Luke 1

Mande korete qu

Komo uni qambu qundo Anutuko o soso riní nore keweronanimo tunoqaró ŋuro sowo mande meté ŋu nakayáŋaŋgurí. Sowo mande ŋu uni toŋeyembo o soso ŋu qenero Anutu koro mandímboro sopo-sopo uni tunoqaŋgurí ŋu, eneŋombo mande ŋu nore soso yimiraŋgurí. Ŋunde ŋuro, uni parámine Teopilus, no ŋuya sowo mande ŋu hurí taró qu noŋgo okeyá ta nakayáŋoro rewe keno maheweya, ye iŋanowó. Ŋunde tewe, keto o soso iŋaró ŋuko hamó naŋge, ye iŋoweya.

Jon tunoqaró ŋuro piŋa mandeyó

Asa Herot,
1:5“Herotko” Juda unipare sopo yereró, quko enendoRom koro wiri yerete uni parámi kasirayemo yora. Wiri yerete uni parámi ŋundo owé parámi ka Herot inaró.
Judia mira koro wiri yerete uni ŋu, yoníqo, o qa-qa uni ka owí muko Sekaraia yora. Eneŋo o qa-qa unindoro kho winiyó
1:5“o qa-qa uni” ŋundoYa Surumímo Anutu koro kho teyaŋgurí. Ene soso rondaŋi huru-huru 24 tunoqiní huru-huru kanata kako Ya Surumí ŋuno sonda irisa quno ŋuno kho teyaŋgurí.
ŋuko Apiya koro wini ŋu. Parí muko Aron koro sowe qu,
1:5“Aron” ŋukoMoses koro payó, komo sukio qa-qa unindoro tapá uni korete qu tunoqaró.
owí muko Elisapet.
Yereka irisa ŋuko Anutu toŋímo roneneŋowí yariyó,
1:6“roneneŋowí tete” ŋuro murí muko ŋandiro: asa Anutuko uni ka, pare ka yiyoro potó moré kini tiní eneŋo unipare qu ka tunoqeteŋgo.
Uni Parámimboro mande kondé ŋuya ore mande ŋu soso okeyá ta howeyari.
Quko simóyari moré kini, dokoro Elisapet ŋu kusimi yora. Ko yereka ŋu koŋgomu tariyó.

Naru kano eneŋo o qa-qa unindoro kho winiyómboro naruye tunoqaró quno Sekaraiako Anutu toŋímo kho taró. Ŋu naruko ŋuno topé-topémbo muríye howero ene rokóŋoyi o nuŋgurí meté mu qawero quro
1:9Naru rokóŋoro “o qa-qa uni” ŋundo wondo yakutímo o nuŋgurí meté ka qaró. Qaní pukatutu Anutu samboko oro o qa-qa ŋunde qu taró.
Uni Parámimboro Ya Surumímo
1:9“Ya Surumí” ŋuko Anutu koro ya qu, ŋunoko Juda unipareto Anutu koya huruwowero quro hu-hariri teyaŋgurí.
oró.
10 O qa-qa ŋu tewero naruyómo ŋuno oníqo, unipare qambu ŋundo Ya kimbino koporo hariri teyaŋgurí.

11 Asa Uni Parámimboro sambo simó
1:11“sambo simó” ŋuko komo suki-suki Anutuko unipare kama yoriní tunoqi sambo simó yondowaró. Ko itaka eneŋo sunará teyoteŋgo.
kato Sekaraiako tunoqero o qa-qa nuŋgurímboro wondo yakutí kandí kondéwore ŋuno kaŋaró.
12 Kaŋiní qenero yukuwo sasaro parámi taró. 13 Ŋunde tiní sambo simó ŋundo ŋande miraró, “Sekaraia, ke ma sorewero, Anutuko haririke iŋote. Ko pareke Elisapet simó urumuni ka pisiyoweya. Ke owí Jon ye qembe. 14 Ke niŋgu-niŋgu teweya, ko newondeke meté horé yoweya. Ko unipare qambu qundo simó tunoqeweya ŋuro niŋgu-niŋgu tewaŋgo. 15 Dokoro ŋu simó ŋuko Anutu toŋímo owé parámi reweya. Wain koya sono kondé soso ŋu kama neweya. Nimí qahímo yoroweya quno ŋuno Yuqa Surumí
1:15“Yuqa Surumí” ŋuko Anutu koro Yuqa naŋge.
ŋundo eneno maŋgoreyoweya.
16 Ko enendo Israel unipare qambu rohoré yiriní Uni Parámi, Anutuyemo uyarewaŋgo. 17 Enendo Uni Parámi toŋímo khe howero Elaija
1:17“Elaija” ŋuko Anutu koroye-ye uni komo qu ka, komo suki kama khumoní Anutuko kina riní samboko oró (2 Wiri yerete Uni 2:11 weyo qembe).Malakai 4:5-6 ŋande yete, ko Elaija pitu ko mahero o ka roŋgaruwoníkata Anutuko unipare soso ronda yereweya.
taró ŋunde qembe Yuqa koro wimbí tero awa-awaye naŋo-simóye yoriní newonde kanata na tewaŋgo. Ko uni mande wenda-wenda teteŋgo qu roŋgaru yiriní iŋo-iŋo roneneŋowí mu tewaŋgo. Ŋunde tero unipare yoriní Uni Parámi maheweya ŋuro sopowaŋgo.”

