Romans 4

Kumponinge Eebaraamiꞌ Naning Koontoꞌ Tampuuꞌnaꞌ Masikaꞌantavuko

Ioꞌ Kumponinge Eebaraamiꞌ bireꞌuuꞌnaꞌ noruꞌeriaing, aiꞌ tee mono-nameng-koo tutuntomaa niiꞌ Juꞌnupoong niuma. Arekeeꞌ, bakaang nko-nko tampara-koo Kumponinge naning koontoꞌ tampuuꞌnunge? Teeꞌkoo deekoꞌ tee daangamparapeuꞌnung. Nka teeꞌ deeaꞌ. Kumponing-koo uroꞌkanooꞌke daangamparavarupeuꞌ. Aiꞌ Daari Meekunge tee eeꞌ minkuvui otong,

“Eebaraamiꞌke Kumponing masikaꞌantavuko Kumponinge tamung naning koontoꞌ tampuuꞌ.”
(Pupuꞌ 15:6)

Naning tee nko-nkoarakotaaꞌ bakaang mooꞌ nkavuaing. Tamung bautaꞌpinaꞌ tang-koo makosi deeaꞌ, tee bakaang nko-nkoi mooꞌ. Nka naning tee Eebaraamiꞌpinaꞌ bakaang nko-nko tamung doonko noruꞌui Kumponing bakaang piaa masikaꞌantavupeuꞌnung aaꞌpuma: Teie oreng koontoꞌnuka deeng-antavurimaung bakaang duta-koo, Kumponinge tee eeꞌnara naning koontoꞌ tampuaing bakaang masikaꞌanta-koo. Tee-pinaꞌ napoꞌ Deevitaꞌke minkuvuuꞌnaꞌpinaꞌ naning bakaang doturoto-koo Kumponinge koontoꞌ tampuainung boto sionaꞌ otoko. Aaꞌpuuꞌ,

“Biraankeariaining teing biikaang boto-totoꞌ tontaꞌevuriaining eeꞌnoko teing biikaang orakaꞌnko tamung doonko dakaꞌpevuriaining.
“Biraankearavaing tee naning bakaang orara nko-nko-koo Kumponinge tampuaukaꞌnung.”
(Kena 32:1-2)

Tee baa Deevitaꞌke biraankenung tampuuꞌ? Aiꞌ niiꞌ Juꞌnupoong dopaꞌ totoꞌmarimaing teeꞌ minkumuruꞌnunge, teing Juꞌdeeaing ee naroꞌka deeaꞌ? Otoaꞌ, ookara naroꞌka. Tero naurampiruꞌ Eebaraamiꞌkoo Kumponinge koontoꞌ tampuuꞌnung bampuuꞌnaꞌ masikaꞌantavuko. 10 Arenang koontoꞌ tampuuꞌ, aiꞌ dopaꞌ totoꞌparioꞌ aiꞌ mmeꞌ totoꞌparavaruko? Dopaꞌ totoꞌparioꞌ deeaꞌ. Mmeꞌ totoꞌparavaruko Kumponinge koontoꞌ tampuuꞌnung. 11 Eeꞌnoko tee damaꞌke Kumponinge nauvuioꞌ dopaꞌ totoꞌparuꞌ taaꞌniꞌanta-koo. Teie taaꞌniꞌantai aaꞌpumaung: Aung naning Kumponinge koontoꞌ tampuuꞌnung teie masikaꞌantavuko totoꞌparavaunge. Tee tee, Eebaraamiꞌ nantoonge biuma deemparuꞌnung dopaꞌ totoꞌpariainge masikaꞌantavaako Kumponinge koontoꞌnuka tampurimainge. 12 Eeꞌnoko napoꞌ teeꞌ nariꞌ biuma teinge nantoong dopaꞌ totoꞌparirininge. Nka tamung boturopa totoꞌparirining deeaꞌ, nka teing naing Kumponinge koontoꞌnuka tampuruꞌning Eebaraamiꞌpinaꞌ Kumponinge bampuruꞌnaꞌ masikaꞌantavaako, tero dopaꞌ totoꞌ nkavuaꞌ masikaꞌantavukoꞌnaꞌ.

