Romans 14

Niiꞌka Simpesimpeꞌmeeriaꞌ Otoaing

Tee naning bakaang masikaꞌanta-koo aruaruꞌ diiꞌanko poko onkeonkeꞌeriai, nka tee ninka tataꞌdeeriaꞌ. Teie naninge masikaꞌanta purintoꞌpoꞌnunge tee kapooꞌ naroꞌketa naivumaung eeꞌnoko teie naninge masikaꞌanta-koo baruꞌ purimparavaunge tee taamang bireꞌniiꞌning naivumaung. Teie naninge naroꞌketa naivumaunge tee kerempumaung orara tampuaukaꞌnung. Eeꞌnoko teie kerempumaunge tee naroꞌketa naivumaung orara tampuaukaꞌ. Aming-koo, nnaꞌ ookaanka Kumponinge onkeonkeꞌuresi otoreng bakanaanka botovotonaaꞌka deemparesi otoreeꞌnaang. Baie daꞌ simpeꞌnko~ tantuuꞌnunge bautaranuka niiꞌnung bakaning? Tee bakaang Ovoringe deekoꞌ simpeꞌ nko-koo makosi arera tampara eeꞌnoko arera orara. Eeꞌnoko tampara tampura tee Ovoringe makosi donkong-antavuaing. Naning narunge niiꞌning doong meekeng tampurimaung eeꞌnoko niiꞌning meekeng deeaꞌ. Teka niiꞌnunge ookara doong nariꞌ oroꞌnanka tampurimaung. Makosi, ookara nantoong tee narunaꞌ narunaꞌ biiꞌka noruꞌariri otoromanaꞌ dateꞌpariri otoroaing biikaang onou-koo. Baie naninge niiꞌnaꞌmung doong tare-koo piavora tee tarevuaing teꞌmung eeꞌnaꞌmung Ovoring pankaing-antavui. Eeꞌnoko tee naning naroꞌketa naikumaung tee Ovoring daangampuma teeꞌ naroꞌketa naikung Kumponing-koo tampaꞌ tampuma. Kerempumaunge teeꞌ, Ovoring daangampuma kerempumaunge, eeꞌnoko Kumponing-koo tampaꞌ tampuma. Niiꞌkoo naning baka otomaung otoaꞌ, niiꞌ Kumponing bakaning naing, domamariri oꞌnori deekoꞌ eeꞌnoko moompima deekoꞌ. Niiꞌ domamariri otoko tee Ovoringe kuung deemuri otong eeꞌnoko moompiko napoꞌ teie, Ovoringe kuung deemuri otong. Arekeeꞌ, domamariritaaꞌ deekoꞌ aiꞌ moompima deekoꞌ niiꞌ teing Ovoring bakaning. Karistooꞌ booꞌparuꞌ eeꞌnoko napoꞌ domamparuꞌ tee ookara-koo nariꞌ Ovoring otooꞌnaang booꞌnuka-koo eeꞌnoko domantooꞌnuka-koo.

10 Arekeeꞌkoo dake daꞌmaikoꞌ orara tampemang? Napoꞌ arekeeꞌkoo daꞌmaikoꞌ oovemaang? Niiꞌ teing ookara donkonampiaining teke Kumponinge simpeꞌmuriainooꞌke. 11 Teeꞌ Daari Meekung-koo daariari otoinaꞌ,

“Kumponinge aaꞌpumaang: Masikaꞌketa masikaꞌ, ookara nantoong ning-koo kinkinaavaining eeꞌnoko ookara menenge ning Kumponing daangamaavaining.”
(Aisaiaꞌ 49:18; 45:23)

12 Teeꞌkoo noruꞌampiri otong niiꞌka niikaang nko-nkonanka ninka basimariaing Kumponing-anko teie nari-koo.

Niiꞌka Orara Aarumo-koo Duaꞌantameeriaꞌ Otoaing

13 Teeꞌkoo niiꞌka simpesimpeꞌmeeriaꞌ otoaing. Teka eeꞌ noruꞌerimatoai: Kapooꞌ naning niiꞌmaikoꞌ tupamparara duaꞌarapeuꞌnung-pinaꞌ oroꞌ nkoampiaukaꞌ. 14 Nkaang otootoꞌ Karistooꞌ ninka nariꞌ oꞌnoresi ninge tasiꞌpansing kapooꞌ baka tanuaang kuꞌmiꞌanta otoaꞌ. Teka naninge masikaꞌantavui kuꞌmiꞌanta tampuko dei, kuꞌmiꞌanta deemparapeuꞌ tee-koo. 15 Nka kapooꞌ niiꞌnunge kuꞌmiꞌanta tampui otoing dake naiera tee daꞌmaikoꞌ domang orari-antavepeuꞌ, eeꞌnoko domang orari-antaveraiꞌnange eeꞌ noruꞌdarapeuꞌ: Ninge enang piaanavung siompamparuing. Aiꞌ tee Karistooꞌ tee daꞌmaikoꞌ mooꞌuuꞌnaang booꞌparuꞌ, teeꞌkoo dake napoꞌ orari-antaveaukaꞌnung naroꞌketa kapooꞌ naiema. 16 Tareraravai tee-koo kapooꞌkoo dake tampara tampei nkovemaung-koo niiꞌninge orakaꞌ minkuminku-aaꞌneeng. 17 Kumponing bakaang tare taamang-aape deeaꞌ tuaang tovang, teka koontoꞌnung aarumo-aape, mooa-aape eeꞌnoko doturotu Tanuaang Meekung-etaing-aape. 18 Naning tee teꞌaapei Karistooꞌkoo daiꞌari mintoompevumaung Kumponing dotu-antavukooꞌ eeꞌnoko nantoonge tampara tampaakooꞌ. 19 Teeꞌkoo toꞌbii-antamariri oꞌnoriaing mooa-aape eeꞌnoko pakupaku-aape nariꞌ. 20 Taamang narung noruꞌeri Kumponing bakaang nko-nko orari-antaveriaukaꞌ. Ookara tee bakei kiiroraaꞌnanka masikung, teka masikaꞌparapeuꞌ orakaꞌ niiꞌning duaꞌanta-koo tamung naroꞌketa naiampiko. 21 Tampaꞌnaꞌ eeꞌ: Kerempeaing tee bioꞌ maaꞌkoo, purintoꞌnaruꞌ nai-koo eeꞌnoko niiꞌning kapooꞌ tee daꞌmaikoꞌ orari-anta-koo makosining. 22 Tee masikaꞌanta temuriiꞌ daꞌ otoꞌderuing tareveai, daꞌ Kumponing ninka nariꞌ kontui otoaing. Biraankenung tee naning tampara aarumo masikaꞌantavumanaꞌ nariꞌ nkoarama tuutunang~ baariꞌumaung. 23 Nka naning tee tamung naroꞌketa naivumaung pankaruntoonge noruꞌ keekooꞌarama, tee tuutunang-poꞌnung. Aming-koo? Tee aaꞌ tee masikaꞌanta-ita nkovuaruing. Aiꞌ ookara kapooꞌ teeꞌke, masikaꞌantavuaꞌ nkovuma teeꞌ orakaꞌke.

Copyright information for `NAS