Romans 15

Newondeye rukisoyoyuri qembe

Nore kumimbo iŋondutu kondé qu teteto. Asa norendo iŋondutu ime qu teteŋgo ŋu yiyoro quhuríye koroworo noreŋo iŋo-iŋonani naŋge kama howewato. Nore soso toponani newonde yunoro o meté yunato kondé kaŋewaŋgo. Dokoro Kristo
15:3“Kristo” ŋuko Yesu naŋge, asa Anutuko rokóŋoní mahero wiri yerete uni parámi horé tunoqaró ŋu.
ŋuko eneŋo iŋo-iŋoyó kama howaró. Kini, sokomeko ŋuno ŋande nakayáŋaró, “Huwó mande keŋo yeteŋgo ŋuko no saŋanemo umburó.”
15:3Hariri Yambo 69:9
Mande soso sokomeko
15:4“sokome” ŋuko Anutu koro mande korete qu, asa Murí Tero yate Malakai kini tete.
nakayáŋaŋgurí ŋuko, nore ronene nerewero quro nakayáŋaŋgurí. Ŋuro tero mondó ta yotoro sokome ŋu weyatoqota newondenani rukisoyoní o meté siyowero quro sopoyoteto.

Anutuko yoriní mondó ta yuri newondeye rukisoyoní. Asa meté enendo ye samaka yiriní Kristo Yesu
15:5“Kristo Yesu” - komo sukiye-ye unindo Anutuko uni ka rokóŋoní mahero wiri yerete uni parámi horé tunoqeweya qu karo yaŋgurí. Juda unipareto uni maheweya ŋu, “Kristo,” ma, “Mesaiya,” ye nekaŋgurí. Asa Yesu mahiní eneŋo unipareyó, “Kristo Yesu,” ma, “Yesu Kristo,” naŋge ye nekaŋgurí.
howero newonde kanata na teyowaŋgo.
Ŋuro tero ye soso maŋgo kanata tero Anutu, noreŋo Uni Paráminani Yesu Kristo koro Iwímboro owí hokoyowaŋgo.

Ŋunde ŋuro Kristoko yeya topo taró ŋundiro naŋge ye soso topo ti. Asa otete ŋundoko Anutu seré te inoyote. Dokoro ŋande yimiroteno, Kristoko Anutu koro mande hamó howero uni koweye toŋaŋgurí qu
15:8“uni koweye toŋaŋgurí qu” - ŋuko Juda uni naŋge. Komo suki AnutukoAbraham, Juda unindoro pukoye ŋu, ŋande miraró, ko enendo rokó ka tero eneŋo naŋo-simó soso koweye toŋoweya. Ŋunde tero, yate-yate Juda uni soso koweye toŋaŋgurí.
samaka yerewero quro kho uniye tunoqaró. Ŋuro tero Anutuko usisambayeya mande kusiyaró ŋu kondériní,
ko uni wini meyowo
15:9“uni wini meyowo” ŋunde quko Juda unipare kini qu naŋge.
ŋundo sikíye ŋu qenero Anutu koro owí hokoyi. Hamó, sokomeko ŋuno ŋande nakayáŋaŋgurí,

“Ŋunde ŋuro nondo uni wini meyowo keweroyemo owéŋge hokowano,
ko no yambo yero seré te kunowano.” *
10 Ko sokomeko kaŋuya ŋande yete,

“Ye uni wini meyowo qu,
ye meté Anutu koro unipareyómboya niŋgu-niŋgu ti.” *
11 Ko kanoko ŋande yete,

“Ye uni wini meyowo qu, ye Anutu owí hokoyi.
Ye unipare soso, seré te inoyi.” *
12 Ko Aisaiako ŋuya ŋande yete,

“Jesi koro Sisani ŋundo otoqoro
uni wini soso sopo yereweya.
Uni wini meyowombo ene qenero
o meté siyowero quro sopowaŋgo.” *
13 Anutuko unipare yoriní o meté quro sopoyoteŋgo. Meté enendo yeŋo iŋondutuyewore niŋgu-niŋgu parámi teweya, ko newonde ime ŋuya riní yeno tunoqeweya. Ŋuro tero Yuqa Surumímboro wimbí ŋu rero o meté ŋu kondé sopowaŋgo.

Polko uni wini meyowo ŋuro kho teyara

14 Uni topone, no ŋande iŋomukoteno, asa yendo otete meté hamó mu howeyoteŋgo, ko iŋo-iŋo meté mu parámi towoyoteŋgo, ko topoyemboro kheye roŋgaruwowero quro wimbuye moré. 15 Nondo itaka mande kondé kumi newondeye okokowowero quro nakayáŋoteno. Dokoro Anutuko samaka-samaka tuwó
15:15“samaka-samaka tuwó” ŋuko Anutu eneŋombo nore samaka yereyote. Kimoyó moré kini.
nunoro
16 Kristo Yesu
15:16“Kristo Yesu” - komo sukiye-ye unindo Anutuko uni ka rokóŋoní mahero wiri yerete uni parámi horé tunoqeweya qu karo yaŋgurí. Juda unipareto uni maheweya ŋu, “Kristo,” ma, “Mesaiya,” ye nekaŋgurí. Asa Yesu mahiní eneŋo unipareyó, “Kristo Yesu,” ma, “Yesu Kristo,” naŋge ye nekaŋgurí.
koro kho uniyó tunoqanowó. Ŋunde tunoqero uni wini meyowo
15:16“uni wini meyowo” ŋunde quko Juda unipare kini qu naŋge.
keweroyemo kho tero o qa-qa uni ŋunde qembe Anutu koro miti mande yesowoyoteno. Yesowowe Yuqa Surumímbo yoriní meté horé tunoqi Anutuko ŋuro metéŋoní nondo yorero o qa-qa
15:16“o qa-qa” ŋunde qu unipareto Anutu iŋoro potoruku te inoro nú-qare kao qa-qa uni inoyi uroní khumoníwondo yakutímo ŋuno qaró.
meté horé ŋunde qembe Anutu te inoyoteno.

