooꞌketa, teeꞌkoo enang diiꞌ domantariaing. 10 Tee naning masikaꞌantavuko bakaang domang-eta tee koontoꞌ naning tampuaing; eeꞌnoko siraꞌpuaing bakaang karange tee tee mooꞌaravaing. 11 Niiꞌnooꞌke Daari Meekunge eeꞌ minkuvui otong,

“Naning tee masikaꞌantavuaing tee Kumponinge sirakuraꞌ oko-antavuaing tee biraanke.”
(Aisaiaꞌ 28:16)

12 Enang tee norunoruꞌ tankatankaang-koong otoaꞌ meuꞌke teing-koo Juꞌnupoong eeꞌnoko Juꞌdeeaing, aiꞌ Ovoring tee Ovoring ookara biikaang, eeꞌnoko avurimaung bakaang biraanke teing nantoong tee-koo kunsiarimaing. 13 Napoꞌ Daari Meekunge minkuvumanaꞌ eeꞌke,

“Ookara nantoong Bakaang miring tampaama kunsiariaining teing domampariaing.”
(Jooeli 2:32)

14 Nka arekeeꞌ kunsiaripeuꞌ nantoong tee-koo biikaang masikaꞌanta otoaruko dei? Napoꞌ arekeeꞌ masikaꞌantavaapeuꞌ bakaang miring taaravaavaꞌ dei? Eeꞌnoko arekeeꞌ taaravaapeuꞌ napoꞌ naning tee siraꞌpumaung otoaruko? 15 Eeꞌnoko nantoonge arekeeꞌ siraꞌpaapeuꞌ niiꞌninge botoaariaruko dei? Teeꞌ daariari otoinaꞌ,

“Tee tampara doorenang nkavai poroma kapariꞌkaako taaravampira doturotumarimaung.”
(Aisaiaꞌ 52:7)

Isireeli-nupoonge Tampara Doorenang Dimpaꞌauꞌnaꞌ

16 Aꞌnooꞌ baruꞌ ookarai masikaꞌantavaavaruuꞌ tee doorenang tampara, tee-pinaꞌ Aisaiaꞌke minkuvuma aaꞌpuuꞌnaꞌ,

“Ovoring, baie masikaꞌantavuuꞌ tee kara niiꞌkoo taaravuuꞌnung?”
(Aisaiaꞌ 53:1)

17 Nka tee niiꞌnunge masikaꞌantavupeuꞌnung deekoꞌ tee taaravura masikaꞌantavupeuꞌ Karistooꞌ daankiaako.

18 Isireeli-nupoonge aming-koo masikaꞌantavaavaung, aiꞌ mmeꞌ taaravaavaꞌ? Otoaꞌ. Bakei taaravauꞌ biikaang minkunaa deemparako daariari otoinaꞌ eeꞌ,

“Biikaang kara beremparuꞌ ootukunairu-koo. Napoꞌ biikaang minkunaa beremparioꞌ taaravauꞌ ootukunung kansiꞌkooninge.”
(Kena 19:4)

19 Nka ee Isireeli-nupoonge taaravaara tasiꞌpaavaꞌ tee minkunaa okoraꞌnooꞌ? A, tee aaꞌ tang kupiꞌoroko. Kumponinge eeꞌ nauvuruꞌ Moosesie daarivuuꞌnaneꞌkoo,

“Nantoong miring-poꞌning deeaing tampaꞌ onkeonkeꞌaranko diiꞌ mamairorarimatoainge. Niiꞌnavitu onou otoroaꞌnavitu pakuaranko iiraroriaing.”
(Boto 32:21)

20 Napoꞌ tee Aisaiaꞌkoo ivekaꞌantavui eeꞌ nauvuruꞌ,

“Teinge kuneꞌmauꞌ nantoonge bane besiꞌmaavarukoꞌninge. Eeꞌnoko ning siraꞌmaruꞌ teing-koo ning-koo niaꞌkaavaruꞌning-koo.”
(Aisaiaꞌ 65:1)

Eeꞌnoko Isireeli-nupoong-koo karoma eeꞌ minkuvuuꞌ,

“Bireng takaaꞌmokooꞌ bokurampima diiꞌ taarapiikanuka, kupiꞌ baukonuka.”
21 (Aisaiaꞌ 65:2)

Copyright information for `NAS