18 Sekaraiako sambo simó ŋande miraró, “Ŋunde quko no date tero mandeke ŋu hamó, ye iŋowano? No koŋgomu tanowó, ko parene ŋuya koŋgomu taró.”

19 Ŋunde yiní mande topé ŋande yaró, “No Gebriel, no Anutu toŋímo kaŋeyoteno. Anutu eneŋombo nimironí piŋa mande meté ŋa kimirowero re umbuteno. 20 Asa qeno, ke mandene kama iŋondutuwoyote. Ŋunde ŋuro itaka ŋano yate Anutuko o ŋu rokóŋoní tunoqeweya ŋuro naruyómo ŋuno maŋgoke kusiyoní mande yewero mepémo kini teweya.”

21 Asa unipare Sekaraia soporo naru piru Ya Surumímo yoraró ŋuro iŋondata parámi taŋgurí. 22 Yate yendémo umburo mande yimirowero mepémo kama taró. Ŋunde ŋuro, enendo kapo ka Yano ŋuno qenete, yero iŋaŋgurí. Maŋgó kusiyowí qembe tero kandímbo naŋge rokó-rokó teyaró.

23 Tukú eneŋo khoyó kini tiníqo, yendéyómo toŋeró. 24 Imemoŋgo parí Elisapet ŋu qahu tero sóqeyoní kombo kandeka kini taró. Ŋunde tiní ŋande yaró, 25 “Ŋundiro naŋge Uni Parámimbo o meté te nunaró. Te nunoro neneŋo kowi piyone riní unipare toŋeyemo kini teweya.”
1:25Ŋu naruko ŋuno pare ka kusimi tero kowi piyo taró. Ŋundiro unipareto ŋande ye iŋaŋgurí, ko Anutuko pare ŋu topé piyimi inaró.


Yesu tunoqaró ŋuro piŋa mandeyó

26 Kombo saŋiyo kanata ŋunde quno Elisapet qahu teyoní Anutuko sambo simó
1:26“sambo simó” ŋuko komo suki-suki Anutuko unipare kama yoriní tunoqi sambo simó yondowaró. Ko itaka eneŋo sunará teyoteŋgo.
Gebriel ŋu asáŋoní
27 pare keta kamí moré kini qu ka Galili mirako Nasaret yendémo ŋuno uyaró. Pare keta ŋuya uni ka, owí muko Josep, ŋuya epe re-re tewari, yero piŋa ye yunaŋgurí. Josep ŋuko Dewit
1:27“Dewit” - komo suki Dewitko Israel uniparetoro wiri yerete uni taró. Anutuko Dewit kondé iŋo inaró, ko yate-yate Israel unipare ŋuyako Dewit kondé iŋo inaŋgurí.
koro sowe qu. Pare keta ŋu owí muko Maria.

28 Asa ŋuno uyaro pare ŋande miraró, “Ke pare puriŋo raró ŋu, naru meté. Uni Parámimbo keya yote.”

29 Yiníqo, iŋondata parámi tero, ŋa do karo ŋunde yete, yero iŋaró. 30 Asa sambo simómbo ŋande miraró, “Maria, ke ma sorewero. Dokoro Anutuko iŋo kunoyote. 31 Qeno, ke qahu tero simó urumuni ka pisiyoweya. Owí Yesu
1:31Owé ŋu, “Yesu”, ŋuro murí muko ŋandiro: “Uni Parámimbo rambaruru koŋgo yoreyote.”
ye qembe.
32 Enendo owé parámi reweya, kowe unipareto, Anutu Koreko Horé yote ŋuro Naŋuní, ye nekoyowaŋgo. Anutu, Uni Parámi ŋundo riní eneŋo usí Dewit koro yakutímo kunditero 33 naru suki-suki Yakop koro wini ŋu wiri yereyoweya, wiri yereweya ŋuko kama kini teweya.”