17 Ŋunde ŋuroko Kristo Yesu quroyómo Anutu koro kho teyoteno ŋuro niŋgu-niŋgu teyoteno. 18 Dokoro neneŋombo kho tanowó ŋuro kama yewano. Kini, ŋa naŋge yewano, Kristoko uni wini meyowo keweroyemo khonewore ko mandenewore kho tiní Anutu howeyoteŋgo. 19 Enendo kho tanowó quno ŋuno Yuqayówore o wimbí moré mu
15:19“o wimbí moré” ŋuko o enesó-enesó tunoqiní Anutu koro wimbí ŋunde tunomo yoweya.
taró. Ŋunde tiníqo, Yerusalem ŋu noŋgo yate-yate Ilirikum mira ŋuno mande yesowowe unipare soso ŋuno Kristo ŋuro miti mande
15:19“miti mande” ŋuko AnutukoKristo asáŋoní khumoro quhurínanimboro kimo tiní Anutu koya newonde kanata tewero ŋuro mande meté mu naŋge.
ŋu iŋomukaŋgurí.
20 Ŋundiro naŋge nondo ŋande ye iŋoyanowó, asa mira kumi muko unipare Kristo kama iŋo inoyoteŋgo ŋuno naŋge miti mande yesowowano. Ŋunde tero meyowomboro khoyó saŋanímo kama kaŋewano. 21 Kini, sokomeko ŋuno ŋande nakayáŋaró,

“Eneŋo sowo mande qu kama iŋaŋgurí
ŋundo qenewaŋgo,
ko piŋa mande kama iŋaŋgurí
ŋundo iŋoyi tondaŋeweya.” *

Polko Rom uni yiyowero khe qu seqaró

22 Murí ŋuro naru parámi no yeno uyarewero khe qu moré kini. 23 Quko itaka mira ketako kho ŋuno tewano qu kini. Ko kumima naru parámi yeno uyarewero kondé iŋoyano. 24 Asa ko andusina Spen mirako
15:24“Spen mira” ŋuko Mediterenian Windi kasina yora, Israel mira ŋuko kasina yora. Mirayemboro Kapo-kapo ŋu qeno.
ŋuno uyarewano quno ŋuno yiyowano. Dokoro ŋande iŋoteno, nondo yeno uyaro yiyoro naru kumi yeya yoroweqota samaka niri Spen ŋuno uyarewano.

25 Quko itaka Yerusalem unipare meté horé
15:25“unipare meté horé” ŋuko oteteye soso muko meté naŋge kini. Kini, owé ŋu “unipare meté horé” ŋuro murí muko ŋandiro, “Anutu koro unipare” naŋge.
samaka yerewero quro ŋuno uyareteno.
26 Dokoro Masedonia uniparetoya Akaia uniparetoya mande kusiyoro unipare meté horé onoŋoye moré kini qu Yerusalem yoteŋgo ŋu samaka yerewaŋgo. 27 Ŋunde tewero ŋuro metéŋoyoteŋgo. Hamó, ŋunde tero utatáyemboro topé tewaŋgo. Dokoro uni wini meyowombo Yuqawore Israel uniparetoya newonde kanata teyoteŋgo. Asa ko noko koro onoŋoyewore meté samaka yerewaŋgo. 28 Ŋunde ŋuroko nondo newonde metémboro ŋu rero yunoroqo rohoréŋoro yeno Rom ŋuno uyareyate Spen ŋuno uyarewano. 29 Ko ŋande iŋoteno, nondo Kristo koro puriŋo parámi rero yeno uyarewano.

30 Uni topo, noreŋo Uni Paráminani Yesu Kristowore
15:30“YesuKristo” - komo sukiye-ye unindo Anutuko uni ka rokóŋoní mahero wiri yerete uni parámi horé tunoqeweya qu karo yaŋgurí. Juda unipareto uni maheweya ŋu, “Kristo,” ma, “Mesaiya,” ye nekaŋgurí. Asa Yesu mahiní eneŋo unipareyó, “Kristo Yesu,” ma, “Yesu Kristo,” naŋge ye nekaŋgurí.
ko newonde meté Yuqako nore nunoyote ŋuwore kondé ŋande kira yereyoteno, meté ye noya koweyumu tero Anutusina neneŋo hariri ti qembe.
31 Ŋuro tero Anutuko uni kama iŋondutuworo Judia mirako yoteŋgo qu keweroyemo kawaware nereweya. Ko Yerusalem ŋuno unipare meté horé ŋundo neneŋo khone ŋaro metéŋowaŋgo. 32 Ŋuro tero imemoŋgo nondo niŋgu-niŋgu tero Anutu koro iŋo-iŋoyó howero yeno uyaro nore soso newondenani meté yoweya. 33 Asa meté Anutuko newonde ime nore nunoyote ŋundo yeya yoweya. Hamó.

Copyright information for `NCA