Romans 5

Niiꞌ Teing Karistooꞌ Ninka Nariꞌ Moompira Domamariri Oꞌnorimaing

(5:1–8:39)

Jiisuuꞌke Niiꞌ Kumponing Ninka Navu-antamurimanaꞌ

Tee barenku masikaꞌantavampirioꞌ Kumponinge koontoꞌnuka tammurimaung. Teeꞌkoo Jiisuuꞌ Karistooꞌke pakumurioꞌ enang mooa-koo oꞌnoring Kumponing ninka. Jiisuuꞌke tee Kumponinge tampaꞌ oomurimanooꞌ basi-antamuruꞌ eeꞌnoko dotumarimaung nempampiritaaꞌ Kumponing-nung meenasi kong-koo. Baruꞌnooꞌ tee dotumarimaung sisikeeramorima eeꞌ noruꞌampima: Sisikeerai tee ivekaꞌantamurimaung orara puruꞌkoo. Eeꞌnoko ivekaꞌmariko makosi-antamurimaung. Makosi-antamuriko masikaꞌantavampimaung kapooꞌ tampuuꞌnaꞌ nkoaravaing. Eeꞌnoko masikaꞌantavampima munteꞌmoriarupeuꞌ nempampima, aiꞌ teie Tanuaang Meekunge, Kumponinge amuruꞌnunge Kumponing-nung piaa niiꞌkoo kooꞌuuꞌ niikaang domang-koo.

Tenang niiꞌ aruaruꞌmori oꞌnoriko, Karistooꞌ batei baumai miruꞌuuꞌnung-koo booꞌparuꞌ Kumponing noruꞌaavaing-koo. Nantoong baruꞌ booroaung niiꞌning pariꞌanta-koo, bane tampeng-koo. Aꞌnooꞌ naninge deeꞌma arooꞌupeuꞌ naning tampara-koo booꞌkoo aaꞌnaꞌ piaavoma deekoꞌ. Nka Karistooꞌ bakei niiꞌ nantoong oreng oꞌnoriko booꞌparuꞌnung-koo Kumponinge bakaang piaa aaꞌnaꞌ deto basi naumurimaung. Enang aaꞌ tee niiꞌ bakaang erenge naroong-antamurining deemariko enang makosi mooꞌmuriaing koontoꞌ kiimata-ita. 10 Tenang napoꞌ niiꞌ kare-nupoong oꞌnoriko napoꞌ bauring boora navu-antamuruꞌ Kumponing ninka. Enang tee niiꞌ navunavuroꞌnuka deemariko makosi niiꞌ koontoꞌ domamuriaining bakaang domaange. 11 Eeꞌnoko tee narung deeaꞌ. Napoꞌ niiꞌ dotumarimaung Kumponing-koo niikaang Ovoring Jiisuuꞌ Karistooꞌke pakumurioꞌ, teie eeꞌnarai osikoimuruꞌnunge.

Jiisuuꞌke Niiꞌ Domang-antamuruꞌnaꞌ Aadama-koong Barakosiꞌ Puruꞌui

12 Enang noruꞌeriaing tee aung taaꞌniꞌanta. Narung naning orakaꞌ nkoarioꞌ bakaang orakaꞌnkoi nantoong karikaꞌ orari-antavuruꞌ eeꞌnoko teie orari-antai tee booꞌ basi-antavuuꞌ nantoong kansiꞌkoo-nupoong-koo. Eeꞌnoko tee teie booꞌke ootukunung kuung deempuruꞌ ookara orakaꞌ nkoaririoꞌ. 13 Niiꞌke noruꞌampiri otong Aadama bakaang orakaꞌnkoi tavoꞌantavuuꞌ tee. Teka teeꞌkoo nantoong oraruꞌkiaakoꞌ Aadama bakaang batei-eta bera Moosesi bakaang batei-koo basi. Kumponinge tee booꞌkoo tampuriarukoꞌ boto totoꞌpaako, aiꞌ bakaang boto mmeꞌ avuriaꞌ teing. 14 Tenang biikaang mono booroma biikaang orakaꞌ nko-koo booroarukoꞌ, teeo Aadama bakaang-koo boorokoꞌ. Teinge totoꞌpaavaꞌ tee boto Kumponinge Aadama avuuꞌnung tee sinang orokoniiꞌ maaꞌkoong. Aadama tee uuꞌaaꞌpinaꞌ tee Domang-anta Tavoꞌaravaing-koong.

