Psalms 101

Mapme’walaŋ gigitŋiŋ mede

Yahwe, du siloŋ tobogoŋ tinimilaŋ tiŋa titiŋ didimeniŋ hogok keleeŋ mede yodapmalaŋ wendok kap tobit.
101:1Siloŋ tobogoŋ eŋ titiŋ didimeniŋ u mapme’walaŋ be Bepaŋ’walaŋ u Hibulu mede gineŋ mu mintadakalehinakalak.
Tiŋa undugoŋ, Wapum, nu dutok hogok nadiŋa kap tobit.
Nu adi titiŋ didimeniŋ hogok takaliwit. Kaŋ Wapum, du deniŋ hinek buŋa nehitubu-lodawaaŋ?

Nu adi yotneneŋ titiŋ didimeniŋ hogok tiluwaat.
Nu titiŋ kadakahi be nemenemek madimadikehi adi mu yabudok nadilat. Nu adi me Bepaŋ sigilulum timiiŋ heki’walaŋ titiŋhikdok adi nadiwene tuwot moŋ hinek tilak. Nu adi adigut tuwot mu yauluwaat. Nu adi yalaŋ talik mu takaliluwaat, unduŋ tiŋa titiŋ kadakahidok adi mu nadiluwaat.

Nu adi me nediyeŋ meeniŋ nolidok kabup yeniwoliwolike tiyemilak u tubukadaka hinek tiluwaat. Unduŋ tiŋa me gifoko heki adi tuwot mu biyabene hatiyaneeŋ.

Nu adi me Bepaŋ hogok baigoŋ takaliiŋ yabukahilewene adi hogokdi nu yotneneŋ nakat hatiyaneem. Tiŋa me titiŋ didimeniŋ hogok tiiŋ heki adi hogokdi nu’walaŋ kwanai taneeŋ.

Me yalaŋ mede yoiŋ heki adi yadi nu yotne wapumneŋ uŋoŋ mu hatiyaneeŋ. Tiŋa undugoŋ, me yalaŋ talik foloŋ yokamehebi tiiŋ heki adi yadi nukut tuwot mu hatidok. Mokoŋ hinek.

Helemahelemaŋ me kadakahi indi’walaŋ kwetnineŋ iŋoŋ adi yehitubu-kadaka hogok tiluwaat. Nu adi me titiŋ kadakaniŋ tiiŋ heki u yehikelekulene adi Yahwe’walaŋ yokwetŋiŋ wapumneŋ iŋoŋ mu hatineeŋ.

Copyright information for `NOP