Baata Teing Baito-nupoong Teing Kumponing-nung Maraka-anta Okovurimaing

13 Kumponinge barevuruꞌ Eebaraamiꞌ bakanavitu ninka depeto ookara kansiꞌ okovorooꞌnaang. Kumponinge barevuaꞌ Eebaraamiꞌ botonang siompuuꞌnung-koo, teka Kumponing masikaꞌantavuko naning koontoꞌ tampura barevuuꞌ. 14 Niiꞌke eeꞌ minkuampiri dei: Moosesi bakaang boto siompaamaing naing oko-antavuriaing tee barenku daamaripeuꞌ. Teeꞌ eeꞌ minkuniiꞌ: Masikaꞌantai tee kapooꞌ basi-antavuarupeuꞌ eeꞌnoko Kumponinge bakaang maraka-anta tee daang-koong. 15 Teka teing boto-koo noruꞌ sipaamaing teing tevung boto sionavung kaariꞌaama Kumponing bakaang iira narung ooaavaing, aiꞌ naning otoaꞌ tee boto keperuuꞌui tampaꞌ tarevupeuꞌnung.

16 Kumponinge tee, tee biraanke niiꞌketa paaꞌaravarooꞌnaang piavora tee biraanke bautaꞌ deeng-antavuuꞌ niiꞌke nka-koo masikaꞌantavampima. Teeꞌkoo Eebaraamiꞌ bakanarempoꞌkai ookenge kompaavaing tee barenku, teing tee boto siompaamaing naing deeaꞌ, nka teing niiꞌning napoꞌ barenku masikaꞌantavaamaing ninka nariꞌ Eebaraamiꞌpinaꞌ, tee niiꞌ ookara niuma. 17 Kumponinge Eebaraamiꞌ nauvuuꞌnaꞌ, Daari Meekung-koo eeꞌ daariari otong,

“Daꞌ tee ninge enang amutemuuꞌ muuꞌke biuma deeng-antaransing.”
(Pupuꞌ 17:5)

Aung kara koontoꞌ Kumponing-koo uroꞌkanooꞌka taaravuuꞌ, bakaang-koo Ovoring-koo masikaꞌantavukoꞌnung-koo tee booꞌnuka domang-anta eeꞌnoko kapooꞌnanka otoroaing karai tavoꞌanta.
18 Kumponinge nauvuuꞌ Eebaraamiꞌ, teie narung bauring donkaani avuuꞌnaang tampuuꞌ baꞌdompenku mmauꞌ deeng-antavuriaing eeꞌnoko pankavitu deempariaing. Eeꞌnoko Eebaraamiꞌke masikaꞌantavuuꞌ Kumponing, bane tee aung kara makotuaung-pinaꞌ oroꞌ nauvuko. 19 Barenku masikaꞌantavui kara duaꞌuaꞌ, bane mono pankara noruꞌarama booꞌkoo makosi, bane tee bakaning mareꞌ daakuꞌkoo dueꞌari otoing eeꞌnoko bane baꞌaang Seeraꞌ bisiirai. 20 Niiꞌnung noruꞌ konte-pinaꞌ oroꞌ tavoꞌaravaꞌ Kumponing-nung barevare-koo, teka aaꞌnaꞌ purimpari masikaꞌantavukoꞌ Kumponing daangampuma. 21 Koontoꞌ tasiꞌpari noruꞌukoꞌ kapooꞌ Kumponinge barevumaung tee makosi nkovuaing. 22 Teeꞌkoo eeꞌnaꞌkoo Kumponinge koontoꞌ tampuuꞌ. 23 Teka tee kara Kumponinge koontoꞌ tampuuꞌnung Eebaraamiꞌ baka nau-anta-koo daariaravaꞌ, teka niiꞌkoo napoꞌ. 24 Kumponinge napoꞌ niiꞌ koontoꞌnuka tammuriainge masikaꞌantavampiko tee napoꞌ domang-antavuuꞌnung booꞌketa Jiisuuꞌ Karistooꞌ, niikaang Ovoring. 25 Tee eeꞌnara Kumponinge tauraꞌpuioꞌ booꞌparuꞌ niikaang boto-totoꞌkoong kiimata nka-koo, eeꞌnoko Kumponinge napoꞌ daaꞌuuꞌ, teeꞌ masikaꞌantavampiko Kumponinge niiꞌ kontoꞌnuka deeng-antamuriiꞌnaang.

Copyright information for `NAS