34 Ŋunde yiní Mariako ŋande oseseyaró, “Ŋu date te tunoqeweya? No uni ka kama ranowó.”

35 Yiní mande topé ŋande yaró, “Yuqa Surumí
1:35“Yuqa Surumí” ŋuko Anutu koro Yuqa naŋge.
ŋundo poka kiriní Anutu Koreko Horé yote ŋuro wimbímbo yoŋo kereweya. Ŋuroko oŋa ŋuko meté horé yoní, Anutu koro Naŋuní, ye nekowaŋgo.
36 Iŋo, nuweŋge Elisapet ŋu koŋgomu tero kusimi taró, quko itaka ka qahu tero simó urumuni ka pisiyoweya. Itaka qahu tero kombo saŋiyo kanata ŋunde kini tete. 37 Anutuko oka tewero kama rukusuwoweya!”

38 Ŋunde yiní Mariako ŋande yaró, “Qeno, no eneŋo sunará pare. Ke yete ŋundiro nono tunoqiní.” Ŋunde yiní sambo simó ŋu roto toŋeró.

Mariako Elisapet qenewero uyaró

39 Ŋu naruko ŋuno Maria otoqoro Judia koro mira purí-purímo yendé kano waka ta oró. 40 Oro enendo Sekaraiako ya ŋuro quroko oro Elisapet qenero, “Naru meté,” yaró. 41 Yiní Elisapetko mandí iŋoní simó qahímo yaró ŋu sore-sore taró. Ŋunde tiní Yuqa Surumí ŋundo Elisapet newondímo maŋgoraró.

42 Maŋgoriní ki parámi tero ŋande yaró, “Anutuko puriŋo te kunoní pare soso taka yereyote. Ŋuya Anutuko simó qahuŋgemo puriŋo te inoyote. 43 Date koro Uni Paráminemboro nimí ŋundo nono mahete? 44 Qeno, keŋo mandeke ŋu iŋoweqo, simó qahunemo ŋundo niŋgu-niŋgu tero sore-sore tete. 45 Keto ŋande iŋondutuwoyaró, do ka Anutuko no nimiraró ŋu hamó tunoqeweya. Ŋunde ŋuro ke puriŋo ka rete.”

Maria koro yambo

46 Ko Mariako ŋande yaró,

“Newondenembo Uni Parámimboro owí hokoyoteno,
47 ko yuqanembo Anutu, no Rambaruru Koŋgo Norewero Uni ŋuro niŋgu-niŋgu teyoteno,
48 dokoro, eneŋo sunará pare ŋuko owí moré kini ŋuro iŋo nunaró.
Hamó, imemoŋgo Anutuko puriŋo ka nunaró ŋuro unipare soso qene iŋowaŋgo,
49 dokoro Uni Wimbí Moré ŋundo kondé samaka nereró.
Ŋunde tero owí meté horé tete.
50 Naru suki-suki enendo unipare soso
eneŋo sasaro teteŋgo qu sikíye te yunoyote.
51 Kandeto o wimbí moré
1:51“o wimbí moré” ŋuko o enesó-enesó tunoqiní Anutu koro wimbí ŋunde tunomo yoweya.
qambu teyote.
Enendo uni kumimbo eneŋo owéye hokoyoteŋgo ŋu yoriní umbu wisikaraŋoyoteŋgo.
52 Enendo wiri yerete uni owéye riní umbuyote,
quko eneŋo owéye ri umbuyote qu ŋu owéye hokoyote.
53 Unipare o qoyemboro khumoyoteŋgo ŋu o yunoní nero qahuye tinditeyote,
quko onoŋo unipare oka kama yunoro kina yohoweyote.
54 Enendo Israel,
1:54“Israel” ŋukoAbraham koro usí, owí kako “Yakop”, Juda uniparetoro pukoye. Ŋuya “Israel” ŋuko mira karo owí ka. Ŋu mirako ŋuno Juda unipare kunditeyaŋgurí.
eneŋo sunará simó ŋu,
samaka yerero sikíye te yunoyote.
55 Dokoro naru suki-suki ŋunde enendo teyoweya ŋuro
usisambanani Abraham koya eneŋo sowe qu ŋunde yimiraró.” *
56 Ŋunde yero Mariako Elisapet koya kombo kapusa ŋuno yate rotoro yendéyómo toŋeró.

