Romans 11

Kumponinge Isireeli-nupoong-koo Taakeng Damaꞌke Tampaꞌ Nkovuriainaꞌ

Enang arekeeꞌ, Kumponinge bakaning damaꞌduvuruꞌ ee? Tee aaꞌ teeꞌ deeaꞌ, bakei! Ning tee Isireeli-nupoong-koo narunge, Eebaraamiꞌ bakanaving-kooning-koo, Bensimani bakanamuiaang-koonung. Kumponinge tee damaꞌduvuriaung Isireeli-nupoong. Otoroainaꞌ noruꞌuritaaꞌ teing bokuvuruꞌ. Diiꞌke noruꞌeriaꞌ deeꞌma Eliasi bakaang minkunaa Daari Meekung-koo otomaung Isireeli-nupoong tuumpivuruꞌnung-koong? Eliasie aaꞌpuuꞌ,

“‘Ovoring, teinge tavaaruꞌ dakaning nakaro-nupoong, boonturoma-nairu pesiꞌevaarima. Teka ning narung enang oꞌnong, eeꞌnoko ning napoꞌ teeꞌ, nkaang domaang napuꞌkoo piavoroi otong.”
(1 Dauraronanka 19:10-14)

Eeꞌnoko teeꞌpuko Kumponinge eeꞌ bariꞌuuꞌ,

“Ninge aaꞌ ~kenaanka-taa kokoreiꞌ nantoong tarearansi otong mmeꞌ kiunaavaꞌ tee-koo daang-koong kumponing-koo miring Baaelo-koo.”
(1 Dauraronanka 19:18)

Tee tee eeꞌnara teeꞌ nariꞌ enanavarang-koo teing eeꞌning taakeng otorong Kumponinge bakaning miruꞌuruꞌning bakaang piaa-koo okoraꞌarioꞌ. Teing piaa narunge nantoong bakaning tampurimaing dempariko nantoong biikaang nko-nko-koo okoraꞌarioꞌ bakaning tampuriaukaꞌ aiꞌ piaa tee nko-nko-koong mooꞌ deeaꞌ. Teeꞌkoo Isireeli-nupoonge tamung kaariꞌaamaatoko teing okiꞌning naing miruꞌuruꞌ biraanke nka-koo. Teing niiꞌning bakaang piaa nka-koo kupiꞌoroma biaꞌorouꞌ. Teeꞌ nariꞌ daariari otoinaꞌ, aaꞌpumanaꞌ,

“Kumponinge avuruꞌ tanuaang kanuꞌaapenung, duta kaputuꞌanta-koong, eeꞌnoko kipau-anta-koong eꞌmung-koo basinooꞌkoo.”
(Boto 29:4; Aisaiaꞌ 29:10)

Eeꞌnoko Deevitaꞌ bakanarong-koo eeꞌ otong:

“Biikaang paroro meekunanka tee beana deemparavaing teing baankaꞌuriiꞌnaang, dinkung-pinaꞌ puꞌantavuriaing makuꞌkoo.
10 Biikaang duta kaputuꞌaravainge ooaaꞌneeng-koo, eeꞌnoko kopini mankiꞌke takaaꞌoromaatoai.”
(Kena 69:22,23)

11 Enang arekeeꞌ, puꞌarima koontoꞌ ee oraruꞌkiaakooꞌ ee? A, otoaꞌ. Teing puꞌaririoꞌ Isireeli-nupoong deeainge domaang kompauꞌ Isireeli-nupoong mamairoarira napoꞌ damaꞌke bereꞌariiꞌnaang. 12 Teeꞌkoo ookara kansiꞌke biraanke kompaing Kumponing-nung avuavuꞌ domang-anta-koonung Isireeli-nupoonge boto totoꞌpaaraiꞌnange Kumponing bakaang piaa kosiꞌaako. Enang noruꞌeriai, teeꞌ deekoꞌ bakei biraanke pankaing ookara nantoonge nkavaavaing damaꞌke, Isireeli-nupoong napoꞌ tapoꞌariko Karistooꞌkoo.