15 Nka tee, nariꞌ oroꞌka deeaꞌ Aadama bakaang orakaꞌnko eeꞌnoko Kumponing bakaang piaae nantoong tampaꞌnko. Narung bakaang orakaꞌnkoi booꞌ tavoꞌantavuuꞌ nantoong mmauꞌkoo, nka aunge narunge Jiisuuꞌ Karistooꞌke baruꞌ puruꞌuitaaꞌ tontaꞌanta bautaꞌpinaꞌ deto basi tavoꞌantavuuꞌ mmauꞌ nantoong-koo teie Kumponing bakaang piaae. 16 Kumponing bakaang bautaꞌ tee, narung bakaang orakaꞌ nko-nko-koong sinang-pinaꞌ deeaꞌ. Namuꞌke boto totoꞌpui Aadamai booꞌkoong kiimata pareꞌuuꞌ niiꞌkoo ookara-koo. Teka Kumponing bakaang bautaꞌ tee, niikaning orakaꞌ nkonanka mmauꞌ pauꞌariko amuruꞌnung, makosi-antamurima niiꞌ Kumponing ninka nariꞌ naroomariri oꞌnoriiiꞌnaang domamariritaaꞌ. 17 Narung naning orakaꞌ nkoarara ookara nantoong booꞌparimaung. Teka enang napoꞌ niiꞌnung narung-koo tee-koo Jiisuuꞌ Karistooꞌkoo Kumponinge deto basinooꞌ tampaꞌ nkomurimaung niikaang orakaꞌ nkonanka tamung tontaꞌmemurima. Eeꞌnoko teeꞌkoo niiꞌ koontoꞌnuka tammurimaung. Eeꞌnoko teing tee bautaꞌ nkavaavaining Kumponing-nung teing eeꞌning ovontumpariri otoroaing eeꞌnara ninka narung ninka Jiisuuꞌ Karistooꞌ ninka.

18 Tee tee eeꞌ otong: Ookara nantoong kiimatavariaing orakaꞌnko nkovuuꞌnung-koo, napoꞌ teeꞌ nariꞌ Kumponinge nantoong koontoꞌnuka tampuriaing eeꞌnoko domampariai niiꞌnung narunge tampara aarumo nkovuuꞌnung-koo. 19 Eeꞌnoko teeꞌkoo napoꞌ nantoong karikaꞌ orara aarumo nkonuka deempariruꞌ teie naninge Kumponing siompuarura, eeꞌnoko napoꞌ teeꞌ nariꞌ nantoong karikaꞌ tampara aarumo nkonuka deempariaing Jiisuuꞌ Karistooꞌke Kumponing tampaꞌ siompuuꞌnung-koo. 20 Kumponinge boto avuruꞌ biikaang orara aarumo pankaing tasiꞌpaavaꞌnaang. Eeꞌnoko orara aarumo aaꞌnaꞌ siraꞌparioꞌ ooampima teeꞌ nariꞌ Kumponing bakaang piaa deto basi napoꞌ siraꞌparioꞌ ooampipeuꞌ. Ookara orakaꞌnko tontaꞌmemurimaung teie. 21 Tutung tee orakaꞌnkoi kuung deempuri otokoꞌ ookara nantoong, eeꞌnoko booꞌnameng-aape sipuruꞌnung, teka enang Kumponing bakaang piaae taremurimang aarumo koontoꞌkoo kuung deemuri, bera domaang oparavaung-koo tavoꞌmuriaing tee-koo Jiisuuꞌ Karistooꞌ niikaang Ovoring-koo kuunge.

Copyright information for `NAS