Elisapetko Jon pisiyaró

57 Asa naru kini tiníqo, Elisapet simó urumuni ka pisiyaró. 58 Pisiyoní yendé uniparetoya suwisawiyómboya Uni Parámimbo Elisapet sikí parámi te inaró ŋuro iŋoro eneya niŋgu-niŋgu taŋgurí.

59 Asa kosa naru kande saŋiyoro kapusa ŋuno simó kowí toŋowero
1:59“kowe toŋowero” murí muko ŋandiro: Juda pareto simó urumuni ka pisiyoní kosa naru kande saŋiyoro kapusa ŋunde rotoníhutuŋo mande howero kowí toŋaŋgurí. Ŋunde tero eneko Anutu koro simó rokóŋaŋgurí.
kopaŋgurí. Koporo, iwí Sekaraia koro owé qu inowato, ye iŋaŋgurí.
60 Quko nimímbo ŋande yaró, “Kini. Owí muko Jon,” yaró.

61 Yiní ŋande miraŋgurí, “Keŋo suwisawike ka, owéye ka ŋunde kini qu,” yaŋgurí.

62 Ŋunde yero kandeyembo naŋge rokó-rokó tero iwí ŋande osese taŋgurí, simó ŋu do owé ka inowato. 63 Ŋunde tiqo, kandímbo rokó-rokó tiní sokome inoyi ŋande nakayáŋaró, “Owí muko Jon.” Nakayáŋoní qenero iŋondata parámi taŋgurí.

64 Ŋu naruko naŋge Sekaraia maŋgó meté tiní mande yero Anutu owí hokaró. 65 Yendé unipare soso qenero sasaro taŋgurí. Ko o soso tunoqaró ŋuro mande piŋa Judia koro mira purí-purímo yendé soso ŋuno uró. 66 Uni soso piŋa mande iŋoro iŋondata tero ŋande osese taŋgurí, “Simó ŋuko, date uni ka tunoqeweya?” yaŋgurí. Hamó, Uni Parámimboro kandí simó ŋu saŋano yora.

Sekaraiako ye-ye mande ka yaró

67 Asa Yuqa Surumí
1:67“Yuqa Surumí” ŋuko Anutu koro Yuqa naŋge.
ŋundo iwí Sekaraiako maŋgoriní ye-ye mande ka ŋande yaró,

68 “Nore Uni Parámi, Israel koro Anutu ŋuro owí hokato.
Dokoro enendo mahero eneŋo unipareyó kimo yerero*
69 unipare rambaruru koŋgo yorewero quro
eneŋo sunará simóŋo Dewit koro sowe qu ka* riní otoqaró.
70 Komo suki Anutuko o ŋuro
eneŋo ye-ye uni meté horé* maŋgoyemo yaró.
71 Ŋande yaró, ko saŋgirínani moŋgo nore norero
uni newonde piyimi te yunoyoteŋgo qu kandeye moŋgo yoreweya.
72 Ŋunde tero usisambananimboro sikíye te yunoro
mande kondé surumí komo kusiyaró ŋu iŋoyote.
73 Mande kondé ŋunde yero
usinani Abraham ŋande miraró,
74 ko uni saŋgirí kandeye moŋgo nore noriní
khoyó meté tewero quro kama sorewero
75 naru rokóŋoro eneŋo toŋímo
otete roneneŋowí* howero meté horé tero kho ŋu tewato.
76 Naŋone, ke Anutu Koreko Horé yote ŋuro ye-ye uni ka, ye neko kerewaŋgo.
Dokoro keto koretero uyaro Uni Parámimboro kheyó roŋgaruwoweya.
77 Ŋunde tero keto eneŋo unipareyó ŋande yimitoyoweya,
ko enendo quhuríye se rotoro rambaruru koŋgo yoreweya.
78 Dokoro enendo newonde surumí tero nore sikínani te nunoyote.
Ŋu muríwore kosa areró ŋundo kore koŋgo noreno mahero
79 uni huririko yoteŋgo quya
kindo khumowero kusuŋoyómo yoteŋgo quya hiyó yunoro
khe newonde ime qu nore witú yereweya.”
80 Asa simó ŋu wotero parámi tiní yuqayó wimbí kondériní uyaro mira wimbímo
1:80“mira wimbí” ŋunde quko te moré kini, ko uni kumimbo ŋuno kama kunditeyoteŋgo.
kunditero, yate-yate Israel ŋunoko tunomo yoweya quro soparó.

Copyright information for `NCA