Noruꞌ Nkavampiainaꞌ Kumponing-nung Piaa-koo Eeꞌnoko Kiimata-koo

13 Enang tee ning diiꞌkoo karomang Isireeli-nupoong deeaing-koo. Ning kara-okovui-nka Isireeli-nupoong deeaing-anko deemarara aaꞌnaꞌ mintoomaramaung kapooꞌ masikung-pinaꞌ noruꞌansi mmaikoriꞌ Isireeli-nupoong mamairoarira mooꞌariainaꞌ. 15 Kumponing teing-eta akoꞌ bereꞌarara ootukunung nantoong kansiꞌnupoong bakaning turaniꞌnuka-anko bereꞌarako tee-anko tapoꞌariko. Eeꞌnoko tee aaꞌnaꞌ dakaosiꞌ deemparavaing tenang teing Juꞌnupoong Karistooꞌ bakaning deempariko damaꞌke, nantoong booꞌnuka napoꞌ domampariainaꞌ oroꞌparavainge.

16 Pankaraampuri meekupoong meekung deekoꞌ makosi damaꞌnaving napoꞌ meekupoonge. Eebaraamiꞌ dovang teing Kumponing-nung koiꞌkoong kaakeng makosinuka eeꞌnoko bakanaving tevari-koong kaumpeꞌnanka makosinuka. 17 Enang tee koiꞌ Kumponinge keenavaang-eta niiꞌning kaumpeꞌnanka kenteꞌuko diiꞌ teing kaumpeꞌnanka poraꞌkoong makosinuka tevari-koo beꞌnuꞌantaruruꞌning kaakeng-eta iriꞌ nariꞌ nkaveriiꞌnaang. 18 Diiꞌke tee iruaꞌ koiꞌkoong keenavaang-koong nkaverima daangantariaukaꞌ teing kenteꞌniiꞌnanka-ankoi. Daangantarima deekoꞌ noruꞌeriaing keenavaang-koonge kaakenge diiꞌ pinkaꞌduri otong. Diiꞌke kaakeng pinkaꞌeriaꞌ. 19 Diiꞌke pa eeꞌ minkuerimang: Eeꞌ, bakei kenteꞌaring kaumpeꞌ niiꞌ enang teꞌ beꞌnuꞌmariiꞌnaang. 20 Eeꞌ, masikaꞌ. Teinooꞌ tee kenteꞌariring teinge masikaꞌantavaavarura. Teka diiꞌ ivekaꞌdariri beꞌnuꞌdariri otong masikaꞌanta narung ninka. Teeꞌkoo baruꞌ daangantariaukaꞌ teka tarerariri otoriai. 21 Teka Kumponinge kaumpeꞌ keenavaang-koong papiꞌoaꞌ kenteꞌuuꞌnung deekoꞌ diiꞌ napoꞌ teeꞌ papiꞌoaꞌ tootoꞌduriaing. 22 Ooveriaing Kumponing tee bakei aaꞌnaꞌ piaa-poꞌnung eeꞌnoko napoꞌ aaꞌnaꞌ kiimata-poꞌnunge. Kiimata teing-koo nantoong duaꞌarimaing-koo eeꞌnoko piaa diiꞌkoo bakaang piaa masikaꞌantaveri otorining-koo otong. Nka masikaꞌantaveriaruko deekoꞌ tee diiꞌ napuꞌduripeuꞌ. 23 Niiꞌnooꞌkoo tee teing Isireeli-nupoong kenteꞌuruꞌning napoꞌ bereꞌarira Karistooꞌ masikaꞌantavaako deekoꞌ Kumponinge tee napoꞌ beꞌnuꞌuripeuꞌ teꞌ napoꞌ kenteꞌariruꞌnooꞌ. Kumponing tee purintoꞌ otoꞌevung teing napoꞌ beꞌnuꞌanta-koo teꞌ unapoꞌ. 24 Diiꞌ kaumpeꞌnanka poraꞌkoong koiꞌketa tootoꞌdurima otoaꞌnaꞌ keenavaang-koo beꞌnuꞌduruꞌ, eeꞌnoko teeꞌkoo bakei teing kaumpeꞌ keenavaang-kooning kenteꞌuuꞌning napoꞌ beꞌnuꞌkoo biikanave-koo makosi.

