Romans 6

Niiꞌ Karistooꞌ Ninka Moompiruꞌnaꞌ

Nka eeꞌ noruꞌampiaukaꞌ, “Orara nkoampimatoaing Kumponing bakaang piaa pankainge piaamuriainaꞌ.” Bakei makosi deeaꞌ! Aiꞌ niiꞌ teing Jiisuuꞌkoo kuunge moompirining deemariritaaꞌ orara nko-koo piamoriaꞌ, aiꞌ arekeeꞌ napoꞌ toromariiꞌnaang? Eeꞌ noruꞌeriaing: Niiꞌ teing Jiisuuꞌ Karistooꞌkoo oꞌnori ntong-koo minkie meekaꞌantamariruꞌ ning bakaang booꞌkoo kuung minkinisinuka. Tenang ntong-koo minkimarira meekaꞌantamariruꞌ tee miruꞌnooꞌ tee-pinaꞌ niiꞌ nariꞌ moompiruꞌ eeꞌnoko napoꞌ nariꞌ dakoꞌmaaruꞌ Karistooꞌ ninka. Tee teeꞌ nkoaruꞌ tee, Niumai domang-antavuuꞌ bakaang iirakutai. Niiꞌ teka nariꞌ domamuruꞌ nantoong nerakupoong oꞌnoriiꞌnaang aampariꞌmarira niikaang aarumo-koo.

Niiꞌ Karistooꞌ Ninka Napoꞌ Domamariri Tampaꞌ Oꞌnorimanaꞌ

Teka niiꞌ Karistooꞌ ninka narung deeng-antamarima nariꞌ moompiruꞌning deemariritaaꞌ teeꞌ nariꞌ Karistooꞌ ninka booꞌketa nerakung otootoꞌkoo oꞌnoriaing. Niiꞌke noruꞌampiri otong niikaang urikung aarumo tee ninka nariꞌ dupisiꞌauꞌ aaꞌbarataꞌkoo~ tee niikaang orara aarumonanka teke bakearaaꞌnaang eeꞌnoko enang tee orara aarumo-koo biꞌmariri oꞌnoriaukaꞌnung napoꞌ. Davorue tee orara aarumo napoꞌ nkovuarupeuꞌ. Teka niiꞌ Karistooꞌ ninka nariꞌ moompiruꞌning deekoꞌ niiꞌke masikaꞌantavampiri otong niiꞌ teing tee ninka nariꞌ domamariaining. Niiꞌke tee noruꞌampiri otong Karistooꞌ tee domamparuꞌnung booꞌnooꞌketa eeꞌnoko napoꞌ booaukaꞌnunge; enang tee booꞌke kuung deempuaꞌ. 10 Tee booꞌ tee booꞌparuꞌnung tee niikaang orakaꞌ nko-koong iriꞌ bake-anta-koo, booꞌparuꞌ totoraꞌpui. Teka tee enanung otootoꞌ tee Kumponing-koo domampari otong. 11 Diiꞌ teeꞌ nariꞌ noruꞌdariainge: Orakaꞌ nko-koo dooruꞌning eeꞌnoko napoꞌ domantaririning Kumponing-koo Jiisuuꞌ Karistooꞌ ninka.

12 Teeꞌkoo tauraꞌdariaukaꞌ orara aarumoi kuung deeng-anta-koo diikaang mono. Teie orara aarumoi baranturiꞌneenga mono bakaang karakaraaꞌke. 13 Diikaang mono-koo niiꞌnairu tauraꞌperiaukaꞌ orara aarumo bakaang pia-siong deemparama orara nko-koo, teka diiꞌka arariaing Kumponing-koo teing-pinaꞌ nantoong booꞌketa domang-antaniiꞌnuka-pinaꞌ, eeꞌnoko diiꞌkoo ookanairu Kumponing bakanairu deeng-antaveri otoriai aarumo koontoꞌ siong-koo. 14 Orakaꞌnkoi kuung deenturiaukaꞌ diiꞌ boto-koo kuung otoriaung-koo Kumponinge piaa-koo kuung otoriko.

Niiꞌ Tampara Aarumoi Daiꞌnisinuka Oꞌnorimanaꞌ

15 Nka tee boto-koo kuung oꞌnoriaꞌ orakaꞌnko nkoampiaukaꞌ aaꞌpampima, “Niiꞌ aaꞌ boto-koo kuung oꞌnoriaꞌ, niiꞌ Kumponing bakaang piaa-koo kuung oꞌnori orakaꞌ nariꞌ nkoampiaing.” Teeꞌ minku-koo bakei makosi deeaꞌ. 16 Diiꞌke ee noruꞌeriaꞌ baa diiꞌke meumperimaung tee diikaang ovoring, eeꞌnoko diiꞌ teing bakaning botovotonaaꞌnuka, aaꞌnoko orakaꞌnko meumperiaing deekoꞌ booꞌ kuneꞌeriaing, eeꞌnoko Kumponing meumperiaing deekoꞌ tampara domaang kuneꞌeriainge. 17 Tenang tutung tee daiꞌdariri otorikoꞌ orara aarumoi dateꞌdurioꞌ, teka enang tampara tampamang Kumponing-koo diiꞌke tampaꞌ meumperimaung-koo tee Ovoring bakaang kara nauraarioꞌ masikaꞌantaverimaung. 18 Teka enang Kumponinge unaa-antarurira orara aarumo ninka daiꞌdariri otorikoꞌnooꞌketa tampara aarumoi daiꞌdariri otoꞌnuka deeng-antaruring. 19 Aing aarumo kementavarioꞌ minkuansing naninka botovotonaaꞌka-pinaꞌ diiꞌkoo tampaꞌ sirakaꞌparaaꞌnaang. Nka eeꞌ minkuamaang: Teeꞌ tauraꞌdariruꞌnaꞌ aaꞌnaꞌ kuꞌmiꞌkoo eeꞌnoko orara-koo teeꞌ nariꞌ napoꞌ aaꞌnaꞌ iriꞌdori tauraꞌdariaing teꞌaape koontoꞌaape eeꞌnoko kiiroraaꞌaape.

20 Tenang diiꞌ orara aarumo-koo daiꞌdariri tee taraꞌdoriaꞌ otorikoꞌ koontoꞌnameng-koo. 21 Nka aremuriiꞌ kapooꞌ diiꞌkoo tavoꞌarakoꞌnung teieta orara aarumo-ita enang maiaꞌdorimaung-etaꞌ? Tee aaꞌ kapooꞌ booꞌ tavoꞌkumaing. 22 Nka enang tee Kumponinge unaa-antaruring orara aarumo-ita bakaning botovotonaaꞌnuka deentariiꞌnaang. Enang deto duꞌduriaining meekaꞌdariri domaang oparavaung nkaveriainaꞌ. 23 Orara aarumoi tee mooꞌ avuꞌkoong, tee booꞌ. Eeꞌnoko Kumponinge tee bautaꞌmuriaing teie domaang oparavaunge Jiisuuꞌ Karistooꞌkoo kuunge, niikaang Ovoring.

Copyright information for `NAS