Kumponing Bakaang Miruꞌ Domang-anta-koo Ookara Nantoong Amutemuriiꞌ

25 Mmaikoriꞌ ee, kapooꞌ tero makensiꞌnung naurampiai diiꞌka daangantariaukaꞌnaꞌ. Aiꞌ teing Isireeli-nupoong teing iveꞌivekaꞌporoi otong eeꞌnoko teeꞌ nariꞌ otoromaatoaing bera tee-koo batei-koo Isireeli-nupoong deeaing-kooning ookara miruꞌniiꞌnanka tumpariainooꞌke basi. 26 Tenang tumpariko ookara Isireeli-nupoong mooꞌariainge, Daari Meekunge eeꞌ naumuruꞌnaꞌ,

“Saioni-namono-ita tee Domang-anta tavoꞌaravaing eeꞌnoko teie toro-antavuriaing Jeekopiꞌdaang biikaang orakaꞌ nko-ita.
27 Tenang eeꞌnang ninge tontaꞌevorompaing biikaang orakaꞌ nkonanka, siompansi tee kara naroompevorontuꞌnung.”
(Aisaiaꞌ 59:20,21; 27:9)

28 Teing Isireeli-nupoonge tampara doorenang dimpaꞌaama Kumponing-koo tooꞌde-nupoong-pinaꞌ deempariko tee doorenang pariꞌantanaꞌ diiꞌke tampaꞌ nkaveruꞌ. Nka teroita miruꞌuruꞌnooꞌkoo Kumponinge eeꞌnariong bakei aaꞌnaꞌ piaavuri otong biikakatauro piaavurikoꞌnung-koo. 29 Teing kapooꞌnanka Kumponinge avurimaing eeꞌnoko teing nantoong avuꞌkoo barevurimaing tontaꞌkoo makosi deeaꞌ. 30 Diiꞌ niiꞌnaꞌmung Kumponing meumperiarukoꞌning enang nkavering bakaang piaa Isireeli-nupoonge tee meumpaavaruioꞌ. 31 Eeꞌnoko tee teeꞌ nariꞌ meuntepaꞌariruꞌnung tasiꞌpaama teinge napoꞌ tee piaa nkavaavaꞌnaang diiꞌke nkaveruꞌnung ooaara. 32 Kumponinge tee nantoong ookara meumpaavaꞌnameng-koo otoroko siraꞌpuing bakaang piaa narunge ookara nariꞌ domampuriiꞌnaang.

Kumponing Daanganaꞌ

33 Kumponing bakei bakaang noruꞌ eeꞌnoko matau aaꞌnaꞌ masikaꞌ eeꞌdoonko isikung otong. Naninge bane keperuuꞌke bakaang onou tasiꞌpuarupeuꞌ eeꞌnoko bakaang aarumo tasiꞌpaaꞌke. 34 Teeꞌ Daari Meekunge aaꞌpumanaꞌ,

“Baie Kumponing bakaang onou tasiꞌpui otong? Baie Kumponing koong-antaevung?”
(Aisaiaꞌ 40:13; Jeremaia 23:18)

35 Eeꞌnoko

“Baa ninka Kumponing komaaru~ otong?”
(Jop 41:11)

36 Otoaꞌ. Tee ootukunung kapooꞌnanka nkonung, tarenara eeꞌnoko miruꞌanta. Bakaang meenasi teeꞌ nariꞌ otomatoaing. Eeꞌ, eeꞌnaꞌ.

Copyright information for `NAS